NKHANI YAKUPFUNZA 33
NYIMBO 130 Khalani Wakulekerera
Kodi Yahova Akufuna Kuti Gwere Limbacite Tani na Wale Omwe Acita Pikado Ikulu?
“Munthu akacita pikado, ifepano tina mthandizi.” — 1 JUWAU 2:1.
CAKULINGA CA NKHANIYI
Tin’pfunza na bzomwe bzidacitika mu gwere la ku Kolinto pomwe m’bale munango adacita pikado ikulu.
1. Kodi n’ciyani comwe Yahova akufuna kwa wanthu wentse?
POMWE Yahova adalenga wanthu, iye adawapasa ufulu bwakusankhula. Imwepo mumbaphatisa basa ufulu bwanu bwakusankhula mukambacita bzakusankhula. Cakusankhula cakufunika kwene-kwene comwe munthu angacite ni kubzipereka kuna Yahova acikhala mbali ya banja lace. Yahova akufuna kuti munthu ali-wentse acite bzimwebzi. Thangwe ranyi? Ni thangwe rakuti iye ambafuna wanthu ndipo akufuna kuti iwo akhale na moyo wabwino. Iye akufuna kuti wanthu akhale pa uxamwali bwakulimba na iye, nakuti akhale na moyo wakusaya kumala. — Deuteronomiyo 30:19, 20; Agalatiya 6:7, 8.
2. Kodi Yahova akufuna ciyani kuna anyapikado omwe akanati kukungula? (1 Juwau 2:1)
2 Tsono Yahova ambangingimiza lini munthu kuti amutumikire. Iye ambasiya kuti munthu ali-wentse asankhule yekha bzomwe akufuna kucita. Tsono tani Mkristau wakubatizidwa akasaya kubvera malamulo ya Mulungu acicita pikado ikulu? Iye akasaya kukungula, an’funika kucosedwa m’gwere. (1 Akolinto 5:13) Napo bziri tenepo, Yahova ambafunisisa kuti munthuyo adzabwerere pomwe kwa iye. Ndipopa iye adapereka cakulombolera kuti bzikhale bzakukwanisika kuti wanthu omwe acita pikado zikulu akakungula alekereredwe. (Werengani 1 Juwau 2:1.) Yahova ni Mulungu wa lufoyi omwe ambakumbira wale omwe acita pikado kuti akungule. — Zakariya 1:3; Aroma 2:4; Tiyago 4:8.
3. Kodi tin’pfunza ciyani mu nkhani ino?
3 Yahova akufuna kuti ifepano timbawone pikado ninga momwe iye ambaiwonera na kutewezerambo momwe iye ambacitira bzinthu na wanthu omwe acita pikado zikulu-zikulu. Mu nkhani ino, tin’pfunza (1) bzomwe Paulo adauza gwere la ku Kolinto kuti licite pomwe m’bale m’bodzi adacita pikado ikulu, (2) bzomwe Paulo adauza gwerero kuti licite pomwe m’baleyo adakungula ndipo (3) momwe Yahova ambabvera munthu omwe wacita pikado ikulu akakungula.
N’CIYANI COMWE GWERE LA KU KOLINTO LIDACITA POMWE M’BALE MUNANGO ADACITA PIKADO IKULU?
4. Kodi ni nkhani iponi yomwe idacitika mu gwere la ku Kolinto? (1 Akolinto 5:1, 2)
4 Werengani 1 Akolinto 5:1, 2. Pa nthawe yomwe Paulo akhacita ulendo bwace bwacitatu bwa umisiyonario, iye adabva nkhani yakuipa yomwe ikhacitika mu gwere lipsa la ku Kolinto. M’bale m’bodzi wa gwerero akhacita malume ya pa mphasa na mkazi wa pai wace. Khalidwe limweri likhali lakuipa kwene-kwene mwakuti “ne wanthu wakunja” akhalicita lini! Tsono gwerero likhandolekerera bzimwebzi ndipo likhawona kuti bzikhalibe kuphonyeka m’baleyo kupitiriza kukhala m’gweremo. Pinango winango akhakumbuka kuti bzimwebzi bzikhalatiza kuti Mulungu ngwa ntsisi kwene-kwene kwa wanthu wakuperewera nakuti ambatibvesesa. Tsono Yahova ambalekerera lini munthu kuti apitirize kucita pikado zikulu-zikulu pakati pa wanthu wace. Na tenepo, bzinthu bzakuipa bzomwe iye akhacitabzo bzikhaipisa mbiri ya gwerero. Iye angadapitiriza kukhala m’gweremo, Akristau winango angadayambambo kumutewezera. Tsono kodi Paulo adauza gwere kuti licite ciyani na munthuyo?
5. Kodi Paulo adauza gwerero kuti licite ciyani, ndipo bzimwebzo bzikhaphatanidza ciyani? (1 Akolinto 5:13) (Onani cithunzi-thunzi.)
5 Werengani 1 Akolinto 5:13. Mwakutsogoleredwa na Mulungu, Paulo adanembera tsamba gwerero ndipo adaliuza kuti licose munthu wakusaya kukungulayo m’gwere. Kodi abale wa m’gwere akhafunika kucita naye tani bzinthu munthu umweyu? Paulo adawauza kuti ‘aleke kubverana’ na munthuyo. Kodi bzimwebzi bzikhathandauza ciyani? Paulo adalewa kuti lamulo limweri likhaphatanidza kuleka “kudya naye munthu umweyo.” (1 Akolinto 5:11) Kudya pabodzi na munthu kungacitise kuti tiyambe kubverana na munthuyo. Patsogolo pace, Paulo adalewa mwakubveka bwino kuti gwere likhafunika lini kucita bzinthu na munthu umweyo. Bzimwebzi bzingadakhotcerera gwere kuti lileke kutewezerambo khalidwe lace lakuipalo. (1 Akolinto 5:5-7) Kuthumizira bzimwebzi, kutcenkha kucita bzinthu na munthuyo kungadacitisa kuti iye azindikire kuti wataika pa njira ya Yahova ndipo angadacita manyazi acifuna kukungula.
Mwakutsogoleredwa na Mulungu, Paulo adanemba tsamba lakulewa kuti munthu omwe akhadacita pikado omwe akhalibe kukungula akhafunika kucosedwa m’gwere (Onani ndime 5)
6. Kodi n’ciyani comwe gwere la ku Kolinto lidacita pomwe lidatambira tsamba la Paulo, ndipo n’ciyani comwe munthu omwe adacita pikadoyo adacita?
6 Pomwe Paulo adatumiza tsamba lace kwa abale wa ku Kolinto, iye adafuna kudziwa bzomwe abalewo adacita pomwe adatambira tsambalo. Patsogolo pace, Tito adauza Paulo nkhani yabwino. Gwerero lidabvera malango ya Paulo ndipo lidacosa munthuyo m’gwere. (2 Akolinto 7:6, 7) Kuthumizira bzimwebzi, pomwe padapita minyezi ming’ono-ng’ono kucokera pomwe Paulo adanembera tsamba gwerero, munthu omwe adacita pikadoyo adakungula pikado yaceyo. Iye adacinja makhalidwe yace ndipo adayamba kuteweza mitemo yakulungama ya Yahova. (2 Akolinto 7:8-11) Pomwe munthuyo adacinja, n’ciyani comwe Paulo adauza gwerero kuti licite?
KODI GWERE LIKHAFUNIKA KUCITA CIYANI NA MUNTHU OMWE AKHADAKUNGULAYO?
7. Kodi kucosedwa kwa munthu omwe adacita pikadoyo m’gwere kudamuthandiza tani? (2 Akolinto 2:5-8)
7 Werengani 2 Akolinto 2:5-8. Paulo adawona kuti ‘kutsimulidwa komwe adacitidwa na wanthu azinji, kukhali kwakukwanira kwa munthu umweyu.’ Bzimwebzi bzikuthandauza kuti pomwe munthuyo adacosedwa m’gwere, iye adazindikira kuti akhafunikira kukungula. Ndipo pakuti iye akhadakungula akhafunika lini pomwe kupitiriza kutsimulidwa. — Ahebereu 12:11.
8. Kodi n’ciyani comwe Paulo adauza gwere la ku Kolinto kuti licite?
8 Patsogolo pace, Paulo adauza gwerero kuti: “Mun’funika kumulekerera tsapano na mtima wentse na kumutsangalaza” ndipo “mulatize lufoyi lanu kwa iye.” Onani kuti Paulo akhafuna kuti gwere licite bzizinji sikuti kundobvuma kuti munthuyo ayambe pomwe kukhala pakati pa wanthu wa Yahova. Paulo akhafuna kuti abalewo alatize kwa munthu omwe wakungulayo na mafala pabodzi na bzicito bzawo kuti amulekerera nakuti ambamufuna. Bzimwebzi bzingadalatiza kuti iwo akumutambiradi m’baleyo mu gwere.
9. Thangwe ranyi wanthu winango pinango bzingadawanesa kulekerera nyapikado omwe akhadakungulayo?
9 Pinango-pentse abale winango alibe kukomedwa pomwe adabva kuti m’bale omwe akhadacita pikadoyo wabwezeresedwa m’gwere. Thangwe ranyi tikulewa bzimwebzi? Thangwe bzicito bza munthuyo bzidabweresa mabvuto m’gwere ndipo pinango bzidacitisa kuti wanthu winango abve manyazi. Ndipopa pinango winango akhawona kuti mpsakusaya kuthemera kuti munthuyo atambiridwe na manja mawiri thangwe pinango iwo adacita nyongo kuti apitirize kukhala wakucena. (Ndendemezerani na Luka 15:28-30.) Tsono, thangwe ranyi bzikhali bzakufunika kuti gwere lilatize lufoyi kwa m’bale wawo omwe akhadabwezeresedwayo?
10-11. Kodi n’ciyani comwe cingadacitika akulu angadalamba kulekerera munthu omwe akhadakungulayo?
10 Kumbukirani bzomwe bzingadacitika akulu angadasaya kubvuma kuti munthuyo abwerere m’gwere, ayai gwere lingadasaya kumulatiza lufoyi pomwe iye angadabwezeresedwa. Iye angadakundidwa na “msunamo ukulu kwene-kwene.” Iye angadakumbuka kuti mpsakukwanisika lini kuti atumikire pomwe Yahova. Ndipo angadasiya kucita nyongo yakuti akhale pomwe pa uxamwali bwakulimba na Mulungu.
11 Kuthumizira bzimwebzi, abale wa m’gwere angadalamba kulekerera nyakucita pikado omwe wakungulayo, uxamwali bwawo na Yahova bungadadzongeka. Thangwe ranyi? Thangwe iwo angadakhala akutewezera lini Yahova omwe ambalekerera munthu omwe wakungula, koma angadakhala akutewezera Sathani omwe ngwakuuma mtima na wakusaya ntsisi. Kulewa cadidi, iwo angadaphatisidwa basa na Sathani kuti adzonge munthuyo mwauzimu. — 2 Akolinto 2:10, 11; Aefezo 4:27.
12. Kodi gwerero lingadatewezera tani Yahova?
12 Tenepo, kodi gwere la ku Kolinto lingadatewezera tani Yahova m’mbuto mwa kutewezera Sathani? Mwakutewezera momwe Yahova ambacitira bzinthu na anyapikado omwe akungula. Onani bzomwe anembi winango wa Bibliya adalewa pakulewa bza Yahova. Davide adati: “Imwe Yahova, ndimwe wabwino ndipo ndimwe wakukonzeka kulekerera.” (Salimo 86:5) Mika adanemba kuti: “Kodi mbani Mulungu wakundendemerana na imwepo, omwe ambalekerera bzakuphonya na pikado za wanthu?” (Mika 7:18) Ndipo Zaiya adanemba kuti: “Munthu wakuipa asiye njira yace ndipo omwe ambapweteka mwanzace asiye makumbukidwe yace. Ndipo abwerere kwa Yahova, omwe an’dzamucitira ntsisi na kwa Mulungu wathu, thangwe ambalekerera na mtima wentse.” — Zaiya 55:7.
13. Thangwe ranyi bzikhali bzakufunika kuti munthu omwe akhadakungulayo abwezeresedwe m’gwere? (Onani kwadru yakuti “Nthawe Yomwe Munthu wa ku Kolinto Adamala ali Kunja kwa Gwere.”)
13 Kuti gwere la ku Kolinto litewezere Yahova, iro likhafunika kutambira munthu omwe akhadakungulayo na kumulatiza lufoyi. Mwakubvera malango ya mpostolo Paulo yakutambira pomwe munthu omwe wakungulayo, gwerero lidalatiza kuti “likhabvera m’bzinthu bzentse.” (2 Akolinto 2:9) N’cadidi kuti padandopita minyezi yakucepa kucokera pomwe iye adacosedwa, tsono cirangoco cidamuthandiza kuti akungule. Ndipopa akulu akhafunika lini kucedwa kumubwezeresa m’gwere thangwe rakuti akhadacosedwa tsapanopa.
KODI TINGATEWEZERE TANI CIRUNGAMO NA NTSISI ZA YAHOVA?
14-15. Kodi tikupfunza ciyani na momwe nkhani ya munthu wa ku Kolinto idatongedwera? (2 Pedru 3:9) (Onani cithunzi-thunzi.)
14 Nkhani yomwe idacitika ku Kolintoyi idanembedwa m’Bibliya kuti ‘itipfunzise.’ (Aroma 15:4) Nkhani imweyi ikutipfunzisa kuti Yahova ambalekerera lini kuti pakati pa wanthu wace pacitike pikado zikulu-zikulu. Iye ambawona kuti anyapikado omwe alibe kukungula an’funika lini kucitiridwa “ntsisi” acipitiriza kucita bzinthu na atumiki wace wakukhulupirika. Napo kuti Yahova ngwa ntsisi, iye ambalekerera lini makhalidwe yakuipa. Mitemo yace pa nkhani ya cabwino na cakuipa imbacinja lini. (Djuda 4) Thangwe kucita bzimwebzi kungadacitisa kuti wanthu wentse wa m’gwere akhale pa ngozi. — Mimwani 13:20; 1 Akolinto 15:33.
15 Napo bziri tenepo, tikupfunza kuti Yahova akufuna lini kuti munthu ali-wentse adzapfudzidwe. Nthawe zentse cakulinga cace n’cakufuna kupulumusa wanthu. Iye ambalatiza ntsisi kwa wanthu omwe acinja nzeru zawo ndipo akufuna kubwezeresa pomwe uxamwali bwawo na iye. (Ezekiyeli 33:11; werengani 2 Pedru 3:9.) Ndipopa pomwe munthu wa ku Kolinto ule adakungula acisiya makhalidwe yace yakuipa, Yahova adaphatisa basa Paulo kuti athandize gwere la ku Kolinto kubvesesa kuti munthuyo akhafunika kulekereredwa acitambiridwa na manja mawiri.
Mwakutewezera lufoyi na ntsisi za Yahova, gwere likutambira na manja mawiri mpfumakazi yomwe yabwezeresedwa m’gwere (Onani ndime 14-15)
16. Kodi imwepo mumbabva tani mukakumbukira momwe nkhani ya munthu wa ku Kolinto idatongedwera?
16 Kuwona momwe nkhani ya munthu wa ku Kolinto idatongedwera, kwatithandiza kubvesesa kuti Yahova ni Mulungu walufoyi nakuti ambacita bzinthu mwacirungamo. (Salimo 33:5) Timbatenda Yahova thangwe ra makhalidwe yace yabwinoya. Kulewa cadidi, tentsenefe tina pikado ndipo timbafunika kulekereredwa na iye. Ali-wentse wa ifepano ana mathangwe yakutendera Yahova thangwe ra cakulombolera comwe cimbacitisa kuti iye atilekerere. Mpsakutsangalaza kwene-kwene kudziwa kuti Yahova ambafunadi wanthu wace ndipo akufuna kuti bzinthu bziwafambire bwino pa moyo wawo!
17. Kodi tin’dzacezerana ciyani mu nkhani zomwe zikubwerazi?
17 Tsono tani pakulewa bza wanthu omwe ambacita pikado ntsiku zino? Kodi akulu wa gwere angatewezere tani Yahova pakuthandiza munthu omwe wacita pikado kuti akungule? Kodi n’ciyani comwe gwere lin’funika kucita akulu akacosa ayai kubwezeresa munthu? Mibvunzo imweyi in’dzatawiridwa mu nkhani zomwe zikubwerazi.
NYIMBO 109 Lufoyi Lamphanvu Lakucokera mu Mtima