Pfunzisani Mwana Wanu Mng’ono kuti Atumikire Yahova

‘Munthu wa Mulungu wacadidi ule . . . abwere pomwe, acidzatipasa malango ya momwe tingadzalerere mwana omwe an’dzabadwayo.’—WAY. 13:8.

NYIMBO: 88, 120

KODI MUNGAMUTEWEZERE TANI JEZU . . .

mwa kulatiza lufoyi kwa mwana wanu?

mwa kukhala mbereki wakubzicepswa?

mwa kukhala wakuzindikira pa kuthandiza mwana wanu?

1. Kodi Manowa adabva tani pomwe mkazi wace adamuuza kuti angadadzakhala na mwana?

MKAZI wa Manowa bzikhamunesa kuuza mwamuna wace kuti iye angadakhala na mwana, pakuti mwamuna waceyo akhadziwa kuti mkaziyo akhabereka lini. Tsono, anjo wa Yahova akhadabwera kwa mkaziyo, acidzamuuza kuti iye na bayace wangadadzakhala na mwana mwamuna, ndipo bzakusaya kukwanisika bzire bzingadakwanisika. Mwakusaya kupenukira, Manowa adakomedwa kwene-kwene, tsono iye adadziwambo kuti angadakhala na udindo bukulu pa moyo wace. Pakuti iwo wakhakhala pakati pa wanthu wakucita bzinthu bzakuipa kwene-kwene, kodi Manowa na mkazi waceyo, wangadakwanisa tani kulera bwino mwana wawo kuti adzatumikire Mulungu? ‘Manowa adayamba kudandaulira Yahova, acimbati: “Ndilekerereni Yahova. Munthu wa Mulungu wacadidi omwe mwam’tumiza ule, ndaphata minyendo, mulekeni abwere pomwe, acidzatipasa malango ya momwe tingadzalerere mwana omwe an’dzabadwayo.”’​—Way. 13:1-8.

2. Kodi kupfunzisa wana wanu kumbaphatanidza ciyani? (Onanimbo kwadru yakuti: “Wana Wanu Ndiwo Anyakupfunza Wanu wa Bibliya Wakufunika Kwene-kwene.”)

² Penu imwepo ndimwe mbereki, pinango mungabzibve ninga momwe Manowa adabvera. Imwepo muna udindo bukulu bwakuthandiza mwana wanu kuti amudziwe Yahova na kumufuna. (Mim. 1:8) Kuti bzimwebzi bzikwanisike, mabanja ya Cikristau yan’funika kukhazikisa ndondomeko ya Kunamata Ninga Banja yakuthandiza na yakuyenda patsogolo. N’cadidi, kuti mukhomereze cadidi ca m’Bibliya mu mtima mwa wana wanu, imwepo mun’funika kucita bzizinji kuposa kumbandocitisa kunamata ninga banja mdzinga uli wense. (Werengani Bzakutonga 6:6-9.) Kodi ni bzineso bziponi bzomwe mungagumane nabzo pa kukhomereza cadidi m’mitima mwa wana wanu? Mu nkhani ino na nkhani yomwe inkutewerayi in’dzafotokoza momwe abereki angatewezerere ciratizo ca Jezu. Napo Jezu akhali lini mbereki tsono abereki angagumane phindu na njira yomwe Jezu adapfunzisira pakuti iye adapfunzisa na kukonzekeresa anyakupfunza wace mwa lufoyi, mwa kubzicepswa na mwa kuzindikira. Mbatipfunzeni makhalidweya liri lense palokha.

LATIZANI KUTI MUMBAMUFUNA MWANA WANU

3. Kodi Jezu adalatiza tani kuti akhawafuna anyakupfunza wace?

³ Jezu akhaleka lini kuwauza anyakupfunza wace kuti akhawafuna. (Werengani Juwau 15:9.) Iye akhalatizambo kuti akhawafuna mwa kumbaceza nawo kawiri-kawiri. (Mar. 6:31, 32; Ju. 2:2; 21:12, 13) Tenepo, bzimwebzi bzinkulatiza kuti Jezu akhandokhalira lini kuphata nawo basa anyakupfunza wacewo. Ndipopa, iwo wakhapenukira lini kuti iye akhawafunadi. Kodi mungatewezere tani momwe Jezu akhapfunzisira?

4. Kodi mungalatize tani kuti mumbawafuna wana wanu? (Onani cithunzi-thunzi cakuyambirira.)

⁴ Mbawauzani wana wanu kuti mumbawafuna, ndipo nthawe zense mbawafotokozerani kuti iwo mbakufunika kwene-kwene kwa imwepo. (Mim. 4:3; Tit. 2:4) Samuel, omwe ambakhala ku Austrália, adalewa kuti: “Pomwe ndikhali mwana, baba wangu akhambandiwerengera Bukhu Langu la Nkhani za m’Bibliya usiku buli-bwense. Iwo akhambatawira mibvunzo yangu, akhambandikolombexa, akhambandimpsompsona na kumbandiuza kuti ndigone bwino. Ndidadabwa pambuyo pace pomwe ndidazindikira kuti baba wangu alibe kukulira m’banja lomwe wanthu akhana cizolowezi ca kumbakolombexana na kumpsompsonana. Ndipo bzimwebzi bzidawonekeratu kuti iwo akhacita nyongo ya kundilatiza lufoyi lawo. Phindu lace ndakuti, inepano ndidakhala na lufoyi likulu kwene-kwene na baba wanguwo, ndipo ndikhabzibva kukhala wakukondwa na wakukhotcerereka.” Mungathandize wana wanu mwa kuwalatizambo njira ibodzi-bodziyo mwa kumbawauza kuti: “Ndimbakufunani kwene-kwene”. Latizani mwakucokera pansi pa mtima kuti mumbawafuna wana wanu. Mbacezani nawo, kudya nawo na kumbasenzeka nawo.

5, 6. (a) Kodi Jezu ambacita ciyani na wanthu wale omwe iye ambawafuna? (b) Fotokozani momwe cirango cakuthemera cingathandizire mwana kubzibva kukhala wakukhotcereredwa na wakufunidwa.

⁵ Jezu adati: ‘Wense womwe ndimbawafuna, ndimbawatsimula na kuwalanga. Tenepo, kungula, ucicitambo bzinthu na nyongo.’a (Cibv. 3:19) Napo anyakupfunza wa Jezu wakhambanesana mwakubwereza-bwereza kuti mbani akhali mkulu pakati pawo, Jezu alibe kuwasiya. Ndipo iye alibembo kuwalekerera pomwe iwo nthawe zinango wakhakwanisa lini kuteweza malango yace. Koma mwa lufoyi na mu njira yabwino Jezu akhambawatsimula pa nthawe yabwino na pa mbuto yakuthemera.​—Mar. 9:33-37.

⁶ Latizani kuti mumbawafuna wana wanu mwa kumbawalanga. Nthawe zinango bzingakhale bzakukwanira kundomuuza mwanayo kuti bzomwe wacitabzo mpsakuphonyeka. Tsono, nthawe zinango, mwanayo angabvere lini malango yomwe mwamuuza. (Mim. 22:15) Bzimwebzi bzikacitika, tewezerani Jezu. Nyang’anani nthawe na mbuto yabwino kuti mumulange mwanayo mwa lufoyi na mwakuthemera. Mbapirirani naye pomwe munkumutsogolera, munkumupfunzisa na pomwe munkumutsimula. Mpfumakazi yakucemeredwa Elaine, yomwe imbakhala ku África do Sul, idalewa kuti: “Abereki wangu wakhacinja lini cirango cawo. Iwo wakandicenjeza kuti ‘ndinkulanga ukacita bzinthu bzakuipa’, iwo wakhacitadi bzimwebzo. Koma iwo wakhandilanga lini mwa ukali kwene-kwene ayai mwakusaya kundifotokozera thangwe lomwe wakhandilangiralo. Phindu lace ndakuti ndikhabzibva kukhala wakukhotcereredwa. Ndikhadziwa bzinthu bzomwe ndikhafunika kucita na bzomwe ndikhafunika lini kucita.”

KHALANI WAKUBZICEPSWA

7, 8. (a) Kodi Jezu adalatiza tani kuti akhali wakubzicepswa mwa kumbapemba kwa Mulungu? (b) Mukambapemba pabodzi na wana wanu, kodi iwo wan’dzapfunza ciyani?

⁷ Kumbukirani momwe anyakupfunza wa Jezu wadabvera mu mtima mwawo pa kubva mpembo wakumalizira wa Jezu pomwe akhali pansi pano, wakuti: ‘Abba, Baba, bzinthu bzense mpsakukwanisika kwa imwepo. Ndicosereni kopo iyi. Koma si mwa kufuna kwangu, koma mwa kufuna kwanu.’b (Mar. 14:36) Mafala yakudandaulaya, yadapfunzisa ateweri wa Jezu kuti napo Mwana wakulungamiratu wa Mulungu akhambapemba mwa kubzicepswa kukumbira thandizo la Mulungu. Tenepo, iwo wakhafunikambo kumbacita bzibodzi-bodzibzo.

⁸ Kodi wana wanu wangapfunze ciyani na mipembo yanu? N’cadidi kuti imwepo mun’funika lini kumbandokhalira kukumbira Yahova kuti akuthandizeni kupfunzisa wana wanu. Mukambapemba mwa kubzicepswa pomwe muna wana wanu, iwo wan’dzapfunza kukhulupira Yahova. Ana, omwe ambakhala ku Brasil, adalewa kuti: “Pomwe tidawonekeredwa na mabvuto, yakuduwala kwa aziyavu wangu womwe wadabala mai, abereki wangu wakhakumbira Yahova kuti awapase mphanvu kuti wakwanise kulimbana na mabvutoyo pabodzi na nzeru kuti wakwanise kumbacita bzakusankhula bzabwino. Napo pa nthawe yomwe bzinthu bzikhafikiratu pa kuipa, iwo wakhambasiya mabvuto yawo m’manja mwa Yahova. Phindu lace ndakuti inepano ndidapfunza kukhulupira Yahova.” Pomwe imwepo munkupemba pabodzi na wana wanu, lekani kumbandopemba bza iwo wokha basi. Kumbirani Yahova kuti akuthandizenimbo imwepo. Pinango mungamukumbire kuti akuthandizeni kulewalewa na bwana wanu kuti adzakubvumizeni kuyenda ku mtsonkhano wa cigawo. Mukumbirenimbo kuti akuthandizeni kukhala wakulimba mtima kuti mumbakwanise kupalizira anyakufendererana nawo nyumba, ayai kuti akuthandizeni mu njira zinango. Mukambakhulupira Mulungu mwa kubzicepswa, wana wanu wan’dzapfunza kucitambo bzibodzi-bodzi.

9. (a) Kodi Jezu adapfunzisa tani wapostolo wace kuti atumikire winango mwakubzicepswa? (b) Penu imwepo ndimwe wakukonzeka kutumikira winango, kodi wana wanu an’dzapfunza ciyani?

⁹ Mwa mafala na bzakucita, Jezu adapfunzisa wapostolo wace kutumikira winango mwakubzicepswa. (Werengani Luka 22:27.) Ndipo adawapfunzisa kukhala wakubzipereka pa kutumikira Yahova na momwe angakhalire na akristau anzawo. Na ciratizo cace ca kubzipereka na kubzicepswa, imwepo mungakwanise kupfunzisambo wana wanu mu njira ibodzi-bodziyo. Debbie omwe ana wana awiri, adalewa kuti: “Ndimbakhala lini na nsanje thangwe ra nthawe yomwe mwamuna wangu ambamala na akulu winango wa mu gwere. Ndimbadziwa kuti banja lathu likakhala lin’funa thandizo mwamuna wangu ambakhala wakukonzeka kutithandiza.” (1 Tim. 3:4, 5) Mwamuna wace Pranas adathumizira mwa kulewambo kuti: “Pomwe wana wathu adakula, iwo adayamba kumbatenga mbali pa mitsonkhano ikulu-ikulu na mabasa yanango ya kutumikira Mulungu. Iwo adakula mwauzimu, adakhala na axamwali wabwino, ndipo ambabzibva kukhala wakufunidwa.” Tsapano banja lathu lense linkutumikira Yahova mu utumiki bwa nthawe zense. Mukakhala wakubzicepswa na wakubzipereka, wana wanu an’dzapfunza bzomwe iwo wangacite kuti atumikire winango.

KHALANI WAKUZINDIKIRA

10. Kodi Jezu adalatiza tani kuti akhali munthu wakuzindikira, pomwe wanthu wakhafuna kumutewera?

¹⁰ Jezu akhali munthu wakuzindikira, ndipo iye akhakwanisa kubvesesa mathangwe yomwe yakhacitisa kuti wanthu wacite bzinthu mu njira inango. Mwa ciratizo, pa nthawe inango, bzikhawoneka kuti abveseri winango wa ku Galireya wakhafuna kwene-kwene kutewera Jezu. (Ju. 6:22-24) Tsono, pakuti Jezu akhakwanisa kuzindikira bzomwe bzikhali m’mitima ya wanthu, iye adazindikira kuti wanthuwo wakhamutewera thangwe ra cakudya ca kuthupi, sikuti thangwe ra bzomwe iye akhapfunzisa. (Ju. 2:25) Jezu, pakuwona kuti bzimwebzi bzikhali bzakuphonyeka, mwakusaya kukalipa, iye adalungamiza makumbukidwe yawo. Ndipo adawafotokozerambo bzomwe iwo wakhafunika kucita.​—Werengani Juwau 6:25-27.

11. (a) Perekani ciratizo comwe cingakuthandizeni kuzindikira penu mwana wanu ambakomedwa na utumiki bwakumunda. (b) Kodi mungacite ciyani kuti utumiki bwakumunda bukhale bwakufunika na bwa phindu kwa wana wanu?

¹¹ Napo imwepo mungakwanise lini kudziwa bzomwe bziri m’mitima ya wana wanu, koma mungazindikire momwe mwana wanu ambabvera akakhala ali mu utumiki bwakumunda. Abereki azinji akakhala ali mu utumiki bwakumunda na wana wawo ambapambula nthawe kuti apume pang’ono na kugula cakudya kuti adye. Napo bziri tenepo imwepo mun’funika kukhala wakuzindikira mwa kubzibvunza kuti, ‘Kodi mwana wangu ambakomedwa na utumiki ayai ambandofuna kudya?’ Tsono mukazindikira kuti mwana wanu ambawona utumiki kukhala bwakusaya kufunika na bwakusaya phindu, imwepo mun’funika kuthandiza mwana wanuyo kuti akhale na bzakulinga bzauzimu. Konzani njira zinango za kuwathandizira kuti awone utumiki kukhala bwakufunika mukakhala munkuyenda nawo pabodzi mu utumiki bwakumunda.

12. (a) Kodi Jezu adalatiza tani kuzindikira pomwe adacenjeza ateweri wace pakulewa bzinthu bzomwe bzingapswipize makhalidwe ya bwino? (b) Thangwe ranyi cenjezo lomwe Jezu adapereka likhali lakufunika kwene-kwene kwa anyakupfunza wace?

¹² Jezu adakhala wakuzindikira pakulewa bzinthu bzomwe bzingacitise munthu kucita pikado. Mwa ciratizo, ateweri wace akhadziwa kuti kucita upombo kukhali kuphonyeka. Koma Jezu adalewa bzinthu bzomwe bzingacitise munthu kucita upombo pomwe adati: ‘Ali-wense wakunyang’anisisa mkazi mpaka kumukhumba, wacita naye kale upombo mumtima mwace. Tsono penu diso lako la kumadidi limbakusoceresa, ulikolole ucilitaya.’ (Mat. 5:27-29) Mafala yamweya yakhali yakufunika kwene-kwene kwa Akristau womwe wakhakhala mu umambo bwa Roma. Munembi munango wa nkhani zakale, pakulewa bza masenzeka yakucitidwa m’mabwalo ya ku Roma, adati: “Maso yakhawona ndipo makutu yakhabva bzinthu bza maika, ndipo bzinthu bza maika bzakunyansiratu, ndibzo bzomwe wanthu akhadekedwa nabzo kwene-kwene.” Jezu adalatiza lufoyi likulu na kuzindikira pomwe adacenjeza anyakupfunza wace pa bzinthu bzomwe bzingadapswipiza makhalidwe yawo yauzimu.

13, 14. Kodi mungacite ciyani kuti mukhotcerere wana wanu kuti aleke kucita masenzeka yakuipa?

¹³ Mukakhala wakuzindikira mun’dzakwanisa kukhotcerera wana wanu pa bzinthu bzomwe bzingawadzonge mwauzimu. Nsiku zino, wana ali pa ngozi ikulu ya kuwona bzinthu bza maika na bzinthu bzinango bza pezi kusiyana na kale-kale. Tenepo, abereki Wacikristau wan’funika kumbauza wana wawo kuti kucita masenzeka yakuipa n’kwakuphonyeka. Na tenepo, kukhala wakuzindikira na wakubvesesa kun’dzakuthandizani kuwona bzomwe mungacite kuti mwana wanu aleke kuwona bzinthu bza maika. Pinango mungabzibvunze kuti: ‘N’ciyani comwe cingapumpse mwana wangu kuwona bzinthu bza maika? Kodi iye ambadziwa kuti bzimwebzi mpsakuipa? Kodi ndine wakufikirika mwakuti mwana wangu angabwere kudzakumbira thandizo akakhala ankutengeka kuti awone bzinthu bza maika?’ Napo mukakhala na wana ang’onoletu, imwepo mungawauze kuti: “Mukakhala mwapita pa interneti pomwe pankuwonesa makhalidwe yapezi, ndipo munkutengeka kuti muwone, ndaphata minyendo, mungabwere kudzandiuza mwakamfulumize. Lekani kucita mantha. Inepano ndikufunisisa kukuthandizani.”

¹⁴ Kukhala wakuzindikira kun’dzakuthandizani kusankhula masenzeka yabwino. Pranas omwe tamulewa kale ule, adati: “Bzomwe ifepano abereki tingasankhule kuti titsangalazidwe nabzo ninga nyimbo, mabukhu, ayai mafirime, banja lense lin’dzafunambo bzinthu bzimwebzo. Imwepo mungalewe bzinthu bzizinji koma wana wanu an’dzawona bzomwe imwepo mumbacita ndipo an’dzatewezerambo.” Penu wana wanu ambawona bzomwe mumbacita pa kusankhula masenzeka yabwino, mwacidziwikire wana wanuwo wan’dzacitambo bzibodzi-bodzibzo.​—War. 2:21-24.

MULUNGU WACADIDI AN’DZATAWIRA MPEMBO WANU

15, 16. (a) Thangwe ranyi mungatsimikize kuti Mulungu an’dzakuthandizani pakupfunzisa bwino wana wanu? (b) Kodi tin’dzacezerana ciyani mu nkhani inkubwerayi?

¹⁵ Kodi n’ciyani cidacitika pomwe Manowa adakumbira thandizo kuti akwanise kulera bwino mwana wace? ‘Mulungu wacadidi, adatetekera Manowa.’ (Way. 13:9) Abereki, dziwani kuti Yahova an’dzakutetekeranimbo. Iye an’dzatawira mipembo yanu ndipo an’dzakuthandizani kupfunzisa wana wanu. Imwepo mungakwanise kucita bzimwebzo mwa lufoyi, mwakubzicepswa na mwakuzindikira.

¹⁶ Ninga momwe Yahova ambathandizira abereki kupfunzisa wana wawo ang’ono, iye an’dzathandizambo abereki pakupfunzisa wana wawo omwe ni maswaka. Nkhani inkubwerayi in’dzafotokoza momwe mungatewezerere Jezu mwa lufoyi, mwakubzicepswa na mwakuzindikira pakupfunzisa maswaka yanu kuti yatumikire Yahova.

[Mafala ya m’nyansi]

[Kwadru pa tsamba 10]

Wana Wanu Ndiwo Anyakupfunza Wanu wa Bibliya Wakufunika Kwene-kwene

IFEPANO timbaphatisa basa bukhu lakuti Kodi Bibliya Limbapfunzisa Ciyani Maka-maka? kuti tithandize anyakupfunza wathu wa Bibliya kumudziwa bwino Yahova na kupfunzambo cadidi ca m’Bibliya. Tikamala, timbapfunza nawombo bukhu lakuti “Kodi Mungatani Kuti ‘Mulungu Apitirize Kukukondani?’” kuti tiwathandize kufuna Yahova pabodzi na mitemo yace.

Pa anyakupfunza wanu wense wa Bibliya, wana wanu ndiwo wakufunika kwene-kwene. Iwo wan’funika kupfunza bza Yahova. Ndipo iwo wan’funikambo kufuna kwene-kwene Yahova na kufunambo mitemo yace. Tenepo, penu imwepo ndimwe mwekha mbereki wacikristau m’banja mwanu, ifepano tinkukulimbisani basi kuphatisa basa bukhu lakuti Kodi Bibliya Limbapfunzisa Ciyani Maka-maka? na bukhu lakuti “Kodi Mungatani Kuti ‘Mulungu Apitirize Kukukondani” kuti mupfunzise wana wanu. (Mim.  6:20) Penu bzin’kwanisika, phatisanimbo basa matsamba ya mibvunzo yomwe yali pa webisaite ya jw.org/pt kuti mutokonye mitima ya wana wanu mwa kuphatisa basa bukhu la Bibliya Limbapfunzisa Ciyani.​—Pitani pomwe padanemba kuti ENSINOS BÍBLICOS > ADOLESCENTES.c

[Mafala ya m’nyansi]

[Cithunzi-thunzi pa tsamba 11

Kodi mwana wanu ambawona basa lakupalizira kukhala lakufunika na la phindu? (Onani ndime 11)