Phatisani Basa Webisaite Yathu Kuti Mupfunzise Wana Wanu
1. Kodi gawo la Webisaite yathu yakuti “Crianças” lina cakulinga ciponi?
1 Webisaite yathu jw.org, idakonzedwa kuti imbathandize wanthu wa misinkhu yense. Gawo la Webisaite yathu lakuti “Crianças” (ndokoni pa Ensinos Bíblicos > Crianças) limbathandiza wana na wabereki kufendererana pafupi na kufenderera Yahova. (Bzakutonga 6:6, 7) Kodi mungaphatise tani basa gawoli kuti mupfunzise wana wanu?
2. Kodi mungasankhule tani nkhani zakuthemerana na misinkhu ya wana wanu kuti mupfunze nawo?
2 Dziwani Kusiyanisa: Mwana ali-wense ana bzakusaya bzace-bzace. (1 Wakolinto 13:11) Tenepo, kodi mungasankhule tani nkhani zakuthemera kuti mupfunze na wana wanu? Bzibvunzeni kuti: ‘Njiponi nkhani yomwe in’dzadekera wana wangu? Kodi wan’dzaibvesesa mpaka paponi? Kodi ni nthawe zingasi zomwe iwo wambakwanisa kukhala tceru?’ Na wana womwe wana magole matatu yakubadwa ayai yakucepa, mungacezerane nawo nkhani za mu Webisaite yathu zakugumanika pa “Minhas Primeiras Lições da Bíblia.” Mabanja manango yambakondwa na nkhani za m’Bibliya za pa gawo lakuti “Ensine Seus Filhos.” Ndipo mungacitembo bzomwe bzinkulewedwa panyansipa.
3. Kodi wabereki wangaphatise tani basa bwino mabasa yakugumanika pa gawo lakuti “Mabasa Yakucita pa Kunamata Ninga Banja”?
3 Mabasa Yakucita pa Kunamata Ninga Banja: Mabasayo njakuti yathandize misolo ya banja kupfunza na wana wawo. Kuti mudziwe momwe mungaphatisire basa nkhanizo, tinyani ka butau kakuti baixar, mucilewenga mafala ya patsogolo pakuti “Guia para os Pais” pa basa liri-lense. Kuti mupfunzise wana ang’ono, phatisani basa bzithunzi-thunzi, ninga bza m’mabasa ya kupintali matsamba. Thandizani wana wakusinkhukira pang’ono kumaliza kunemba bzomwe bzinkusala pa cithunzi-thunzico. Mabasa mu gawo liri-lense, nja nkhani ibodzi-bodzi ya m’Bibliya; tenepo wana wa misinkhu yakusiyana-siyana, wangacite mbali pa basa libodzi-bodzilo pa kunamata ninga banja.
4. Kodi n’ciani cingagumanike pa gawo lakuti “Khala Xamwali wa Yahova”?
4 Khala Xamwali wa Yahova: Mavidiyo, nyimbo na mabasa yomwe yali pa gawoli mu Webisaite yathu, yambathandiza wabereki kuti wakhomereze Fala la Mulungu mu m’mtima mwa wana wawo ang’ono. (Bzakutonga 31:12) Vidiyo iri-yense yakufupika, ina mapfunziso yakufunika kwene-kwene. Mabasa yakusenzeka bza kufufudza na kugumana cinthu cakubisika, yambapasa mphanvu mapfunziroyo. Wana wambafuna kuimba, ndipo nyimbo zimbathandiza wana kukumbukira bzomwe wapfunzabzo, tenepo nyimbo za Umambo na nyimbo zakunembedwera maka-maka wana, zinkumbaikhidwa mwakukhazikika.
5. Thangwe ranyi wabereki wan’funika kukumbira kuti Yahova awathandize kupfunzisa cadidi wana wawo?
5 Wabereki, Yahova an’funa kuti mukhale baba na mai wabwino. Tenepo, mukumbireni kuti akuthandizeni kupfunzisa wana wanu cadidi. (Wayeruzi 13:8) Na thandizo la Yahova, mungapfunzise wana wanu kukhala ‘wa nzeru kuti wadzapulumuke mwa kukhulupira Kristu Jezu.’—2 Timotio 3:15; Mimwani 4:1-4.