Kwadru Ya Mibvunzo

◼ Kodi mpalizi wacikazi an’funika kumpsinkha mu msolo pomwe ankucitisa pfunziro la Bibliya pabodzi na mpalizi wacimuna?

Mpalizi wacikazi an’funika kumpsinkha mu msolo pomwe ankucitisa pfunziro la Bibliya lakukhazikika pabodzi na mpalizi wacimuna. (1 Wakolinto 11:3-10) Nsanja ya Olonda ya 15 Julho 2002, tsamba 27, idafokotoza kuti: ‘Kumweku n’kupfunzisa komwe kumbakhala kwakonzedweratu, ndipo nyakucitisa pfunziroyo ndiye ambakhala ankutsogolera. Pa cakucitika ninga cimweci, pfunzirolo limbakhala mbali yakuthumizirika ya mapfunziro ya m’gwere. Penu mpalizi wacikazi wakubatizidwa an’citisa pfunzirolo pabodzi na mpalizi wacimuna wakubatizidwa, iye an’funikira kumpsinkha mu msolo mwace.’ Bzimwebzo bzingacitidwembo penu iye ankuperekezedwa na mpalizi wacimuna wakusaya kubatizidwa. Bzin’funika kucitidwa tenepoyo, bziribe basa penu pfunzirolo linkucitikira m’nyumba, pa msuwo ayai pa mbuto inango.

Tsono penu pfunziro la Bibliya lakucitidwa pa mui likanati kukhazikisidwa, mpalizi wacikaziyo an’funika lini kumpsinkha mu msolo akakhala ali pabodzi na mpalizi wacimuna. Bzingacitidwe tenepoyo, napo penu ulendobo bukhali bwakudzandowonesa momwe pfunziro la Bibliya limbacitidwa ayai kudzacezerana nkhani za m’mabukhu yakucitira nayo mapfunziro ya Bibliya. Pakuti mapfunziro yakucitidwa pa mui yambakhazikisidwa mwa pang’ono-pang’ono pambuyo pakucita maulendo mazinji yakubwerezera, tenepo, apalizi wacikazi wan’dzafunika kukumbuka na kuwona penu pa cakucitikaco bzin’funika kumpsinkha mu msolo.