Vidiyo Yatsapano kuti Tiyambisire Mapfuziro ya Bibliya

Vidiyo ya mphindi zakucepa ya msolo wakuti Thangwe Ranyi Tin’funika Kupfunza Bibliya? inkufikira wanthu wazinji pa jw.org. Vidiyoyi idakonzedwa kuti ilimbise wanthu wa kaso kubvuma pfunziro la Bibliya lafovolo. Kuti muigumane ndokoni padanemba “Peça um Estudo Bíblico” panyansi pa tsamba lakuyamba la Webisaiti yathu ayai mungacite scan kodikoyi QR (quick response) yakudindidwa kumbuyo kwa tratado zathu zatsapano. Onani njira zinango za momwe tingaphatisire bwino basa vidiyoyi.

• Pa kucita ulendo bwakubwereza, mungalewe tenepa kwa mweneciro nyumba: “Kodi ningakulatizeni vidiyo ya mphindi zing’onong’ono yomwe inkufokotoza momwe mungagumanire mitawiro pa mibvunzo yanu ya m’Bibliya?” Iye akabvuma, mulatizeni vidiyoyi pa mtedwe wanu wa m’manja ayai mu komputador yace.

• Pomwe tinkugawira tratado zatsapano pakucita upalizi bwa padeca ayai bwakusaya kulinganizidwa, mulatizeni kodiko ya QR ndipo mulimbiseni munthuyo kuti akacite scan na mtedwe wace wa m’manja. Pakuti bzirewedwe bzizinji pakucita scan kodiko ya QR bzimbafunguliratu pomwe pana vidiyoyi mu Webisaiti yathu, mpsakukwanisika kuwona vidiyoyi na mtedwe wanu wa m’manja.

• Uzani womwe mumbaphata nawo basa pabodzi, wanzanu wakuxikola, abale wanu na winango womwe mumbadziwana nawo bza vidiyoyi, na kuiwona nawo pabodzi. Ayai watumizireni link ya vidiyoyi, ndipo akumbireni kuti wakaiwone wokha.

Mwa kuphatisa bwino basa makonzedwe yatsapanoya, pinango tingakwanise kuyambisa mapfunziro ya Bibliya mazinji, na kuthandiza mwauzimu womwe wana “makumbukidwe yabwino yomwe yangadawathandiza kukagumana moyo wakusaya kumala.”​—Mabasa 13:48.