Kwadru Ya Mibvunzo

◼ Kodi wana wan’funika kupfunza ciani kuti wakule wacikhwima mwa uzimu?

Wabereki wacikristau wambacita bzinthu bzizinji kuti wana wawo “ambawalere m’malango ya Yahova na kuwapfunzisa kakumbukidwe kace.” (Wayef. 6:4) Mwa ciratizo, wabereki wambawona kukhala kwakuthandiza kucezerana vesi la nsiku macibese yali-yense. Pa kunamata ninga banja na pa nthawe zinango, mabanja yambawona vidiyo yacicezerana na kumbafokotozerana nkhani zakucokera mu bukhu la Achichepere Akufunsa, ayai kumbayezezera nkhani za m’Bibliya. Tsono kuti wana wakhale “wakukhwima mwa uzimu”, iwo wan’funika kupfunzisidwambo cadidi cakuzika ca m’Bibliya.​—Waheb. 6:1.

Kumbukirani bzomwe ifepano timbapfunzisa wale womwe timbawagumana mu utumiki. Pa ulendo bwakutoma ayai pa ulendo bwakubwereza, ifepano timbayeza kuyambisa pfunziro la Bibliya mwa kuphatisa basa bukhu lakuti Kodi Baibulo Limaphunzitsa Chiyani Kwenikweni? Tikamaliza bukhu limweri ifepano timbaphatisa basa bukhu la kuti “Khalanibe m’Chikondi cha Mulungu.” Thangwe ranyi? Bukhu la Baibulo Limaphunzitsa Chiyani limbathandiza anyakupfunzira kugumana cidziwiso cakuyambirira ca m’Bibliya. Bukhu la “Chikondi cha Mulungu” limbawapfunzisa momwe wangaphatisire basa mitemo ya Bibliya pa moyo wawo wa nsiku na nsiku. Kupfunza mabukhu mawiriya kumbathandiza watsapanowa kukhala “wakuzikika” mwa Kristu na “kukhala wakukhazikika m’cikhulupiro.” (Wakol. 2:6, 7) Kodi mabukhu yamweya yangathandizembo lini wana wathu? Iwo wanfunikambo kupfunza bza cakulombolera, bza Umambo, na bza mkhalidwe wa anyakufa. Wana wan’funikambo kudziwa thangwe race Mulungu ankulekerera kubonera na kuzindikira nsiku za kumalizira za mkonzedwe wa bzinthuyu. Iwo wan’funika kutsimikiza kuti Mboni za Yahova zina cadidi. Maswaka yan’funika pomwe kubvesesa mitemo ya m’Bibliya na kuzoloweresa “nzeru zawo za kuzindikira.” (Waheb. 5:14) N’cadidi kuti wabereki wan’funika kuwona msinkhu na luso lakubvesesa la mwana ali-wense. Tsono wana wazinji wambakwanisa kupfunza cadidi cakuzika ca m’Bibliya kutomera wakali wang’ono.​—Luka 2:42, 46, 47.

Pakufuna kuthandiza wabereki, pa Webisaiti ya jw.org pan’dzagumanika bzitsogozo bza mapfunziro yakucokera m’bukhu la Baibulo Limaphunzitsa Chiyani. Mabanja yangagumane bzimwedzi mu Webisaiti yathu mwa kunyang’ana pomwe padanemba ENSINOS BÍBLICOS > ADOLESCENTES. Kutsogolo kuno bzitsogozo bza mapfunziro yakucokera m’bukhu la “Chikondi cha Mulungu” bzin’dzaikhidwambo. N’cadidi kuti tinfunikambo kuphatisira basa mabukhu yamweya yakucita kudindidwa. Wabereki wangasankhule nthawe yomwe wangaphatisire basa mbali zimwezi mkati mwa kunamata ninga banja, pomwe wankupfunza na mwana ali-wense payekha ayai pakupfunzisa mwana kucita pfunziro layekha.