Magole 100 ya Kudziwisa Umambo!

1. Kodi wanthu wa Yahova wakhalimbisidwa kucita ciyani pafupi-fupi magole dzana yapitaya?

¹ “Onani, Mambo ankutonga! Imwe ndimwe adziwisi wace. Natenepo dziwisani, dziwisani, dziwisani, bza Mambo na Umambo bwace.” Na mafala yamphanvuya yakulewedwa na M’bale Rutherford pafupi-fupi magole 100 yapitaya, wanthu wa Yahova wadalimbisidwa kupaliza mafala ya Umambo ku mbuto iri-yense. Ndipo ndibzo bzomwe tidacita! Ninga Akristau wakuyambirira, timbapalizira bzipsa bzabwino bza Umambo ‘mu cilengedwe cense ca pansi.’ (Wakol. 1:23) Tikakumbukira magole dzana yakumbuyo, kodi tacita ciyani kuti tidziwise Umambo bwa Mulungu? Pomwe tinkufendera magole dzana ya kubadwa kwa Umambobu, kodi tingapitirize tani kubudziwisa?

2. Kodi mabukhu yathu yambatsatsa tani Umambo bwa Mulungu?

² Kukumbukira Bza M’mbuyo: Kwa magole mazinji, mabukhu yathu yambatsatsa Umambo bwa Mulungu. Kuyambira mu 1939, revista yathu yakufunika ina msolo wakuti: Nsanja ya Olonda Yolengeza Ufumu wa Yehova. Revistayi kawiri-kawiri imbafotokoza bza Umambo na bzomwe bundzacita. Revista ya Galamukani! imbafotokozambo bza Umambo bwa Mulungu ninga njira yokhayo yakupasira cidikhiro kuna mtundu wa wanthu. Marevista mawiriya tsapano mpsakuthemeradi kukhala yankusanduliziridwa na kugawidwa pa dziko!—Cibv. 14:6.

3. Kodi ni njira zinango ziponi zomwe tikhaphatisira basa kuti tidziwise Umambo?

³ Wanthu wa Yahova wayezera njira zizinji zakudziwisira Umambo. Mu nsiku zakuyambirira, tikhaphatisira basa kanderendere zakukhala na mitcini yakukhala na bzakukuzira mafala, kumwazira nkhani pa cikasi, na majiradisko. Njira zomwezire zidathandizira kumwaza bzipsa bzabwino kuna wanthu wazinji pa nthawe yomwe kukhana apalizi wakucepa wa Umambo. (Psal. 19:4) M’magole ya tsapanopaya, tinkumwaza mkhani pa webisaite ya jw.org, kuti tipalizire Umambo kwa wanthu bzulu bzizinji—kuphatanidza wanthu wakukhala mu mbuto zomwe basa lathu lidaletsedwa.

4. N’ciyambi ciponi cakupambulika comwe timbacita?

⁴ Wanthu wa Yahova watanganikambo na ciyambi cakupambulika kuti amwaze mafala ya Umambo. Mwa ciratizo, kuyambira m’magole ya mu 1990, tacita nyongo ya kuthumizira nthawe za basa la ku nyumba na nyumba mwa kucita upalizi mu mbuto zakucezera, mbuto zakuimisira kanderendere na mu mbuto zamalonda. Tsapanopali, takhala na makonzedwe yakucita upalizi bwakupambulika m’mbuto zakugumanika wanthu azinji za m’mizinda mikulu-mikulu kuzungulira dziko lapansi. Kuthumizira bzimwebzi, magwere mazinji yankucitambo upalizi bwa padeca m’madera yawo mwa kuphatisa basa kangolo kakukhala na mabukhu kakucita kupfuwa na manja ndipo mwa kuphatisambo basa meza mu mbuto zakupitidwa na wanthu azinji. Ncadidi, timbapitiriza kucita basa la nyumba na nyumba ninga njira yakufunika ya basa lathu lakupalizira Umambo.—Mabasa 20:20.

5. Kodi gole lipsa la basa lin’dzapereka mpata uponi kuna azinji wa ife?

⁵ Kukumbukira Bzakutsogolo: Mwa kuyamba gole la basa mu Setembro, azinji an’dzayamba kutumikira ninga apainiya wakukhazikika. Kodi mungafune kudzaphatana nawo? Penu ne, kodi mungafune lini kucita upainiya bwakuthandiza mu nthawe zinango? Bziribe basa kuti mun’kwanisa kucita upainiya ayai ne, Yahova mwakusaya kupenukira, an’dzasimba nyongo iri-yense yomwe muncita yakucita basa la kudziwisa umambo mwakukwana.—Malak. 3:10.

6. Kodi mwezi wa Outubro 2014 un’dzakhala tani wakupambulika?

⁶ Mwezi wa Outubro 2014, Umambo bwa Mulungu bun’dzafitsa magole 100 ya kubadwa kwace. Mwakuthemera, revista yakugawira ya Nsanja ya Olonda ya mwezi umweyu in’dzafotokoza bza Umambo bwa Mulungu. Thangwe ranyi mun’saya kucita nyongo yakuti mukhale nayo mazinji yomwe mukwaniseyo? Ninga momwe timbaonera tsogolo, ali-wense wa ifepano angapitirize ‘kupalizira bzipsa bzabwino bzakulewa bza Umambo bwa Mulungu’ kuna ali-wense womwe angafune kubva.—Mabasa 8:12.