Kugawira Mcemo
1. Ni lini pomwe in’dzayambika kampanya yakugawira mcemo wa mtsonkhano?
1 Mucikhala kuti mwakonzera axamwali ayai banja lanu cakudya cakupambulika, comwe cafuna nyongo na kobiri zizinji, mwakusaya kupenukira bzingakupaseni mphamvu yakucemera wanthu. Mwakundendemerana, pacitidwa basa likulu lakukonzekera phwando lauzimu lomwe lin’dzacitika pa mtsonkhano wathu wacigawo womwe unkubwerawo. Midzinga mitatu unati kuyamba mtsonkhano, Yahova watipasa mwayi wakucemera winango kuti wadzagumanike. N’ciyani cin’dzatithandiza kugawira mcemoyo mwakukondwa?
2. Kodi n’ciani cin’dzaticitisa kuti ticite mwakukwanira kampanya?
2 Tikambakumbukira mwakutenda momwe ifepano patekha, timbagumanira phindu na phwando lauzimu lomwe Yahova watikonzera pa mitsonkhano yathu, tin’dzafunisisa kugumanikambo pa kucita mwakukwanira kampanya. (Zai. 65:13, 14) Timbakumbukire kuti kampanya yapagoleyi imbakhala na bzakutewera bzabwino. (Onani kwadru ya msolo wakuti “Bzakutewera Bzace.”) Wanthu winango womwe timbawacemera, wambabwera kudzatsonkhana nafe koma winango ambabwera lini. Bziribe basa kuti mbangasi womwe wangabwere, tsono, nyongo yathu pa kampanyayo in’dzapereka citumbizo kwa Yahova na kuwonesa kupasa kwace.—Psal. 145:3, 7; Cibv. 22:17.
3. Kodi mcemo un’dzagawiridwa tani?
3 Bungwe la akulu lin’dzacezerana kuti liwone momwe gwere lin’dzagawirira mcemoyo mwakukwanira, na penu bzingadzafunike kusiya mcemoyo pa nyumba zomwe tiniwona lini munthu ayai kugawira mbuto zomwe kumbagumanika wanthu wazinji. Nsiku za kumala kwa mdzinga marevista yangadzagawiridwembo pabodzi na mcemo bzikadzafunika. Tikadzamaliza kampanya, tin’dzakondwa kudziwa kuti tacita basa lakufunika nakuti tacemera wanthu wazinjisa kuti wadzagumane nafe pa phwando lauzimu lomwe Yahova watikonzera!
[Kwadru pa tsamba 4]
Kodi Mun’dzalewa Ciyani?
Mukadzamala kumusana, mungadzalewe kuti: “Tinkucita basa la kampanya lomwe linkucitika pa dziko lense lapansi, lakucemera wanthu pa mtsonkhano wakufunika kwene-kwene. Nsiku, nthawe na mbuto bzidanembedwa pa mcemoyu.”
[Kwadru pa tsamba 4]
Bzakutewera Bzace
• Mu magole yadapitaya, mpfumakazi inango idacitambo kampanya yakugawira mcemo, ndipo idabzibvunza penu bzidakhaladi bzakuthandiza kucita kampanyayo. Mpfumakaziyo idakumbuka kuti, ‘Kodi wanthu wandzabvuma kudzagumanika nafe pa mtsonkhano wacigawo?’ Pa nsiku ya Malinkhuma kumacibese ku mtsonkhanoko, iye adawona munthu wa cipembedzo ca Sique ndipo adayamba kuceza naye. Bzidaoneka kuti iye akhali pamtsonkhanopo thangwe akhadatambira katsamba kathu ka mcemo. Iye akhana mibvunzo yomwe mpfumakaziyo idakwanisa kuyitawira. Iye adalewa momwe adakondwera kwene-kwene na mtsonkhanoyo na momwe wanthu womwe akhali pa mtsonkhanopo akhadabvalira na khalidwe lawo. Patapita nthawe, nsiku ibodzi-bodziyo mpfumakaziyo idayamba kuceza na banja lomwe likhadakhala pafupi naye. Iwo akhadatambirambo katsamba ka mcemo tenepo adayenda ku mtsonkhanoko na xapa. Iwo akhakomedwa na mtsonkhanoyo ndipo adafuna kudzagumanika pomwe mangwana yace, nsiku ya mdzinga. Mpfumakaziyo idadzawona momwe kampanya yathu yapagoleyi ikhaliri yakufunika.
• Pa mtsonkhano wacigawo womwe udacitika tsapanopapa, mwamuna na mkazi womwe mbapainiya wakukhazikika adayamba ndiwo kuceza na banja linango lacikulire. Banjalo lidalewa kuti kukhali kuyamba kugumanika pa mtsonkhanopo. Apainiyawo adawabvunza kuti “Kodi mbani wakucemerani?” Iwo adawatawira kuti “Nsiku inango pomwe tidafika pamui pathu, tidawona katsamba ka mcemo pansi pa msuwo wathu.” Iwo adawerenga mcemoyo ndipo adadzaza kwadru yakugumanika kuseri kwa mcemoyo. Abale winango pa mtsonkhanoyo adapasambo banjalo cakudya. Iwo adakomedwa kwene-kwene na nkhani za pa mtsokhanopo ndipo adafuna kubwera pomwe nsiku ya mangwana yace. Tenepo padacitika makonzedwe ya kuwazungira na kukuza cikhumbo cawo.