Bzinthu Bzathu Bzakuphatisira Basa Pakupfunzisa
1. Kodi apalizi Wacikristau wambandendemerana tani na m’misiri?
1 M’misiri ambaphatisa basa bzinthu bzakusiyana-siyana. Bzinthu bzinango mpsakufunika kubziphatisa basa nthawe inango, koma bzinango bzimbaphatisidwa basa kawiri-kawiri. Amisiri waluso nthawe zense ambakhala na bzinthu bzomwe ambabziphatisa basa pafupi-pafupi pa mbuto yawo yakukoyera bzinthu, ndipo bzinthu bzimwebzo ni bzomwe iwo azolowera kubziphatisa basa. Bibliya limbalimbisa Mkristau ali-wense kuti abzipereke mu utumiki ndipo acikhalambo ‘nyabasa omwe alibe mathangwe yakucitira manyazi na basa lace.’ (2 Tim. 2:15) Kodi n’cinthu ciponi comwe n’cakufunika kwene-kwene pa bzinthu bzomwe timbaphatisira basa? Ni Fala la Mulungu—cinthu cakufunika kwene-kwene comwe timbaciphatisa basa pa ‘kupfunzisa wanthu’. (Mat. 28:19, 20) Na tenepo, tin’funika kucita nyongo kuti tikhale na luso pa ‘kuphatisa basa bwino fala la cadidi.’ Tsono, ciripo cinthu cinango comwe cimbaphatisidwa basa kawiri-kawiri pa bzinthu bzathu bzomwe timbapfunzisira bzomwe Mkristau ali-wense an’funika kupfunza kubziphatisa basa mwaluso kuti tipfunzisire wanthu cadidi.—Mim. 22:29.
2. Kodi ni bzinthu bziponi bzakufunika kwene-kwene bzomwe timbabziphatisira basa pakupfunzisa?
2 Bzinthu Bzathu Bzomwe Timbaphatisa Basa Kawiri-kawiri pa Kupfunzisa: Kupambula Bibliya, n’ciyani cinthu cinango comwe tin’funika kumbaciphatisa basa? Cinthu cakuyamba comwe tinaco kuti tipfunzisire cadidi ca Bibliya ni Kodi Baibulo Limaphunzitsa Chiyani Kwenekweni? Tikamaliza kupfunza na nyakupfunza bukhu limweri, timbaphatisa basa bukhu lakuti “Kodi Mungatani Kuti ‘Mulungu Apitirize Kukukondani?” kuti timupfunzise kuphatisa basa nfundo za m’Bibliya nsiku zense pa moyo wace. Tsono, tin’funika kukhala wa luso pa kuphatisa basa mabukhu mawiriya. Mabroxura manango yan’funika kuphatanidzidwa pa bzinthu bzathu bzomwe timbapfunzisira. Bzipsa Bzawino Bzakucokera kwa Mulungu! ni cibodzi mwa bzinthu bzathu bzakufunika bzomwe timbayambisira pfunziro la Bibliya. Penu mu dera lathu muna wanthu omwe ambaneseka kuwerenga ayai omwe ambalewalewa cirewedwe comwe cina mabukhu yathu mang’ono-ng’ono, tingaphatise basa Tetekerani Mulungu ayai Tekerani Mulungu ndipo Khalani na Moyo Wakusaya Kumala. Cinthu comwe n’cakuthandiza pa kupfunzisa kuti citsogolere nyakupfunza ku gulu, ni broxura lakuti Mbani Ankucita Kufuna kwa Yahova Lero Lino? Mavidiyo yomwe njakuthandiza pa kupfunzisa wanthu, ninga yakuti Thangwe Ranyi Tin’funika Kupfunza Bibliya?, N’ciyani Cimbacitika mu Nyumba ya Umambo? na Deus tem nome?, ni bzinthu bzomwe tin’funika kubzipfunzambo bwino kuti tikabziphatise bwino basa.
3. Kodi nkhani zomwe tin’dzapfunza kutsogolo mu mbali za mu Utumiki Bwathu bwa Umambo zin’dzatithandiza kucita ciyani?
3 Nkhani zomwe tin’dzazipfunza kutsogoloku za mu Utumiki Bwathu bwa Umambo zin’dzatithandiza kukhala na luso pa kuphatisa basa yanango mwa mabukhu yathu yakufunika kwene-kwene pa bzinthu bzathu bzomwe timbaphatisira basa pakupfunzisa. Pakuti tin’funika kucita nyongo ya kuphatisa basa bzinthu bzimwebzi, tin’dzakhala watceru pa malango yakufuliziridwa yakuti: ‘Mbasamala nthawe zense na bzomwe umbacita pabodzi na bzomwe umbapfunzisa. Pitiriza kucita bzimwebzi, thangwe ukacita tenepo un’dzabzipulumusa wekha pabodzi na womwe wan’kubvera.’—1 Tim. 4:16.