KUKHALA NA MOYO WACIKRISTAU
Mbafufudzani Kuti Mudziwe Nzeru za Mulungu
Tikufuna kuti Yahova ambakomedwe na bzentse bzomwe timbacita. (Mim 27:11) Kuti bzimwebzi bzikwanisike, tin’funika kumbacita bzinthu bzomwe bzimbalatiza kuti timbatewezera nzeru za Yahova napo pacikhala palibe lamulo lakulewa bza nkhaniyo. Kodi n’ciyani cingatithandize kucita bzimwebzi?
Mbapfunzani Bibliya nthawe zentse. Tikambawerenga Bibliya timbakhala tikuceza na Yahova. Timbakwanisa kudziwa nzeru za Yahova tikawona momwe akhacitira bzinthu na wanthu wace na kuwonambo bzomwe bzidacitikira wanthu omwe adacita bzinthu bzakuipa na omwe adacita bzabwino. Ndipo tikafuna kucita cinthu, mzimu wakucena un’dzatithandiza kukumbukira nfundo zomwe tapfunza mu Fala la Mulungu. — Ju 14:26.
Mbafufudzani. Mukafuna kucita cinthu, bzibvunzeni kuti: ‘Kodi ni mavesi yaponi ya m’Bibliya ayai ni nkhani iponi yomwe ingandithandize kudziwa bzomwe Yahova akufuna?’ Pembani kwa Yahova kuti akuthandizeni ndipo fufudzani m’mabukhu yomwe yalipo m’cirewedwe canu kuti mugumane nfundo za m’Bibliya zomwe mungaziphatise basa pa bzomwe mun’funa kucitabzo. — Sl 25:4.
ONANI VIDIYO YA MSOLO WAKUTI TIN’FUNIKA ‘KUPIRIRA’ — KUTI TIDYE CAKUDYA CAKUPASA THANZI, MUKAMALA BVUNZANI ABVESERI KUTI:
Kodi mpfumakazi yomwe tawona mu vidiyoyi ikhagumana na mphitca ziponi?
Kodi kufufudza kungakuthandizenimbo tani kukunda mphitca zibodzi-bodzizi?
Kodi timbakhala na phindu liponi tikambafufudza na kucita pfunziro la patekha tikafuna kucita cinthu? — Ahe 5:13, 14