Citisani Kuti “Moto wa Yah” Upitirize Kugaka

1. Kodi Bibliya limbayezezera lufoyi na ciyani?

“LUFOYI limbagaka ninga moyo, moto wa Yah. Madzi mazinji yangakwanise lini kuthima lufoyiro, ndipo nyanza ingakwanise lini kuligwinyira kutali.”b (Nyimbo ya Salomau 8:6, 7) Mafalaya yambafotokoza bwino-bwino bza lufoyi lacadidi! Mafala yamweya yambalimbikisa wale omwe adalowolana kuti: Imwepo mungakwanise kulatizana lufoyi lomwe lin’dzamala lini.

2. N’ciyani comwe banja lingacite kuti lufoyi lawo lireke kumala mphanvu?

² Kuti wanthu wakulowolana akhale na lufoyi lakusaya kumala bzimbathemba awiriwo. Kuti moto upitirize kugaka timbafunika kupitiriza kuuyesera. Tikasaya kuuyesera, motoyo umbathima. Mpsibodzi-bodzimbo na lufoyi la mwamuna na mkazi. Kuti lipitirize kukhala la mphanvu, awiriwo an’funika kupitiriza kulilimbisa. Nthawe zinango, banja lingawone kuti lufoyi lawo likumala mphanvu, maka-maka akakhala akugumana na bvuto lakusaya kobiri, bvuto la thanzi ayai mabvuto manango yomwe yambacitikira wanthu. Penu imwepo muli pa banja, n’ciyani comwe mungacite kuti “moto wa Yah” upitirize kukhala udagaka m’banja mwanu? Mu nkhani ino, tin’pfunza bzinthu bzitatu bzomwe mungacite kuti banja lanu likhale lakulimba na lakukondwa.c

PITIRIZANI KULIMBISA UXAMWALI BWANU NA YAHOVA

3. Kodi kukhala pa uxamwali bwakulimba na Yahova kumbathandizira tani m’banja? (Mpalizi 4:12) (Onani cithunzi-thunzi.)

³ Kuti “moto wa Yah” upitirize kugaka, mwamuna na mkazi an’funika kupitiriza kulimbisa uxamwali bwawo na Yahova. Kodi kukhala pa uxamwali bwakulimba na Yahova kumbathandizira tani kuti banja likhale lakukondwa? Banja likambawona kuti uxamwali bwawo na Yahova n’bwakufunika, limbacita nyongo yakuphatisira basa malango ya Yahova ndipo malangoyo yambawathandiza kupirira mabvuto yomwe yangacitise kuti lufoyi lawo limale mphanvu. (Werengani Mpalizi 4:12.) Wanthu wakulimba mwauzimu ambacita nyongo ya kutewezera makhalidwe ya Yahova, ninga kudeka mtima, kupirira na kulekerera. (Aefezo 4:32–5:1) Banja likambalatizana makhalidwe yamweya limbacitisa kuti lufoyi lawo lithimizirike. Mpfumakazi inango yakucemeredwa Lena, yomwe iri pa banja kwa magole 25, idati: “Mpsakupusa kufuna na kulemekeza munthu omwe ambafuna bzinthu bzauzimu.”

4. Thangwe ranyi Yahova adasankhula Zuze na Mariya kuti alere Mesiya?

⁴ Mbatiwoneni nkhani ibodzi ya m’Bibliya. Pa mbadwa zentse za Davide, Yahova adasankhula Zuze na Mariya kuti alere Mesiya. Thangwe ranyi? Thangwe ndakuti awiriwa akhali pa uxamwali bwakulimba na Yahova, ndipo Yahovayo akhadziwa kuti iwo angadadzacita bzinthu mwakubverana na lufoyi lomwe akhanalo kwa iye. Mabanja, kodi mungapfunze ciyani na Zuze na Mariya?

5. Kodi amuna angapfunze ciyani na Zuze?

⁵ Zuze adabvera malango ya Yahova, ndipo bzimwebzi bzidamucitisa kuti akhale mwamuna wabwino. Iye adatambira malango yakucokera kwa Mulungu yakulewa bza banja lace katatu-kentse. Akapasidwa malangoyo iye akhabvera napo kuti akhafunika kucinja bzinthu bzizinji. (Mateu 1:20, 24; 2:13-15, 19-21) Mwa kubvera malango ya Mulungu, Zuze adakhotcerera Mariya, adamuthandiza ndipo adamupasa bzomwe akhafunikira. Bzomwe Zuze adacitabzi bzidacitisa kuti Mariya amufune kwene-kwene na kumulemekeza! Amuna, imwepo mungatewezere Zuze mwa kumbabvera malango ya m’Bibliya ya momwe mungasamalirire mabanja yanu.d Imwepo mukabvera malango yamweya napo kuti yangakucitiseni kucinja bzinthu bzinango, mumbalatiza kuti mumbafuna akazanu ndipo mumbacitisa kuti banja lanu likhale lakulimba. Mpfumakazi inango ya ku Vanuatu, yomwe iri pa banja kwa magole 20, idati: “Mwamuna wangu akambateweza malango ya Yahova, nimbamulemekeza kwene-kwene. Nimbabzibva kukhala wakukhotcerereka. Ndipo akambacita cakusankhula, nimbacita lini thupo.”

6. Kodi akazi angapfunze ciyani na Mariya?

⁶ Mariya akhali pa uxamwali bwakulimba na Yahova ndipo iye akhacita ciri-centse kuti alimbise cikhulupiro cace kwa iye. Iye akhadziwa bwino Bzinembo. (Luka 1:46) Ndipo akhakhalambo na nthawe ya kumbakumbukira bzomwe akhapfunza. (Luka 2:19, 51) Bzimwebzi bzidacitisa kuti iye akhale mkazi wabwino. Bzimwebzi ndibzo bzomwe mpfumakazi zizinji ntsiku zino zomwe ziri pa banja zimbacita. Mpfumakazi inango yakucemeredwa Emiko idalewa kuti: “Pomwe inepano ndikhanati kulowodwa ndikhana ndondomeko yangu yakucita bzinthu bzauzimu. Tsono pomwe ndidalowodwa, mwamuna wangu ndiye akhambapemba na kucitisa kunamata kwa pa banja. Bzimwebzi bzidacitisa kuti nimbathembe iye pa nkhani zauzimu. Ndidazindikira kuti ndikhafunika kucita bzinthu bzinango bzauzimu ndekha kuti ndilimbise uxamwali bwangu na Yahova. Tsapano nimbakhala na nthawe ya kupemba, kuwerenga Bibliya na kukumbukira bzomwe ndawerengabzo.” (Agalatiya 6:5) Akazi, mukapitiriza kulimbisa uxamwali bwanu na Yahova abayanu an’dzakutumbizani na kukufunani kwene-kwene. — Mimwani 31:30.

7. N’ciyani comwe mabanja yangapfunze na Zuze na Mariya pa nkhani ya kunamata pabodzi?

⁷ Zuze na Mariya akhambacita bzinthu pabodzi kuti alimbise uxamwali bwawo na Yahova. Iwo akhambanamata Yahova pabodzi. (Luka 2:22-24, 41; 4:16) Bzimwebzi bzikhali lini bzakupusa, maka-maka pomwe iwo adadzakhala na wana. Koma adacita nyongo ya kubzikwanirisa. Bzimwebzi ndibzo bzomwe mabanja yan’funikambo kumbacita. Penu imwepombo muna wana, pinango nthawe zinango bzingakuneseni kumbayenda ku mitsonkhano na kucita kunamata kwa pa banja. Ndipo bzingakhale bzakunesa kwene-kwene kukhala na nthawe ya kumbapfunza na kupemba pabodzi. Tsono kumbukirani kuti mukambanamata Yahova pabodzi, imwepo mun’dzakhala naye pa uxamwali bwakulimba ndipo awirimwe mun’dzakhala wakubverana. Ndipopa mbawonani kunamata kwanu kukhala cinthu cakufunika kwene-kwene.

8. N’ciyani comwe banja lomwe limbanesana lingacite kuti ligumane phindu na kunamata kwa pa banja?

⁸ N’ciyani comwe imwepo mungacite penu mukugumana na mabvuto m’banja mwanu? Kunamata kwa pa banja kungakhale kwakusaya kudekeza. Penu bziri tenepo, mbacitani bzinthu bzomwe mukuwona kuti mwentse mungakomedwe nabzo. Bzimwebzi bzin’dzacitisa kuti mumbafunane ndipo bzin’dzacitisambo kuti mumbakomedwe pomwe mukucita bzinthu bzauzimu pabodzi.

MBAKHALANI NA NTHAWE YA KUCEZA

9. Thangwe ranyi mwamuna na mkazi an’funika kukhala na nthawe ya kuceza?

⁹ Mabanja, kuti mupitirize kumbafunana mbakhalani na nthawe ya kuceza. Mukacita bzimwebzi, mun’dzakwanisa kudziwa bzomwe mwanzanu wa m’banjayo akukumbuka na mabvuto yomwe akugumana nayo. (Genesesi 2:24) Lilia na Ruslan ali pa banja kwa magole 15. Onani bzomwe iwo adazindikira pomwe adalowolana. Lilia adati: “Pomwe ifepano tidalowolana tikhakumbuka kuti tingadadzakhala na nthawe ikulu ya kuceza. Tsono bzimwebzi bziribe kucitika. Ifepano tikhakhala wakutanganika kwene-kwene na basa, basa la pa mui na kusamalira wana wathu. Tidazindikira kuti tikasaya kukhala na nthawe ya kuceza tingakhale lini wakubverana.”

10. Kodi mabanja yangaphatise tani basa malango ya pa Aefezo 5:15, 16?

¹⁰ N’ciyani comwe mabanja yangacite kuti yambakhale na nthawe ya kuceza? Pomwe mukukonza ndondomeko yanu, mun’funika kumbapambula nthawe yakuti mukhale na mwanzanu wa m’banja. (Werengani Mimwani 5:15, 16.) M’bale munango wa ku Nigéria, wakucemeredwa Uzondu, adalewa kuti: “Ndikakonza ndondomeko ya bzinthu bzomwe ndikufuna kucita, nimbaikhambo nthawe yomwe nin’dzakhala na mkazangu, ndipo nthaweyo ikafika nimbalekerera lini kuti cinthu cinango cinditazise kucita bzimwebzi.” (Afilipi 1:10) Onani bzomwe adalewa Anastasia, mkazi wa nyakunyang’anira dera wa ku Moldova, bza momwe ambaphatisira bwino basa nthawe yace. Iye adati: “Mwamuna wangu akakhala akucita bzinthu bzinango bzakubverana na basa lace, inepano nimbacitiratu bzinthu bzomwe ndikufuna. Bzimwebzi bzimbacitisa kuti tikagumana timbakhale na nthawe ya kuceza.” Tsono n’ciyani comwe imwepo mungacite penu ndondomeko yanu ikukutazisani kuti mumbakhale na nthawe ya kuceza na mwanzanu wa m’banja?

11. Kodi ni bzinthu bziponi bzomwe Akila na Prisila akhacita pabodzi?

¹¹ Mabanja yangapfunze bzizinji na bzomwe Akila na Prisila akhacita. Banja limweri likhalemekezedwa kwene-kwene mu nthawe ya Akristau wakuyambirira. (Aroma 16:3, 4) Napo kuti Bibliya limbafotokoza lini bzizinji bza banja limweri, koma iro limbalewa kuti banja limweri likhaphata basa, kupalizira na kuthandizambo wanthu pabodzi. (Mabasa 18:2, 3, 24-26) Ndipopa, Bibliya likaguma bza Akila na Prisila, nthawe zentse limbawaguma ali pabodzi.

12. Kodi n’ciyani comwe mwamuna na mkazi angacite kuti ambakhale na nthawe yakuceza? (Onani cithunzi-thunzi.)

¹² Kodi mabanja yangatewezere tani Akila na Prisila? Kumbukirani bzomwe imwepo na mwanzanu wa m’banja mungacite pabodzi. Kodi mungacite bzinthu bzinango pabodzi m’mbuto mwa kubzicita mwekha? Akila na Prisila akhambapalizira pabodzi. Kodi imwepo mumbacitambo bzimwebzi? Cinthu cinango comwe Akila na Prisila akhacita ndico kuphata basa pabodzi. Pinango imwepo na mwanzanu wa m’banja mumbaphata lini basa lakundendemerana. Tsono tani mucimbacita bzinthu bza pa mui pabodzi? (Mpalizi 4:9) Imwepo mukambathandizana basa, bzimwebzi bzin’dzacitisa kuti mumbakhale na nthawe yakuceza. Robert na Linda ali pa banja kwa magole 50. Robert adalewa kuti: “Kulewa cadidi, ifepano tiribe nthawe izinji yakuti timbacite masenzeka. Tsono inepano na mkazangu tikathandizana kutsuka mapalato, bzimwebzi bzimbandicitisa kuti ndikomedwe kwene-kwene. Kucita bzinthu pabodzi kumbaticitisa kuti tikhale wakubverana. Ndipo lufoyi lathu limbapitiriza kukula.”

13. Kodi n’ciyani comwe mwamuna na mkazi an’funika kucita kuti akhale wakubverana?

¹³ Kumbukirani kuti kukhala nyumba ibodzi kungacitise lini kuti mwamuna na mkazi ambakhale wakubverana. Mkazi munango wa ku Brasil adalewa kuti: “Ntsiku zino timbakhala wakutanganidwa kwene-kwene, ndipo bzimwebzi bzingaticitise kukumbuka kuti timbamala nthawe pabodzi thangwe timbakhala nyumba ibodzi. Bzimwebzi bzidandicitisa kuzindikira kuti kundokhala pabodzi n’kwakukwanira lini. Koma nimbafunambo kukhala na nthawe yakuceza na mwamuna wangu.” Bruno na mkazi wace, Tays, ambakhala na nthawe yakuceza. Iye adalewa kuti: “Pa nthawe yomwe timbakhala tikuceza, timbatinya-tinya lini telefoni zathu, ndipo bzimwebzi bzimbacitisa kuti kucezako kukhale kwakudekeza.”

14. Penu banja limbakomedwa lini kucitira bzinthu pabodzi, n’ciyani comwe lingacite?

¹⁴ Tsono tani penu imwepo na mwanzanu wa m’banja mumbakomedwa lini mukakhala mukucita bzinthu pabodzi? Pinango bzimwebzi bzimbacitika thangwe rakuti mumbafuna lini bzinthu bzibodzi-bodzi, ndipo mukakhala muli pabodzi mumbandokhalira kupopotezana. N’ciyani comwe imwepo mungacite? Kumbukirani bza moto omwe tacezerana kumayambiriro kwa nkhani ino. Moto umbayamba pang’ono-pang’ono kugaka. Ndipo kuti ugake kwene-kwene, imwepo mumbafunikira kuikha nkhuni zizinji pa motopo. Mpsibodzi-bodzimbo na imwepo. Mbakhalani na nthawe yakucepa ya kuceza ntsiku zentse. Ndipo pomwe mukucita bzimwebzi, mbacitani cinthu comwe mwentse mungakomedwe naco, sikuti kucita cinthu comwe cingakucitiseni kuti mukalipizane. (Tiyago 3:18) Mukayamba kucita bzinthu bzing’ono-bzing’ono pabodzi, imwepo mun’dzayamba kufunana kwene-kwene.

MBALEMEKEZANANI

15. Thangwe ranyi kulemekezana n’kwakufunika m’banja?

¹⁵ Kulemekezana ni cinthu cakufunika kwene-kwene m’banja. Iko kuli ninga mphepo yomwe imbacitisa kuti moto ugake kwene-kwene. Kukakhala kulibe mphepo, moto umbathima. Mwakundendemerana na bzimwebzi, banja likakhala kuti limbalemekezana lini, lufoyi lawo limbamala mwakamfulumize. Tsono iwo akambalemekezana, bzimbacitisa kuti afunane kwene-kwene. Imwepo mun’funika lini kucita kumuuza mwanzanu wa m’banja kuti mumbamulemekeza. Iye an’funika kulewa yekha kuti ambalemekezedwa. Penny na Aret ali m’banja kwa magole 25. Aret adalewa kuti: “Pa mui pathu pana mpfatso thangwe rakuti timbalemekezana. Bzimwebzi bzimbacitisa kuti munthu ali-wentse akhale wakutsudzuka kulewa bzomwe akukumbuka.” N’ciyani comwe imwepo mungacite kuti mwanzanu wa m’banja ambabzibve kuti ambalemekezedwa? Mbatiwoneni bzomwe Abalahamu na Sara akhacita.

16. Kodi amuna angapfunze ciyani na bzomwe Abalahamu akhacita? (1 Pedru 3:7) (Onani cithunzi-thunzi.)

¹⁶ Abalahamu akhamulemekeza kwene-kwene mkazi wace Sara. Iye akhatetekera bzomwe Sara akhalewa ndipo akhacita bzomwe iye akumbira. Pa nthawe inango, Sara adakalipa ndipo adapasa mulandu Abalahamu pa bzomwe bzikhadacitikabzo. Kodi Abalahamuyo adamutawira kuipa? Ne. Iye akhadziwa kuti Sara akhali mkazi wakubvera, ndipo Sarayo akhamuthandiza pa bzakusankhula bzomwe iye akhacita. Abalahamu adamutetekera ndipo adamalisa bvutolo. (Genesesi 16:5, 6) Kodi tikupfunza ciyani na nkhani imweyi? Amuna, imwepo muna udindo bwa kumbacita bzakusankhula m’banja mwanu. (1 Akolinto 11:3) Tsono cinthu comwe mungacite pomwe mukanati kucita cakusankhulaco ndico kutetekera bzomwe mkazi wanu anilewa. (1 Akolinto 13:4, 5) Nthawe zinango, mkazi wanu angakhale na thupo ndipo angafune kufotokoza bza mu mtima mwace. Kodi imwepo mungalatize kuti mumbamulemekeza mwa kumutetekera mwatceru? (Werengani 1 Pedru 3:7.) Angela na Dmitry ali pa banja magole pafupi-fupi 30. Angela adalewa momwe bayace ambalatizira kuti ambamulemekeza. Iye adati: “A Dmitry nthawe zentse ambakhala wakukonzeka kunditetekera ndikakhala ndidakalipa na pomwe ndikufuna kuwauza cinthu. Iwo ambacita bzinthu mwakupirira, napo pomwe ndidapsoma.”

17. Kodi akazi angapfunze ciyani na bzomwe Sara akhacita? (1 Pedru 3:5, 6)

¹⁷ Sara akhalatiza kuti akhalemekeza bayace Abalahamu mwa kumbathandizira pa bzakusankhula bzomwe iye akhacita. (Genesesi 12:5) Pa nthawe inango, Abulahamu adatambira alendo mwakusaya kudikhiririka. Iye adauza mkazi wace Sara kuti asiye bzomwe akhacita kuti aphikire cakudya alendowo. (Genesesi 18:6) Sara adacitiratu bzomwe bayace Abalahamu adamuuza. Akazi, imwepo mungatewezere Sara mwa kumbathandizira bzakusankhula bza amuna wanu. Mukacita bzimwebzi, banja lanu lin’dzakhala lakulimba. (Werengani 1 Pedru 3:5, 6.) Dmitry, omwe wafotokozedwa mu ndime yapitayi, adalewa momwe mkazace ambalatizira kuti ambamulemekeza. Iye adati: “Nimbatenda kwene-kwene mkazangu thangwe ra nyongo yomwe iye ambaicita ya kuthandizira bzakusankhula bzomwe nimbacita, napo bzire bzomwe iye akhafuna lini kuti bzicitike tenepoyo. Ndipo bzinthu bzikasaya kufamba bwino, iye ambandinyoza lini.” Bzimwebzi bzikulatiza kuti bzimbakhala bzakupusa kufuna munthu omwe ambatilemekeza!

18. Kodi ni phindu liponi lomwe mabanja yan’dzakhala nalo yakacita nyongo yakuphatisa basa bzomwe tapfunza mu nkhani ino?

¹⁸ Sathani akufuna kudzonga lufoyi lomwe liripo pakati pa mabanja yacikristau. Iye ambadziwa kuti mabanja yakasiya kulatizana lufoyi, yangasiyembo kutumikira Yahova. Tsono, lufoyi lacadidi lingamale lini! Tenepo, tikufuna kuti lufoyi lomwe liripo m’banja mwanu likhale ninga lomwe limbafotokozedwa mu Nyimbo ya Salomau. Kuti bzimwebzi bzikwanisike, mbaikhani Yahova pa mbuto yakuyamba m’banja mwanu, mbakhalani na nthawe yakucita bzinthu pabodzi ndipo mbalemekezanani. Mukacita bzimwebzi, banja lanu lin’dzatumbizisa Yahova, omwe ni Mulengi wa mabanja. Ndipo lufoyi lomwe liripo m’banja mwanu lin’dzagaka ninga moyo ndipo lin’dzamala lini.