NKHANI YAKUPFUNZA 53
Alumbwana — Citani Nyongo Kuti Mukhale Wakukhwima Mwauzimu
“Khala wamphanvu, ndipo latiza kuti ndiwe mwamuna.” — 1 AMAMBO 2:2.
NYIMBO 135 Mwa Lufoyi, Yahova Ankukumbira kuti: “Mwanangu, Khala Wanzeru”
BZOMWE TIN’PFUNZAa
1. N’ciyani comwe Mkristau an’funika kucita kuti bzinthu bzimufambire bwino?
MAMBO Davide adauza Salomau kuti: “Khala wamphanvu, ndipo latiza kuti ndiwe mwamuna.” (1 Amambo 2:1-3) Amuna wentse wacikristau ntsiku zino angacite bwino kubvera malango yamweya. Kuti bzinthu bziwafambire bwino pa moyo wawo, iwo an’funika kupfunza malamulo ya Mulungu na kuyaphatisa basa. (Luka 2:52) Thangwe ranyi mpsakufunika kuti alumbwana akhale wakukhwima mwauzimu?
2-3. Thangwe ranyi mulumbwana an’funika kucita nyongo kuti akhale Mkristau wakukhwima mwauzimu?
2 Mkristau ana udindo bwakufunika m’banja na m’gwere. Alumbwana, tikupenukira lini kuti imwepo mudakumbukira kale bza mabasa yomwe mun’dzakhala nayo kutsogolo. Imwepo mungafune kudzakhala mtumiki wa nthawe zentse, mtumiki wakuthandiza ndipo mukadzakula mucidzakhala mkulu wa gwere. Ndipo imwepo mungadzafunembo kulowola mucikhala na wana. (Aefezo 6:4; 1 Timotio 3:1) Kuti mudzakwanise kudzacita bzentsenebzi mukadzakula, imwepo mun’funika kukhala Mkristau wakukhwima mwauzimu.b
3 Kodi n’ciyani cingakuthandizeni kuti mukhale Mkristau wakukhwima mwauzimu? Pana bzinthu bzakusiyana-siyana bzomwe imwepo mun’funika kupfunza kubzicita. Tsono, n’ciyani comwe mungacite tsapano lino kuti mukonzekere kudzacita mabasa yakusiyana-siyana kutsogolo?
BZOMWE MUNGACITE KUTI MUKHALE WAKUKHWIMA MWAUZIMU
Kutewezera makhalidwe ya Jezu kungakuthandizeni kukhala Mkristau wakukhwima mwauzimu (Onani ndime 4)
4. Kodi n’kuponi komwe mungagumane bziratizo kuti mutewezere? (Onani cithunzi-thunzi.)
4 Sankhulani bziratizo bzabwino kuti mutewezere. M’Bibliya muna wanthu wakukhulupirika omwe alumbwana angawatewezere. Wanthu amwewa akhafuna Mulungu ndipo adacita bzinthu bzakusiyana-siyana kuti asamalire wanthu wa Mulungu. Ndipo imwepo mungatewezerembo bziratizo bza Akristau wakukhwima mwauzimu m’banja mwanu na m’gwere. (Ahebereu 13:7) Ndipo munthu munango wabwino kwene-kwene omwe mungamutewezere ni Jezu Kristu. (1 Pedru 2:21) Pomwe mukupfunza bziratizo bzimwebzi, mbawonani makhalidwe yabwino yomwe iwo adalatiza. (Ahebereu 12:1, 2) Mukamala onani momwe mungatewezerere makhalidwe yawoyo.
5. Kodi n’ciyani comwe mungacite kuti mukwanise kumbakumbuka bwino, ndipo thangwe ranyi bzimwebzi mpsakufunika? (Salimo 119:9)
5 Citani nyongo kuti ‘mumbakumbuke bwino.’ (Mimwani 3:21) Munthu omwe ambakumbuka bwino ambacita lini bzinthu mwamphumapuma, koma iye ambakhala na nthawe yakukwanira kuti awone penu bzomwe an’funa kucitabzo mpsabwino ayai ne. Tenepo, citani nyongo kuti mukwanise kukhala na khalidwe limweri. Thangwe ranyi? Thangwe dzikoli lidadzala na alumbwana omwe ambafuna kucita bzinthu bza mu msolo mwawo ndipo ambandocita bzinthu mwakusaya kukumbuka. (Mimwani 7:7; 29:11) Ndipo cinango n’cakuti mungatewezerembo bzomwe mungawone m’manotisiya. Tsono kodi n’ciyani comwe cingakuthandizeni kuti mumbakumbuke bwino? Mbapfunzani nfundo za m’Bibliya mucimbakumbukira kuti thangwe ranyi izo n’zakuthandiza. Mukamala phatisani basa nfundozo kuti mucite bzakusankhula bzomwe Yahova ambakomedwa nabzo. (Werengani Salimo 119:9) Mukakwanisa kukhala na khalidwe limweri, bzin’dzalatiza kuti mukukhala Mkristau wakukhwima mwauzimu. (Mimwani 2:11, 12; Ahebereu 5:14) Onani momwe kukumbuka bwino kun’dzakuthandizirani pa bzakucitika bziwiri ibzi: Cakuyamba, pakucita bzinthu na mpfumakazi ndipo caciwiri, pakucita bzakusankhula pa nkhani ya kabvalidwe.
6. Kodi kukumbuka bwino kun’dzathandiza tani mulumbwana kuti ambalemekeze akazi?
6 Kukumbuka bwino kun’dzakuthandizani kuti mumbalemekeze akazi. Mpsacibadwa kuna mulumbwana wacikristau kuyamba kufuna mpfumakazi yacikristau. Tsono mulumbwana omwe ambakumbuka bwino an’dzanemba lini mensaje ayai kucita cinthu comwe cingalatize kuti akufuna mpfumakaziyo uko akuifuna lini, koma angacite bzimwebzo pokha-pokha penu mulumbwanayo akufuna kudzailowoladi mpfumakaziyo. (1 Timotio 5:1, 2) Penu iye ali pa umakhadzi na mpfumakazi, an’dzacita ciri-centse kuti akhale na mbiri yabwino mwakutcenkha kumbakhala na mpfumakaziyo pawokha-wokha. — 1 Akolinto 6:18.
7. Kodi kukumbuka bwino kun’dzathandiza tani mulumbwana kuti ambasankhule bwino bzakubvala na momwe ambabzidekesera?
7 Cinthu cinango comwe cin’dzalatiza kuti mulumbwana ambakumbuka bwino ni momwe iye an’dzasankhulira bzakubvala na momwe an’dzabzidekesera. Kazinji-kazinji bzakubvala bza moda bzimbakonzedwa na wanthu omwe ambalemekeza lini Yahova ndipo ana makhalidwe yakuipa. Iwo ambalatiza kuti ana makhalidwe yakuipa mwa kukonza bzakubvala bzakuthimba kwene-kwene bzomwe bzimbacitisa kuti amuna awoneke ninga akazi. Mulumbwana omwe akukhala wakukhwima mwauzimu akambasankhula bzakubvala bzomwe an’funa kubvala, iye ambatsogoleredwa na nfundo za m’Bibliya na kutewezerambo bziratizo bza abale wakukhulupirika wa m’gwere. Iye an’funika kubzibvunza kuti: ‘Kodi bzakubvala bzomwe nimbasankhula kuti ndibvale bzimbalatiza kuti ndina makumbukidwe yabwino ndipo nimbakumbukirambo wanthu winango? Kodi bzakubvala bzangu bzimbalatiza kwa wanthu winango kuti ndikufuna kutumikira Yahova na mtima wentse?’ (1 Akolinto 10:31-33; Tito 2:6) Mulumbwana omwe ambakumbuka bwino an’dzalemekezedwa na abale na mpfumakazi zace ndipo an’dzalemekezedwambo na Yahova.
8. Kodi n’ciyani comwe mulumbwana angacite kuti ambakhale wakuthembeka?
8 Khalani wakuthembeka. Mulumbwana wakuthembeka akapasidwa basa iye ambalicita na nyongo. (Luka 16:10) Onani ciratizo ca Jezu. Pomwe iye adapasidwa basa na Yahova, iye adalicita basalo na mtima wace wentse napo kuti nthawe zinango bzikhali bzakunesa kuti alicite. Iye akhafuna kwene-kwene wanthu ndipo maka-maka akhafuna kwene-kwene anyakupfunza wace, ndipopa adapereka moyo wace thangwe ra iwo. (Juwau 13:1) Mwakutewezera Jezu, mbaphatani basa lomwe mwapasidwa na nyongo. Penu mukudziwa lini bwino-bwino momwe mungalicitire basalo, khalani wakubzicepesa ndipo bvunzani Akristau wakukhwima. Lekani kumbandokomedwa na bzinthu bzing’ono-ng’ono bzomwe mukucita. (Aroma 12:11) Koma citani basalo mucimbakumbukira kuti “mukucitira Yahova, sikuti wanthu.” (Akolose 3:23) Pakuti ndimwe lini munthu wakulungamiratu, mukakhala mwaphonya mbabvumani kuphonya kwanuko ndipo mbakhalani wakubzicepesa. — Mimwani 11:2.
PFUNZANI MABASA YAKUSIYANA-SIYANA
9. Thangwe ranyi mulumbwana an’funika kupfunza mabasa?
9 Kuti imwepo mukhale Mkristau wakukhwima mwauzimu, mun’funikambo kupfunza mabasa. Bzimwebzi bzin’dzakuthandizani kuti mucite mabasa yakusiyana-siyana m’gwere, kuti mugumane basa lomwe lingadzakuthandizeni pa moyo wanu, kuthandiza banja lanu na kukhala wakubverana na anzanu. Mbatiwoneni mabasa yanango yomwe imwepo mungapfunze.
Kuwerenga na kunemba bwino kun’dzakuthandizani na kuthandizambo gwere (Onani ndime 10-11)
10-11. Kodi ni phindu liponi lomwe mulumbwana an’dzakhala nalo akapfunza kuwerenga na kunemba bwino? (Salimo 1:1-3) (Onani cithunzi-thunzi.)
10 Pfunzani kuwerenga na kunemba bwino. Bibliya limbalewa kuti munthu wakukondwa na omwe bzinthu bzimbamufambira bwino ngule omwe ntsiku zentse ambawerenga Fala la Mulungu na kukumbukira bzomwe awerengabzo. (Werengani Salimo 1:1-3.) Kuwerenga Bibliya ntsiku zentse kun’dzakuthandizani kuti mudziwe momwe Yahova ambakumbukira ndipo bzimwebzi bzin’dzakuthandizani kuti mumbakumbuke bwino. (Mimwani 1:3, 4) Amuna omwe ambacita bzimwebzi mbakufunika kwene-kwene m’gwere. Thangwe ranyi?
11 Abale na mpfumakazi zathu ambafuna amuna wanzeru kuti awapfunzise na kuwapasa malango ya m’Bibliya. (Tito 1:9) Imwepo mukadziwa kuwerenga na kunemba bwino bzin’dzakuthandizani kuti mumbakonzekere bwino nkhani na mitawiro yomwe in’dzalimbisa cikhulupiro ca Abale wanu wacikristau. Ndipo bzimwebzi bzin’dzakuthandizani kuti mumbanembe nfundo zakuthandiza zomwe mwazibva ku mitsonkhano ya gwere, mitsonkhano ya dera na mitsonkhano ya cigawo. Ndipo nfundo zimwezi zin’dzakuthandizani kulimbisa cikhulupiro canu na kulimbisambo cikhulupiro ca anzanu.
12. Kodi n’ciyani comwe cin’dzakuthandizani kuti mumbalewelewe bwino na anzanu?
12 Pfunzani kutetekera mwatceru na kulewalewa mwakudeka mtima. Mkristau wakukhwima mwauzimu an’funika kucita nyongo kuti ambalewelewe bwino na anzace. Munthu omwe ambalewalewa bwino na anzace ambatetekera pomwe anzace akulewalewa na kuphatisambo basa nfundo zawo. (Mimwani 20:5) Iye angakwanise kudziwa bzomwe mwanzace akukumbuka mwa kubva fala, kuwona momwe nkhope yace iriri na kalalewedwe kace. Imwepo mungakwanise lini kucita bzimwebzi penu mumbakwanisa lini kumala nthawe na anzanu. Penu imwepo mumbandophatisa basa mitcini ya nzeru kuti mulalewe nawo, imwepo mungakwanise lini kuzolowera kumbalewalewa bwino na anzanu. Ndipopa mbacitani nyongo yakuti mumbakhale na nthawe ya kumbalewalewa na anzanu maso na maso. — 2 Juwau 12.
Mpsabwino kupfunza basa lomwe lingadzakuthandizeni kutsogolo (Onani ndime 13)
13. Kodi n’ciyani cinango comwe mulumbwana angapfunze? (1 Timotio 5:8) (Onani cithunzi-thunzi.)
13 Pfunzani kubzisamalira. Mkristau wakukhwima mwauzimu an’funika kukhala ule omwe ambabzisamalira yekha na kusamalirambo banja lace. (Werengani 1 Timotio 5:8.) M’madziko manango alumbwana ambapfunza mabasa yakusiyana-siyana na pai wawo ayai na munthu munango omwe ni famidya yawo. M’madziko manango alumbwana ambapfunza mabasa ku xikola. Bziribe basa penu tingapfunze mabasa na pai wathu ayai tingapfunze ku xikola, koma cakufunika kwene-kwene n’cakuti tin’funika kupfunza basa lomwe lingadzatithandize kutsogolo. (Mabasa 18:2, 3; 20:34; Aefezo 4:28) Citani nyongo kuti mudziwike kuti mumbaphata basa mwakubzipereka. Mukacita bzimwebzi, imwepo mun’dzakwanisa kugumana basa ndipo mun’dzakhala pa basapo nthawe ikulu. Mabasa yomwe tacezeranaya njakufunika thangwe yangadzakuthandizeni kucita bzizinji kutsogolo. Bwerani tiwone udindo bunango bomwe mungadzakhale nabo kutsogolo.
KONZEKERANI UDINDO BOMWE MUN’DZAKHALA NABO KUTSOGOLO
14. Kodi n’ciyani comwe mulumbwana angacite kuti akonzekere kudzacita utumiki bwa nthawe zentse?
14 Mtumiki wa nthawe zentse. Akristau winango wakukhwima mwauzimu adayamba kucita utumiki bwa nthawe zentse pomwe akhali alumbwana. Kucita upainiya kungathandize mulumbwana kupfunza kuphata basa na wanthu wa m’bzikhalidwe bzakusiyana-siyana. Ndipo kumbathandizambo munthu kudziwa kuphatisa basa kobiri. (Afilipi 4:11-13) Kuti munthu awone penu angakwanise kucita utumiki bwa nthawe zentse, comwe cingamuthandize ndico kuyamba kucita upainiya bwakuthandiza. Azinji ambayamba kucita upainiya bwakuthandiza ndipo bzimwebzi bzimbawathandiza kuti adzakwanise kucita upainiya bwakukhazikika. Kucita upainiya kumbapereka mwayi kwa munthu kuti adzakwanise kucita utumiki bwa nthawe zentse ninga kuthandizira basa la kumanga-manga na kutumikira pa Beteli.
15-16. Kodi n’ciyani comwe mulumbwana angacite kuti athemere kukhala mtumiki wakuthandiza ayai mkulu wa gwere?
15 Mtumiki wakuthandiza ayai mkulu wa gwere. Abale wakukhwima mwauzimu an’funika kukhala na cakulinga ca kutumikira abale na mpfumakazi zawo ninga akulu wa gwere. Bibliya limbalewa kuti amuna omwe akufuna udindo bumwebu “akufuna basa labwino.” (1 Timotio 3:1) M’bale akanati kukhala mkulu, cakuyamba iye ambafunika kukhala mtumiki wakuthandiza. Atumiki wakuthandiza ambathandiza akulu mu njira zizinji zakusiyana-siyana. Akulu pabodzi na atumiki wakuthandiza ambathandiza abale na mpfumakazi mwakubzicepesa ndipo ambathandizirambo basa la kupalizira mwanyongo. Alumbwana angathemere kukhala atumiki wakuthandiza akandopfitsa magole 17. Ndipo atumiki wakuthandiza wakuthemera angaikhidwe kukhala akulu napo kuti ana magole 20.
16 Kodi imwepo mungacite ciyani kuti muthemere kukhala na udindo bumwebu? Bibliya limbafotokoza bzinthu bzakusiyana-siyana bzomwe mun’funika kucita. Ndipo kumbukiranimbo kuti comwe cingaticitise kuti tithemere ndico lufoyi lathu kwa Yahova, kuna banja lathu na kuna gwere. (1 Timotio 3:1-13; Tito 1:6-9; 1 Pedru 5:2, 3) Citani nyongo kuti mubvesese nfundo iri-yentse. Pembani kwa Yahova kuti akuthandizeni kukwanirisa bzinthu bzimwebzi.c
Yahova ambafuna kuti amuna ambafune akazawo na wana wawo, ambawathandize mwa kuthupi, ndipo kuposa bzentse ambawathandizembo mwauzimu (Onani ndime 17)
17. Kodi n’ciyani comwe mulumbwana angacite kuti akonzekere kuti adzakhale mwamuna na msolo wa banja? (Onani cithunzi-thunzi.)
17 Mwamuna na msolo wa banja. Ninga momwe Jezu adalewera, Akristau winango wakukhwima mwauzimu angasankhule kusaya kulowola ayai kusaya kulowodwa. (Mateu 19:12) Tsono imwepo mukasankhula kulowola dziwani kuti mun’dzathumizira udindo bunango pa moyo wanu thangwe mun’dzakhala mwamuna na msolo wa banja. (1 Akolinto 11:3) Yahova ambafuna kuti mwamuna ambafune mkazace na kumusamalira mwakuthupi na mwauzimu. (Aefezo 5:28, 29) Makhalidwe na mabasa yomwe tacezerana mu nkhani ino, yomwe ni kumbakumbuka bwino, kulemekeza akazi, kukhala wakuthembeka, yan’dzakuthandizani m’banja. Iyo yan’dzakukonzerekesani kuti mudzakwanise kucita udindo bwanu bwakukhala mwamuna na msolo wa banja.
18. Kodi n’ciyani comwe mulumbwana angacite kuti akonzekere kukhala pai?
18 Pai. Mukalowola imwepo mungadzakhale pai. Kodi n’ciyani comwe mungapfunze na Yahova kuti mukhale pai wabwino? Imwepo mungapfunze bzinthu bzizinji. (Aefezo 6:4) Yahova adauza Mwana wace Jezu Kristu kuti ambamufuna kwene-kwene. (Mateu 3:17) Imwepo mukakhala pai, nthawe zentse mbatsimikizirani wana wanu kuti mumbawafuna. Mbawatendani thangwe ra bzinthu bza bwino bzomwe iwo ambacita. Abereki omwe ambatewezera Yahova ambakwanisa kuthandiza wana wawo kuti akakula adzakhalembo amuna na akazi wakukhwima mwauzimu. Imwepo mungabakakonzekereretu bzimwebzi mwa kumbasamalira bwino maudindo yanu na kumbalatiza lufoyi wanthu wa m’banja mwanu na wa m’gwere. (Juwau 15:9) Bzimwebzi bzin’dzakuthandizani kuti mudzakwanirise bwino udindo bwanu bwakukhala mwamuna na pai. Pomwe mukucita nyongo ya kucita mabasa yamweya, imwepo mun’dzakhala wakufunika kwene-kwene kwa Yahova, kwa banja lanu na m’gwere.
KODI N’CIYANI COMWE IMWEPO MUN’CITA?
Alumbwana azinji omwe adapfunza mwakuphatisa basa bzinembo na kuphatisambo basa bzomwe adapfunzabzo adakhala Akristau wakukhwima mwauzimu (Onani ndime 19-20)
19-20. Kodi n’ciyani comwe alumbwana angacite kuti akhale Akristau wakukhwima mwauzimu? (Onani cithunzi-thunzi pa tsamba lakuyamba.)
19 Alumbwana, imwepo mun’funika kucita nyongo kuti mukhale Akristau wakukhwima mwauzimu. Imwepo mun’funika kusankhula wanthu wabwino kuti mutewezere, mucite nyongo kuti mumbakumbuke bwino, kukhala wakuthembeka, kupfunza mabasa yakusiyana-siyana na kukonzekera maudindo yomwe mun’dzakhala nayo kutsogolo.
20 Nthawe zinango imwepo mukakumbukira mabasa yomwe mun’dzakhala nayo kutsogolo mungacite thupo kwene-kwene. Tsono kumbukirani kuti Yahova ali wakukonzeka kukuthandizani. (Zaiya 41:10, 13) Ndipo abale na mpfumakazi zanu za m’gwere an’dzakuthandizanimbo. Imwepo mukakwanisa kukhala Mkristau wakukhwima mwauzimu, dziwani kuti moyo wanu un’dzakhala wa phindu na wakudekeza. Ifepano timbakufunani kwene-kwene alumbwanamwe! Ndipo tikufuna kuti Yahova akusimbeni pomwe mukucita nyongo yakukhala Akristau wakukhwima mwauzimu. — Mimwani 22:4.
NYIMBO 65 Tipitirize Kuyenda Patsogolo!
a Amuna wakukhwima mwauzimu mbakufunika kwene-kwene m’gwere. Mu nkhani ino, tiniwona bzomwe alumbwanamwe mungacite kuti mukhale wakukhwima mwauzimu.
b Onani “Kafotokozedwe ka Mafala Yanango” mu nkhani yomwe yapitayi.
c Onani bukhu lakuti Gulu Lochita Chifuniro cha Yehova, msolo 5, 6.