Tin’funika Kumbatenda Yahova Thangwe ra Kutilekerera Pikado Zathu

1-2. Kodi ni mwa njira iponi bzinthu pa moyo wathu bzikhali ninga bza tswaka lomwe likufotokozedwa pa ndime 1?

NDOKUMBUKIRANI bza tswaka linango lomwe lidabadwira m’banja la wanthu wakudala. Tsono ntsiku inango, abereki wace acita asidente ndipo afa. Pomwe tswakalo labva bzimwebzi lasunama kwene-kwene. Tsono pana cinthu cinango comwe calisunamisa pomwe. Tswakalo ladziwa kuti abereki wacewo adadzonga kobiri zomwe akhanazo ndipo akhana mangawa makulu. Tenepo, m’mbuto mwa kusala na cuma ca abereki wacewo, iro lasala na mangawa. Mangawayo ni makulu kwene-kwene ndipo iro lin’kwanisa lini kuyapagali.

² Tingalewe kuti bzomwe bzacitikira tswakali ndibzo bzomwe bzidaticitikirambo ifepano. Abereki wathu, Adamu na Eva, akhali wakulungama ndipo akhakhala mu paraizo wakudeka. (Genesesi 1:27; 2:7-9) Iwo angadakhala na moyo wakukondwa mpaka kale-kale. Tsono padacitika cinthu cakuipa kwene-kwene. Adamu na Eva adaphonya, ndipo thangwe ra bzimwebzo Yahova adawathotha mu zunde la Edeni. Iwo alibe pomwe kukhala na mwayi wakukhala na moyo mpaka kale-kale. Tsono n’ciyani comwe iwo adasiyira wana wawo? Bibliya limbalewa kuti: “Thangwe ra munthu m’bodzi [Adamu] pikado idapita m’dziko, ndipo pikadoyo idabweresa infa, tenepo infayo idafikira wanthu wentse thangwe wentse akhana pikado.” (Aroma 5:12) Adamu adatisiyira pikado yomwe imbaticitisa kuti tife. Pikado imweyi iri ninga mangawa makulu yomwe palibe ne m’bodzi wa ifepano omwe angakwanise kuyapagali. — Salimo 49:8.

3. Thangwe ranyi pikado zathu zimbandendemezeredwa na “mangawa”?

³ Jezu adandendemezera pikado na “mangawa.” (Luka 11:4; Mateu 6:12) Tikaphonya timbakhala ninga kuti tina mangawa kwa Yahova ndipo Yahovayo angadatisunda kuti tipagali mangawayo. Mangawayo yangadasaya kuperekedwa, iyo yangadamala pokha-pokha tikafa. — Aroma 6:7, 23.

4. (a) N’ciyani comwe cingadacitikira wanthu wentse omwe ana pikado angadasaya kuthandizidwa? (Salimo 49:7-9) (b) Kodi fala lakuti “pikado” m’Bibliya limbafuna kuthandauza ciyani? (Onani kwadru yakuti “Pikado.”)

⁴ Kodi tingakwanise kukhala pomwe na bzinthu bzentse bzomwe Adamu na Eva adaluza? Tekha tingakwanise lini. (Werengani Salimo 49:7-9.) Tingadasaya kuthandizidwa, tingadakhala lini na cidikhiro cakudzakhala na moyo wakusaya kumala kutsogoloku ayai cakudzalamusidwa. Tikafa tingadadzakhala lini pomwe na moyo ninga momwe bzimbacitikira na bzirombo. — Mpalizi 3:19; 2 Pedru 2:12.

5. Kodi Baba wathu wa lufoyi adatithandiza tani kupagali pikado zathu? (Onani cithunzi-thunzi.)

⁵ Kumbukirani bza tswaka lomwe lafotokozedwa pakuyamba lire. Kodi iro lingadabzibva tani bzingadakhala kuti mwamuna munango wakudala wabzipereka kuti apagali mangawa yaceyo? Kulewa cadidi, tswakalo lingadatenda kwene-kwene kudeka mtima kwa mwamunayo. Mwakundendemerana na bzimwebzi, Baba wathu wa lufoyi, Yahova, adatipasa mphaso yomwe idapagali pikado yomwe tidaitenga kwa Adamu. Jezu adabvekesa bzimwebzi pomwe adalewa kuti: “Mulungu adafuna kwene-kwene dziko la pantsi, mwakuti adapereka mwana wace m’bodzi yekha, kuti ali-wentse omwe an’khulupira mwanayo, aleke kudzaphedwa, koma adzakhale na moyo wakusaya kumala.” (Juwau 3:16) Kuthumizira bzimwebzi, mphaso imweyi imbatipasa mwayi wakukhala pa uxamwali bwakulimba na Yahova.

6. Kodi ni mafala yaponi ya m’Bibliya yomwe tin’cezerana mu nkhani ino, ndipo thangwe ranyi?

⁶ Kodi n’ciyani comwe tingacite kuti tikhale na mwayi wakulekereredwa pikado zathu? Kuti tigumane mtawiro wa mbvunzo umweyu, tin’cezerana thandauzo la mafala yanango ya m’Bibliya yomwe ni kubwezeresa mbverano, kumpsinkha pikado, cakulombolera, kulombola na kuwonedwa kukhala wakulungama. Kucezerana mafala yamweya kun’tithandiza kuwona bzomwe Yahova adacita kuti atilekerere ndipo tin’dzamutenda kwene-kwene.

CAKULINGA: KUBWEZERESA MBVERANO

7. (a) Kodi n’cinthu ciponi cinango comwe Adamu na Eva adaluza? (b) Ninga mbadwa za Adamu na Eva, n’ciyani comwe tin’funikira mwakamfulumize? (Aroma 5:10, 11)

⁷ Kuthumizira pa kuluza mwayi omwe akhanawo wakukhala na moyo mpaka kale-kale, Adamu na Eva adaluza uxamwali bomwe akhanabo na Baba wawo Yahova. Ndipo pomwe iwo akhanati kuphonya, akhacita mbali ya banja la Yahova. (Luka 3:38) Tsono pomwe iwo adaphonyera Yahova, iye adawacosa m’banja mwace. Bzimwebzi bzidacitika pomwe iwo akhanati kukhala na wana. (Genesesi 3:23, 24; 4:1) Na tenepo, pakuti ifepano ndife mbadwa zawo tin’funika kukhala pa mbverano na Yahova. (Werengani Aroma 5:10, 11.) Kulewa kunango, tin’funika kukhala pa uxamwali na iye. Ninga momwe bukhu linango limbalewera, “kubwezeresa mbverano” kumbathandauza “kukhala pomwe pa uxamwali na munthu omwe akhali nyamadulanthaka wathu.” Bzakudabwisa mpsakuti ni Yahova omwe adayamba kucita bzimwebzi. Mwa njira iponi?

MAKONZEDWE: KUMPSINKHA PIKADO

8. Kodi kumpsinkha pikado n’ciyani?

⁸ Kumpsinkha pikado ni makonzedwe yomwe Yahova adayakhazikisa kuti abwezerese uxamwali pakati pa iye na wanthu. Bzimwebzi bzimbaphatanidza kucinjanisa cinthu na cinango comwe cina pereso yakundendemerana na cinthuco. Mwa njira imweyi, cinthu comwe cikhadataika ayai comwe cikhadapfudzika cingabwezeresedwe pomwe. Bzinembo Bzacigerego Bzacikristau bzimbalewambo kuti Yahova adacita makonzedwe kuti bzikhale bzakukwanisika kuti wanthu akhale pa uxamwali na iye. — Aroma 3:25.

9. Kodi ni makonzedwe yaponi yakusaya kukhalisa yomwe Yahova adacita kuti Ajirayeri alekereredwe pikado zawo?

⁹ Kuti Ajirayeri akhale pa uxamwali na iye, Yahova adacita makonzedwe yakusaya kukhalisa kuti iye ambawalekerere pikado zawo. Ajirayeri akhakumbukira Ntsiku ya Kumpsinkha Pikado gole liri-lentse. Pa ntsikuyo, mkulu wa antsembe akhambapereka ntsembe za bzifuwo m’mbuto mwa wanthu wentse. N’cadidi kuti ntsembezo zikhamalisiratu lini pikado za wanthuwo thangwe bzifuwo mpsing’ono kwene-kwene tikabzindendemezera na wanthu. Tsono, Ajirayeriwo akakungula na kupereka ntsembe zomwe zikhafunikira, Yahova akhawalekerera. (Ahebereu 10:1-4) Kuthumizira bzimwebzi, makonzedwe ya kumpsinkha pikado yakhakumbusa Ajirayeri kuti akhali wakuperewera nakuti akhafunikira ntsembe yomwe ingadamalisiratu pikado zawo.

10. Kodi ni makonzedwe yaponi yakukhalisa yomwe Yahova adacita kuti tilekereredwe pikado zathu?

¹⁰ Kodi ni makonzedwe yaponi yakukhalisa yomwe Yahova adacita kuti tilekereredwe pikado zathu? Iye adacita makonzedwe yakuti Mwana wace wakufunidwa ‘apereke ntsembe kabodzi kokha mpaka kale-kale, kuti anyamule pikado za wanthu azinji.’ (Ahebereu 9:28) Jezu adapereka “moyo wace kuti alombole wanthu azinji.” (Mateu 20:28) Kodi cakulombolera n’ciyani?

PERESO: CAKULOMBOLERA

11. (a) Mwakubverana na Bibliya, kodi cakulombolera n’ciyani? (b) Kodi n’ciyani comwe cikhafunika kuti cakulomboleraco ciperekedwe?

¹¹ Mwakubverana na Bibliya, cakulombolera ni pereso yomwe imbaperekedwa kuti impsinkhe pikado na kubwezeresa mbverano. Kwa Yahova cakulombolera cidabwezeresa bzomwe bzikhadaluzidwa. Mwa njira iponi? Kumbukirani kuti Adamu na Eva adaluza moyo wakulungama na mwayi wakukhala na moyo mpaka kale-kale. Na tenepo, pereso ya cakulombolera ikhafunika kukhala yakundendemerana na ya cinthu comwe cidaluzidwa. (1 Timotio 2:6) Ndipo cakulomboleraco cikhafunikira kuperekedwa na munthu (1) wakulungamiratu; (2) omwe angakhale na moyo wakusaya kumala na (3) omwe akhali wakukonzeka kupereka moyo wace thangwe ra ifepano. Munthu umweyu ndiye omwe angadakwanisa kubwezeresa moyo omwe ukhadaluzidwa.

12. Thangwe ranyi Jezu adakwanisa kupereka cakulombolera?

¹² Mbatiwoneni mathangwe matatu yomwe yakulatiza kuti Jezu ndiye omwe angadakwanisa kupagali pereso ya cakulombolera. (1) Iye ngwakulungama ndipo “alibe kucita pikado.” (1 Pedru 2:22) (2) Thangwe ra bzimwebzo iye angadakhala na moyo mpaka kale-kale pa dziko la pantsi. (3) Iye akhali wakukonzeka kutifera. (Ahebereu 10:9, 10) Ninga munthu wakulungamiratu, Jezu akhali wakundendemerana na mwamuna wakutoma, Adamu pomwe iye akhanati kuphonya. (1 Akolinto 15:45) Thangwe ra infa ya Jezu, iye adampsinkha pikado ya Adamu ayai kubwezeresa bzomwe Adamu adaluza. (Aroma 5:19) Mwa njira imweyi, Jezu adakhala “Adamu wakumalizira.” Mpsakufunikira lini pomwe kuti munthu munango wakulungamiratu adzapagali bzomwe Adamu adaluza. Jezu adafa “kabodzi kokha mpaka kale-kale.” — Ahebereu 7:27; 10:12.

13. Kodi n’kusiyana kuponi komwe kulipo pakati pa kumpsinkha pikado na cakulombolera?

¹³ N’kusiyana kuponi komwe kulipo pakati pa makonzedwe ya kumpsinkha pikado na cakulombolera? Makonzedwe ya kumpsinkha pikado ni bzomwe Mulungu adacita kuti abwezerese uxamwali pakati pa iye na wanthu. Cakulombolera ni pereso yomwe idapagalidwi kuti bzikhale bzakukwanisika kuti pikado za wanthu zimpsinkhidwe. Pereso imweyi imbaimira mulopa wa Jezu omwe udaperekedwa thangwe ra ifepano. — Aefezo 1:7; Ahebereu 9:14.

PHINDU LACE: KULOMBOLA NA KUWONEDWA KUKHALA WAKULUNGAMA

14. N’ciyani comwe tin’cezerana tsapano?

¹⁴ Kodi ni phindu liponi lomwe timbakhala nalo thangwe ra bzomwe Yahova adaticitirabzi? Kuti titawire mbvunzo umweyu, tsapano tin’cezerana bza thandauzo la mafala mawiri yomwe Bibliya limbayaphatisa basa kuti litithandize kubvesesa phindu lomwe timbakhala nalo thangwe ra kulekerera kwa Yahova.

15-16. (a) M’Bibliya, kodi fala lakuti “kulombola” limbathandauza ciyani? (b) Kodi timbabzibva tani thangwe rakuti tidatsudzulidwa ku pikado na infa?

¹⁵ M’Bibliya, fala lakuti kulombola limbathandauza kutsudzula munthu pambuyo pa kumupagaliri cakulombolera. Mpostolo Pedru adalewa kuti: “Imwepo mukudziwa kuti mulibe kupulumusidwa ku mkhalidwe wanu wakusaya basa omwe mudatambira kwa makolo yanu yakale na bzinthu bzakudzongeka ninga prata na oro, koma mudapulumusidwa na mulopa wakufunika kwene-kwene wa Kristu omwe uli ninga mulopa wa bira wakusaya cirema ne nthontsa.” — 1 Pedru 1:18, 19.

¹⁶ Thangwe ra ntsembe ya cakulombolera tingatsudzulidwe ku pikado na infa bzomwe bzimbatiboneresa. (Aroma 5:21) Timbatenda kwene-kwene Yahova na Jezu thangwe ra kutilombola na mulopa wa Jezu. — 1 Akolinto 15:22.

17-18. (a) Kodi kuwonedwa kukhala wakulungama kumbathandauza ciyani? (b) Kodi ni phindu liponi lomwe timbakhala nalo thangwe ra Yahova kutiwona kukhala wakulungama?

¹⁷ Kuwonedwa kukhala wakulungama kumbathandauza kuti Yahova ambatiuza lini kuti tipagali pikado zomwe tidacita. Napo kuti iye ambacita bzimwebzi, ambacinja lini malamulo yace yakulungama. Iye ambatiwona lini kuti ndife wakulungama thangwe ra kuti tikuthemera ayai kuti ambandosiya tenepo pikado zathu. Koma iye ngwakukonzeka kutilekerera pikado zathu thangwe timbalatiza kuti timbakhulupira bzomwe Yahova na Mwana wace, Jezu, adaticitira pakucita makonzedwe ya cakulombolera. — Aroma 3:24; Agalatiya 2:16.

¹⁸ Kodi ni phindu liponi lomwe timbakhala nalo Yahova akatiwona kukhala wakulungama? Winango ambagumana phindu thangwe adasankhulidwa kuti akatonge pabodzi na Jezu kudzulu na kukhala wana wa Mulungu. (Tito 3:7; 1 Juwau 3:1) Pikado zawo zalekereredwa. Bziri ninga kuti alibe kucita pikado iri-yentse ndipo mwa njira imweyi mbakuthemera kukatonga mu Umambo bwa Mulungu. (Aroma 8:1, 2, 30) Winango omwe adawonedwa kukhala wakulungama an’dzakhala na moyo mpaka kale-kale pano pa dziko la pantsi. Yahova adalekerera pikado zawo ndipo iwo ni axamwali wace. (Tiyago 2:21-23) Wa m’thimu likulu omwe an’dzapulumuka pa Armagedo an’dzakhala na mwayi wakukhala na moyo wakusaya kumala. (Juwau 11:26) Wanthu “wakulungama” na “wakusaya kulungama” omwe adafa an’dzalamusidwa. (Mabasa 24:15; Juwau 5:28, 29) Pakumalizira pace, atumiki wentse omwe ambabvera Yahova omwe ali pa dziko la pantsi an’dzakhala na “ufulu bwa ulemerero bwa wana wa Mulungu.” (Aroma 8:21) Tikudikhirira mwakukondwa nthawe yomwe tin’dzakhala pomwe wana wakulungamiratu wa Baba wathu, Yahova!

19. Kodi bzinthu bzidacinja tani pa moyo wathu thangwe ra bzomwe Yahova na Jezu adaticitira? (Onani kwadru yakuti “Kodi Mafalaya Yambathandauza Ciyani kwa Ifepano?”)

¹⁹ Kulewa cadidi, ifepano tikhalibe cidikhiro ninga tswaka lomwe lafotokozedwa pakuyamba lire lomwe lidaluza bzentse licikhala na mangawa makulu yomwe lingadakwanisa lini kuyapagali. Koma Yahova adatithandiza. Bzinthu bzidacinja pa moyo wathu thangwe Yahova adanyang’ana njira yakutilekererera pikado zathu ndipo Jezu adapereka cakulombolera. Tikakhulupira Jezu Kristu timbalomboledwa ayai kutsudzulidwa ku pikado na infa. Yahova akalekerera pikado zathu bzimbakhala ninga kuti tiribe kuzicita pikadozo. Kuposa bzentse, cinthu cakufunika kwene-kwene n’cakuti tingakhale pa uxamwali na Baba wathu wa lufoyi Yahova.

20. Kodi tin’dzacezerana ciyani mu nkhani yomwe ikubwerayi?

²⁰ Tikambakumbukira bzentse bzomwe Yahova na Jezu adaticitira timbatenda kwene-kwene. (2 Akolinto 5:15) Mu nkhani yomwe ikubwerayi, tin’dzawona bziratizo bzakusiyana-siyana bza m’Bibliya bzomwe bzin’dzatithandiza kuwona kuti Yahova akatilekerera timbafunikira lini pomwe kupitiriza kubzipasa mulandu.