Mbapfunzani na Bzithunzi-thunzi

Mabukhu yathu yambakhala na bzithunzi-thunzi bzizinji bzomwe bzimbatipfunzisa nfundo zakufunika kwene-kwene. Kodi imwepo mungaphatise tani basa bzithunzi-thunzi bzimwebzi?

• Mbayambani kuwona bzithunzi-thunzi pomwe mukanati kuwerenga nkhani iri-yentse. Bzithunzi-thunzi bzingakucitiseni kufuna kuwerenga nkhaniyo. Tingabzindendemezere bzithunzi-thunzibzo na cakudya cabwino, tikaciwona “cimbatidekera” ndipo timbafuna kucidya. Tenepo, mbabzibvunzani kuti: ‘N’ciyani comwe ndikuwona?’ — Amose 7:7, 8.

• Pomwe mukuwerenga nkhani, mbayezerani kukumbukira thangwe lomwe lacitisa kuti bzithunzi-thunzi bziikhidwe mu nkhaniyo. Mbawerengani mafala ya m’bzithunzi-thunzi penu yalipo. Mbawonani kubverana komwe kulipo pakati pa bzithunzi-thunzibzo na nkhaniyo ndipo mbawonanimbo momwe mungaphatisire basa bzomwe mukupfunza na cithunzi-thunzi ciri-centse pa moyo wanu.

• Mukamala kuwerenga nkhaniyo, phatisani basa bzithunzi-thunzi kuti mukumbukire nfundo zikulu-zikulu. Yezerani kukumbukira nfundo zomwe mwapfunza na cithunzi-thunzi ciri-centse.

• Onani pomwe bzithunzi-thunzi bza mu revista ino ndipo yezerani kuwona penu mukadakumbukira nfundo zomwe mwapfunza.