Thangwe Ranyi Dzina la Yahova Ndakufunika kwa Jezu?

1-2. (a) Kodi n’ciyani comwe Jezu adacita usiku bomwe akhanati kuphedwa? (b) Kodi ni mibvunzo iponi yomwe in’tawiridwa mu nkhani ino?

KUKHADASALA pang’ono kudoka, pa cinai gole la 14 Nisani, 33 pomwe Kristu akhadabwera kale, Jezu akhadasala pang’ono kuphindukiridwa, kutongedwa, kuboneresedwa na kuphedwa. Pa nthawe imweyi ni pomwe iye na apostolo wace akhadamala kucita Cilaliro ca Mbuya mu cipinda ca m’dzaulu. Pambuyo pa Cilaliroci Jezu adapasa malango yakumalizira apostolo wace kuti awakonzekerese na kuwalimbikisa. Ndipo pomwe akhadasala pang’ono kuti acoke, Jezu adacita mpembo wakufunika kwene-kwene. Ifepano timbawerenga bza mpembo umweyu pa Juwau kapitulo 17.

² Mu nkhani ino, tiniwona bzinthu bzinango bzomwe tingapfunze na mpembo wa Jezu. Kodi iye akhacita thupo na ciyani pomwe akhanati kufa? Kodi n’ciyani comwe cikhali cakufunika kwene-kwene kwa iye pomwe akhali pa dziko la pantsi? Mbatiwoneni mitawiro ya mibvunzoyi.

“INEPANO NDAWADZIWISA DZINA LANU”

3. N’ciyani comwe Jezu adalewa pakulewa bza dzina la Yahova, ndipo akhafuna kuthandauza ciyani na bzimwebzi? (Juwau 17:6, 26)

³ Mu mpembo wace, Jezu adalewa kuti: “Inepano ndawadziwisa dzina lanu.” Bzimwebzi bzikulatiziratu kuti cimweci cikhali cinthu cakufunika kwene-kwene pa moyo wace, thangwe iye adalewa bzimwebzi kawiri kentse. (Werengani Juwau 17:6, 26.) Kodi Jezu akhafuna kulewa ciyani? Kodi iye adapfunzisa anyakupfunza wace bza dzina la Mulungu? Anyakupfunza wa Jezu akhali Adjuda ndipo akhadziwa kale kuti dzina la Mulungu ni Yahova. Dzina limweri limbagumanika m’Bzinembo bza Cihebereu maulendo 7000. Tenepo bzomwe Jezu adacita alibe kundowauza kokha kuti dzina la Mulungu ni Yahova koma iye adawapfunzisa thandauzo la dzinalo. Jezu adathandiza anyakupfunza wace kudziwa bwino Yahova, kuphatanidzambo cakulinga comwe iye anaco na dzikoli pabodzi na wanthu, bzomwe iye akhadacita kale, bzomwe iye an’dzacita na makhalidwe yace. Ni Jezu yekha omwe angadakwanisa kupfunzisa bwino bzinthu bzimwebzi thangwe iye ambadziwa bwino Yahova kuposa munthu winango ali-yentse.

4-5. (a) Kodi dzina la munthu lingakhale tani lakufunika kwene-kwene kwa ifepano? (b) Kodi anyakupfunza wa Jezu adafika tani pa kumudziwa bwino Yahova?

⁴ Tiyezezere kuti m’gwere mwanu muna mkulu munango wa gwere omwe ambacemeredwa David ndipo ni dotolo. Ndipo ntsiku inango pomwe moyo wanu uli pa ngozi imwepo mukuyenda ku xipitali komwe mkuluyo ambaphata basa ndipo iye akupulumusa moyo wanu. Tsapano imwepo mumbamufuna kwene-kwene m’baleyo mukambabva bza dzina lace ndipo mukakumbukirambo bzomwe iye adakucitirani. Napo kuti iye ni mkulu m’bodzi-bodzi ule omwe mumbamudziwa kwa magole mazinji, koma tsapano iye ni dotolo omwe wapulumusa moyo wanu.

⁵ Mwa njira ibodzi-bodziyi, anyakupfunza wa Jezu akhadziwa kale bza dzina la Yahova. Tsono dzina limweri lidadzakhala na thandauzo kwa iwo thangwe Jezu adawathandiza kudziwa bwino Yahova. Thangwe ranyi tikulewa tenepo? Thangwe Jezu akhatewezera makhalidwe ya Baba wace pa bzentse bzomwe iye akhalewa na kucita. Tenepo pomwe anyakupfunzawo akhawona momwe Jezu akhapfunzisira na kuwonambo momwe iye akhacitira bzinthu na wanthu bzimwebzi bzidacitisa kuti amudziwe bwino Yahova. — Juwau 14:9; 17:3.

“DZINA LANU LOMWE MUDANDIPASA”

6. Kodi Jezu akhafuna kulewa ciyani pomwe adalewa kuti iye akhadapasidwambo dzina la Yahova? (Juwau 17:11, 12)

⁶ Mu mpembo wace, Jezu adakumbirira anyakupfunza wace kuti: “Anyang’anireni thangwe ra dzina lanu lomwe mudandipasa.” (Werengani Juwau 17:11, 12.) Kodi bzimwebzi bzikuthandauza kuti dzina la Jezu lingadadzakhala Yahova? Ne. Jezu adalewa dzina la Yahova ninga ‘dzina lace.’ Bzimwebzi bzikulatiziratu kuti Jezu alibe kucemeredwa na dzina la Yahova. Tsono thangwe ranyi Jezu adalewa kuti iye akhadapasidwambo dzina la Mulungu? Cakuyamba, Jezu akhali muimikiri ndipo akhalewalewa m’mbuto mwa Yahova. Iye adabwera mu dzina la Baba wace ndipo adacitambo mabasa mazinji mu dzina la Baba wacewo. (Juwau 5:43; 10:25) Kuthumizira bzimwebzi, dzina lakuti Jezu limbathandauza kuti “Yahova ni Mpulumusi.” Tenepo thandauzo la dzina la Jezu limbaphatanidzambo dzina la Yahova.

7. Kodi Jezu angadalewalewa tani m’mbuto mwa Yahova? Fotokozani.

⁷ Kuti tibvesese bwino-bwino momwe Jezu akhalewalewera m’mbuto mwa Yahova, kumbukirani bza ciratizo ici: Mtongi angatumize munthu kuti akalewelewe m’mbuto mwace, ndipopa mafala yomwe munthuyo ambakalewa yambakhala na mphanvu ibodzi-bodzi na mafala ya mtongiyo. Mwa njira ibodzi-bodziyi, Jezu akhaimira Yahova ndipo akhalewalewa mu dzina la Yahovayo. — Mateu 21:9; Luka 13:35.

8. Thangwe ranyi Yahova adalewa kuti Jezu akhana dzina lace napo pomwe akhanati kubwera pa dziko la pantsi? (Ekisodo 23:20, 21)

⁸ M’Bibliya, Jezu ambacemeredwa Fala thangwe Yahova adamuphatisa basa kuti apereke malango kwa anjo kuphatanidzambo wanthu. (Juwau 1:1-3) Pinango pentse Jezu ni anjo omwe Yahova adamutumiza kuti akasamalire Ajirayeri pomwe akhali mu dambo. Pomwe Yahova adauza Ajirayeri kuti abvere anjo ule, iye adawauzambo thangwe lace. Iye adati: “Pakuti dzina langu liri mwa iye.”a (Werengani Ekisodo 23:20, 21.) Yahova adalewa bzimwebzi thangwe Jezu ambaimira iye ndipo ni mtumiki mkulu omwe ambakhotcerera na kucenesa dzina la Baba wace.

“BABA LEMEKEZANI DZINA LANU”

9. Kodi n’ciyani comwe cikulatiza kuti dzina la Yahova likhali lakufunika kwa Jezu? Fotokozani.

⁹ Ninga momwe tawonera, dzina la Yahova likhali lakufunika kwene-kwene kwa Jezu napo pomwe iye akhanati kubwera pa dziko la pantsi. Ndipo pomwe akhali pa dziko la pantsi, bzentse bzomwe iye adacita bzidalatiza kuti dzina la Yahova likhali lakufunika kwene-kwene kwa iye! Kuphampha kwa utumiki bwace, Jezu adakumbira kuti: “Baba lemekezani dzina lanu.” Pa nthawe imweyoletu, Baba wace adamutawira ndipo kudabveka fala likukuwa ninga ciphaliwali liciti: “Ndalilemekeza kale ndipo nin’dzalilemekeza pomwe.” — Juwau 12:28.

10-11. (a) Kodi Jezu adalemekeza tani dzina la Yahova? (Onanimbo cithunzi-thunzi.) (b) Thangwe ranyi dzina la Yahova lin’funika kucenesedwa?

¹⁰ Jezu adalemekezambo dzina la Baba wace. Mwa njira iponi? Njira ibodzi ya momwe iye adacitira bzimwebzi ndiyo kuuza wanthu bza makhalidwe yakudabwisa ya Baba wace na bzinthu bzabwino bzomwe ambacita. Tsono kundocita bzimwebzi kukhali lini kwakukwanira. Jezu akhafuna kulatiza kuti bzentse bzomwe Baba wace akhacita bzikhali bzabwino. Nakuti dzina lace ndakucena. Jezu adalatiza momwe bzimwebzi bzikhaliri bzakufunika pomwe adapfunzisa anyakupfunza wace momwe angacitire mpembo. Iye adati: “Baba wathu omwe muli kudzulu, dzina lanu licenesedwe.” — Mateu 6:9.

¹¹ Tsono thangwe ranyi dzina la Mulungu lin’funika kucenesedwa? Thangwe mu zunde la Edeni Sathani adanyoza dzina la Yahova ndipo adalewambo magunkha pakulewa bza iye. Sathani adalewa kuti Yahova ngwakunama ndipo akhabisirambo bzinthu bzabwino Adamu na Eva. (Genesesi 3:1-5) Mwakucita bzimwebzi, Sathani adacitisa kuti wanthu awone ninga kuti Yahova ambacita lini bwino bzinthu. Thangwe ra gunkha lomwe Sathani adalewa pinango wanthu adakumbuka kuti Yahova ni Mulungu wakuipa. Patsogolo pace mu nthawe ya Djobi, Sathani adalewa kuti Djobi akhatumikira Mulungu thangwe ra bzinthu bzomwe iye adamupasa. Iye adalewa kuti wanthu an’dzasiya kutumikira Yahova akagumana na mabvuto thangwe wanthuwo alibe lufoyi likulu na Yahovayo. (Djobi 1:9-11; 2:4) Pakhafunika kupita nthawe kuti bziwoneke padeca kuti mbani omwe akhali nyakunama pakati pa Yahova na Sathani.

“NDIKUPEREKA MOYO WANGU”

12. Kodi Jezu akhali wakukonzeka kucita ciyani thangwe ra lufoyi lomwe akhanalo pa dzina la Yahova?

¹² Thangwe ra lufoyi lomwe Jezu akhanalo kuna Yahova iye akhafuna kucita bzentse bzomwe angadakwanisa kuti acenese dzina la Yahovayo. Iye akhali wakukonzeka kufa kuti alatize kuti bzentse bzomwe Yahova ambacita mpsabwino.b (Juwau 10:17, 18) Wanthu awiri wakulungama Adamu na Eva adaphindukira Yahova ndipo adakhala ku mbali ya Sathani. Tsono mwakusiyana na wanthu amwewa, Jezu akhali wakukonzeka kubwera pa dziko la pantsi na kulatizambo lufoyi lomwe iye akhanalo kwa Baba wace. Jezu adalatiza bzimwebzi mwakubvera Yahova pa moyo wace wentse. (Ahebereu 4:15; 5:7-10) Jezu adapitiriza kukhala wakukhulupirika pa moyo wace mpaka pomwe iye adaphedwa pa muti wakuzunzidwira. (Ahebereu 12:2) Mwa njira imweyi, iye adalatiza lufoyi lace kwa Yahova na pa dzina la Yahovayo.

13. Thangwe ranyi Jezu akhali munthu wabwino omwe angadalatiza kuti Sathani ngwakunama? (Onanimbo cithunzi-thunzi.)

¹³ Bzentse bzomwe Jezu adacita bzidalatiziratu kuti Sathani ngwakunama sikuti Yahova! (Juwau 8:44) Jezu akhadziwa bwino Yahova kuposa munthu ali-wentse omwe adakhala kale pa dziko la pantsi. Tenepo bzingadakhala kuti bzinthu bzentse bzomwe Sathani adanamizira Yahova mpsacadidi, Jezu angadadziwa bzimwebzo. Tsono Jezu adapitiriza kukhala wakukhwimika pakukhotcerera dzina la Yahova. Napo kuti Yahova alibe kumukhotcerera pomwe akhafuna kuphedwa, Jezu akhali wakukonzeka kufa na kupitirizambo kukhala wakukhulupirika. — Mateu 27:46.c

“INEPANO . . . NDAMALIZA BASA LOMWE MUDANDIPASA”

14. Kodi Yahova adasimba tani Jezu thangwe ra kukhulupirika kwace?

¹⁴ Mu mpembo omwe Jezu adaucita pomwe akhanati kufa, iye adalewa kuti: “Inepano . . . ndamaliza basa lomwe mudandipasa kuti ndicite.” Jezu akhakhulupira kuti angadapitiriza kukhala wakukhulupirika Yahova angadamusimba. (Juwau 17:4, 5) Yahova alibe kulekerera kuti iye apitirize kukhala m’thenje. (Mabasa 2:23, 24) Yahova adalamusa Jezu ndipo adamupasa udindo bukulu kwene-kwene kudzulu. (Afilipi 2:8, 9) Na kupita kwa nthawe, Jezu adakhala Mambo wa Umambo bwa Mulungu. Kodi n’ciyani comwe Umambobo bun’dzacita? Jezu adapereka mtawiro pomwe adapfunzisa anyakupfunza wace momwe angacitire mpembo, iye adati: “Umambo bwanu bubwere. Kufuna kwanu kucitike pantsi pano, ninga kudzulu.” — Mateu 6:10.

15. Kodi Jezu an’dzacita ciyani kutsogolo?

¹⁵ Tsapanopa Jezu anicita nkhondo na anyamadulanthaka wa Mulungu ndipo an’dzapfudza wanthu wakuipa pa nkhondo ya Armagedo. (Apokalipse 16:14, 16; 19:11-16) Patsogolo pace, Jezu an’dzathusa Sathani “kuciphompho,” komwe an’dzacita lini pomwe cinthu ciri-centse ndipo bzin’dzakhala ninga kuti wafa. (Apokalipse 20:1-3) Tenepo Jezu an’dzatonga kwa magole 1000, an’dzabwezeresa pomwe mtendere pa dziko la pantsi ndipo an’dzathandizambo wanthu kuti akhale wakulungama. Iye an’dzalamusambo anyakufa kuti akhale na moyo pa dziko la pantsi. Pakumalizira, cakulinga ca Yahova cin’dzakwanisika! — Apokalipse 21:1-4.

16. Kodi moyo un’dzakhala tani pambuyo pa utongi bwa magole 1000?

¹⁶ Kodi moyo un’dzakhala tani pambuyo pa utongi bwa magole 1000? Pikado na kuperewera kun’dzakhala kulibe. Wanthu an’dzafunikira lini pomwe kukumbira kuti alekereredwe pikado zawo. Iwo an’dzafunikira lini pomwe cakulombolera, mkhala-pakati ayai wantsembe kuti akhale axamwali wa Yahova. Ndipo pakumalizira “infa ninga nyamadulanthaka wakumalizira [yomwe tidatengera kwa Adamu] in’dzapfudzidwa.” Nthutu zin’dzakhala ziribe pomwe wanthu thangwe anyakufa an’dzalamusidwa. Wanthu wentse pa dziko la pantsi an’dzakhala wakulungama. — 1 Akolinto 15:25, 26.

17-18. (a) N’ciyani comwe cin’dzacitika kuphampha kwa magole 1000? (b) Kodi n’ciyani comwe Jezu an’dzacita kuphampha kwa utongi bwace? (1 Akolinto 15:24, 28) (Onanimbo cithunzi-thunzi.)

¹⁷ Pana cinthu cinango comwe cin’dzacitika kuphampha kwa magole 1000. Kodi cinthuco n’ciponi? Cinthuco n’cakuti palibe pomwe munthu omwe an’dzapenukira kuti Yahova ngwakucena na wakulungama. Thangwe ranyi tikulewa tenepo? Thangwe mu zunde la Edeni, Sathani adanamizira Yahova kuti ambatonga lini wanthu mwalufoyi ndipo ngwakunama. Kucokera nthawe imweyire, dzina la Yahova lakhala likucenesedwa na wanthu omwe ambamutumbiza na kumulemekeza. Wanthu amwewa acitisambo kuti makhalidwe yace yawonekere kwa wanthu. Kuphampha kwa magole 1000 dzina la Yahova lin’dzakhala lacenesedwa. Iye an’dzakhala walatiza kuti ni Baba walufoyi kwene-kwene.

¹⁸ Kuphampha kwa magole 1000, wanthu wentse an’dzadziwa kuti bzomwe Sathani adalewa pakulewa bza Yahova bzikhali bzakunama. Kodi n’ciyani comwe Jezu an’dzacita kuphampha kwa utongi bwace? Kodi iye an’dzaphindukirambo Yahova ninga momwe Sathani adacitira? Ne! (Werengani 1 Akolinto 15:24, 28.) Jezu an’dzapereka Umambo kwa Baba wace ndipo an’dzabvumambo kutongedwa na Baba wacewo. Kulewa cadidi, mwakusiyana na Sathani, Jezu ngwakukonzeka kupereka utongi bwentse kwa Yahova thangwe iye ambafuna Yahovayo.

19. Kodi dzina la Yahova ndakufunika tani kwa Jezu?

¹⁹ Yahova akhana mathangwe yakubveka pakupasa Jezu dzina lace! Jezu adaimira mwakulungama dzina la Baba wace. Kodi dzina la Yahova limbathandauza ciyani kwa Jezu? Dzina limweri ndakufunika kwene-kwene kwa Jezu kuposa cinthu ciri-centse. Jezu adapereka moyo wace thangwe ra dzina limweri. Ndipo kuphampha kwa utongi bwace bwa magole 1000, iye an’dzapereka bzentse kwa Baba wace. Kodi tingatewezere tani bzomwe Jezu adacita? Mu nkhani yomwe ikubwerayi tin’dzatawiridwa mbvunzo umweyu.