Mbapfunzani Kuti Mumbauzembo Winango Bzomwe Mwapfunza

Ifepano tikambapfunza Bibliya timbakhala wakutsangalazidwa. Tsono timbakhaliratu wakutsangalazidwa tikambauzambo winango bzomwe tapfunza bzomwe bzidatithandiza kukhala pa uxamwali na Yahova. Mimwani 11:25 ambati: “Omwe ambatsangalaza winango, an’dzatsangalazidwambo.”

Kuuza winango bzomwe tapfunza kumbatithandiza kukumbukira nfundo zomwe tapfunzazo ndipo timbathumizirambo luso lathu la kubvesesa bzinthu. Pakuti nfundo zimwezi zingathandize wanthu winango, timbakomedwa kuwauzambo nfundozo. — Mabasa 20:35.

Yezerani kucita ibzi: Sumana yomwe ikubwerayi, nyang’anani mpata kuti muuze munthu munango bzomwe mwapfunza. Imwepo mungauze munthu m’bodzi wa m’banja mwanu, wa m’gwere mwanu, mwanzanu wa kubasa, wa ku xikola, vizinyu wanu ayai munthu omwe mwagumana naye mu upalizi. Yezerani kufotokoza bzomwe mwapfunzabzo mwa mafala yanu-yanu na mu njira yakusaya kunesa.

Kumbukirani ibzi: Uzani winango bzomwe mwapfunza kuti muwalimbikise, sikuti na cakulinga cakuti mubziwonesere. — 1 Akolinto 8:1.