Imwepo Mungalimbane na Bzikhumbo Bzakuipa

1. Kodi tentsenefe timbafunika kulimbana na ciyani?

KODI imwepo mudakhala kale na cikhumbo cakufuna kucita cinthu comwe Yahova ambakomedwa lini naco? Penu bzimwebzo bzidakucitikirani kale, lekani kusunama. Bibliya limbalewa kuti: “Palibe mayezo yomwe mwagumana nayo, yomwe njakusiyana na yomwe wanthu winango ambagumana nayo.” (1 Akolinto 10:13) Bzimwebzi bzikuthandauza kuti cikhumbo ciri-centse comwe mungakhale mukulimbana naco winango akulimbanambo naco. Imwepo muli lini mwekha ndipo na thandizo la Yahova mungakwanise kukunda.

2. Kodi ni mayezo yaponi yomwe Akristau winango na anyakupfunza wa Bibliya winango ambalimbana nayo? (Onanimbo bzithunzi-thunzi.)

² Bibliya limbalewambo kuti: “Munthu ali-wentse ambayezedwa na bzomwe ambakhumba ndipo bzimwebzo ni bzomwe bzimbamukwewa na kumupumpsa.” (Tiyago 1:14) Vesiri likutithandiza kubvesesa kuti wanthu angayezedwe na bzinthu bzakusiyana. Akristau winango angayezedwe kuti acite upombo na munthu wa cidzo cakusiyana ndipo winango angayezedwe kuti acite upombo na munthu wa cidzo cibodzi-bodzi. Wanthu omwe akhawona pornografia ayai bzinthu bzamaika pinango angakhale pomwe na cikhumbo cakufuna kuwona pomwe pornografiyayo ayai bzinthu bzamaikabzo. Ndipo azinji omwe adasiya kuphatisa basa mankhwala yakudzungulumwisa msolo ayai omwe akhamwa kwene-kwene bzakumwa bzakuledzeresa angagumanembo na bvuto libodzi-bodziri. Yamweya ni yanango mwa mayezo yomwe Akristau na anyakupfunza wa Bibliya ambagumana nayo. Pinango pentse tentsenefe pa nthawe inango tidabzibva kale ninga momwe mpostolo Paulo adabvera, iye adanemba kuti: “Pomwe ndikufuna kucita cinthu cabwino, cinthu cakuipa cimbakhala mwa ine.” — Aroma 7:21.

3. Kodi munthu omwe akulimbana na cikhumbo cakuipa kwa nthawe itali angakumbuke ciyani?

³ Penu imwepo mukulimbana na cikhumbo cakuipa kwa nthawe itali, pinango mungakumbuke kuti mungakwanise lini kucita bzinthu bzabwino. Ndipo pinango mungakumbuke kuti mungabvumidwe lini na Yahova thangwe rakuti muna cikhumbo cakuipa. Tsono khalani na citsimikizo cakuti bzimwebzi mpsacadidi lini! Kuti tibvesese thangwe race, nkhani ino in’tawira mibvunzo miwiri iyi: (1) N’ciyani comwe cingacitise kuti mukhale na makumbukidwe yamweya? (2) Kodi imwepo mungakunde tani bzikhumbo bzakuipa?

BZOMWE SATHANI AKUFUNA KUTI TIKUMBUKE

4. (a) Kodi Sathani akufuna kuti tikumbuke ciyani tikayezedwa? (b) Thangwe ranyi tingatsimikizire kuti tingakwanise kulimbana na mayezo?

⁴ Tikayezedwa, Sathani ambafuna kuti tikumbuke kuti tingakwanise lini kulimbana na cikhumbo cakufuna kucita bzinthu bzakuipa. Jezu adabvekesa bwino bzimwebzi pomwe adapfunzisa ateweri wace kupemba kuti: “Lekani kulekerera kuti tiyezedwe, koma tipulumuseni kwa nyakuipayo.” (Mateu 6:13) Sathani adalewa kuti wanthu an’dzabvera lini Yahova akadzayezedwa kuti acite bzinthu bzakuipa. (Djobi 2:4, 5) Thangwe ranyi Sathani ambakumbuka tenepo? Iye ndiye omwe adayezedwa na cikhumbo cace ndipo alibe kupitiriza kukhala wakukhulupirika kwa Yahova. Iye ambakumbuka kuti tiri ninga iye nakuti tin’dzasiya kukhala wakukhulupirika kwa Yahova tikayezedwa. Sathani adafika pakukumbuka kuti angadayezera kucitisa Mwana wakulungama wa Mulungu kuti acite bzinthu bzakuipa! (Mateu 4:8, 9) Tsono kumbukirani ibzi: Kodi n’cadidi kuti ifepano tingakwanisedi lini kulimbana na bzikhumbo bzakuipa? Bzikuwonekeratu kuti n’cadidi lini! Ifepano timbatawiriza bzomwe mpostolo Paulo adalewa, iye adati: “Pa bzinthu bzentse nimbakwanisa kukhala na mphanvu thangwe ra ule omwe ambandipasa mphanvu.” — Afilipi 4:13.

5. N’ciyani comwe cikulatiza kuti Yahova ambakhulupira kuti tingakwanise kukunda bzikhumbo bzakuipa?

⁵ Yahova ngwakusiyana kwene-kwene na Sathani. Yahovayo ambakhulupira kuti tingakwanise kulimbana na bzikhumbo bzathu bzakuipa. Kodi timbadziwa tani bzimwebzo? Iye adalewa kuti thimu likulu la wanthu wakukhulupirika lingadadzapulumuka pa citsautso cikulu. Ndokumbukirani thandauzo la bzimwebzi. Yahova omwe anganame lini adalewa kuti wanthu azinji sikuti ang’ono-ng’ono ‘angadadzafula bzakubvala bzawo bzitali acibzicenesa na mulopa wa Mwana wa Bira,’ bzomwe bzikuthandauza kuti Yahova an’dzawona wanthu amwewa ninga wakucena. (Apokalipse 7:9, 13, 14) Bzikuwonekeratu padeca kuti Yahova ambadziwa kuti tingakwanise kulimbana na bzikhumbo bzakuipa.

6-7. Kodi n’ciyani cinango comwe Sathani akufuna kuti tikumbuke?

⁶ Sathani akufunambo kuti tikumbuke kuti pakuti tina bzikhumbo bzakuipa, Yahova an’dzatibvumiza lini kuti tikhale na moyo wakusaya kumala. Thangwe ranyi Sathani akufuna kuti tikumbuke tenepoyo? Thangwe iye akudziwa kuti Yahova an’dzamubvumiza lini kuti akhale na moyo mpaka kale-kale ndipo an’dzapfudzidwa. (Genesesi 3:15; Apokalipse 20:10) Bzikuwonekeratu kuti Sathani ana ukali thangwe ra kudziwa kuti ifepano tina cidikhiro cakudzakhala na moyo mpaka kale-kale. Ndipopa iye ambayezera kuticitisa kukumbuka kuti tiri ninga iye nakuti tiribe cidikhiro cakutsogolo. Tsono ifepano tiribe kukhala ninga iye. Kulewa cadidi, Bibliya limbatitsimikizira kuti Yahova akufuna kutithandiza kuti tidzakhale na moyo mpaka kale-kale. Iye “an’funa lini kuti munthu ali-wentse adzapfudzidwe, koma an’funa kuti wanthu wentse akungule.” — 2 Pedru 3:9.

⁷ Ifepano tikakumbuka kuti tingakwanise lini kulimbana na bzikhumbo bzakuipa, tin’dzakhala tikukumbuka ninga momwe Sathani akufunira. Kuzindikira bzimwebzi kun’dzacitisa kuti tikhale wakutsimikiza kulimbana naye. — 1 Pedru 5:8, 9.

KODI KUPEREWERA KUNGATICITISE KUKUMBUKA CIYANI?

8. Kuthumizira pa bzinthu bzakuipa, fala lakuti pikado limbafuna kulewambo bza ciyani? (Salimo 51:5) (Onanimbo “Kafotokozedwe ka Mafala Yanango.”)

⁸ Kupambula Sathani, kodi pana cinthu cinango comwe cingaticitise kukumbuka kuti tingakwanise lini kulimbana na bzikhumbo bzakuipa? Inde ciripo! Kodi n’ciponi? Ni kuperewera komwe tidatengera kwa abereki wathu wakuyambirira.a — Djobi 14:4; werengani Salimo 51:5.

9-10. (a) Kodi n’ciyani comwe cidacitikira Adamu na Eva pomwe adakhala wakuperewera? (Onanimbo cithunzi-thunzi.) (b) Kodi kukhala wakuperewera kumbaticitisa kuti tibzibve tani?

⁹ Kumbukirani momwe Adamu na Eva adabvera pomwe adakhala wakuperewera. Pambuyo pa kusaya kubvera Yahova, iwo adabisala ndipo adayezera kumpsinkha mathupi yawo. Pakulewa bzomwe iwo adacitabzo bukhu la Estudo Perspicaz das Escrituras limbalewa kuti: “Pikado idacitisa kuti iwo abzipase mulandu, acite manyazi na thupo.” Adamu na Eva angadakwanisa lini pomwe kukhala pa uxamwali na Yahova. Ndipo bziribe basa bzomwe iwo angadacita. Nthawe zentse angadabzipasa mulandu, kucita manyazi na thupo thangwe akhali wakuperewera.

¹⁰ N’cadidi kuti ifepano tiri lini pa mkhalidwe wakundendemerana na Adamu na Eva. Tikulewa tenepo thangwe rakuti cakulombolera cimbaphata lini basa kwa iwo, tsono kwa ife cakulombolera cimbatithandiza kuti tilekereredwe pikado zathu na kukhala pa uxamwali bwakulimba na Mulungu. (1 Akolinto 6:11) Napo bziri tenepo, ifepano ndife wakuperewera. Ndipopa timbabzipasambo mulandu, timbacita thupo na manyazi. Na thangwe limweri, Bibliya limbalewa kuti pikado ikupitiriza kutonga wanthu. Ndipo bzimwebzi bzimbacitikirambo ‘napo wale omwe alibe kucita pikado ninga momwe adacitira Adamu.’ (Aroma 5:14) Tin’funika lini kubzibva kuti pakuti tina pikado tin’dzakwanisa lini kucita bzinthu bzabwino ayai kukhala na cidikhiro cakutsogolo. Ifepano tingatcenkhe makumbukidwe yakuphonyekaya. Mwa njira iponi?

11. N’ciyani comwe tin’funika kucita tikawona kuti tin’kwanisa lini kulimbana na bzikhumbo bzakuipa, ndipo thangwe ranyi? (Aroma 6:12)

¹¹ Pakuti ndife wakuperewera, nthawe zinango tingakumbuke kuti tingakwanise lini kulimbana na bzikhumbo bzakuipa. Bziri ninga tikubva fala likutiuza kuti cipo ticidzakwanisa kulimbana na bzikhumbo bzakuipa. Tsono tin’funika lini kutetekera “fala” limweri. Thangwe ranyi? Thangwe Bibliya limbatipfunzisa kuti tin’funika lini kulekerera kuti pikado ipitirize ‘kutitonga ninga mambo.’ (Werengani Aroma 6:12.) Bzimwebzi bzikuthandauza kuti ifepano tingasankhule kuleka kucita bzinthu mwakubverana na bzikhumbo bzathu bzakuipa. (Agalatiya 5:16) Yahova ambakhulupira kuti tingakwanise kulimbana na bzikhumbo bzakuipa; thangwe bzingadakhala kuti iye ambakhulupira lini angadatiuza lini kuti ticite bzimwebzi. (Deuteronomiyo 30:11-14; Aroma 6:6; 1 Atesalonika 4:3) Kulewa cadidi, tingakwanisedi kulimbana na bzikhumbo bzakuipa.

12. N’ciyani comwe tin’funika kucita tikakumbuka kuti tingabvumidwe lini na Mulungu, ndipo thangwe ranyi?

¹² Mwa njira ibodzi-bodziyi, tikakhala kuti tina bzikhumbo bzakuipa ticikumbuka kuti tingakwanise lini kubzikunda ayai kuti Yahova angakomedwe lini nafe, bzimbakhala ninga kuti kuperewera kwathu ndiko komwe “kukulewalewa.” Tsono tin’funika lini kutetekera bzomwe kuperewerako kumbalewa. Thangwe ranyi? Thangwe Bibliya limbatipfunzisa kuti Yahova ambabvesesa kuti ndife wakuperewera. (Salimo 103:13, 14) Iye “ambadziwa bzinthu bzentse” pakulewa bza ifepano kuphatanidzambo momwe kuperewera kumbaticitisira kufuna kucita bzinthu bzakuipa. (1 Juwau 3:19, 20) Tikalimbana na cikhumbo cathu cakufuna kucita bzinthu bzakuipa, Yahova an’dzatiwona ninga wanthu wakucena. Thangwe ranyi tingatsimikizire bzimwebzi?

13-14. Kodi kukhala na bzikhumbo bzakuipa kungathandauze kuti tingakwanise lini kubzikunda? Fotokozani.

¹³ Bibliya limbalatiza kuti pana kusiyana kukulu pakati pa kucita cinthu cakuphonyeka (comwe ni cinthu comwe tingakwanise kucitcenkha) na kukhumba kucita cinthu cakuphonyeka (comwe ni cinthu comwe cingacitike mwakusaya kufuna kwathu). Pakuyamba abale winango wa ku Kolinto akhambacita bzinthu bza upombo. Paulo adanemba kuti: “Winango wa imwepo mukhali tenepoyo.” Kodi bzimwebzi bzin’funa kulewa kuti iwo alibe kukhala pomwe na cikhumbo cakufuna kucita bzinthu bza upombo? Mtawiro ngwakuti ne, thangwe kazinji-kazinji mpsakunesa kwene-kwene kusiya kukhala na bzikhumbo bzimwebzi. Tsono Akristau omwe adabziphata acileka kucita bzinthu mwakubverana na bzikhumbo bzawo bzakuipa adabvumidwa na Yahova. Kwa iye Akristau amwewa ‘akhadasambisidwa.’ (1 Akolinto 6:9-11) Ndipo bzimwebzi bzingakucitikirenimbo.

¹⁴ Bziribe basa cikhumbo cakuipa comwe mungakhale mukulimbana naco, imwepo mungakwanise kucikunda. Napo kuti mungakwanise lini kusiyiratu kukhala na bzikhumbobzo, imwepo mungakwanise kukhala wakubziphata mucileka kucita “kufuna kwa thupi na kwa makumbukidwe [yanu].” (Aefezo 2:3) Mbatiwoneni bzinthu bzomwe bzingakuthandizeni.

BZOMWE MUNGACITE KUTI MULIMBANE NA MAYEZO

15. Kuti tikwanise kukunda bzikhumbo bzakuipa, thangwe ranyi tin’funika kubvuma bvuto lomwe tinalo?

¹⁵ Kuti imwepo mukwanise kulimbana na bzikhumbo bzakuipa mun’funika kuzindikira bvuto lomwe munalo. Ndipo tcenkhani kumbabzinamiza na “nzeru zakunama.” (Tiyago 1:22) Kumbukirani ibzi. Munthu omwe ambamwa kwene-kwene pinango angacepese bvuto lace mwakukumbuka kuti: ‘Pana wanthu omwe ambamwa kwene-kwene kuposa inepano.’ Ayai mwamuna omwe ambawona pornografia ayai bzinthu bzamaika pinango angayezere kufuna kupasa mulandu mkazace, iye angakumbuke kuti: ‘Bzingadakhala kuti mkazangu ambandilatiza lufoyi inepano ningadambawona lini pornografia ayai bzinthu bzamaika.’ Makumbukidwe ninga yamweya yangacitise kuti imwepo muleke kukwanisa kulimbana na mayezo. Lekani kumbabzipasa lazau thangwe ra kucita bzinthu bzakuipa. Mbabvumani bzomwe imwepo mumbaphonya. — Agalatiya 6:7.

16. N’ciyani comwe imwepo mungacite kuti mukhale wakutsimikiza kucita bzinthu bzabwino?

¹⁶ Kuthumizira pa kuzindikira bvuto lanu, imwepo mun’dzafunikira kukhala wakutsimikiza kucita bzomwe mpsabwino. (1 Akolinto 9:26, 27; 1 Atesalonika 4:4; 1 Pedru 1:15, 16) Zindikirani bzinthu bzomwe bzimbakuyezani na pa nthawe yomwe bzimbacitika. Pinango yangakhale mayezo yanango ayai nthawe yomwe kwa imwepo bzimbakhala bzakupusa kwene-kwene kuyezedwa. Kodi kwa imwepo bzimbakhala bzakunesa kwene-kwene kulimbana na mayezo mukakhala mudaneta ayai kukakhala kuti ni usiku? Konzekerani momwe mungadzalimbanire na mayezo ndipo kumbukirani bzomwe mungadzacite. Nthawe yabwino yomwe mungacite bzimwebzo ni pomwe mukanati kugumana na mayezoyo. — Mimwani 22:3.

17. Kodi tikupfunza ciyani na ciratizo ca Zuze? (Genesesi 39:7-9) (Onanimbo bzithunzi-thunzi.)

¹⁷ Kumbukirani bzomwe Zuze adacita pomwe mkazi wa Potifari adayezera kumupumpsa. Iye adalamba mwakamfulumize. (Werengani Genesesi 39:7-9.) Kodi bzimwebzi bzikutipfunzisa ciyani? Pomwe mkazi wa Potifari akhanati kupumpsa Zuze, Zuzeyo akhadatsimikiza kale kucita bzinthu bzabwino. Mwa njira ibodzi-bodziyi, imwepo mungatsimikizirembo kucita bzinthu bzabwino pomwe mukanati kuyezedwa. Mukacita tenepo, bzin’dzakhala bzakupusa kucita bzinthu mwakubverana na bzomwe mwasankhula kale mukadzakhala mukuyezedwa.

“PITIRIZANI KUBZIYEZA”

18. Kodi imwepo mungakunde tani bzikhumbo bzakuipa? (2 Akolinto 13:5)

¹⁸ Kuti mukunde bzikhumbo bzakuipa, imwepo mun’dzafunika ‘kupitiriza kubziyeza’ mwekha ayai imwepo mun’funika kupitiriza kubziyeza kuti muwone momwe mukucitira bzinthu pa moyo wanu. (Werengani 2 Akolinto 13:5.) Nthawe zentse mbawonani momwe mukukumbukira na kucitira bzinthu ndipo mbacinjani bzinthu bzomwe bziri lini bwino bzikafunikira. Napo kuti imwepo mungakwanise kulamba mayezo, mungabzibvunze kuti: ‘Kodi ndamala nthawe zingasi kuti ndilambe?’ Mukazindikira kuti mudacedwa kulamba lekani kubzipasa mulandu. M’mbuto mwace, citani bzomwe mungakwanise kuti mudzabzikhotcerere bzikadzacitika pomwe. Bzibvunzeni kuti: ‘Ndikakhala na makumbukidwe yakuphonyeka, kodi ningasiyiretu kuyakumbukira mwakamfulumize? Kodi masenzeka yomwe nimbacita yambacitisa kuti bzikhale bzakunesa kulimbana na mayezo? Ndikawona cithunzi-thunzi ca maika nimbanyang’anisiratu kumbali mwakamfulumize? Kodi nimbabvesesa kuti nthawe zentse kubvera malamulo ya Yahova n’kwabwino napo kuti nthawe zinango bzingafunike nyongo na kukhala wakubziretsa?’ — Salimo 101:3.

19. Kodi bzakusankhula bzakuipa bzing’ono-bzing’ono bzingatitazise tani kulimbana na bzikhumbo bzakuipa?

¹⁹ Pomwe mukubziyeza, tcenkhani kumbabzipasa lazau. Bibliya limbati: “Mtima ngwakupumpsa kwene-kwene kuposa cinthu ciri-centse, ndipo ungacite cinthu ciri-centse cakuipa.” (Jeremiya 17:9) Jezu adalewa kuti “nzeru zakuipa” zimbacokera mu mtima. (Mateu 15:19) Munthu omwe adasiya kuwona pornografia ayai bzinthu bzamaika, na kupita kwa nthawe pinango angawone kuti palibe bvuto liri-lentse kuwona bzithunzi-thunzi bza maika penu ibzo bzikulatiza lini wanthu ali pezi. Ayai pinango iye angakumbuke kuti: ‘Palibe bvuto liri-lentse ndicimbakumbukira kuti ndikucita cinthu cakuipa pomwe ndikucicita lini.’ Munthu omwe ambakumbuka tenepayu ambakhala ‘akukonzekereratu kucita bzikhumbo bza pikado.’ (Aroma 13:14) Kodi tingatcenkhe tani bzimwebzi? Citani mphole na bzakusankhula bzomwe mumbacita. Bzinthu bzakuipa bzing’ono-bzing’ono bzomwe mumbasankhula kucita bzimbadzacitisa kuti munthu asankhule kucita bzinthu bzakuipa bzikulu-bzikulu, acitazira kulimbana na mayezo.b Tcenkhani makumbukidwe ayai “nzeru zakuipa,” zomwe zingakucitiseni kubzipasa lazau thangwe ra bzinthu bzakuipa bzomwe mukucita.

20. Kodi cidikhiro cathu cakutsogolo n’ciponi, ndipo ni thandizo liponi lomwe tinalo?

²⁰ Ninga momwe tawonera, Yahova ambatipasa mphanvu kuti tikwanise kulimbana na mayezo. Ndipo thangwe ra cakulombolera, ifepano tingalekereredwe pikado zathu ticikhala na cidikhiro cakudzakhala na moyo mpaka kale-kale mu dziko lipsa. Tin’dzakhala wakukondwa kwene-kwene thangwe ra kutumikira Yahova ndipo tin’dzafunikira lini kulimbana na bzikhumbo bzakuipa! Tsono pomwe tikanati kupita mu dziko limwero, tingakhale na citsimikizo cakuti tin’dzabvumidwa na Yahova. Thangwe ra nyongo yathu pabodzi na bzisimbo bza Yahova tingakwanise kukunda bzikhumbo bzakuipa!