Tewezerani Momwe Yahova Ambacitira Bzinthu

1. Kodi anamati wa Yahova ambalatiza tani kuti ambafunana?

ANAMATI wense wa Yahova wa pa dziko la pansi ambacita mbali ya banja libodzi. Ndipo iwo ni abale na mpfumakazi omwe ambalatizana lufoyi. (1 Juwau 4:16, 21) Nthawe zinango iwo ambacita nyongo ikulu kuti athandize abale wawo, koma nthawe zizinji iwo ambalatiza lufoyi lawo mwa kucitira abale wawowo bzinthu bzing’ono-bzing’ono. Mwa ciratizo, pinango iwo angalewe mafala yakulimbisa abale wawo ayai angawacitire bzinthu mwakudeka mtima. Tenepo, tikambacitira bzinthu bzabwino wanthu winango, timbatewezera Baba wathu wakudzulu.—Wayefezo 5:1.

2. Kodi Jezu adatewezera tani lufoyi la Baba wace?

² Jezu adatewezera Baba wace pa bzinthu bzense. Iye nthawe zense akhacita bzinthu na wanthu mwakudeka mtima. Iye adalewa kuti: ‘Bwerani kuna ine imwe mwensene wakuneta na anyakulemedwa, ndipo ine ndin’dzakudukuzani.’ (Mateu 11:28, 29) Tenepo, tikambatewezera Jezu na kumbacita bzinthu mwa kukumbukira ‘munthu wakunyozeka,’ tin’dzakondwesa Yahova, ndipo ife tin’dzakondwambo. (Psalymo 41:1) Mu nkhani ino, tiniwona momwe tingacitire bzinthu bzabwino wanthu wa m’banja mwathu, abale wathu wa m’gwere na wanthu omwe timbawapalizira.

MOMWE TINGACITIRE BZINTHU BZABWINO WANTHU WA M’BANJA MWATHU

3. Kodi amuna angacitire tani bzinthu bzabwino akazi wawo? (Onani cithunzi-thunzi pa tsamba 27.)

³ Amuna an’funika kukhala ciratizo cabwino na kulatiza kuti ambafuna kwene-kwene wanthu wa m’banja mwawo. (Wayefezo 5:25; 6:4) Bibliya limbalewa kuti amuna an’funika kumbacitira bzinthu bzabwino akazi wawo na kuwadziwa bwino. (1 Pedru 3:7) Ndipo mwamuna omwe ambadziwa bwino mkazi wace ambazindikira kuti napo ambasiyana bzinthu bzinango na mkazaceyo, iye ambabziwona lini kukhala wakufunika kwene-kwene kuposa mkaziyo. (Ciyambo 2:18) Koma ambacita naye bzinthu ninga combo cakusaya kulimba ndipo ambamulemekeza. Mkazi munango ku Canadá adalewa bza mwamuna wace kuti: “Mwamuna wangu ambanyoza lini makumbukidwe yangu ayai bzomwe ndimbalewa. Iye ni mtetekeri wabwino. Ndipo ndikakhala na makumbukidwe yakuphonyeka pa cinthu cinango, iye ambandithandiza mwakudeka mtima kuti ndicinje.”

4. Kodi mwamuna angalatize tani kuti ambakumbukira mkazi wace na momwe iye ambacitira bzinthu na akazi winango?

⁴ Mwamuna omwe ambacita bzinthu mwakukumbukira mkazi wace, ambacita lini bzinthu na akazi winango bzomwe bzingawacitise kuwona ninga kuti iye ankuwasirira. (Djobi 31:1) Iye ambaphatisa lini basa m’mbuto zakucezera za pa interneti kuti acitise mkazi omwe ngwace lini kutengeka naye, ndipo ambapita lini mu webisaite zomwe zimbawonesa bzinthu bzamaika. Ndipo ambapitiriza kukhala wakukhulupirika thangwe ra kufuna mkazi wace pabodzi na Yahova na kuwenga comwe n’cakuipa.—Werengani  Psalymo 19:14; 97:10.a

5. Kodi mkazi angacite tani kuti ambacitire bzinthu bzabwino mwamuna wace?

⁵ Mwamuna akambatewezera lufoyi la Jezu Kristu, omwe ni msolo wace, bzimbakhala bzakusaya kunesa kuti mkazi wace amulemekeze ‘kwene-kwene.’ (Wayefezo 5:22-25, 33) Ndipo mkaziyo akambalemekeza mwamuna wace, iye an’dzacita nyongo yakubvesesa makumbukidwe ya mwamunayo na kucita naye bzinthu mwakudeka mtima napo akatanganidwa na nkhani za gwere ayai akambalimbana na mabvuto yali-yense. Mwa ciratizo, mwamuna munango ku Grã-Bretanha adati: “Nthawe zinango, mkazi wangu ambazindikira kuti pana cinthu cinango comwe cikuboneresa makumbukidwe yangu. Patsogolo pace, iye ambaphatisa basa mtemo wa m’Bibliya wakugumanika pa Mimwani 20:5, napo kuti pangafunike nthawe kuti ‘atunge’ makumbukidwe yangu, bzikakhala bzakufunika ndimbakhala wakutsudzuka kuceza naye.”

6. Kodi tingacite tani kuti tilimbise wana kuti ambacite bzinthu mwakukumbukira winango na kuwadekera mtima, ndipo iwo an’dzagumana phindu liponi?

⁶ Abereki akambalemekezana na kudekerana mtima, iwo ambakhala ciratizo cabwino kwa wana wawo. Ndipo iwo an’funikambo kupfunzisa wana wawo kuti ambacita bzinthu mwakukumbukira winango na kuwadekera mtima. Mwa ciratizo, abereki an’funika kupfunzisa wana wawo kuti aleke kumbathamanga-thamanga mu Nyumba ya Umambo. Ayai akakhala pa madyo, abereki an’funika kuuza wanawo kuti ambapase mpata acikulire kuti akhale wakuyamba kutenga cakudya. Kulewa cadidi, munthu ali-wense m’gwere an’funikambo kumbathandiza abereki. Ndipo tin’funika kumbatenda mwana akaticitira cinthu cinango cabwino. Kucita bzimwebzi kun’dzacitisa mwanayo kubzibva bwino na kuwona kufunika kwa mafala ya m’Bibliya yakuti: ‘Kupasa kumbabweresa cikondweso cikulu kuposa kutambira.’—Mabasa 20:35.

MOMWE TINGACITIRE BZINTHU BZABWINO ABALE WATHU WA M’GWERE

7. Kodi Jezu adacita tani bzinthu na munthu omwe akhali nkhuthu, ndipo tingatewezerembo tani ciratizo cace?

⁷ Nsiku inango, pomwe Jezu akhali mu mzinda wa Dekapoli, wanthu ‘adamubweresera munthu omwe akhali nkhuthu ndipo akhanesekambo kulewalewa.’ (Marko 7:31-35) Jezu adamupoza, koma sikuti pa maso pa wanthuwo. N’thangwe ranyi? Thangwe ra kukhala nkhuthu, pinango munthuyo akhabzibva lini bwino pakati pa wanthu wale. Jezu adabvesesa momwe iye akhabvera, tenepo ‘adatenga munthuyo aciyenda naye pambali’ ku mbuto komwe kukhalibe wanthu ndipo adamupozera kumweko. Kulewa cadidi, ifepano tingakwanise lini kucita bzinthu bzakudabwisa ninga momwe Jezu adacitira, koma tin’funika kumbacita bzinthu mwakukumbukira bzakusaya na makumbukidwe ya abale wathu na kuwadekera mtima. Mpostolo Paulo adanemba kuti: ‘Bwerani timbakumbukirane kuti tilimbisane pa lufoyi na pa mabasa yabwino.’ (Wahebereu 10:24) Jezu adabvesesa momwe munthuyo akhabvera ndipo adamudekera mtima. Cimweci n’ciratizo cabwino kwa ifepano!

8, 9. Kodi tingathandize tani acikulire na anyakupunduka? (Fotokozani bziratizo.)

⁸ Mbacitirani bzinthu bzabwino acikulire na anyakupunduka. Khalidwe likulu kwene-kwene kwa Akristau ni lufoyi, sikuti kondocita bzinthu bzabwino. (Juwau 13:34, 35) Lufoyi limbaticitisa kuti ticite bzomwe tingakwanise kuti tithandize abale wathu omwe mbacikulire ayai anyakupunduka kuti afike pa mitsonkhano na kupalizira. Ndipo timbawathandiza napo kuti bzimbakhala bzakunesa kwa ifepano ayai napo iwo ambakwanisa lini kucita bzinthu bzizinji. (Mateu 13:23) Michael, omwe ambafamba na kanjinga ka wanthu wakupunduka, ambatenda kwene-kwene thandizo lomwe ambapasidwa na wanthu wa m’banja lace na abale wa m’gwere. Iye adati: “Na thandizo lomwe iwo ambandipasa, ndimbakwanisa kugumanika pa mitsonkhano na mu utumiki bwakumunda mwakukhazikika, maka-maka mu upalizi bwa padeca.”

⁹ Nyumba zizinji za Beteli, zina abale na mpfumakazi omwe mbakukalamba na wakupunduka. Tsono anyakunyang’anira ambawasamalira mwalufoyi ndipo ambawathandiza kuti apalizire mwakuphatisa basa matsamba na mitedwe ya m’manja. Bill, omwe ana magole 86 yakubadwa, ambanembera matsamba wanthu wakutali. Iye adati: “Ndimbatenda kwene-kwene mwayi omwe ndinawo wakunembera matsamba wanthu.” Nancy, omwe ana magole pafupi-fupi 90, adalewa kuti: “Ndimbanemba lini matsamba kuti ndidzaze mu envelope. Koma kuti ndipalizire wanthu, pakuti iwo an’funikira kudziwa cadidi ca m’Bibliya!” Ethel, omwe adabadwa mu 1921, adalewa kuti: “Moyo wangu umbandinesa kwene-kwene, ndipo nsiku zinango ndimbatazira kubvala.” Napo bziri tenepo, mpfumakaziyi imbapalizira na kucitisa ulendo bwakubwereza mwakuphatisa basa mtedwe. Barbara, omwe ana magole 85 yakubadwa, adati: “Thangwe ra bvuto la kukalamba, ndimbaneseka kupalizira mwakukhazikika. Koma kucita upalizi mwakuphatisa basa mtedwe kumbandithandiza kuti ndilewelewe na wanthu. Ndipopa, ndimbatenda kwene-kwene Yahova!” Ninga bzakutewera bzace, mkati mwa gole libodzi, gulu linango la acikulire wa nyumba inango ya Beteli adapalizira maora 1.228, adanemba matsamba 6.265, adapfuwira mtedwe wanthu 2.000, ndipo adagawira mabukhu 6.315! Tinkupenukira lini kuti nyongo yawo idakondwesa kwene-kwene Yahova!—Mimwani 27:11.

10. Kodi tingacite tani kuti timbathandize abale wathu kugumana phindu na mitsonkhano?

¹⁰ Mbawonani mitsonkhano kukhala yakufunika. Tikambawona mitsonkhano kukhala yakufunika, tin’dzathandiza abale wathu kugumana phindu na mitsonkhanoyo. Kodi tingacite tani bzimwebzo? Njira ibodzi ndiyo kufika na nthawe yabwino kuti tireke kuceukisa abale wathuwo. Koma nthawe zinango, mwadzidzidzi pangawoneke bzinthu bzomwe bzingaticitise kucedwa kufika pa mitsonkhano. Penu ni cizolowezi cathu, tin’funika kukumbukira momwe kucedwako kumbatokonyera abale wathu na bzomwe tingacinje kuti tilatize kuti timbawakumbukira. Lekani kuyebwa kuti ni Yahova pabodzi na Mwana wace omwe ambatiuza kuti titsonkhane. (Mateu 18:20) Tenepo, tikambafika na nthawe yabwino pa mitsonkhano, timbalatiza kuti timbawalemekeza!

11. Kodi abale omwe ambakhala na mbali pa mitsonkhano angateweze tani malango yomwe yambagumanika pa 1 Wakolinto 14:40?

¹¹ Tikambacita bzinthu mwakukumbukira abale wathu, tin’dzateweza malango ya m’Bibliya yakuti: ‘Bzinthu bzense bzimbacitike mwakuthemera na mwakulongosoka.’ (1 Wakolinto 14:40) Abale omwe ambakhala na mbali pa mitsonkhano ambateweza malangoya akambacita mbali zawo mwakubverana na nthawe yomwe apasidwa. Mwa njira imweyi, iwo ambalatiza kuti ambakumbukira lini kokha mfotokozi wa nkhani yakutewera koma gwere lense. Kumbukirani momwe abale ambabvera mitsonkhano ikamala mwakucedwa. Abale winango ambafamba mtantho utali kuti abwerere ku mui kwawo mwakuphatisira basa kandere-ndere, winango ambafamba na minyendo. Ndipo winango, mwamuna ayai mkazi ni munthu wakusaya kukhulupira ndipo ambadikhira kuti afike pa mui na nthawe yabwino.

12. N’thangwe ranyi akulu wa m’gwere an’themera kulemekezedwa na kufunidwa? (Onani kwadru yakuti “Mbalemekezani Wale Omwe Ambatsogolera.”)

¹² Akulu wa gwere ambacita nyongo yakucita mabasa yakusiyana-siyana m’gwere na kupalizira bzipsa bzabwino, tenepo iwo mbakuthemera kulemekezedwa na kufunidwa. (Werengani 1 Watesalonika 5:12, 13.b) Mwakusaya kupenukira imwepo mumbatenda kwene-kwene bzense bzomwe iwo ambakucitirani. Ndipo mungalatize kutenda kwanu mwa kumbawabvera na kuwalemekeza, thangwe ‘iwo ambanyan’ganira moyo wanu ninga wanthu omwe an’dzatawira mulandu.’—Wahebereu 13:7, 17.

MOMWE TINGACITIRE BZINTHU MU UTUMIKI BWAKUMUNDA

13. Kodi tingapfunze ciyani na momwe Jezu adacitira bzinthu na wanthu?

¹³ Pakufotokoza bza Jezu, Zaiya adati: ‘An’dzatcola lini phesi lakusweka, ndipo an’dzathimisa lini mbvuniko omwe wasala pang’ono kuthima.’ (Zaiya 42:3) Lufoyi la Jezu likhamucitisa kuti abvere nsisi winango. Iye akhabvesesa makumbukidwe ya wale omwe akhali wakusunama na wakutepa omwe akhali ninga ‘wakutcoka’ ayai ‘mbvuniko wakuthima,’ tenepo iye adawadekera mtima na kuwabvera nsisi. Napo wana akhafunisisa kukhala na Jezu. (Marko 10:14) Kulewa cadidi, ifepano tingakwanise lini kubvesesa ayai kucita bzinthu na wanthu ninga momwe Jezu adacitira! Koma tingalatize kuti timbakumbukira wanthu omwe timbawapalizira mwa kalewelewedwe kathu, nthawe yomwe timbawazungira na nthawe yomwe timbamala tikulewalewa nawo.

14. N’thangwe ranyi tin’funika kumbakumbukira momwe tingalewelewere na wanthu mu utumiki bwakumunda?

¹⁴ Kodi tingalewelewe tani na wanthu mu utumiki bwakumunda? Wanthu bzulu na bzulu nsiku zino ‘mbakunyuka-nyuka na wakumwazika’ thangwe ra maboma na anyakucita malonda yacinyengo, nkhani za ndale pabodzi na atsogoleri wa bzipembedzo bza m’dzikoli. (Mateu 9:36) Ninga bzakutewera bzace, wanthu azinji ambakhulupira lini munthu ali-wense ndipo alibe cidikhiro ciri-cense pakulewa bza tsogolo. Ndipopa mafala yathu yomwe tingayaphatise basa kuti tilewelewe nawo yan’funika kulatiza kuti timbawadekera mtima nakuti timbawakumbukira! Wanthu azinji ambabvuma kubva mafala yathu sikuti kokha thangwe timbaphatisa basa bwino Bibliya, koma thangwe linango ndakuti timbalatiza kuti timbawakumbukira na kuwalemekeza.

15. Kodi tingalatize tani kuti timbakumbukira wanthu omwe timbawapalizira?

¹⁵ Pana njira zizinji za momwe tingalatizire kuti timbakumbukira wanthu mu utumiki bwakumunda. Mwa ciratizo, tikambawabvunza mibvunzo tin’funika kuwonesesa kuti tinkuwadekera mtima na kuwalemekeza. Mpainiya munango omwe adatumikira ku dera lomwe wanthu azinji akhana manyazi, iye akhatcenkha kubvunza mibvunzo yomwe ingadawacitisa manyazi akatazira kupereka mtawiro wacadidi. Iye akhawabvunza lini kuti, “Kodi imwepo mumbalidziwa dzina la Mulungu?” ayai “Kodi imwepo mumbadziwa kuti Umambo bwa Mulungu n’ciyani?” M’mbuto mwace, iye akhalewa mafala ninga yakuti, “Inepano ndidapfunza m’Bibliya kuti Mulungu ana dzina lace cairo. Kodi mungafune kuti ndikulatizeni dzinalo?” Njira imweyi ingaphatisidwe lini basa kuli-kwense, thangwe wanthu na cikhalidwe bzimbasiyana. Koma nthawe zense tin’funika kumbalemekeza wanthu omwe timbawapalizira na kuwadekera mtima. Tsono kuti ticite bzimwebzi, tin’funika kuwadziwa bwino.

16, 17. Kodi tingalatize tani kudeka mtima tikambakumbukira bza (a) nthawe yakuzungira wanthu? (b) nthawe yomwe tingamale tinkuceza nawo?

¹⁶ Kodi tingazungire wanthu pa nthawe iponi? Tikambapalizira nyumba na nyumba, wanthu ambatidikhirira lini thangwe iwo ambakhala alibe kuticemera. Ndipopa mpsakufunika kuwazungira pa nthawe yomwe iwo angakhale adakonzeka kuceza nafe. (Mateu 7:12) Mwa ciratizo, kodi wanthu wa m’dera lanu ambacedwa kumuka kuphampha kwa mdzinga? Mukawona kuti bziri tenepo, pinango mungayambe kucita upalizi bwa mu mseu, bwa padeca, ayai kucita ulendo bwakubwereza kwa wanthu omwe mukudziwa kuti adakonzeka kuceza namwe.

¹⁷ Kodi tingaceze nawo nthawe zingasi? Wanthu azinji mbakutanganidwa kwene-kwene, tenepo tin’funika kumbaceza nawo mu nthawe yakucepa, maka-maka bukakhala ulendo bwakuyamba. Mpsakufunika kumaliza maceza yathu mwakamfulumize, m’mbuto mwa kumala nthawe itali. (1 Wakolinto 9:20-23) Wanthu akawona kuti timbawabvesesa akatanganidwa, iwo an’dzakhala wakukonzeka kuceza nafe ulendo bunango tikan’dzawazungira pomwe. Tikambalatiza makhalidwe ya mzimu wa Mulungu, ifepano tin’dzakhaladi ‘anyabasa anzace wa Mulungu.’ Ndipo Yahova an’dzatiphatisa basa kuti tithandize munthu ali-wense kuti apfunze cadidi ca m’Bibliya!—1 Wakolinto 3:6, 7, 9.

18. Tikambakumbukira anzathu, kodi tin’dzatambira bzisimbo bziponi?

¹⁸ Tenepo mbaticiteni bzense bzomwe tingakwanise kuti tilatize kuti timbakumbukira wanthu wa m’banja mwathu, abale na mpfumakazi zathu na wanthu omwe timbawapalizira mu utumiki bwakumunda. Tikacita bzimwebzi, tin’dzatambira bzisimbo bzizinji pakali pano na kutsogolo. Pa Psalymo 41:1, 2 pambati: ‘An’kondwa ni ule omwe ambacita bzinthu acikumbukira munthu wakunyozeka; Yahova an’dzamukhotcerera na kumusunga wa moyo. An’dzacemeredwa wakukondwa pa dziko lense la pansi.’