‘Gula Cadidi Ndipo Leka Kucigulisa’

1, 2. (a) Kodi cinthu cakufunika kwene-kwene pa moyo wanu n’ciyani? (b) Kodi n’cadidi ciponi comwe timbaciona kukhala cakufunika, ndipo n’thangwe ranyi? (Onani bzithunzi-thunzi pa tsamba lino.)

KODI cinthu cakufunika kwene-kwene pa moyo wanu n’ciyani? Ninga atumiki wa Yahova, cinthu cakufunika kwene-kwene comwe tinaco ni uxamwali bomwe tinabo na iye. Ndipo tingabucinjanise lini na cinthu ciri-cense. Timbawonambo cadidi ca m’Bibliya kukhala cakufunika kwene-kwene, thangwe cimbatithandiza kukhala pauxamwali na Yahova.—Wakoloso 1:9, 10.

² Yahova ni Pfunzisi wathu Mkulu, omwe ambatipfunzisa cadidi cakufunika comwe ciri m’Fala lace, Bibliya. Iye ambatipfunzisa bza kufunika kwa dzina lace ndipo ambatiuza makhalidwe yace yabwino. Ndipo iye ambatiuzambo kuti ambatifuna kwene-kwene, ndipopa adapereka moyo wa mwana wace wakufunidwa kwa ife. Yahova ambatipfunzisa bza Umambo bwa Mesiya. Iye ambatipasa cidikhiro ca moyo wakusaya kumala, bziribe basa penu cidikhiro cathu n’cakudzayenda kudzulu ayai n’cakudzakhala m’paraizo pano pa dziko la pansi. (Juwau 10:16) Yahova ambatipfunzisa momwe tingakhalire na moyo. Ndipopa ifepano timbawona cadidici ninga cuma thangwe cimbatithandiza kufendererana na Mulengi wathu na kukhala na moyo wathandauzo.

3. Kodi Yahova ambatikumbira kobiri kuti tipfunze cadidi cace?

³ Yahova ni Mulungu omwe ambapasa. Iye adalatiza kuti ambapasa pomwe adapereka mwana wace ninga nsembe kwa ife. Ndipo Yahova akambawona munthu ankufufudza cadidi ca m’Bibliya, iye ambamuthandiza kuti acigumane. Iye ambatikumbira lini kobiri kuti tipfunze cadidi cace. Mwa ciratizo, mwamuna munango wakucemeredwa Simau adapereka kobiri kuna mpostolo Pedru kuti akhale na udindo bwa kumbapasa mzimu wakucena wanthu winango. Tsono Pedru adamuuza kuti makumbukidwe yaceyo yakhali yakuphonyeka ndipo adalewa kuti: ‘Siriva wakoyo apfudzidwe pabodzi na iwepo, thangwe ukukumbuka kuti ungagumane mphaso ya Mulungu na kobiri.’ (Mabasa 8:18-20) Tenepo, kodi ‘kugula cadidi’ kumbathandauza ciyani?

KODI ‘KUGULA CADIDI’ KUMBATHANDAUZA CIYANI?

4. Kodi mu nkhani ino, tin’pfunza ciyani pakulewa bza cadidi?

⁴ Werengani Mimwani 23:23.a Tin’funika kucita nyongo kuti tipfunze cadidi ca m’Bibliya. Ndipopa tin’funika kucita ciri-cense kuti ticigumane. Ndipo tikagula ‘cadidi,’ ayai tikapfunza cadidico, tin’funika kucisamalira bwino kuti tireke ‘kucigulisa’ ayai kucisiya. Kodi tingagule tani ‘cadidi’ ca m’Bibliya? Kodi cimbagulisidwa kobiri zingasi? Mitawiro ya mibvunzoyi in’tithandiza kuti tiphatisise cadidico na manja mawiri na kutitsimikizirisa kuti tireke kucisiya. In’tithandiza pomwe kuwona kuti thangwe ranyi cadidi ca Yahova n’cakufunika kwene-kwene kuposa cinthu cinango ciri-cense.

5, 6. (a) Kodi tingagule tani cadidi ca m’Bibliya fovolo? Fotokozani. (b) Kodi cadidi cimbatithandiza tani?

⁵ Kulewa kuti pambaperekedwa lini kobiri kuti munthu agumane cinthu cinango kumbathandauza lini kuti cinthuco n’cafovolo. Fala la Cihebereu lakusanduliziridwa kuti ‘kugula’ lomwe limbagumanika pa Mimwani 23:23 lingathandauzembo ‘kugumana.’ Mafala mawiriya yankulatiza kuti munthu an’funika kucita nyongo ayai kupereka cinthu cinango kuti agumane cinthu comwe n’cakufunika kwene-kwene kwa iye. Kuti tibvesese momwe tingagulire cadidi ca m’Bibliya, tiyezeze kuti ku msika kukuperekedwa mafigu yafovolo. Kodi tingadikhire kuti mafiguyo yabwere yokha kumui kwathu? Ne, tin’funika kuyenda ku msikako kuti tikayatenge ticiyabweresa kumui. Tenepo, napo kuti mafiguyo njafovolo, tin’funika kucita nyongo kuti tiyagumane. Mpsibodzi-bodzimbo, kuti ifepano tipfunze cadidi ca m’Bibliya tin’funika lini kupereka kobiri, koma tin’funika kucita nyongo na kubzipereka.

⁶ Werengani Zaiya 55:1-3.b Bzomwe Yahova adalewa bzimbatithandiza kubvesesa bzomwe bzimbathandauza ‘kugula cadidi.’ Mu mavesiya, Yahova ambandendemezera mafala yace ya cadidi na madzi, mkaka na vinyu. Ninga momwe madzi yambadjedjeresera kukhosi kwa munthu omwe ana nyota, cadidi ca m’Bibliya cimbatitsangalaza. Ndipo ninga momwe mkaka umbathandizira mwana kukula na mphanvu, cadidi ca m’Bibliya cimbacitisambo uxamwali bwathu na Yahova kukhala bwakulimba. Yahova ambandendemezerambo mafala yace na vinyu. Kodi n’thangwe ranyi? Bibliya limbalewa kuti vinyu umbatsangalazisa munthu. (Psalymo 104:15) Tenepo pomwe Yahova ambatiuza kuti ‘tigule vinyu,’ iye ambafuna kutidziwisa kuti tikatewezera malango yace pa moyo wathu, tin’dzakhala wakukondwa kwene-kwene. (Psalymo 19:8) Yahova ambaphatisa basa bzinthu bzakundendemezerabzi kuti atithandize kubvesesa bza phindu lomwe tingaligumane tikapfunza na kuphatisa basa cadidi ca m’Bibliya. Tsapano bwerani ticezerane bzinthu bzixanu bzomwe bzingatitazise ‘kugula cadidi.’

BZOMWE BZINGAKUTAZISENI KUGULA CADIDI CA M’BIBLIYA

7, 8. (a) N’thangwe ranyi pambafunika nthawe kuti tipfunze cadidi ca m’Bibliya? (b) Kodi n’ciyani comwe Mariko adacita kuti apfunze cadidi, ndipo bzakutewera bzace bzidakhala bziponi?

⁷ Nthawe. Kuti munthu abvesese bzipsa bza Umambo, awerenge Bibliya pabodzi na mabukhu manango yakulewa bza Bibliya, apfunze Bibliya na Mboni za Yahova, akonzekere mitsonkhano yathu na kuyenda ku mitsonkhanoko pambafunika nthawe. Tsono kuti ticite bzensenebzi, tin’funika kuphatisa basa nthawe yomwe tingadacita bzinthu bzinango bzakusaya kufunika kwene-kwene. (Werengani Wayefezo 5:15, 16.c) Kodi kupfunza cadidi cakuyambirira ca m’Bibliya kumbafuna nthawe zingasi? Palibe nthawe yakuikhidwiratu koma bzimbathemba munthu ali-wense. Kupfunza bza nzeru za Yahova, njira zace na bzinthu bzomwe iye adakonza kulibe malire. (Waroma 11:33) Nkhani yakuyambirira ya mu Nsanza ya Mulindiri yakuyamba idandendemezera cadidi ca m’Bibliya na “maluwa yomwe yadabisika pakati pa mauswa.” Iyo idalewa kuti: “Mpsakufunika lini kukomedwa na dziluwa libodzi la cadidi. Ndipo bzingadakhala kuti dziluwa libodzi la cadidi ndakukwanira, Mulungu angadapereka lini cadidi cizinji. Ndipopa citani nyongo yakugumana maluwa manango.” Tenepo tingabzibvunze kuti, ‘Kodi ni bzinthu bziponi bzomwe ndapfunza bza Yahova?’ Napo m’dziko lipsa tin’dzakhala na moyo wa muyaya, nthawe zense tin’dzapfunza bzinthu bzizinji bza Yahova. Nsiku zino, mpsakufunika kwene-kwene kumbaphatisa basa nthawe yathu kuti timbapfunze bza Yahova. Tsapano mbatiwoneni ciratizo ca munthu munango omwe adacita bzimwebzi.

⁸ Mtsikana munango wa ku Japão wakucemeredwa Mariko, (Onani mafala ya m’nyansid) adayenda ku Estados Unidos kuti akacite mapfunziro yace mu Mzinda wa Nova Iorque. Nsiku inango, mpfumakazi inango yomwe ikhali mpainiya idamupalizira bzipsa bwabwino kumui kwace. Mariko adabvuma kupfunza Bibliya na mpfumakaziyo napo kuti akhali wa cipembedzo cinango. Iye adakomedwa kwene-kwene na bzomwe akhapfunzabzo mpaka adakumbira kuti ambapfunze kawiri pa mdzinga. Napo kuti Mariko akhatanganidwa kwene-kwene na xikola pabodzi na mabasa manango, mwakusaya kucedwa iye adayamba kumbayenda ku mitsonkhano ya gwere. Iye adacepesa nthawe yace yomwe akhacita masenzeka kuti akhale na nthawe izinji yakupfunza cadidi ca m’Bibliya. Mwa kucita bzimwebzi, Mariko adakhala pauxamwali bwakulimba na Yahova, ndipo mkati mwa gole libodzi iye adabatizidwa. Ndipo pomwe padapita minyezi mitanthatu mu gole la 2006, pambuyo pa kubatizidwa iye adakhala mpainiya, ndipo ankucita upainiyabo mpaka lero.

9, 10. (a) Kodi kupfunza cadidi ca m’Bibliya kumbacinja tani makumbukidwe ya kukhala na bzinthu bzakuthupi? (b) Kodi n’ciyani comwe Maria adacinja, ndipo bzakutewera bzace bzidakhala bziponi?

⁹ Bzinthu bza kuthupi. Kuti tipfunze cadidi ca m’Bibliya, nthawe zinango pangafunike kusiya basa lomwe timbatambira kobiri zizinji ayai udindo bomwe tingakhale nabo m’dzikoli. Mwa ciratizo, Pedru na Andereya akhali akhombwe, koma pomwe Jezu adawacemera kuti akhale anyakupfunza wace, iwo adasiya malonda yawoyo. (Mateu 4:18-20) Tsono bzimwebzi bzinkuthandauza lini kuti imwepo mukapfunza cadidi, mun’funika kusiya basa lanu. Thangwe munthu an’funika kuphata basa na kusamalira banja lace. (1 Timotio 5:8) Koma mukapfunza cadidico, makumbukidwe yanu yakufuna bzinthu bzakuthupi yambacinja. Imwepo mun’dzazindikira cinthu comwe n’cakufunika kwene-kwene pa moyo. Jezu adalewa kuti: ‘Lekani kubzigwezekera cuma pa dziko la pansi.’ Koma iye ambatilimbisa kuti: ‘Gwezekani cuma canu kudzulu.’ (Mateu 6:19, 20) Bzimwebzi ndibzo bzomwe mtsikana munango wakucemeredwa Maria adacita.

¹⁰ Maria akhakomedwa kwene-kwene kucita masenzeka manango yakucemeredwa golf kuyambira ali mwana. Ndipo pomwe akhali ku xikola, iye adapitiriza kuyenda patsogolo na masenzekayo mpaka adapasidwa mwayi wakuti akacite mapfunziro ya padzulu. Cakulinga ca Maria cikhali cakufuna kubvekera pa masenzekaya na kukhala na kobiri zizinji. Tsono na kupita kwa nthawe iye adayamba kupfunza Bibliya. Iye adakomedwa kwene-kwene na bzomwe adapfunzabzo ndipo adayamba kubziphatisa basa pa moyo wace. Iye adalewa kuti: “Ndikhakomedwa kwene-kwene pomwe ndikhacinja mikhalidwe yangu na bzinthu bzinango pa moyo wangu kuti ndibverane na bzomwe ndikhapfunza m’Bibliya.” Maria adazindikira kuti mpsakunesa kulinga kukhala pauxamwali na Yahova ndipo pa nthawe ibodzi-bodziyo kulinga kukhala wakubvekera pa masenzeka yace. (Mateu 6:24) Tenepo, iye adasankhula kumalisa cakulinga comwe akhanaco pa masenzeka kuti acite cinthu cinango cakufunika kwene-kwene. Tsapano, Maria ankucita upainiya ndipo iye adalewa kuti “ngwakukondwa kwene-kwene kuposa kale-kale ndipo moyo wace ngwathandauzo.”

11. Tikapfunza cadidi ca m’Bibliya, kodi n’ciyani comwe cingacitike na mbverano omwe tinawo na wanthu winango?

¹¹ Mbverano wathu na wanthu winango. Tikayamba kuphatisa basa bzomwe timbapfunza m’Bibliya, mbverano wathu na axamwali pabodzi na acibale wathu ungacinje. Jezu adatithandiza kubvesesa thangwe lomwe adapembera anyakupfunza wace. Iye adati: ‘Aceneseni na cadidi; fala lanu ni cadidi.’ (Juwau 17:17) Fala lakuti ‘kucenesa’ lingathandauzembo ‘kupambula.’ Tenepo tikayamba kuphatisa basa cadidi pa moyo wathu, tin’funika kumbatalikirana na dziko thangwe ifepano timbateweza mitemo ya m’Bibliya. Napo ticite nyongo yakukhala pa mbverano wabwino na axamwali pabodzi na acibale wathu, winango angafune lini kucita nafe bzinthu ninga momwe akhacitira tinati kupfunza cadidi ndipo angatsutse bzomwe timbakhulupira. Bzimwebzi bzimbatidabwisa lini. Jezu adalewa kuti: ‘Kulewa cadidi, anyamadulanthaka wa munthu, an’dzakhala wanthu wa m’banja lace cairo.’ (Mateu 10:36) Tsono Jezu adalewa pomwe kuti bziribe basa bzinthu bzomwe tingasiye kuti tipfunze cadidi, kutsogolo tin’dzatambira bzinthu bzizinji!—Werengani Marko 10:28-30.e

12. Kodi n’ciyani comwe m’Juda munango adasiya kuti apfunze cadidi ca m’Bibliya?

¹² Mjuda munango wakucemeredwa Aaron, adamala nthawe itali akukhulupira kuti mpsakukwanisika lini kucemera dzina la Mulungu. Koma iye akhafunisisa kudziwa cadidi cakulewa bza Mulungu. Nsiku inango, Mboni idamuuza kuti mpsakukwanisika kucemera dzina la Mulungu lomwe lidanembedwa m’bzinembo bzinai bza Cihebereu, lomwe ni “Yahova.” Aaron adakomedwa kwene-kwene thangwe ra kupfunza kalewedwe ka dzinali ndipo adayenda ku sinagoga kukauzambo atsogoleri wa cipembedzo cacijuda! Iye akhakumbuka kuti iwo angadakomedwa thangwe ra kudziwa dzina la Mulungu, koma ndibzo lini bzomwe bzidacitika. M’mbuto mwa kukomedwa, iwo adamupsipira mata acimuthotha mu mzinda omwe akhakhala. Ndipo acibale wace alibembo kukomedwa naye. Koma iye alibe kubvuma kuti bzimwebzi bzimutazise kudziwa bzizinji bza Yahova. Na kupita kwa nthawe Aaron adakhala Mboni ya Yahova ndipo adatumikira Yahovayo mwakukhulupirika mpaka moyo wace wense. Ifepanombo tin’funika kudikhira kuti mbverano wathu na wanthu winango ungacinje tikapfunza cadidi ca m’Bibliya.

13, 14. Kodi tin’funika kucinja ciyani tikapfunza cadidi? Fotokozani ciratizo.

¹³ Makumbukidwe na bzicito bzakupswipa. Tikapfunza cadidi ticiyamba kuphatisa basa nfundo za m’Bibliya, tin’funika kucinja makumbukidwe pabodzi na bzicito bzakuipa. Mpostolo Pedru adanemba kuti: ‘Ninga wana wakubvera lekani kutewezera bzikhumbo bzanu bzomwe mukhanabzo kale-kale pomwe mukhali wakusaya kudziwa, koma khalani wakucena m’makhalidwe yanu yense.’ (1 Pedru 1:14, 15) Mu mzinda wakale wa ku Kolinto, wanthu azinji akhacita bzinthu bza unzazi. Ndipo omwe akhakhala mu mzindayo akhafunika kucinja bzinthu bzizinji kuti akhale wakucena pamaso pa Yahova. (1 Wakolinto 6:9-11) Nsiku zino, wanthu azinji ambacinjambo bzinthu bzizinji akapfunza cadidi ca m’Bibliya. Pakulewa bza nkhani imweyi Pedru adati: ‘Nthawe yomwe yapitayi njakukwana kuti mucite kufuna kwa wanthu wamitundu, pomwe mukhacita bzinthu bzakuipa, bzikhumbo bzakuipa, kuledzera, maphwando, kumwa kwene-kwene na kunamata bzifanikiso kwakusaya kubvumizidwa.’—1 Pedru 4:3.

¹⁴ Jasmine pabodzi na bayace akhali aledzeri kwa magole mazinji. Napo kuti bayaceyo akhana luso la kunemba mabukhu, iye akhakwanisa lini kukhotcerera basalo thangwe ra kumwa. Ndipo Jasmine akhadziwika kwene-kwene thangwe ra ukali na kucita bzinthu bza ciwembo. Nsiku inango, pomwe Jasmine akhadaledzera adagumana mu msewu na banja linango la amisiyonario. Banjalo lidamukumbira kuti lidzayende kumui kwace pa mdzinga wakutewera kuti akapfunze naye Bibliya. Tsono pomwe iwo adadzayenda kumui kwaceko, adakagumana iye pabodzi na mwamuna wace adaledzera. Iwo akhakhulupira lini kuti amisiyonario wale angadayendadi kumui kwawo. Nsiku inango amisiyonariowo adadzayenda pomwe kumui kwawoko ndipo adakawona wense alibe kuledzera. Ndipo iwo akhadikhirira kuti ayambe kupfunza cadidi ca m’Bibliya, tenepo mwakusaya kucedwa adayamba kuphatisa basa bzomwe akhapfunzabzo. Mkati mwa minyezi mitatu, iwo adasiya kumwa mowa, ndipo patsogolo pace adakanembesa malowozi yawo ku boma. Wanthu azinji wa mu mzinda omwe akhakhala adawona nyongo yomwe iwo adacita kuti acinje, bzimwebzi bzidacitisa kuti wanthuwo ayambembo kupfunza Bibliya.

15. Kodi ni cinthu ciponi comwe cingatinese kucinja tikapfunza cadidi ca m’Bibliya, ndipo n’thangwe ranyi?

¹⁵ Miyambo na bzicito bzomwe bzimbakondwesa lini Mulungu. Cinthu cakunesa kwene-kwene kucinja ni kuleka kutenga mbali pa miyambo na bzicito bzomwe bzimbakondwesa lini Yahova. Ndipo winango ambaneseka kusiya napo pambuyo pa kupfunza momwe Yahova ambawonera bzinthu bzimwebzi. Iwo ambadziwa kuti wanthu kawiri-kawiri ambakhulupira kwene-kwene miyambo inango, ninga kulemekeza acibale wawo omwe adafa. (Bzakutonga 14:1) Tsono n’ciyani comwe cingatithandize kucinja? Tingapfunze na bziratizo bzabwino bza wale omwe adacinja bzinthu pa moyo wawo pomwe adapfunza cadidi, ninga momwe adacitira Akristau wakuyambira ku Efezo.

16. Kodi n’ciyani comwe Akristau winango wa ku Efezo adacita?

¹⁶ Mu mzinda wakale wa ku Efezo, wanthu azinji akhacita matsenga kwene-kwene. Kodi n’ciyani comwe wanthu omwe akhacita matsenga adacita pomwe adakhala Akristau? Bibliya limbafotokoza kuti: ‘Azinji omwe akhambacita bza matsenga adabweresa mabukhu yawo, aciyatentha pa maso pa wense. Pomwe adalewenga kobiri zomwe adagulira mabukhuyo, zidakwana kobiri 50.000 za siliva. Fala la Yahova likhakula, licikunda mwa mphanvu.’ (Mabasa 19:19, 20) Akristau wakukhulupirikawa adatentha mabukhu yawo yakuumira, ndipo Yahova adawasimba thangwe ra bzimwebzi.

17. (a) Kodi ni bzinthu bziponi bzomwe bzingatitazise kupfunza cadidi ca Bibliya? (b) Kodi mu nkhani yakutewera tin’dzacezerana mibvunzo iponi?

¹⁷ Kodi n’ciyani comwe imwepo mudacita kuti mupfunze cadidi ca m’Bibliya? Azinji wa ifepano tidaphatisa bwino basa nthawe yathu. Ndipo winango wa ife adabvuma kuluza mwayi wakukhala na cuma. Winango mbverano omwe akhanawo na acibale pabodzi na axamwali wawo udacinja. Ndipo azinji wa ifepano tidacinja makumbukidwe na bzicito bzakuipa. Tidasiya miyambo na bzicito bzomwe bzimbakondwesa lini Yahova. Koma tidatsimikiza na mtima wense kuti cadidi ca m’Bibliya n’cakufunika kwene-kwene kuposa cinthu ciri-cense comwe tingacisiye. Cadidi ca m’Bibliya catithandiza kukhala pauxamwali bwakulimba na Yahova, comwe ni cinthu cakufunika kwene-kwene pa moyo wathu. Ndipo tikambakumbukira bzisimbo bzense bzomwe tinabzo thangwe ra cadidi, timbaneseka kubvesesa kuti thangwe ranyi munthu ambafika pa ‘kugulisa’ cadidici. Kodi bzimwebzi bzingacitike tani? Ndipo kodi tingatcenkhe tani kugwera m’bvuto ninga limweri? Mu nkhani yakutewera tin’dzawona mitawiro ya mibvunzoyi.