Kulewalewa Mwacibadwa

2 Wakolinto 2:17

BZOMWE MUNGACITE: Lewalewani ninga momwe mumbalewalewera, kucokera pansi pa mtima, mucilatizambo momwe nkhaniyo inkukutokonyerani na momwe ingatokonyerembo abveseri wanu.

MOMWE MUNGACITIRE:

• Pembani, mucikonzekera bwino-bwino. Kumbirani Mulungu kuti akuthandizeni kuikha makumbukidwe yanu pa nkhaniyo, m’mbuto mwa kucita thupo na momwe mungakaifotokozere. Kumbukirani nfundo zikulu-zikulu zomwe mun’funa kukazifotokoza, ndipo mbazilewani m’mafala yanu-yanu, m’mbuto mwakucita kuwerenga fala libodzi na libodzi ninga momwe bzidanembedwera pa tsamba la nkhani.

• Lewalewani na mtima wense. Kumbukirani thangwe lomwe abveseri wanu an’funikira kubva nkhaniyo. Ikhani makumbukidwe yanu pa abveseri wanuwo. Bzimwebzi bzin’dzacitisa kuti kaimidwe kanu, kaphatisidwe basa ka manja yanu na mawonekedwe ya nkhope yanu bzilatize lufoyi na uxamwali.

• Mbanyang’anisani abveseri wanu. Mbanyang’anisani wanthu omwe munkuceza nawowo penu bzimbabvumizika kwanuko. Mukakhala munkufotokoza nkhani, mbanyang’anisani mbveseri m’bodzi na m’bodzi, m’mbuto mwakunyang’anisa abveseri wense kabodzi na kabodzi.