Mareferentsiya ya Kabukhu ka Mitsonkhano ka Moyo Wathu na Utumiki
© 2023 Watch Tower Bible and Tract Society of Pennsylvania
4-10 MARÇO
CUMA CA M’FALA LA MULUNGU | MASALIMO 16-17
“Yahova, Ntsantsa Yangu ya Bzinthu Bzabwino”
Maswakamwe, Kodi Mungakhale Tani na Moyo Wakukondwa?
MBASANKHULANI AXAMWALI WABWINO
11 Werengani Psalymo 16:3. Davide akhadziwa momwe angadagumanira axamwali wabwino. Iye adasankhula wale omwe akhafuna Yahova kuti akhale axamwali wace, ndipo bzimwebzi bzidamucitisa kukhala wakukondwa. Iye adafotokoza bza axamwali wacewo kuti akhali ‘anyakucena’ thangwe akhacita nyongo yakuteweza mitemo yakulungama ya Yahova. Nyakunemba bukhu la psalymo munango adafotokozambo bzibodzi-bodzibzi, pomwe adalewa bza kusankhula axamwali, iye adati: ‘Ndine xamwali wa wentse omwe ambakugopani na wale omwe ambasunga bzakutonga bzanu.’ (Salimo 119:63) Ninga tidapfunzira mu msolo udamala ule, imwepo mungagumane axamwali azinji wabwino pakati pa wale omwe ambafuna na kubvera Yahova. Koma mun’funika lini kukhala na axamwali wa misinkhu ibodzi-bodzi na yanu yokha.
w14 15/2 tsa. 29 ndi. 4
“Timbawone Bzinthu Bzabwino Bzomwe Yahova Ambaticitira”
Davide adaimba kuti: “Yahova ni cipande cangu, mbali yomwe ndidapasidwa, na kopo yangu. Imwepo mumbakhotcerera utaka bwangu. Ndataliridwa mbuto zabwino.” (Salimo 16:5, 6) Davide akhatenda kwene-kwene “cipande” cace, ayai kuti mwayi wakukhala pa uxamwali na Yahova na kumutumikira. Mwakundendemerana na Davide, ifepano timbagumana na mabvuto mazinji koma timbasimbidwa mu njira zizinji. Na tenepo, bwerani tipitirize kukhala wakukondwa pakutumikira Mulungu wacadidi na ‘kumbatenda’ templo yauzimu ya Yahova.
w08 15/2 tsa. 3 ndi. 2-3
Ikhani Yahova Patsogolo Panu Nthawe Zentse
2 Tentsenefe timbapfunza bzinthu bzizinji na bziratizo bza m’Bibliya bza wanthu wakudziwika bwino ninga Abalahamu, Sara, Mozeji, Rute, Davide, Esteri, mpostolo Paulo na winango. Ndipo tingagumanembo phindu na wanthu wale omwe ambadziwika lini kwene-kwene. Kumbakumbukira bziratizo bza m’Bibliya kungatithandize kucita bzomwe nyakunemba salimo adacita. Iye adati: “Ndaikha Yahova patsogolo pangu nthawe zentse. Thangwe iye ali ku boko langu lamadidi, nin’dzatekenyeka lini.” (Salimo 16:8) Kodi mafala yamweya yakuthandauza ciyani?
3 Kale-kale mcikunda akhaphatirira xipada yace na boko lamadidi. Bzimwebzi bzikhacitisa kuti mbali ya kumadidiyo ireke kukhala yakukhotcerereka na cakukhotcera comwe akhanyamula na boko lamadzere. Tsono, iye akhakhala wakukhotcerereka mcikunda mwanzace akakhala adaima pafupi na iye ku boko lace lamadidi. Ifepanombo tikambakumbukira Yahova na kucita kufuna kwace, iye an’dzatikhotcerera. Bwerani tiwone momwe bziratizo bza m’Bibliya bzingalimbisire cikhulupiro cathu kuti “tiikhe Yahova patsogolo pathu nthawe zentse.” — Byington.
Cuma Cauzimu
it-2 tsa. 714
Mboni ya Diso
Fala la Cihebereu lakuti ʼi·shohnʹ (Deu 32:10; Mim 7:2), likaphatisidwa basa pabodzi na fala lakuti ʽaʹyin (diso), limbathandauza “mwana wa diso.” Mwakundendemerana na bzimwebzi, fala lakuti bath (mwana wacikazi) lomwe liri pa Maliro 2:18 limbathandauza “mwana wacikazi wa diso.” Mafala yentseneya yambathandauza mboni ya diso. Mafala mawiriya yomwe ni “mwana wa diso” na “mwana wacikazi wa diso” (“mboni ya diso,”) yambabvekesedwa bwino pa Salimo 17:8. Mafala yamweya yambalewa bza kacithunzi-thunzi kathu komwe tingakawone mu mboni ya diso la munthu omwe ali pafupi na ifepano.
Diso ni cinthu comwe timbafunika kucita naco mphole kwene-kwene; ndipopa mu diso mukapita kantsiye ayai kacinthu kanango ifepano timbakwanisa kukawona. Mbali icena ya diso yomwe imbakhala mboni ya diso imbafunika kukhotcereredwa bwino, thangwe mbali imweyi ikapwetekeka ayai ikasaya kukhala bwino thangwe ra matenda, ingacitise kuti mboniyo itazire kuwona ayai ingacitise kuti munthu akhale zimola. Bibliya limbaphatisa basa mafala yakuti “mboni ya diso” kuti lilatize cinthu cakufunika kwene-kwene kukhotcereredwa. Lamulo la Mulungu lin’funika kuwonedwambo mwa njira ibodzi-bodziyi. (Mim 7:2) Pakufotokoza momwe Yahova akhacitira bzinthu na Ajirayeri, Deuteronomiyo 32:10 ambalewa kuti iye akhakhotcerera mtundu umweyu ninga “mboni ya diso lace.” Davide adapemba kuti akhotcereredwe na kusamaliridwa ninga “mboni ya diso.” (Salimo 17:8) Iye akhafuna kuti Yahova acite bzinthu mwa kumuthandiza pomwe akhaboneresedwa na anyamadulanthaka wace. (Ndendemezerani na Zak 2:8; pomwe pambaphatisidwa basa fala la Cihebereu lakuti ba·vathʹ ʽaʹyin, “eyeball”.)
11-17 MARÇO
CUMA CA M’FALA LA MULUNGU | SALIMO 18
“Yahova . . . Ndiye Omwe Ambandipulumusa”
w09 1/5 tsa. 14 ndi. 4-5
Cikondweso ca Yahova Ndico Mbuto Yathu Yakukhotcerereka
Bibliya limbandendemezera pomwe Yahova na bzinthu bzakusaya moyo. Iro limbalewa kuti iye ni “Tsendwa la Ajirayeri,” ni “mwala” na “mbuto yakuthawira.” (2 Samuyeli 23:3; Salimo 18:2; Deuteronomiyo 32:4) Kodi bzinthu bzentsenebzi bzikundendemerana tani? Ninga momwe tsendwa lakulimba limbakhalira lakusaya kutekenyeka, Yahova Mulungu ni Mbuto yakukhotcerereka yakulimba kwa imwepo.
5 Bukhu la Masalimo lina mafala mazinji yakuyezezera yakufotokoza bza unthu bwa Yahova. Mwa ciratizo, pa Salimo 84:11 pambalewa kuti Yahova ni “dzuwa na cakukhotcera” thangwe iye ndiye Omwe adakonza dzuwa na njira zentse zakukhotcerereka. Tsono pa Salimo 121:5 pambalewa kuti “Yahova ni mthunzi wanu pa nthawe yakuthemera.” Ninga momwe mthunzi umbatithandizira pa ntsiku ya dzuwa, Yahova ambakhotcerera atumiki wace ku mabvuto yomwe yangawacitikire na kuwapasa mthunzi “m’manja” mwace ayai “m’maphaphidwe” mwace. — Zaiya 51:16; Salimo 17:8; 36:7.
it-2 tsa. 1161 ndi. 7
Fala
Mulungu ambabva fala la atumiki wace. Wanthu omwe ambatumikira Mulungu mu mzimu na mu cadidi angakumbire thandizo kwa iye na citsimikizo cakuti iye an’dzabva fala lawo, bziribe basa cirewedwe comwe angaphatise basa. Kuthimizira bzimwebzi, napo kuti nthawe zinango munthu angapembe ca mumtima, Mulungu omwe ambadziwa mitima ya wanthu wentse, “an’dzabva” ayai kutetekera mpembo waceyo. (Sl 66:19; 86:6; 116:1; 1Sa 1:13; Neh 2:4) Mulungu ambabva munthu omwe akugumana na mabvuto akamulirira kuti amuthandize, ndipo iye ambabvambo na kudziwa bzomwe munthu ali-wentse wakuipa akukumbuka na bzomwe akufuna kucitira wanthu wace. — Gen 21:17; Sl 55:18, 19; 69:33; 94:9-11; Jer 23:25.
Bzomwe Tingacite Tikakhala na Thupo
2. Kukumbukira. Mukakhala phee mucikumbukira bzomwe bzidakucitikirani pa moyo wanu, kodi mumbakwanisa kuwona momwe Yahova adakuthandizirani? Tikambakumbukira momwe Yahova ambatithandizira na momwe adathandizirambo atumiki wace m’mbuyomu, timbakhala na mphanvu pabodzi na citsimikizo cakuti iye an’dzatithandizambo tikagumana na mabvuto. (Salimo 18:17-19) Mkulu munango wa gwere wakucemeredwa Joshua adalewa kuti. “Ndina lista ya bzinthu bzizinji bzomwe Yahova adanditawira mu mpembo. Bzimwebzi bzimbandithandiza kukumbukira nthawe yomwe ndidakumbira cinthu Yahova na momwe iye adanditawirira.” Inde, tikambakumbukira momwe Yahova ambatithandizira pa moyo wathu, timbakhala na mphanvu ndipo timbamalisa thupo.
Cuma Cauzimu
it-1 tsa. 432 ndi. 2
Akerubi
Bzimwebzi ni bzifanikiso lini bzakugopswa bzomwe wanthu omwe akhanamata mirungu yakunama akhabzinamata. Mwakubverana na umboni bunango bwacidjuda (Bibliya limbafotokoza lini nkhani imweyi), Akerubi amwewa akhali ninga wanthu. Bzimwebzi ni bzinthu bzakukonzedwa na wanthu bzomwe bzikhaimira bzakulengedwa bzauzimu bza kudzulu bzakukonzedwa bwino ʼmwakuteweza malangoʼ yomwe Mozeji adapasidwa na Yahova. (Eki 25:9) Mpostolo Paulo adalewa kuti ʼakerubi awiri waulemerero, omwe akhampsinkha cakugwanankhirira cace na matenga yawo.ʼ (Ahe 9:5) Akerubi amwewa akhaimira Yahova. Yahova adati: “Inepano nin’dzawonekera padzaulu pa tampayo pa kulewalewa na iwepo. Ndipo inepano nin’dzakudziwisa mitemo yentse yomwe un’funika kukauza Ajirayeri, kucokera pakati pa akerubi awiri omwe ali padzaulu pa thungwa la umboni.” (Eki 25:22; Num 7:89) Ndipopa, Yahova adalewa kuti “[akhadakhala] padzaulu pa akerubi.” (1Sa 4:4; 2Sa 6:2; 2Am 19:15; 1Nk 13:6; Sl 80:1; 99:1; Zai 37:16) Akerubi akhali ninga “cizindikiro ca ngolo” ya Yahova (1Nk 28:18), ndipo maphaphidwe ya akerubi yakhaimira kukhotcerereka na kucita ulendo kamfulumize. Tenepo, pomwe Davide akhaimba nyimbo yace, iye adalewa kuti kufulumiza komwe Yahova ambacita pa kuyenda kukamuthandiza kukhali ninga “munthu omwe adapakira kerubi ndipo akumbuluka” napo pa “maphaphidwe ya mzimu.” — 2Sa 22:11; Sl 18:10.
18-24 MARÇO
CUMA CA M’FALA LA MULUNGU | SALIMO 19-21
“Kudzulu Kumbadziwisa Ulemerero bwa Yahova”
w04 1/1 tsa. 8 ndi. 1-2
Wanthu Wentse, Perekani Ulemerero kwa Yahova
DAVIDE, mwana wa Jese, adakula ninga makabusa pafupi na mzinda wa Betelehemu. Bzimwebzi bzidamucitisa kuti akhale na nthawe yakuwona kukula na kudeka kwa kudzulu usiku pa nthawe yomwe akhausa mabira ya pai wace! Kulewa cadidi, iye adakumbukira bzimwebzi pomwe akhanemba, mwakucita kufuliziridwa na mzimu wakucena wa Mulungu, nyimbo yomwe imbagumanika pa Salimo 19. Iye adaimba kuti: “Kudzulu kukudziwisa ulemerero bwa Yahova; ndipo m’mlengalenga mukudziwisa mabasa ya manja yace.” — Salimo 19:1, 4.
2 Mwakusaya mafala na mwakusaya kulewalewa, ntsiku na ntsiku na usiku buli-bwentse kudzulu kumbapereka ulemerero kwa Yahova. Cirengedwe cimbasiya lini kupereka ulemerero kwa Yahova, ndipopa mpsakufunika kwa ifepano kuti tikhale wakubzicepesa kuti timbawone umboni bumwebu bomwe wanthu wentse wa “pa dziko lentse la pantsi” ambakwanisa kubuwona. Tsono umboni bwakusaya kulewalewabu n’bwakukwanira lini ne. Wanthu wakukhulupirika ambalimbikisidwa kuti aphatise basa mafala yawo pa kupereka ulemerero kwa Yahova. Nyakunemba salimo munango adauza atumiki wa Yahova kuti: “Bvumani Yahova, imwe mitundu ya wanthu.” (Salimo 96:7, 8) Wale omwe ali pa uxamwali bwakulimba na Yahova ali wakukonzeka kucita bzimwebzi. Tsono kodi kubvuma kupereka ulemerero kwa Yahova kumbathandauza ciyani?
w04 1/6 tsa. 11 ndi. 8-10
Cirengedwe Cimbapereka Ulemerero kwa Mulungu!
8 Patsogolo pace, Davide adafotokoza cinthu cinango cakudabwisa pa cirengedwe ca Yahova. Iye adati: “Kudzuluko iye adaikha tendi la dzuwa, ndipo dzuwalo limbawoneka ninga noiva omwe akucoka m’nyumba mwace, limbakomedwa na momwe mwamuna wamphanvu ambacitira akambathamanga m’njira. Limbacokera kuphampha kwa kudzulu, ndipo limbazungulira mpaka kuphampha kunango kwa kudzulu. Palibe cinthu comwe cimbabva lini kupsa kwace.” — Salimo 19:4-6.
9 Dzuwa nding’ono na nyenyezi zinango. Tsono, dzuwa ni nyenyezi ikulu kwene-kwene mwakuti maplaneta yanango yomwe yadazungulira dzuwalo yambawoneka kuti ni mang’ono kwene-kwene. Bukhu linango limbalewa kuti dzuwa lidalemera matonelada “2 bilhões, ya bilhões na bilhões”. Kulemera kumweku kumbaposa kulemera kwa maplaneta yentse yomwe yadazungulira dzuwa kuyaphatanidza pabodzi. Mphanvu ya dzuwa imbacitisa kuti dziko la pantsi limbazungulire dzuwalo pa mtantho wa makilometro 150 milhões mwakusaya kupambuka pa njira yace ne kufundukira kutali ayai kufendera pafupi na dzuwalo. Ni mphanvu yakucepa basi ya dzuwa yomwe imbafika pa dziko la pantsi pano, koma mphanvu imweyi imbakwanisa kucitisa kuti bzinthu bza moyo bzipitirize kukhala bziripo pa dziko pano.
10 Nyakunemba salimo adaphatisa basa mafala yakuyezezera pakufotokoza bza dzuwa pomwe adalewa kuti dzuwa ni “cinzonzomtali” comwe cimbathamanga kucokera kumalekezero ya dziko kufika kumalekezero yanango ya dziko masikati ndipo cimbakagona mu “tendi.” Nyenyezi ikulu imweyi ikambamira kumaulo, munthu akambaiwona ali pa dziko la pantsi pano, bzimbakhala ninga kuti ikupita mu “tendi” kuti ikapume. Kumacibese imbakhala ninga kuti ikufumphuka, ndipo imbayamba kugaka kwene-kwene “ninga noiva omwe akubula m’nyumba mwace.” Pakuti Davide akhali makabusa, iye akhadziwa kuti usiku kumbadjedjera kwene-kwene. (Genesesi 31:40) Iye akhakumbukira kuti dzuwa likhamucitisa kubva kuthuma mwakamfulumize na kucitisa kuti mbuto yomwe iye aliyo ithume. Bzikuwonekeratu kuti dzuwalo likhaneta lini pa ulendo bwace bwakucokera ku macibese kuyenda ku maulo, koma likhali ninga “cinzonzomtali” cakukonzeka kubwerera pomwe ulendo bwace.
g95 8/11 tsa. 7 ndi. 3
Munthu wa Luso Omwe Wanthu Alibe Naye Basa Ntsiku Zathu Zino
Kukulisa mtima wathu wakutenda luso la m’cirengedwe kungatithandize kudziwa Mulengi wathu omwe mabasa yace yatizungulira. Pa nthawe inango Jezu adauza anyakupfunza wace kuti anyang’anisise maluwa ya m’thengo yomwe yakhadamera ku Galileya. Iye adati: “Pfunzani na momwe yambakulira maluwa ya m’thengo; iyo yambaphata lini basa ne kusona bzakubvala; tsono ndikukuuzani kuti napo Salomau mu ulemerero bwace bwentse, iye alibe kubvalira ninga libodzi mwa maluwaya.” (Mateu 6:28, 29) Kudeka kwa maluwa kumbatikumbusa kuti Mulungu angaleke lini kusamalira wanthu.
Cuma Cauzimu
w06 15/5 tsa. 18 ndi. 4
Nfundo Zikulu-zikulu za Cigawo Cakuyamba ca Bukhu la Masalimo
Sl 21:3 — Kodi “korowa ya oro” yomwe Davide adailewa ikuimira ciyani? Bibliya limbalewa lini kuti korowayi ikhali yacadidi ayai kudeka kwace kukhali kwakuyezezera thangwe rakuti Davide adakunda nkhondo zizinji. Vesi limweri limbalewa bza korowa yomwe Jezu adatambira kwa Yahova mu 1914. Korowayi imbalewedwa kuti nja oro thangwe rakuti utongi bwa Jezu n’bwakupambulika kwene-kwene.
25-31 MARÇO
CUMA CA M’FALA LA MULUNGU | SALIMO 22
Bibliya Likhadalewa Kale Bzinthu Bzakusiyana-siyana Pakulewa bza Infa ya Jezu
w11 15/8 tsa. 15 ndi. 16
Iwo Adamugumana Mesiya!
16 Mesiya angadadzawonedwa ninga kuti wasiyidwa na Mulungu. (Werengani Salimo 22:1.) Marko adalewa kuti “pa nthawe zitatu za kumaulozo, Jezu adakuwa mwamphanvu aciti: ‘Eli, Eli, lama sabakitani?’ Bzomwe bzimbathandauza kuti: ‘Mulungu wangu, Mulungu wangu, thangwe ranyi mwandisiya?’” (Marko 15:34) Mafala yamweya yakuthandauza lini kuti Jezu akhakhulupira lini Pai wace wa kudzulu. Iye akhadziwa kuti Mulungu angadamukhotcerera lini pa nthawe yomwe iye angadaphedwa na anyamadulanthaka wace. Umweyu ukhali mwayi wakuti Jezu alatize kuti angadapitiriza kukhala wakukhulupirika kwa Mulungu napo pomwe angadayezedwa. Kukuwa kwa Jezu kumweku kudakwanirisa cinembo ca Salimo 22:1.
w11 15/8 tsa. 15 ndi. 13
Iwo Adamugumana Mesiya!
13 Davide adalewa kuti Mesiya angadadzanyozedwa. (Werengani Salimo 22:7, 8.) Jezu adanyozedwa kwene-kwene pomwe adamanikidwa pa muti wakuzunzidwira. Mateu adanemba kuti: “Ndipo omwe akhagwata na pamwepo akhambamutukwana na kumbakwetedza misolo yawo acimbati: ‘Iwepo omwe ukhambati ungadagwesa templo, uciimanga pomwe mu ntsiku zitatu, bzipulumuse wekha! Penu ndiwedi mwana wa Mulungu, buluka pa muti wakuzunzidwirapo.’” Mwa njira ibodzi-bodziyi, atsogoleri wa antsembe, anembi na akulu, adayambambo kumunyoza acimbati: “Iye adakwanisa kupulumusa winango; koma akutazira kubzipulumusa yekha! Penu iye ni Mambodi wa Jirayeri, mbatimuwoneni penu angabuluke pa muti wakuzunzidwira pale, ndipo ifepano tinimukhulupira. Iye akhakhulupira Mulungu; musiyeni Mulungu waceyo amupulumuse penu ambamufunadi, pakuti akhambati: ‘Ine ndine Mwana wa Mulungu.’” (Mat. 27:39-43) Jezu adapirira bzentsenebzi ndipo alibe kukalipa ayai kubwezera. Iye ni ciratizo cabwino kwene-kwene kwa ifepano.
w11 15/8 tsa. 15 ndi. 14
Iwo Adamugumana Mesiya!
14 An’dzacita vima-vima bzakubvala bza Mesiya. Nyakunemba salimo adanemba kuti: “Iwo akugawana bzakubvala bzangu pakati pawo, ndipo akucitira vima-vima cakubvala cangu.” (Sal. 22:18) Bzimwebzi bzidacitikadi. Bibliya limbalewa kuti pomwe acikunda waciroma “adamukhomerera [Jezu] pa muti, adagawana bzakubvala bzace bzakunja mwakucita vima-vima.” — Mat. 27:35; werengani Juwau 19:23, 24.
Cuma Cauzimu
w06 1/11 tsa. 29 ndi. 7
Timbalemekeze Mitsonkhano Yathu Yakupambulika
7 Pana njira zakusiyana-siyana za momwe tingalemekezere mitsonkhano yathu. Njira ibodzi ndiyo kuimba nyimbo za Umambo. Nyimbo zizinji zidanembedwa ninga mpembo ndipopa tin’funika kumbaziimba mwa ulemu. Mwakuphatisa basa mafala ya mu Salimo 22, mpostolo Paulo adanemba bza Jezu kuti: “Nin’dzadziwisa dzina lanu kwa abale wangu ndipo pakati pa gwere nin’dzakutumbizani na nyimbo.” (Ahebereu 2:12) Na tenepo, tin’funika kukhala tidakhala nyakutsogolera mtsonkhano akakhala akanati kulewa nyimbo yomwe tiniimba, patsogolo pace tiimbe nyimboyo ticimbakumbukira bzomwe ikuthandauza. Pomwe tikuimba nyimbozo tin’funika kubva ninga momwe nyakunemba salimo adabvera pomwe adanemba kuti: “Nin’dzatumbiza Yahova na mtima wangu wentse pakati pa wanthu wakulungama omwe adatsonkhana na pakati pa gwere.” (Salimo 111:1) Kulewa cadidi, kuimbira Yahova nyimbo za kumutumbiza ni thangwe libodzi lomwe lingaticitise kumbafika mwakamfulumize pa mitsonkhano.
w03 1/9 tsa. 20 ndi. 1
Tumbizani Yahova “pa Mitsonkhano”
Ninga momwe bzikhacitikira kale-kale, ntsiku zino wanthu wakukhulupirika ambapasidwa mwayi wakuti alewe bza cikhulupiro cawo “pakati pa gwere.” Munthu ali-wentse ambakhala na mwayi wakupereka mtawiro pa mibvunzo yomwe imbacitidwa pa mitsonkhano ya gwere. Lekani kumbanyozera kufunika kwa bzimwebzi. Mwa ciratizo, mitawiro yomwe imbalatiza bzomwe tingacite kuti tipirire mabvuto ayai tiyatcenkhe imbalimbikisa abale kuti apitirize kuteweza nfundo za m’Bibliya. Mitawiro yomwe imbaperekedwa mwakuphatisa basa mavesi yomwe yali pa ndimepo, ayai nfundo zomwe munthu agumana pomwe afufudza zingacitise kuti wanthu winango ambafunembo kumbafufudza.
1-7 ABRIL
CUMA CA M’FALA LA MULUNGU | MASALIMO 23-25
“Yahova ni M’busa Wangu”
w11 1/5 tsa. 31 ndi. 3
“Yahova ni M’busa Wangu”
Yahova ambatsogolera mabira yace. Mabira yakakhala yalibe makabusa yambataika. Mwakundendemerana na bzimwebzi, timbafunikirambo kutsogoleredwa pa moyo wathu. (Jeremiya 10:23) Davide adalewa kuti Yahova ambayendesa wanthu wace ku mbuto komwe kuna “m’mauswa yakupswipirira bwino,” na“ ku mbuto zakupumira za madzi mazinji.” Ndipo ambawatsogolerambo “mu njira zacirungamo.” (Vesi 2 na 3) Bzomwe Yahova ambacitabzi bzikundendemerana na bzomwe makabusa ambacita na mabira yace ndipo bzimwebzi bzikulatiza kuti tin’funika kumukhulupira. Tikambateweza malango ya Mulungu yomwe yambagumanika m’Bibliya, tingakhale na moyo wabwino, wakukondwa ndipo bzinthu bzin’dzatifambira bwino kutsogolo.
w11 1/5 tsa. 31 ndi. 4
“Yahova ni M’busa Wangu”
Yahova ambakhotcerera mabira yace. Mabira yakakhala yalibe makabusa yambacita mantha ndipo yambasaya munthu wakuyathandiza. Yahova ambauza wanthu wace kuti aleke kucita mantha napo ‘acimbafamba m’cigwa ca mdima wakugopswa.’ Imweyi imbakhala nthawe yomwe munthu ambakhala akugumana na mabvuto makulu. (Vesi 4) Pa nthawe imweyi Yahova ambawona bzomwe bzikucitikira atumiki wace ndipo ambakhala wakukonzeka kuwathandiza. Iye ambapasa atumiki wace nzeru na mphanvu kuti akwanise kupirira mayezo yomwe akugumana nayo. — Afilipi 4:13; Tiyago 1:2-5.
w11 1/5 tsa. 31 ndi. 5
“Yahova ni M’busa Wangu”
Yahova ambadyesa mabira yace. Mabira yambathemba makabusa wawo kuti ayapase cakudya. Pana bzinthu bzizinji bzauzimu bzomwe tingakwanise lini kubzigumana tekha mwakusaya kuthandizidwa na Mulungu. (Mateu 5:3) Timbatenda kwene-kwene Yahova thangwe ngwakupasa ndipo ambapasa atumiki wace cakudya cizinji cauzimu. (Vesi 5) Tikambawerenga Bibliya na mabukhu yomwe yambatithandiza kudziwa bzizinji bza m’Bibliya timbadziwa cakulinga ca moyo na bzomwe Mulungu an’funa kudzaticitira kutsogolo.
Cuma Cauzimu
w11 15/2 tsa. 24 ndi. 1-3
Mbafunani Cirungamo na Mtima Wanu Wentse
YAHOVA akutsogolera wanthu wace “mu njira zacirungamo” mwakuphatisa basa Fala lace na mzimu wace wakucena. (Salimo 23:3) Tsono pakuti wanthufe ndife wakuperewera, nthawe zinango timbacoka mu njira za cirungamo. Bzimwebzi bzikacitika, pambafunika nyongo kuti tiyambe pomwe kucita bzinthu bzauzimu. Kodi n’ciyani cingatithandize? Mwakundendemerana na Jezu, tin’funika kufuna kucita bzinthu bzakulungama. — Werengani Salimo 45:7.
2 Kodi pa vesiri, “njira zacirungamo” n’ciyani? “Njira” zimwezi ni moyo omwe munthu ambakhala nawo akambateweza nfundo zakulungama za Yahova. Fala la Cihebereu lomwe adalisandulizira kuti “cirungamo” limbathandauza “kuleka kugonyola-gonyola” pa kuteweza makhalidwe yabwino. Pakuti Yahova ni “mbuto yakukhala yakulungama,” wanthu omwe ambamunamata ambathemba iye kuti awauze njira za makhalidwe yabwino zomwe iwo an’funikira kuziteweza. — Jeremiya 50:7.
3 Kuti tikondwese Mulungu, tin’funika kucita nyongo ya kuteweza bzomwe iye ambawona kuti mpsakulungama. (Deuteronomiyo 32:4) Kuti bzimwebzi bzikwanisike, tin’funika kumbapfunza bzinthu bzizinji pakulewa bza Yahova m’Fala lace, Bibliya. Tikapfunza bzizinji bza Yahova na kumbamufenderera ntsiku zentse, ifepano tin’dzafuna kwene-kwene cirungamo cace. (Tiyago 4:8) Ndipo tikambasankhula bzinthu bzakufunika pa moyo wathu, tin’funika kubvuma kuti Fala la Mulungu limbatitsogolere.
8-14 ABRIL
CUMA CA M’FALA LA MULUNGU | MASALIMO 26-28
Kodi N’ciyani Comwe Davide Adacita Kuti Apitirize Kukhala Wakukhulupirika kwa Yahova?
w04 1/12 tsa. 14 ndi. 8-9
Fambani Mwakukhulupirika
8 Davide adapemba kuti: “Ndidingeni, Yahova, ndipo mundiyeze; cenesani impso zangu na mtima wangu.” (Salimo 26:2) Impso zimbakhala mkati kwene-kwene mwa thupi lathu. Impsozo zimbaimira bzomwe munthu akukumbuka mu mtima mwace. Ndipo mtima wakuyezezera umbaimira mkati mwa munthu, ayai kuti bzomwe bzimbamucitisa kuti acite bzinthu bzinango, momwe ambabvera mu mtima mwace na nzeru zace. Pomwe Davide adakumbira Yahova kuti amuyeze, iye akhakumbira kuti Yahovayo afufudze na kuwona nzeru zace na momwe akhakumbukirira mu mtima mwace.
9 Davide adakumbira kuti impso na mtima wace bzicenesedwe. Kodi Yahova ambacenesa tani mkati mwathu? Davide adaimba kuti: “Nin’dzatumbiza Yahova omwe ambandipasa malango, napo usiku, makumbukidwe yangu yambandilungamiza.” (Salimo 16:7) Kodi bzimwebzi bzikuthandauza ciyani? Bzimwebzi bzikuthandauza kuti malango ya Yahova yadamufika pa mtima Davide ndipo yadakhazikika mu mtimamo. Bzimwebzi bzingaticitikirembo ifepano tikambakumbukira na mtima wentse malango yomwe timbatambira m’Fala la Mulungu, Bibliya, na wanthu omwe ambamuimirira, na gulu lace na kubvuma kuti malangoyo yakhazikike mu mtima mwathu. Kupemba kwa Yahova nthawe zentse kuti aticenese kun’dzatithandiza kuti tifambe mwakukhulupirika nthawe zentse.
w04 1/12 tsa. 15 ndi. 12-13
Fambani Mwakukhulupirika
12 Pakufotokoza cinthu cinango comwe cidacitisa kuti Davide apitirize kufamba mwakukhulupirika, iye adati: “Nimbakhala lini pabodzi na wanthu wacinyengo. Ndipo nimbabverana lini na wanthu omwe ambabisa unthu bwawo. Nimbaipidwa na mtsonkhano wa wanthu wapikado, ndipo nin’dzakhala lini pantsi na wanthu omwe ambacita bzakuipa.” (Salimo 26:4, 5) Davide akhakhala lini pantsi, ne na pang’onopo, na wanthu wakuipa. Iye akhafuna lini kubverana nawo.
13 Tsono tani ifepanombo? Kodi timbalamba kukhala na wanthu wakuipa, mwa kutcenkha kumbawona programa za pa TV, mavidiyo, interneti na njira zinango? Kodi timbatcenkha kucita bzinthu na wanthu omwe ambabisa unthu bwawo? Wanthu winango ku xikola ayai ku basa kwathu anganamizire kuti ana makhalidwe yabwino uko ana cakulinga cakuipa. Kulewa cadidi, tingafune lini kukhala pabodzi na wanthu omwe ambateweza lini mitemo ya m’Bibliya. Napo kuti apanduki ambabziti mbanthu wabwino, iwombo angabise unthu bwawo na cakulinga cakuti atisiyise kutumikira Yahova. Kodi tingacite tani penu m’gwere muna wanthu winango wacinyengo? Iwombo ambabisa unthu bwawo caibo. Jayson, omwe tsapano ni mtumiki wakuthandiza, akhanawo anzace wa mtundu umweyu pomwe akhali mwana. Pakulewa bza wanthu amwewa, iye adati: “Ntsiku inango m’bodzi wa anzanguwo adandiuza kuti: ‘Bzomwe timbacita tsapano bziribe basa thangwe pa nthawe yomwe dziko lipsa lin’dzabwera tin’dzakhala tafa. Tin’dzadziwa lini kuti tikuluza bzinthu bzabwino.’ Bzomwe adacitabzo bzidandicitisa kuti ndizindikire kuti axamwali wanguwo akhali wakuipa. Inepano ndikufuna lini kuti ndidzakhale ndidafa pomwe dziko lipsa lin’dzabwera.” Jayson adacita bzinthu bza nzeru mwa kusiya kubverana na wanthu amwewo. Mpostolo Paulo adaticenjeza kuti: “Lekani kupumpsika, kubverana na wanthu wakuipa kumbadzonga makhalidwe yabwino.” (1 Akolinto 15:33) Ndipopa kutcenkha kubverana na wanthu wakuipa n’kwabwino kwene-kwene.
w04 1/12 tsa. 16 ndi. 17-18
Fambani Mwakukhulupirika
17 Tendi la mkonkhano pabodzi na mabasa yentse ya antsembe likhali likulu la kunamatira Yahova ku Jirayeri. Pakufotokoza momwe Davide akhakomedwera na mbuto imweyi, iye adati: “Yahova, ndimbafuna nyumba yomwe imwepo mumbakhala na mbuto yomwe imbakhala ulemerero bwanu.” — Salimo 26:8.
18 Kodi timbafuna kutsonkhana ku mbuto yomwe timbapfunzira bzinthu bza Yahova? Nyumba ya Umambo iri-yentse imbakhala likulu la kunamata kwacadidi ku mphimpha komwe kuna nyumbayo thangwe ra mapfunziro yauzimu yomwe yambacitika kumweko. Ndipo, gole liri-lentse timbakhala na mitsonkhano ya cigawo na ya dera. Pa mitsonkhano imweyi pambafotokozedwa mitemo ya Yahova. Tikambapfunza kufuna mitemo imweyi, timbafunisisa kuyenda ku mitsonkhanoyi na kutetekera bwino nfundo zentse zomwe zimbafotokozedwa. (Salimo 119:167) Bzimbakhala bzakudekeza kwene-kwene kukhala na Akristau anzathu omwe ambacita thupo na moyo wathu ndipo ambatithandiza kuti tipitirize kufamba mwakukhulupirika. — Ahebereu 10:24, 25.
Cuma Cauzimu
w06 15/7 tsa. 28 ndi. 15
Yahova Ambapulumusa Munthu Omwe Akubonera
15 Nyakunemba salimo Davide adaimba kuti: “Napo pai wangu na mai wangu acindisiya, Yahova an’dzandisamalira.” (Salimo 27:10) Mpsakudekeza kudziwa kuti lufoyi la Yahova limbaposa lufoyi la m’bereki. Napo kuti kulambidwa na kuzunzidwa na abereki wathu kungakhale kwakuwawa kwene-kwene, kungacinje lini momwe Yahova ambatisamalirira. (Aroma 8:38, 39) Kumbukirani kuti Yahova ambakwewa munthu omwe ambamufuna. (Juwau 3:16; 6:44) Bziribe basa penu wanthu angakucitireni bzinthu bzakuipa, Baba wanu wakudzulu ambakufunani kwene-kwene.
15-21 ABRIL
CUMA CA M’FALA LA MULUNGU | MASALIMO 29-31
Cirango ni Lufoyi Likulu Lomwe Yahova Ambalilatiza
it-1 tsa. 802 ndi. 3
Nkhope
‘Kubisa nkhope’ kumbathandauza bzinthu bzizinji mwakubverana na bzomwe bzikulewedwabzo. Kubisa nkhope kwa Yahova Mulungu nthawe zizinji kumbathandauza kusiya kuthandiza munthu. Bzimwebzi bzingacitike thangwe ra kuti munthu ayai thimu la wanthu liribe kumubvera, ninga momwe bzidacitikira na mtundu wa Ajirayeri. (Djb 34:29; Sl 30:5-8; Zai 54:8; 59:2) Nthawe zinango bzimwebzi bzingathandauze kuti Yahova alibe kufuna kucita cinthu pa nthaweyo, koma akudikhira nthawe yakuthemera. (Sl 13:1-3) Mkumbiro wa Davide wakuti “Bisani nkhope yanu ku pikado zangu,” ukuthandauza kuti akhakumbira Mulungu kuti amulekerere pikado zace. — Sl 51:9; ndendemezerani na Sl 10:11.
w07 1/3 tsa. 19 ndi. 1
Wanthu Wakukondwa Thangwe ra Kudikhirira Yahova
Njira ya momwe cirango ca Yahova cimbatithandizira tingaindendemezere na momwe bzisapo bzimbakhumira. Bibliya limbalewa mafala yakuteweraya pa nkhani ya kulanga kwa Mulungu: “Wale omwe ambabvuma kupfunzisidwako, na kupita kwa nthawe malangoyo yambabala bzisapo bza mtendere mwakubverana na cirungamo.” (Ahebereu 12:11) Bzisapo bzimbatenga nthawe kuti bzifwire. Mpsibodzi-bodzimbo na ifepano. Pambatengambo nthawe kuti ticinje nzeru zathu kuti zibverane na bzomwe Bibliya limbatipfunzisa. Mwa ciratizo, napo kuti khalidwe lathu linango lingacitise kuti tiluze mwayi omwe tikhanawo mu gwere, mtima wa kudikirira Mulungu un’dzatithandiza kuti tileke kuwofoka ticisiyiratu kutumikira Mulunguyo. Pa nthawe ninga imweyi, mafala yakufuliziridwa na mzimu wa Mulungu, yomwe Davide adanemba yangatilimbikise. Iyo yambati: “Ukali [bwa Mulungu] bumbakhalisa lini; koma kufunidwa na iye n’kwa moyo wentse. Kukadoka pinango tingalire, koma kukacena tin’dzakuwa mwakukondwa.” (Salimo 30:5) Tikakhala na mtima wa kudikirira Yahova na kuteweza malango ya m’Fala lace, nthawe ya “kukuwa mwa kukondwa” in’dzafika.
Kodi Kukungula Caiko Kumbathandauza Ciyani?
18 Kuti munthu wakucosedwa alatize kuti wakungula na mtima wentse, iye an’funika kumbabwera ku mitsonkhano nthawe zentse na kubvera malango ya akulu wa gwere yakuti akhale na ndondomeko yabwino ya kupemba na kupfunza Bibliya ntsiku zentse. Iye an’funikambo kucita nyongo yakutcenkha bzinthu bzomwe bzingamucitise kubwerera pomwe pa pikado yomwe adacitayo. Iye akacita ciri-centse comwe angakwanise kuti akhale pomwe pa uxamwali na Yahova, Yahova an’dzamulekerera ndipo akulu wa gwere an’dzamuthandiza kucita pomwe mbali ya gwere. Akulu wa gwere akayezera kuwona penu munthu wakunguladi na mtima wentse ayai ne, iwo ambadziwa kuti nkhani iri-yentse njakusiyana na inzace. Tenepo, iwo ambawona bwino-bwino nkhani iri-yentse payokha ndipo ambatcenkha kucita bzinthu mwakuuma mtima na munthu omwe wacita pikadoyo.
Cuma Cauzimu
w06 15/5 tsa. 19 ndi. 13
Nfundo Zikulu-zikulu za Cigawo Cakuyamba ca Bukhu la Masalimo
31:23 — Kodi munthu wakubzikuza ambalangidwa tani na Yahova? Bzomwe bzikulewedwa kuti an’dzabwezeredwa ni cirango. Munthu wakulungama ambabwezeredwa mwa kupasidwa cirango thangwe ra bzinthu bzakuipa bzomwe wacita mwa ngozi. Pakuti munthu wakubzikuza ambasiya lini kucita bzinthu bzakuipa, ambabwezeredwa bzizinji mwakupasidwa cirango camphanvu. — Mimwani 11:31; 1 Pedru 4:18.
22-28 ABRIL
CUMA CA M’FALA LA MULUNGU | MASALIMO 32-33
Thangwe Ranyi Tin’funika Kumbazimbula Pikado Ikulu Yomwe Tacita?
w93 15/3 tsa. 9 ndi. 7
Ntsisi za Yahova Zimbatipulumusa Kuti Tireke Kuphatisidwa Mwala
7 Penu tina mulandu wakuti tacita pikado ikulu kwene-kwene, bzingatinese kukhala wakukhwimika kuti tizimbule pikado yathuyo kwa Yahova. Kodi n’ciyani cingatithandize? Mu Salimo 32, Davide adalewa kuti: ‘Pomwe ndidanyamala, mafupa yangu yadatepa, thangwe ntsiku yentse ndikhabonera mu mtima mwangu. Thangwe masikati na usiku boko lanu likhandilemera. Mphanvu zangu zidaphwa ninga madzi pa nthawe yakupsa ya cirimo.’ (Vesi 3, 4) Kuyezera kubisa pikado yomwe adacita, kudacitisa kuti Davide abzibve kukhala wakusaya mphanvu. Thupo lidacitisa kuti amale mphanvu ndipo adakhala ninga muti pa nthawe ya cirala omwe umbasaya madzi kuti upitirize kukhala na moyo. Ninti iye adaduwala ndipo adabonera kwene-kwene na makumbukidwe yakuphonyeka. Bzimwebzi bzidamucitisa kuti aleke kukhala wakukondwa. Penu bzimwebzi bzacitikirambo m’bodzi wa ifepano, n’ciyani comwe tingacite?
cl tsa. 262 ndi. 8
Mulungu Omwe ali “Wakukonzeka Kulekerera”
8 Pomwe Davide adakungula adalewa mafala aya: ‘Pakumalizira pace ndidazimbula pikado yangu kwa imwepo; ndiribe kubisa kuphonya kwangu. . . . Ndipo imwepo mudandilekerera bzakuphonya bzangu na pikado zangu.’ (Salimo 32:5) Fala lakuti “mudandilekerera” lidasanduliziridwa kucokera ku fala la Cihebereu lomwe limbathandauza “kunyamula” ayai kuti “kutenga.” Pa vesiri falali limbathandauza kucosa “cakuphonya ayai pikado.” Tenepo, Yahova adanyamula pikado za Davide acizicosa. Mwakusaya kupenukira, bzimwebzi bzidacepesa nzeru zomwe Davide akhanazo za kubziwona kuti akhali wakuphonya. (Salimo 32:3) Ifepano tingakhalembo na citsimikizo centse cakuti Mulungu ambacosa pikado za wanthu omwe ambafuna kulekereredwa mwakuphatisa basa ntsembe ya cakulombolera ya Jezu. — Mateu 20:28.
w01 1/6 tsa. 30 ndi. 1
Kukungula Kumbapoza
Pomwe Davide adakungula, iye alibe kupitiriza kukhala na makumbukidwe yakubziwona kuti akhali munthu wakuipa. Mafala yace m’masalimo yomwe adanemba yakulewa bza kuzimbula pikado, yakulatiza kuti iye adakhala wakutsudzuka ndipo akhafunisisa kutumikira Yahova mwakukhulupirika. Mwa ciratizo, onani Salimo 32. Pa vesi 1, timbawerenga kuti: “An’kondwa ni munthu omwe anilekereredwa bzakuphonya bzace, omwe pikado zace zinimpsinkhidwa.” Napo pikado icikhala ikulu tani, munthu ambagumana phindu akakungula na mtima wentse. Njira ibodzi ya momwe tingacitire bzimwebzi ndiyo kubvuma na mtima wentse kuphonya kwathu ninga momwe Davide adacitira. (2 Samuyeli 12:13) Iye alibe kuyezera kunyang’ana mathangwe kuti abzipase lazau ayai kuti apase mulandu wanthu winango. Vesi 5 limbati: “Pakumalizira pace ndidazimbula pikado yangu kwa imwepo; ndiribe kubisa kuphonya kwangu. Ndidati: ‘Nin’dzazimbula pikado zangu kwa Yahova.’ Ndipo imwepo mudandilekerera bzakuphonya bzangu na pikado zangu.” Kukungula caiko kumbacitisa kuti mtima ukhale pantsi, ndipopa munthu omwe akhadacita pikado ambabonera lini pomwe na kubzipasa mulandu thangwe ra bzomwe adacita.
Cuma Cauzimu
w06 15/5 tsa. 20 ndi. 1
Nfundo Zikulu-zikulu za Cigawo Cakuyamba ca Bukhu la Masalimo
33:6 — Kodi “mphuwe ya mkamwa” mwa Yahova n’ciyani? Ni mzimu wa Mulungu ayai kuti mzimu wakucena, omwe Mulungu adauphatisa basa pakukonza bzinthu bza kudzulu. (Genesesi 1:1, 2) Mzimu umweyu umbacemeredwa mphuwe ya mkamwa mwace thangwe, ninga momwe mphuwe imbafulizira bzinthu bziciyenda kutali, mzimu umweyu ungatumizidwe uciyenda kukacita bzinthu bzomwe bziri kutali.
29 ABRIL–5 MAIO
CUMA CA M’FALA LA MULUNGU | MASALIMO 34-35
“Tumbizani Yahova Nthawe Zentse”
w07 1/3 tsa. 22 ndi. 11
Mbatilemekezeni Dzina la Yahova Pabodzi
11 “Nin’dzatumbiza Yahova nthawe zentse; nin’dzamutumbiza na mulomo wangu nthawe iri-yentse.” (Salimo 34:1) Pakuti Davide akhathawa-thawa, iye akhacita thupo na momwe angadagumanira bzinthu bzakufunika pa moyo wace. Tsono mafala yamweya yakulatiza kuti Davide adapitiriza kukhala na mtima wakufuna kulemekeza Yahova napo kuti akhana thupo limweri. Iye ni ciratizo cabwino kwa ifepano omwe tikugumana na mabvuto. Penu tiri ku xikola, ku basa, tiri pabodzi na Akristau anzathu ayai tikupalizira, cakulinga cathu cikulu cin’funika kukhala cakufuna kulemekeza Yahova. Kumbukirani mathangwe yomwe tinayo yomwe yangaticitise kucita bzimwebzi. Mwa ciratizo, pana bzinthu bzizinji bzomwe tingapfunze na cirengedwe ca Yahova ticikomedwa nabzo. Ndipo kumbukirani bzomwe Yahova adacita mwakuphatisa basa mbali ya pa dziko la pantsi ya gulu lace. Yahova akuphatisa basa wanthu wakukhulupirika kuti acite bzinthu bzizinji napo kuti mbakuperewera. Kodi mabasa ya Mulungu tingayandendemezere na yomwe wanthu omwe ambatumbizidwa m’dzikoli ambacita? Kodi mukubverana lini na mafala yomwe Davide adalewa yakuti: “Pakati pa mirungu palibe wakundendemera na imwe, Mbuya; ndipo palibe mabasa yakundendemerana na yanu”? — Salimo 86:8.
w07 1/3 tsa. 22 ndi. 13
Mbatilemekezeni Dzina la Yahova Pabodzi
13 “Inepano nin’dzalewa bza Yahova mwakucita kusamwirira; Anyakulungama an’dzabva ndipo an’dzakomedwa.” (Salimo 34:2) Pamwepa, Davide akhabzitumbiza lini thangwe ra bzinthu bzomwe akhacita. Mwa ciratizo, iye alibe kubzitumbiza na momwe adanamizira mambo wa ku Gate. Iye adazindikira kuti Yahova ndiye omwe adamukhotcerera pomwe akhali ku Gate na kuti iye adakwanisa kuthawa na thandizo la Yahovayo. (Mimwani 21:1) Na tenepo, Davide alibe kubzitumbiza, koma adatumbiza Yahova. Bzimwebzi bzidacitisa kuti wanthu wabwino ayambe kufuna Yahova. Jezu adatumbizisambo dzina la Yahova, ndipo bzimwebzi bzidacitisa kuti wanthu wakubzicepesa, wanthu omwe adabvuma kupfunzisika ayambe kufuna Yahova. Ntsiku zino, wanthu azinji wabwino wa pa dziko lentse la pantsi, akupita mu gwere la Akristau wakudzozedwa, omwe msolo wace ni Jezu. (Akolose 1:18) Wanthu amwewa ambakomedwa kwene-kwene akabva dzina la Yahova likulemekezedwa na atumiki wace wakubzicepesa ndipo akambatetekera mafala ya m’Bibliya mwakuthandizidwa na mzimu wakucena wa Mulungu. — Juwau 6:44; Mabasa 16:14.
w07 1/3 tsa. 23 ndi. 15
Mbatilemekezeni Dzina la Yahova Pabodzi
15 “Ndidapemba kwa Yahova ndipo iye adanditawira, ndipo adamalisa mantha yangu yentse.” (Salimo 34:4) Bzinthu ninga bzimwebzi bzikhali bzakufunika kwene-kwene kwa Davide. Ndipopa adathimizira kulewa kuti: “Mwamuna wakubzicepesayu adacemera, ndipo Yahova adamubva; iye adamupulumusa pa mabvuto yace yentse.” (Salimo 34:6) Tikakhala na abale anzathu, timbakhala na mipata mizinji yakufotokoza bzinthu bzakulimbikisa bzakulatiza momwe Yahova watithandizira kupirira mabvuto yathu. Bzimwebzi bzimbalimbisa cikhulupiro ca anzathu, ninga momwe mafala ya Davide yadalimbisira cikhulupiro ca wanthu omwe akhali ku mbali yace. Wanthu omwe akhana Davide ‘adakomedwa: ndipo nkhope zawo ziribe kucita manyazi.’ (Salimo 34:5) Iwo alibe kucita manyazi napo kuti akhathawa Mambo Sauli. Iwo akhana cikhulupiro cakuti Mulungu akhathandiza Davide ndipo nkhope zawo zikhali zakukondwa. Mwakundendemerana na bzimwebzi, wanthu omwe apfunza tsapanopa cadidi na wale omwe adapfunza kale-kale ambathemba Yahova kuti awathandize pa mabvuto yawo. Pakuti ambakwanisa kuwona kuti Yahova akuwathandiza, nkhope zawo zimbakhala zakukomedwa ndipo zimbalatiza kuti mbakutsimikiza kupitiriza kukhala wakukhulupirika kwa Yahova.
Cuma Cauzimu
w06 15/5 tsa. 20 ndi. 2
Nfundo Zikulu-zikulu za Cigawo Cakuyamba ca Bukhu la Masalimo
35:19 — Kodi Davide akhafuna kulewanyi pomwe adakumbira kuti Yahova aleke kulekerera wale omwe akhamuwenga kuti “apoyirise maso yawo”? Kupoyirisa maso komwe anyamadulanthaka wa Davide angadacita kungadalatiza kuti iwo akhakomedwa thangwe ra kuti bzinthu bzakuipa bzomwe akhafuna kucitira Davideyo bzikhawafambira bwino. Davide adakumbira kuti bzimwebzi bzileke kucitika.