Izaki akhana magole 40 yakubadwa pomwe adalowola Rebeka. Iye akhamufuna kwene-kwene mkazaceyo. Ndipo na kupita kwa nthawe, iwo adadzabereka wana awiri, omwe akhali amamphase.

Mwana wakuyamba akhali Esau, ndipo waciwiri akhali Djakobi. Esau akhakhazikika lini pa mui, ndipo akhali msodzi wabwino. Tsono Djakobi akhali munthu wakuderekha, ndipo akhafuna lini kumbacoka-coka pa mui.

Mu nsiku zimwezire, mwana wakuyamba ndiye omwe akhambatambira mbali ikulu ya utaka akafa pai wawo. Kodi un’dziwa utaka n’ciyani? Ni bzense bzomwe pai ambasiira wana wace akafa, ninga mbuto na kobiri. Ndipo kwa banja la Izaki, utakabo bukhaphatanidzambo bzinthu bzomwe Yahova akhadapicira kwa pai wace Abalahamu. Esau akhalibe basa na picirolo, tsono Djakobi, akhadziwa kuti picirolo likhali lakufunika kwene-kwene.

Pa nsiku inango, Esau adafika kumui ali wakuneta kwene-kwene kucokera kasodza, ndipo akhana njala. Iye adasirira cakudya cabwino comwe m’bale wace Djakobi akhadaphika, ndipo adati: ‘Ndikufa na njala! Ndipakulirembo mphodza waphikazo!’ Djakobi adatawira kuti: ‘Ndin’kupakulira, tsono toma wandipicira kuti ndine omwe ndin’dzatambira utaka bwako.’ Esau adati: ‘Ndiribe basa na utakabo! Khala nabo iwepo. Ine ndin’funa kudya basi.’ Kodi bzomwe Esau adacitabzi bzikhali bzabwino? Nee. Esau adaluza cinthu cakufunika kwene-kwene thangwe ra cakudya.

Pomwe Izaki adadzakalamba kwene-kwene, idafika nsiku kuti asimbe mwana wace wakuyamba. Tsono Rebeka adathandiza Djakobi kuti asimbidwe ndiye. Pomwe Esau adadziwa kuti Djakobi ndiye omwe adatambira utakabo, iye adakalipa kwene-kwene mwakuti akhafuna kupha m’bale waceyo. Izaki na Rebeka, akhafunisisa kukhotcerera Djakobi. Tenepo iwo adamuuza kuti: ‘Thawa, ndoko kwa Labani, m’bale wa mai wako, ndipo kakhale kumweko mpaka citamala ciya ca m’bale wako.’ Djakobi adabvera abereki wacewo, ndipo adathawadi kuti apulumuse moyo wace.

Yahova adapicira Djakobi kuti angadamukhotcerera ninga momwe adacitira na Abalahamu na Izaki. Djakobi akhakhala ku Haramu, ndipo kumweko iye adalowola acibereka wana. Banja lace lidakula, ndipo iye akhali wakudala kwene-kwene.

Pambuyo pa magole mazinji, Yahova adati kwa Djakobi: ‘Bwerera ku dziko lako.’ Djakobi na banja lace adayamba kucita ulendo bwawo bwa kubwerera ku dziko lace. Pomwe akhali mu njira, iye adagumana na munthu omwe adamuuza kuti m’bale wace Esau akhabwera na anyankhondo wace wakukwana 400 kuti adzagumane naye. Djakobi atabva bzimwebzo, adacita mantha kuti pinango Esau angadadzapweteka iye pabodzi na banja lace. Tenepo, iye adapemba kwa Yahova aciti: ‘Ndaphata minyendo Yahova, ndipulumuseni m’manja mwa mbale wangu.’ Mangwana yace, Djakobi adatumizira Esau mphaso ya mabira, mbuzi, ng’ombe, ngamira pabodzi na mabulu mazinji.

Usiku bwace, pomwe Djakobi akhali yekha-yekha, iye adawonana na anjo m’bobzi! Anjoyo adayamba kumenyana naye. Iwo adamenyana mpaka kucena. Napo Djakobi akhadapwetekeka, iye alibe kuthetha. Anjoyo adati: ‘Ndisiye ndiyende.’ Tsono Djakobi adati: ‘Nee, ndin’kusiya lini mpaka utandisimba.’

Pakumalizira pace anjoyo adasimba Djakobiyo. Tenepo, iye adadziwa kuti Yahova angadamupulumusa m’manja mwa Esau.

Macibeseyo Djakobi adawona Esau na anyankhondo wacewo na patali. Djakobi adapita kutsogolo kwa banja lace, ndipo adagodama, acimbakotamisa nkhope yace mpaka pansi kanomwe-kense. Esau adathamangira Djakobi, acikamukumbatira. Iwo adagwesa misozi, ndipo adacita mtendere. Yahova adakomedwa kwene-kwene na momwe Djakobi adacitira mtendere na m’bale wace, nandi?

Patsogolo pace, Esau adabwerera kumui kwace, ndipo Djakobi adapitiriza na ulendo bwace. Djakobi adadzabereka wana 12 wacimuna. Madzina yawo akhali: Rubeni, Simiyoni, Levi, Juda, Dani, Nafitali, Gadi, Aseri, Isakari, Zebulani, Zuze na Benjamini. Yahova adaphatisa basa Zuze kuti athandize wanthu wace. Un’dziwa adacita tani bzimwebzo? Mbatiwone.