NKHANI YA PA TSAMBA LAKUYAMBA | KODI MULUNGU AMBAIWONA TANI NKHONDO?

Momwe Mulungu Akhaiwonera Nkhondo Mu Nthawe Zakale

Wanthu wakhaponderezedwa. Iwo akhapemba kazinji kense kwa Mulungu kukumbira thandizo, tsono mpemboyo ulibe kutawiridwa pa nthawe imweyo. Wanthu amwewa wakhali Ajirayeri womwe wakhali wanthu wa Mulungu mu nthawe zakale. Anyakuponderezawo wakhali Waedjipito, omwe ukhali mtundu wamphanvu kwene-kwene. (Kufuluka 1:13, 14) Kwa magole mazinji, Ajirayeri wakhadikhira kuti Mulungu adzawamalisire mabvuto yomwe akhagumana nayo m’manja mwa Waedjipito. Tsono nthawe idafika yakuti Mulungu awapulumuse. (Kufuluka 3:7-10) Bibliya limbalewa kuti Mulungu caiyeyo adamenya nkhondo na Waedjipito. Cakutoma, iye adalanga Waedjipito na mtundu wakusiyana-siyana wa bzisi, patsogolo pace iye adapfudza mambo wa Edjipito na anyankhondo wace pa Nyanza Ifuira. (Psalymo 136:15) Tenepo Yahova adalatiza kukhala ‘nyankhondo wamphanvu’ kwa wanthu wace.​—Kufuluka 15:3, 4.

Nkhani yakuti Mulungu caiyeyo adamenya nkhondo na Waedjipito inkulatiza kuti iye ambawenga lini mtundu uli-wense wa nkhondo. Nthawe zinango, iye adabvumiza wanthu wace Ajirayeri kuti akamenye nkhondo. Mwa ciratizo, iye adawauza kuti akamenye nkhondo na Akanani, womwe wakhali wanthu wakuipa kwene-kwene. (Bzakutonga 9:5; 20:17, 18) Iye adatsogolerambo Mambo wa ku Jirayeri Davide kuti akamenye nkhondo na Wafiristi, omwe akhawapondereza. Mulungu mpaka adacita makonzedwe yomwe yadacitisa kuti Davide akunde nkhondoyo.​—2 Samuweri 5:17-25.

Nkhani za m’Bibliyazi zimbalatiza kuti pomwe Ajirayeri wakhacitiridwa bzinthu bzakuipa na kuponderezedwa, Mulungu akhabvumiza kuti nkhondo icitike kuti akhotcerere wanthu wace na kunamata kwacadidi. Tsono onani bzinthu bzitatu bzomwe bzikhacitisa Mulungu kubvumiza nkhondo zinango:

1. MULUNGU NDIYE AKHASANKHULA WOMWE AKHAFUNIKA KUMENYA NKHONDO. Nthawe inango Mulungu adauza Ajirayeri kuti: ‘Ulendo buno mun’funika lini kukamenya nkhondo.’ Thangwe ranyi? Thangwe rakuti Mulunguyo ndiye angadawamenyera nkhondo. (2 Nkhani 20:17; 32:7, 8) Iye adacita bzimwebzi kazinji kense ninga momwe bzalatizidwira kale m’mbuyomu mu nkhani ino. Nthawe zinango, iye adauza wanthu wace Ajirayeri kuti akamenye nkhondo zomwe iye akhadabvumiza, maka-maka zire zomwe zikhaphatanidza kukhotcerera Dziko lawo Lakupiciridwa.​—Bzakutonga 7:1, 2; Djosuwe 10:40.

2. MULUNGU NDIYE AKHASANKHULA NTHAWE YOMWE NKHONDOYO INGADACITIDWA. Atumiki wa Mulungu wakhafunika kudikhira nthawe yakusankhulidwa na Mulungu kuti akamenye nkhondo thangwe ra uipi na kuponderezedwa kwawo. Mpaka nthaweyo itafika, iwo wakhafunika lini kukamenya nkhondoyo mwakusaya kuuzidwa, ndipo kusaya kucita bzimwebzo, kukhawacitisa kuluza citsogozo ca Mulungu. Kulewa cadidi, Bibliya limbalatiza kuti pomwe Ajirayeri akhayenda kukamenya nkhondo mwakusaya kuuzidwa na Mulungu, iwo wakhakundidwa.a

3. MULUNGU AMBAKOMEDWA LINI NA INFA YA WANTHU, NAPO YA ANYAKUIPA. Yahova Mulungu ni Nsansa ya moyo na Mulengi wa wanthu wense. (Psalymo 36:9) Tenepo iye ambafuna lini kuwona wanthu acifa. Tsono mpsakupasa nsisi kuwona kuti pana wanthu womwe wambacita ciri-cense kuti azunze anzawo, mpaka kuwapha. (Psalymo 37:12, 14) Kuti amalise kuipa kumweku, nthawe zinango Mulungu akhabvumiza kumenya nkhondo kuti wanthu wakuipawo apfudzidwe. Tsono napo bzikhali tenepo, m’magole yomwe iye akhabvumiza Ajirayeri kuti akamenye nkhondo, iye akhali wa ‘nsisi’ na ‘wakusaya kukalipa kamangu’ kwa womwe akhapondereza wanthu wace. (Psalymo 86:15) Mwa ciratizo, iye akhawawuza kuti akanati kuyamba kupfudza mzinda, Ajirayeriwo wakhafunika ‘kudziwisa mafala ya mtendere’ na cakulinga ca kupereka mpata kwa wanthu wa m’mzindayo kuti acinje khalidwe lawo na kutcenkha nkhondo. (Bzakutonga 20:10-13) Mu njira imweyi, Mulungu adalatiza kuti ‘ambakomedwa lini na infa ya munthu wakuipa, koma ambafuna kuti munthu wakuipayo asiye njira zace za kuipa acibwerera kuti akhale na moyo.’​—Zakiyeri 33:11, 14-16.b

Ninga momwe tawonera, Mulungu akhawona nkhondo ninga njira yakubvumizika yakumalisira mtundu uli-wense wa uipi na kupondereza komwe kukhacitidwa mu nthawe zakale. Tsono Mulungu sikuti wanthu, ndiye akhasankhula kuti ni lini pomwe nkhondo ingadacitidwa ndipo kuti ni mbani omwe angadamenya nkhondoyo. Koma kodi Mulungu akhakomedwa kucita nkhondo zimwezi? Ne na pang’onopo. Iye ambawenga kwene-kwene ciwembo. (Psalymo 11:5) Tsono kodi mawonedwe ya Mulungu pa nkhani ya nkhondo yadacinja pomwe Mwana wace Jezu Kristu, adayamba upalizi bwace m’nthawe ya apostolo?

[Mafala ya m’nyansi]

[Cithunzi-thunzi pa tsamba 4]

Napo adakonza nkhondo ya kumenyana na Akanani, iye adapulumusa wanthu winango, ninga Rahabe na banja lace