Bzisimbo Bzomwe Ndikhadikhirira Lini na Bzomwe Ndidapfunza Pakutumikira Yahova

Abereki wangu akhakhala ku Estónia. Tsono pa nthawe ya Nkhondo Yaciwiri ya pa Dziko Lentse, iwo adacoka kumweko aciyenda kukakhala ku Alemanha. Kumweko ndiko komwe ndidabadwira. Patsogolo pace, tidafuluka ticiyenda kukakhala ku Canadá. Pomwe tidafika ku Canadá, tidakakhala pafupi na mzinda wa Ottawa. Ndipo tidakakhala mu ka nyumba kang’ono komwe kakhakhala nkhuku. Tikhali wakusauka. Koma, tikhambadya mazai ntsiku zentse pa matabitcu.

Ntsiku inango, Mboni za Yahova zidawerengera mai wangu Apokalipse 21:3, 4. Iwo adakomedwa na bzomwe adabvabzo ndipo adayamba kulira. Pai wangu na mai wangu adapitiriza kupfunza Bibliya ndipo adadzabatizidwa.

Napo kuti abereki wangu akhadziwa lini kulalewa bwino-bwino Cingerezi, iwo akhacita nyongo pakutumikira Yahova. Napo kuti pai wangu akhaphuphudza akuphata basa la kukonza mafero ku Sudbury, Ontario, iwo akhambatitenga na m’bale wangu, Sylvia, ticiyenda kukapalizira. Ndipo sumana iri-yentse tikhapfunza Ntsanza ya Mulindiri pa kunamata kwathu kwa pa banja. Abereki wangu adandithandiza kuti nimbafune Mulungu. Bzimwebzi bzidacitisa kuti ndibzipereke kwa Yahova ndicibatizidwa mu 1956 pomwe ndikhana magole 10. Kukumbukira momwe iwo akhafunira Yahova kudandipasa mphanvu kuti ndipitirize kutumikira Yahova moyo wangu wentse.

Pomwe inepano ndidamaliza kupfunza, ndidayamba kuwofoka. Ndikhakumbuka kuti ningadakhala mpainiya ningadakwanisa lini kugumana kobiri zomwe zingadandithandiza kuti ndikwanirise cakulinga cangu cakupakira ndeke. Ndidagumana basa ku radio, ndipo ndikhalifuna kwene-kwene basa limweri. Ndikhaphata basa usiku, ndipo bzimwebzi bzikhacitisa kuti nditazire kuyenda ku mitsonkhano. Ndipo ndidayambambo kucita uxamwali na wanthu omwe akhatumikira lini Yahova. Tsono ndidazindikira kuti bzomwe ndikhacitabzo bzikhali lini bwino ndipo ndidacinja.

Ndidafuluka ndiciyenda kukakhala ku Oshawa, Ontario. Kumweko ndidadziwana na Ray Norman pabodzi na m’bale wace wacikazi, Lesli, na apainiya winango. Iwo adanditambira bwino. Kuwona momwe iwo akhaliri wakukondwa kudandicitisa kuti ndicinje bzakulinga bzangu. Iwo adandilimbikisa kuti ndikhale mpainiya. Ndipo ndidadzayamba kucita upainiya mu Setembro, 1966. Ndikhali wakukondwa kwene-kwene, ndipo bzinthu bzikhandifambira bwino. Tsono padadzacitika bzinthu bzinango.

YAHOVA AKAKUKUMBIRANI KUTI MUCITE CINTHU, YEZERANI KUCICITA

Pomwe ndikhanati kumaliza kupfunza, ndidaprenxeri petição kuti ndikatumikire ku Beteli ya ku Toronto, Canadá. Pomwe ndikhacita upainiyabo, ndidacemeredwa kuti ndikatumikire ku Beteli magole manai. Inepano ndikhakomedwa kwene-kwene na Lesli, ndipo ndikhakumbuka kuti ndikabvuma kukatumikira ku Beteliko ningadadzamuwona lini pomwe. Ndidapemba ndipo ndidabvuma kuyenda kukatumikira ku Beteliko. Tsono bzidakhala bzakuwawa kwene-kwene kusiyana na Lesli.

Pomwe ndidafika ku Beteli, ndidakaphata basa ku mbuto yakufulira bzakubvala, ndipo patsogolo pace, ndidadzaphata basa ninga secretário. Tsono Lesli adadzayamba kutumikira ninga mpainiya wakupambulika ku Gatineau, Quebec. Nthawe zentse ndikhabzibvunza penu iye ali bwino na penu ndidacita cakusankhula cabwino. Tsono padadzacitika cinthu cinango comwe ndikhacidikhirira lini. M’bale wace wa Lesli, Ray, adadzacemeredwa kuti adzatumikirembo pa Beteli. Ndipo tidakhala m’kwartu ibodzi. Bzimwebzi bzidacitisa kuti ndiyambe pomwe kuceza na Lesli. Tidalowolana pa ntsiku yakumalizira ya utumiki bwangu bwa pa Beteli bwa magole manai, pa ntsiku ya 27 Fevereiro, 1971.

Inepano na Lesli tidauzidwa kuti tikatumikire mu gwere linango la cirewedwe ca Cifaransa ku Quebec. Pomwe padapita magole mang’ono-ng’ono, ndidadabwa pomwe ndidauzidwa kuti ndikatumikire ninga nyakunyang’anira dera pomwe ndikhana magole 28. Ndidabziwona kuti ndikhali mwana kwene-kwene ndipo ningadakwanisa lini kutumikira ninga nyakunyang’anira dera. Tsono mafala ya pa Jeremiya 1:7, 8 yadandilimbikisa kwene-kwene. Mkazangu, Lesli, adacita asidente na karo ndipo bzimwebzi bzikhamutazisa kugona. Ndipopa tidawona ninga kuti bzingadakhala bzakunesa kwene-kwene kwa ifepano kutumikira ninga anyakunyang’anira dera. Tsono iye adalewa kuti: “Yahova akatikumbira kuti ticite cinthu, kodi tin’funika lini kuyezera kucicita?” Tidabvuma basalo ndipo tidatumikira ninga anyakunyang’anira dera kwa magole 17.

Pomwe ndikhali nyakunyang’anira dera, ndikhakhala wakutanganika kwene-kwene, ndipo ndikhambakhala ndiribe nthawe yakuceza na Lesli. Pa nthawe imweyi ndidapfunza cinthu cinango. Ntsiku inango ciposi, tidabva msuwo wa nyumba yathu ukugogodzedwa. Pomwe ndidafungula msuwoyo ndiribe kuwona munthu. Ndidandowona sesto yomwe ikhana nguwo ya pa meza, mafruta, queijo, pau, garafa la vinyu, makopo na katsamba komwe kakhalibe dzina. Katsambako kakhana mafala yakuti: “Tengani akazanu muyende nawo ku mbuto inango ndipo mukadye nawo pabodzi cakudyaci.” Imweyi ikhali ntsiku yabwino ya kucita bzimwebzi thangwe kukhalibe nvula. Tsono ndidamuuza Lesli kuti ningadakwanisa lini kuyenda thangwe ndikhana nkhani zomwe ndikhafunika kukonzekera. Iye adandibvesesa, tsono alibe kukomedwa na bzomwe ndidalewabzo. Pomwe ndikhadakhala pa meza, ndidayamba kukumbukira bwino-bwino bza nkhani imweyi. Ndidakumbukira bzomwe Aefezo 5:25, 28 ambalewa. Mavesiya yadandikumbusa bzomwe Yahova ambafuna kuti ndicite na mkazangu. Pomwe ndidamala kupemba, ndidamuuza Lesli kuti: “Mbatiyende.” Ndipo pomwe iye adabva bzimwebzi adakomedwa kwene-kwene. Tidayenda ku mbuto inango pafupi na mkulo, tidatandika nguwo yathu ya pa meza, ndipo ntsiku imweyi idakhala yakudekeza kwene-kwene kwa ifepano. Ndipo ndidadzakwanisa kukonzekera nkhani zangu.

Madera yomwe ifepano tikhazungira yakhayambira ku British Columbia mpaka ku Newfoundland. Cakulinga cangu cakufuna kupakira ndeke cire cikhakwanisika. Inepano ndikhafuna kuyenda ku Xikola ya Jileyade, tsono ndikhafuna lini kukhala m’misiyonario mu dziko lacirendo. Inepano ndikhambawona kuti amisiyonario mbanthu wakupambulika, ndipo ndikhabziwona kuti ndine lini wakuthemera. Ndipo ndikhacita mantha kuti tingadatumizidwa ku dziko la ku África, komwe kukhana matenda na nkhondo. Ndikhakomedwa kutumikira komwe ndikhaliko.

TIDAUZIDWA KUTI TIKATUMIKIRE KU ESTÓNIA NA KWA WANTHU WA MTUNDU WA BÁLTICO

Mu 1992, Mboni za Yahova zidayamba pomwe kupalizira mwa padeca m’madziko manango yomwe yakhacita mbali ya União Soviética. Abale adatikumbira kuti tiyende ku Estónia kuti tikatumikire ninga amisiyonario. Pomwe tidabva bzimwebzi, tidadabwa kwene-kwene ndipo tidaipempherera nkhaniyo. Tidalewa pomwe kuti: ‘Yahova akatikumbira kuti ticite cinthu, tiyezere kucicita.’ Tidabvuma ndipo tidalewa kuti: ‘Bziri bwino, thangwe tiniyenda lini ku África.’

Ifepano tidayambiratu kupfunza cirewedwe ca ku Estónia. Pomwe padapita minyezi ming’ono-ng’ono, tidauzidwa kuti tikatumikire ninga anyakunyang’anira dera. Tikhazungira magwere 46 na magrupo matatu ya wanthu wa mtundu wa Báltico na ku Kaliningrad, Rússia. Tikhafunika kupfunza cirewedwe ca Cilativiano, Cilituania na Cirusso. Kucita bzimwebzi kukhali kwakunesa. Napo kuti bzikhali tenepo, nyongo yathu idacitisa kuti axamwali wathu akomedwe nafe, ndipo iwo adatithandiza. Mu 1999, ku Estónia kudakhazikisidwa mthambi, ndipo ndidauzidwa kuti ndikatumikire m’Komiti ya Mthambi pabodzi na Toomas Edur, Lembit Reile na Tommi Kauko.

Tidadziwana na abale azinji omwe akhadayendesedwa ku Sibéria. Napo kuti iwo adaikhidwa m’kawoko na kukhala kutali na adzinza wawo, alibe kubwerera m’mbuyo. Iwo adapitiriza kukhala wakukondwa na kupalizira na nyongo. Bzimwebzi bzidatithandiza kuwona kuti mpsakukwanisika kupirira na kupitiriza kukhala wakukondwa napo kuti tikugumana na mabvuto.

Ifepano tikhaphata basa kwene-kwene ndipo tikhalibe nthawe yakupuma. Ndipopa, mkazangu, Lesli, adayamba kubva kuneta kwene-kwene. Tikhadziwa lini kuti kuneta kwene-kweneko kukhacitisidwa na matenda manango yakucemeredwa fibromyalgia. Bzimwebzi bzidaticitisa kukumbuka bza kubwerera ku Canadá. Pomwe tidauzidwa kuti tiyende ku xikola ya mthambi ku Patterson, Nova Iorque, EUA, ndidawona ninga kuti tingadakwanisa lini kuyenda. Tsono, pa mbuyo pa kupemba, tidabvuma kuyenda. Yahova adasimba cakusankhula cathu. Pomwe tikhali kumweko, Lesli adagumana thandizo la ulapi lomwe akhafunikira. Bzimwebzi bzidacitisa kuti tiyambe pomwe kucita basa lathu bwino-bwino.

TIKHADIKHIRIRA LINI KUTI TINGADAYENDA KUKATUMIKIRA KU CONTINENTE INANGO

Pomwe tidabwerera ku Estónia, usiku bwa ntsiku inango mu 2008, ndidaligaliridwi na abale wa ku likulu lathu la pa dziko lentse acitibvunza penu tingadabvuma kuyenda kukatumikira ku Congo. Ndidadabwa kwene-kwene, thangwe mangwana yace ndikhafunikira kuwauza penu tingadabvuma kuyenda ayai ne. Ndiribe kumuuza mkazangu, Lesli, bza nkhaniyi ntsiku imweyire thangwe ndikhadziwa kuti angadagona lini. Tsono inepano ndine ndiribe kugona. Ndidapemba kwa Yahova ndicimuuza thupo lomwe ndikhanalo la kuyenda ku África.

Pomwe kudacena, inepano ndidamuuza Lesli bza nkhaniyo. Pomwe tikhacezerana, tidalewa kuti: “Yahova akufuna kuti ifepano tiyende ku África. Tsono ifepano tingadziwe tani kuti kumweko kunkatidekera tikasaya kubvuma kuyenda?” Pa mbuyo pa kumala magole 16 ku Estónia, tidayenda ku Kinshasa, Congo. Mthambi ya kumweko ikhali yakudeka ndipo kumweko kukhana miti mizinji. Ndipo cinthu cakuyamba comwe mkazangu, Lesli, adaikha m’kwartu mwathu kakhali ka kartau komwe adacoka nako ku Canadá. Ka kartauko kakhana mafala yakuti: “Khala wakukondwa komwe iwepo uli.” Pambuyo pakudziwana na abale, kucitisa mapfunziro ya Bibliya pabodzi na basa lathu la umisiyonario, tidayamba pomwe kukhala wakukondwa. Pomwe padapita nthawe, tidakhala na mwayi wa kuzungira mthambi zakusiyana-siyana m’madziko yakukwana 13 ya ku África. Tidapfunza bzinthu bzizinji bzakudekeza na wanthu wakusiyana-siyana. Mantha yangu yadamala, ndipo tidatenda Yahova thangwe ra kutitumiza ku África.

Ku Congo, tidalatizidwa bzakudya bzakusiyana-siyana na tulombo tomwe tikhatukumbukira lini kuti tingadadzatudya. Tsono pomwe tidawona abale wathu ali kudya cakudyaco, ifepano tidadyambo ndipo tidakomedwa.

Tidayenda kumabvadzuwa kwa dzikolo kuti tikalimbikise abale na kuwapasa bzomwe iwo akhafunikira. Ku mbuto zimwezi, akambowa akhaboneresa akazi na wana. Napo bziri tenepo, pomwe ifepano tidawona cidikhiro cawo cakulamusidwa kwa anyakufa, lufoyi lawo kwa Yahova na kukhulupirika kwawo, bzidatilimbikisa kwene-kwene. Bzimwebzi bzidaticitisa kukumbukira thangwe lomwe limbaticitisa kutumikira Yahova na kulimbisambo cikhulupiro cathu kwa iye. Abale winango adaluza minda yawo na nyumba zawo. Bzimwebzi bzidatikumbusa kuti tingaluze bzinthu bzathu bzakuthupi. Tsono uxamwali bwathu na Yahova ndico cinthu cakufunika kwene-kwene. Napo kuti iwo akhagumana na mabvuto mazinji, akhadandaula lini. Momwe iwo akhacitira bzinthu bzidacitisa kuti tipirire pomwe tikhagumana na mabvuto ya thanzi.

TIDAUZIDWA KUTI TIKATUMIKIRE KU ÁSIA

Padacitika pomwe cinthu cinango comwe tikhacidikhirira lini. Tidakumbiridwa kuti tiyende kukatumikira ku mthambi ya ku Hong Kong. Ifepano tikhanati kukumbukira kale bza kuyenda kukakhala ku Ásia. Pakuti tidakwanisa kuwona momwe Yahova adatithandizira pa utumiki bwathu bwentse, ifepano tidabvuma kuyenda kumweko! Mu 2013, ifepano tidacoka ku África ticisiyana na axamwali wathu omwe tikhawafuna kwene-kwene, ndipo tikhadziwa lini bzomwe bzingadacitika patsogolo pace.

Bzinthu bzidacinja kwene-kwene pomwe ifepano tidayamba kukhala ku Hong Kong thangwe mzinda umweyu una wanthu azinji wakucokera m’madziko yakusiyana-siyana. Bzikhali bzakunesa kwene-kwene kupfunza Cixineji. Abale adatitambira bwino ndipo tidakomedwa na cakudya ca kumweko. Pakhana basa lizinji lomwe likhacitidwa ku mthambi. Tsono pa nthawe ibodzi-bodziyo, bzinthu bzikhayenda bziciumira kwene-kwene. Ndipopa, Bungwe Lakutonga lidawona kuti bzikhali bwino kuti mbuto zinango za mthambiyo zigulisidwe. Ndipo pomwe padapita nthawe pang’ono, mu 2015, ifepano tidafulukira ku Coreia do Sul, komwe tikupitiriza na utumiki bwathu. Pomwe tidafika kuno, tidafunikira kupfunza cirewedwe ca kumwekuno, bzomwe bzikhali bzakunesa kwene-kwene. Tsono napo bziri tenepo, abale na mpfumakazi ambatilimbikisa mwa kutiuza kuti tikulalewa bwino.

BZOMWE TIDAPFUNZA PAKUCITA UTUMIKI BWATHU

Kukhala na axamwali ku mbuto komwe timbakudziwa lini kulibe kupusa. Tsono tidawona kuti njira yabwino yakuti tikhale na axamwali ndiyo kuyamba ndifepano kuwacemera kuti abwere ku mui kwathu. Bzimwebzi bzikhacitisa kuti ifepano timbadziwane na wanthu mwakamfulumize. Tidakwanisa kuwona kuti abale wathu mbakundendemerana ndipo Yahova adatilenga kuti timbakwanise kufungula mtima wathu kuti tifune axamwali wathu. — 2 Akolinto 6:11.

Tidapfunza kubvuma axamwali wathu ninga momwe Yahova ambacitira na kuwonambo bzinthu bzakusiyana-siyana bzakulatiza kuti Yahova ambatifuna ndipo ambatipasa malango kuti yatithandize pa moyo wathu. Tikawofoka ayai kukumbuka kuti abale ambatifuna lini, timbawerenga makarta yomwe tidatambira kucokera kwa axamwali wathu. Yahova adatawira mipembo yathu na kutitsimikizira kuti ambatifuna na kutilimbikisa kuti tipitirize kucita utumiki bwathu.

Na kupita kwa nthawe, inepano na Lesli tidapfunza kufunika kwa kumbakhala na nthawe yakuti timbaceze napo kuti tina bzizinji bzakucita. Ndipo tidawonambo kufunika kwa kumbabziseka tekha tikakhala tikuphonya kulalewa cirewedwe comwe tikupfunza kucilalewa. Usiku buli-bwentse timbanyang’ana cinthu comwe cimbaticitisa kuti titende Yahova.

Kulewa cadidi, ndikhawona ninga kuti ningadakwanisa lini kukhala m’misiyonario ayai kuyenda kukakhala m’madziko manango. Tsono ndidapfunza kuti na thandizo la Yahova, bzinthu bzentse mpsakukwanisika. Ndidakumbukira mafala ya Jeremiya, yomwe yambati: “Mwandiphindukira, imwe Yahova.” (Jeremiya 20:7) Iye adatipasa bzisimbo bzomwe tikhadikhirira lini, ndipo adandithandizambo kukwanirisa cakulinga cangu cakufuna kucita ulendo na ndeke ndiciyenda m’madziko manango. Ndidacita ulendo na ndeke bwakuyenda m’madziko yakusiyana-siyana yomwe ndikhayakumbukira lini pomwe ndikhali mwana. Tidacita maulendo yamweya pomwe tikhazungira mthambi m’makontinente maxanu. Ndipo nimbatendambo kwene-kwene mkazangu, Lesli, pakundithandiza kucita utumiki bwentsebu.

Nthawe zentse timbayezera kukumbukira kuti tacita bzentsebzi thangwe rakuti timbafuna Yahova. Bzisimbo bzomwe tinabzo ntsiku zino bzimbalatiza momwe moyo un’dzakhalira wabwino kwene-kwene kutsogolo pomwe Yahova “an’dzafuthula boko lace acipereka cakukhumba ca bza moyo bzentse.” — Salimo 145:16.