Mbvunzo Omwe Munthu Ali-wentse Angacite

Mpfumakazi Mariya na abayawo a Johna ambakhala ku dziko linango lomwe wanthu wa ku Filipinas ambabwera kudzakhala na kuphata basa ndipo iwo ambakomedwa kupalizira wanthuwo. Pa nthawe ya COVID-19, mpfumakaziyi idapfunzisa Bibliya wanthu azinji mu dziko lomwe ikhakhala na wanthu wa m’madziko manango. Kodi iyo idacita tani bzimwebzi?

Mpfumakazi Mariya ikhabvunza anyakupfunza wace wa Bibliya kuti: “Kodi pana munthu omwe imwepo mumbamudziwa omwe akufunambo kupfunza Bibliya?” Iwo akatawira kuti inde, mpfumakaziyi ikhambakumbira kuti ayambe kupfunza naye munthuyo. Kucita mbvunzo ningati umweyu kumbacitisa kuti bzinthu bzifambe bwino. Thangwe ranyi? Thangwe wanthu omwe ambafuna Fala la Mulungu ambafunambo kuuza wanthu wa m’banja mwawo na axamwali wawo bzomwe akupfunza. N’ciyani comwe cidacitika pomwe mpfumakazi Mariya idacita mbvunzo umweyu kuna anyakupfunza wace wa Bibliya?

Nyakupfunza wa Bibliya m’bodzi wa mpfumakazi Mariya wakucemeredwa Jasmin adamuuza kuti pakhana wanthu anai omwe akhafunambo kupfunza Bibliya. M’bodzi wa iwo akhali a Kristina. Iwo akhakomedwa kwene-kwene na pfunzirolo mwakuti adakumbira mpfumakazi Mariya kuti ambapfunze kawiri pa sumana. Pomwe mpfumakazi Mariya idawabvunza penu pakhana wanthu winango omwe akhafunambo kupfunza Bibliya, iwo adatawira kuti: “Inde, ndinawo axamwali wangu.” Pomwe padapita ntsiku zing’ono-ng’ono, a Kristina adacitisa kuti mpfumakazi Mariya igumane na axamwali wawo anai omwe akhafunambo kupfunza Bibliya. Pomwe padapita nthawe, a Kristina adadzauza mpfumakazi Mariya kuti pakhana axamwali wawo pomwe winango omwe akhafunambo kupfunza Bibliya. Axamwaliwo adadzauzambo mpfumakazi Mariya kuti akhana axamwali wawombo omwe akhafunambo kupfunza Bibliya.

A Kristina akhafuna kuti wanthu wa m’banja mwawo omwe akhali ku Filipinas apfunzembo Bibliya. Tenepo, iwo adaceza na mwana wawo wacikazi wakucemeredwa Andrea. Pakuyamba, Andrea akhakumbuka kuti ‘Mboni za Yahova ni gereja yacirendo, imbakhulupira lini Jezu ndipo imbandophatisa basa Cipangano Cakale basi.’ Tsono pomwe adandopfunza kabodzi, iye adazindikira kuti bzomwe akhakumbuka pakulewa bza Mboni za Yahova bzikhali bzakuphonyeka. Pa pfunziro liri-lentse, iye akapfunza bzinthu bzipsa kucokera m’Bibliya akhambalewa kuti: “Bzimwebzi mpsacadidi thangwe bzikucokera m’Bibliya!”

Pomwe padapita nthawe, Andrea adadzauzambo mpfumakazi Mariya bza axamwali wace awiri omwe akhafunambo kupfunza Bibliya. Ndipo kuthumizira bzimwebzi, tia wace wa Andrea wakucemeredwa Angela, omwe ni azimola akhambatetekera pomwe mpfumakazi Mariya akhambacita pfunziro na Andrea, tsono mpfumakaziyo ikhadziwa lini bzimwebzi. Ntsiku inango, a Angela adauza Andrea kuti auze mpfumakazi Mariya kuti iwo akhafunambo kupfunza Bibliya. A Angela adayamba kupfunza Bibliya ndipo akhakomedwa na bzomwe akhapfunzabzo. M’kati mwa mwezi m’bodzi, iwo adaikha mu msolo mavesi mazinji ya m’Bibliya ndipo akhafuna kumbapfunza kanai pa sumana! Mwakuthandizidwa na Andrea, a Angela adayamba kumbatsonkhana mwakuphatisa basa vidiyokonferensiya.

Pomwe abayawo wa a Kristina wakucemeredwa Joshua akhali pafupi na pomwe mpfumakazi Mariya na a Kristina akhapfunza, mpfumakazi Mariya idawabvunza penu angafunembo kumbakhala pabodzi pa pfunzirolo. A Joshua adatawira kuti: “Nditi nimbandotetekere basi, koma lekani kumbandicita mibvunzo. Mukandicita mibvunzo, nin’cokeratu.” Mkati mwa mphindi zixanu za pfunzirolo, a Joshua adacita mibvunzo mizinji kuposa yomwe a Kristina akhacita ndipo adafunambo kupfunza Bibliya.

Mbvunzo omwe mpfumakazi Mariya akhambacita udacitisa kuti iwo akhale na mapfunziro mazinji ya Bibliya. Iwo adacita makonzedwe yakuti anyakupfunza wawo winango ambapfunzisidwe na abale winango. Thangwe ra mbvunzo omwe mpfumakazi Mariya adacita, wanthu wakukwana 28 wa m’madziko yakusiyana-siyana adayamba kupfunza Bibliya.

Nyakupfunza wakuyamba wa mpfumakazi Mariya wakucemeredwa Jasmin, omwe wafotokozedwa mu nkhani ino, adabatizidwa mu Abril 2021. A Kristina adabatizidwa mu Maio 2022 ndipo adabwerera ku Filipinas komwe kuna adzinza wawo. Anyakupfunza winango awiri omwe mpfumakazi Mariya adalatizidwa na a Kristina adabatizidwambo. Pomwe padapita minyezi ming’ono-ng’ono pambuyo pa a Kristina kubatizidwa, a Angela adabatizidwambo ndipo tsapano akutumikira ninga mpainiya wakukhazikika. A Joshua, abayawo wa a Kristina na mwana wawo wacikazi, Andrea, pabodzi na anyakupfunza winango akadapfunza Bibliya ndipo akuyenda patsogolo.

Mu nthawe ya Akristau wakuyambirira, wanthu azinji akhauza wanthu wa m’banja mwawo na axamwali wawo bzomwe akhapfunza pakulewa bza Jezu. (Juwau 1:41, 42a; Mabasa 10:24, 27, 48; 16:25-33) Tenepo mbabvunzani anyakupfunza wanu wa Bibliya kuti: “Kodi pana munthu omwe imwepo mumbamudziwa omwe akufunambo kupfunza Bibliya?” Imwepo mukacita mbvunzo umweyu, pinango-pentse mungagumane wanthu winango omwe akufunambo kupfunza Bibliya.