Mbakumbukirani Bzinembo

Kodi bzidakunesani kale kukumbukira vesi la m’Bibliya lomwe mumbalifuna? Pinango lingakhale vesi lomwe limbakutsangalazani, lomwe limbakuthandizani kukunda makumbukidwe yakuphonyeka ayai lomwe mungafunembo kuuza munthu munango. (Salimo 119:11, 111) Onani nfundo zinango zomwe zingakuthandizeni kumbakumbukira mavesi ya m’Bibliya.

• Phatisani basa aplikativo ya JW Library^®. Konzani mbuto ndipo ipaseni dzina lakuti “Mavesi Yomwe Nimbayafuna” ndipo mbaikhani mavesi yomwe mukufuna kuyakumbukira pa mbuto imweyi.

• Nembani vesi pa mbuto yomwe mungakwanise kumbaliwona. Nembani pa katsamba vesi lomwe mukufuna kumbalikumbukira, ndipo liikheni pa mbuto yomwe mungambaliwone nthawe zentse. Winango ambaikha pafupi na supedyo ndipo winango ambaikha pa msuwo wa jalera. Tsono winango ambacosa foto vesiro aciliikha pa tela ya komputadori ayai ya telefoni yawo.

• Phatisani basa makartau. Ku mbali ibodzi ya kartauyo nembani vesi la m’Bibliya ndipo ku mbali inangoyo nembani mafala ya mu vesiro. Mukamala, mbawonani mbali yomwe mwanemba vesi la m’Bibliya muciyezera kukumbukira mafala yace ayai mbawonani mbali yomwe mwanemba mafala muciyezerambo kukumbukira vesi lace.