Pa Moyo Wathu Wentse Takhala Tikupfunzisidwa na Mpfunzisi Wathu Mkulu

CIRATIZO CA ABEREKI WANGU

Mu gole la 1950 abereki wangu adacoka ku Itália aciyenda ku Canadá ndipo adakakhala mu mzinda wa Kindersley m’cigawo ca Saskatchewan. Na kupita kwa nthawe, iwo adadzapfunza cadidi ndipo cadidico cidadzakhala cakufunika kwa iwo. Ndikukumbukira pomwe ndikhali mwana ndikhambamala ntsiku yentse ndikupalizira pabodzi na wanthu wa m’banja mwathu. Ndipopa nthawe zinango nimbasenzeka mwakulewa kuti ndidayamba “upainiya bwakuthandiza” pomwe ndikhana magole 8!

Abereki wangu akhali wakusauka; napo bziri tenepo iwo adabvuma kuluza bzinthu bzizinji kuti atumikire Yahova ndipo adakhala ciratizo cabwino kwa inepano. Mu 1963 iwo adagulisa bzinthu bzizinji kuti agumane kobiri kuti ayende ku mtsonkhano wa m’madziko omwe udacitikira ku Pasadena, Califórnia ku Estados Unidos. Patsogolo pace, mu 1972 tidayenda kukakhala mu mzinda wa Trail m’cigawo ca Colúmbia Britânica ku Canadá. Ndipo kucokera komwe tikhakhala mpaka mu mzinda umweyu pakhana makilometro pafupi-fupi 1000. Cakulinga cathu cikhali ca kuthandiza wanthu omwe akhalewalewa Ciitaliyano mu mzinda umweule. Pai wangu akhaphata basa la kupsaira na kukonza-konza bzinthu ku bazali. Iwo adalamba mwayi wakuphata basa lomwe lingadacitisa kuti atambire kobiri zizinji thangwe ra kufuna kuikha bzinthu bzauzimu pa mbuto yakuyamba.

Nimbatenda kwene-kwene abereki wangu thangwe ra kukhala ciratizo cabwino kwa inepano na abale wangu atatu. Ciratizo cawo cidandithandiza kuti ndiyambe kutumikira Yahova. Iwo adandipfunzisa cinthu cakufunika comwe ndiribe kuciyebwa kwa moyo wangu wentse, comwe n’cakuti: Ndikaikha Yahova pa mbuto yakuyamba, iye nthawe zentse an’dzandisamalira. — Mateu 6:33.

KUYAMBA UTUMIKI BWA NTHAWE ZENTSE

Mu 1980, ndidalowolana na mpfumakazi inango yakudeka yakucemeredwa Debbie, yomwe ikhafuna kucita bzizinji pakutumikira Yahova. Ifepano tikhafuna kucita utumiki bwa nthawe zentse ndipopa pomwe padapita minyezi mitatu pambuyo pa malowozi yathu, Debbie adayamba kutumikira ninga mpainiya. Pomwe padapita gole libodzi pambuyo pa malowozi yathu, tidayenda kukathandizira ku kagwere kanango kang’ono komwe kakhafunikira thandizo ndipo kumweko ndidayambambo kutumikira ninga mpainiya.

Na kupita kwa nthawe, tidasiya kukhala wakukondwa pa utumiki bwathu ndipo tidakumbuka bzakucoka kumwekule. Tsono cakuyamba tidayenda kukaceza na nyakunyang’anira dera. Iye adalewalewa nafe mwa lufoyi tsono alibe kutsembera ndipo adatiuza kuti: “Muna bvutoyo ndimwepo. Imwepo mukundokhalira kunyang’anisisa mabvuto basi. Imwepo mukambanyang’ana bzinthu bzomwe bzingakucitiseni kukhala wakukondwa pa utumiki bwanu mun’dzabzigumana.” Malango yamweya ni yomwe ifepano tikhafunikira. (Salimo 141:5) Ifepano tidacinjiratu mwakamfulumize momwe tikhawonera bzinthu ndipo tidazindikira kuti pakhana bzinthu bzizinji bzabwino pa utumiki bwathu. Azinji m’gwere mwathu akhafuna kucita bzizinji pakutumikira Yahova, kuphatanidzambo wana pabodzi na mpfumakazi zinango zomwe zikhadalowodwa na amuna omwe akhatumikira lini Yahova. Bzimwebzi bzidatipfunzisa cinthu cakufunika. Tidapfunza kuti tin’funika kumbawona bzinthu mu njira yakuthemera ticikhulupira kuti Yahova an’dzatithandiza kulimbana na mabvuto yomwe yangawoneke ninga yakunesa. (Mika 7:7) Tidayamba pomwe kukhala wakukondwa ndipo bzinthu bzidayamba kutifambira bwino pa utumiki bwathu.

Apfunzisi wa xikola yathu yakuyamba ya apainiya akhadatumikira m’madziko yanango. Iwo adatilatiza mafoto yawo manango ndipo adatifotokozerambo bza bzisimbo na mabvuto yomwe adagumana nayo pa mautumiki yakusiyana-siyana yomwe adakhala nayo. Bzimwebzi bzidacitisa kuti tifunembo kutumikira ninga amisiyonario.

Kuti tiwone momwe moyo wa umisiyonario umbakhalira, mu 1984 tidayenda kukakhala ku cigawo ca Quebec komwe kumbalalewedwa Francês. Kucokera ku Quebec mpaka ku Colúmbia Britânica pakhana makilometro yakupitirira 4000. Ku Quebec, ifepano tikhafunika kupfunza cikhalidwe na cirewedwe cipsa. Bvuto linango ndakuti tikhalibe kobiri zizinji. Na kupita kwa nthawe, cakudya comwe tikhambadya cikhali mbatata zomwe mulimi munango akhatiuza kuti tikatenge m’munda mwace pambuyo pa iye kubvuna. Mkazangu Debbie akhambaphika mbatatazo mu njira zakusiyana-siyana ndipo zikhambakoma kwene-kwene! Napo kuti tikhagumana na mabvuto tidacita ciri-centse kuti tipirire mwakukondwa. Cakufunika kwene-kwene n’cakuti tikhakwanisa kuwona kuti Yahova akhatisamalira. — Salimo 64:10.

Ntsiku inango, tidatambira xamada yomwe tikhaidikhirira lini. Tidauzidwa kuti tikatumikire ku Beteli ya ku Canadá. Tsono pa nthawe ibodzi-bodziyo tidacita thupo thangwe tikhadatumiza petisau kuti tiyende ku Xikola ya Jileyade, napo bziri tenepo tidabvuma kuyenda ku Beteliko. Pomwe tidafika ku Beteli tidabvunza M’bale Kenneth Little, omwe akhali wa m’Komiti ya Mthambi, kuti: “N’ciyani comwe tin’dzacita tikadzacemeredwa kuti tidzayende ku Xikola ya Jileyade?” Iwo adatitawira kuti: “Lekani thupo bzimwebzi bzikadzacitika tin’dzawona bzakucita.”

Pambuyo pa kupita sumana ibodzi bzimwebzi bzidacitikadi. Inepano na mkazangu Debbie tidauzidwa kuti tiyende ku Xikola ya Jileyade. Ndipo tidafunikira kusankhula. M’bale Little adalewa kuti: “Pa bzakusankhula bziwiribzi pinango imwepo mungafunike kusankhula cibodzi. Pa bzakusankhula bziwiribzi palibe comwe cikuposa cinzace; ndipo Yahova angabzisimbe.” Ifepano tidasankhula kuyenda ku Xikola ya Jileyade ndipo na kupita kwa nthawe tidakwanisa kuwona kuti mafala yomwe M’bale Little adatiuza yakhali yacadidi. Ifepano tidapasambo winango malango mabodzi-bodziya pomwe akhafuna kusankhula kuti ni utumiki buponi bomwe angadacita.

KUTUMIKIRA NINGA AMISIYONARIO

Tidakhala na mwayi wakukhala pabodzi na aluno 24 wa mu turma 83 ya Jileyade. Xikola imweyi idacitikira ku Brooklyn, Nova Iorque, kuyambira mu Abril 1987. M’bale Ulysses Glass na Jack Redford ndiwo omwe akhali apfunzisi wathu. Minyezi mixanu ire idapita mwakamfulumize na tenepo tidamaliza mapfunziroyo pa 6 Setembro 1987. Tidauzidwa kuti tikatumikire ku Haiti, pabodzi na John na Marie Goode.

Dziko la Haiti likhatambira lini amisiyonario kucokera mu 1962 pomwe amisiyonario wakumalizira adauzidwa kuti acoke m’dzikolo. Pomwe padapita sumana zitatu pambuyo pa kumaliza Xikola ya Jileyade, inepano na Debbie tidayamba kutumikira ku Haiti. Gwere lathu likhana apalizi 35 ndipo likhali pa mbuto inango m’mapiri. Ifepano tikhali maswaka, tikhadziwa lini bzinthu bzizinji ndipo tikhambakhala tekha ku nyumba za amisiyonario. Wanthu azinji wa kumweko akhali wakusauka ndipo azinji wa iwo akhadziwa lini kuwerenga. Pomwe tikhakhala ku Haiti, wanthu azinji adakhala waciwembo thangwe ra nkhani za ndale, adayezera kumenyana na boma, kuliphindukira ndipo kudacitikambo malengwa ya pantsi.

Tidapfunza bzizinji na kupirira pabodzi na cikondweso comwe abale na mpfumakazi wa ku Haiti akhanaco. Azinji wa iwo akhagumana na mabvuto napo bziri tenepo akhafuna Yahova na utumiki. Ndikukumbukira bza mpfumakazi inango yacikulire yomwe ikhadziwa lini kuwerenga; tsono ikhambakumbukira mavesi 150 ya m’Bibliya. Bzinthu bzomwe bzikhacitika mu dziko limwelire bzidandicitisa kufuna kupitiriza kupalizira mafala yabwino yakuti Umambo bwa Mulungu ndibo bokha bomwe bun’dzamalisa mabvuto ya wanthu. Mpsakudekeza kwene-kwene kudziwa kuti anyakupfunza wathu winango wakuyambirira wa Bibliya mu dziko limwelire adadzakhala apainiya wakukhazikika, apainiya wakupambulika na akulu wa gwere.

Ku Haiti, ndidadziwana na tswaka linango lakucemeredwa Trevor, lomwe likhali misiyonario wa gereja inango, ndipo nthawe zinango tikhambaceza bza m’Bibliya. Pomwe padapita magole, ndidadabwa kwene-kwene pomwe ndidatambira karta yakucokera kwa iye yakulewa kuti: “Inepano nin’batizidwa pa mtsonkhano wa dera omwe ukubwerayu! Ndikufuna kubwerera ku Haiti ndicikatumikira ninga mpainiya wakupambulika ku mbuto ibodzi-bodzi komwe ndikhatumikira ninga misiyonario wa gereja inango ire.” Ndipo ndibzo bzomwe iye na mkazace adacita kwa magole mazinji.

KUTUMIKIRA KU EUROPA NDIPO PATSOGOLO PACE KU ÁFRICA

Pakuti m’madziko manango ya ku Europa basa lathu likhaletsedwa lini, ifepano tidatumizidwa kuti tikatumikire kumweko. Mu 1992 tidafika ku Liubliana ku Eslovénia, mzinda omwe ukhali pafupi na komwe abereki wangu adakulira pomwe akhanati kuyenda kukakhala ku Itália. Pa nthawe imweyi, ku Yugoslavia kukhapitiriza kucitika nkhondo. Beteli ya ku Austria ku Vienna, ya ku Zagreb ku Croácia na ya ku Belgrado ku Sérvia ndizo zomwe zikhatsogolera basa lakupalizira ku mbuto imweyi. Tsono tsapano dziko liri-lentse lingadakhala na Beteli yace-yace.

Kuti tikhale ku Eslovénia tikhafunika kupfunza cirewedwe na cikhalidwe cipsa. Wanthu wa kumweko akhambalewa kuti, “Jezik je težek,” Bzomwe bzikhathandauza kuti “Cirewedweci cikhali cakunesa.” Bzimwebzi bzikhalidi bzacadidi! Ndipo tidadabwa kwene-kwene pomwe tidawona momwe abale akhaliri wakukonzeka kubvuma mwakamfulumize kucinja kuli-kwentse komwe gulu likhacita na momwe Yahova akhawasimbira. Pamwepa tidakwanisa pomwe kuwona kuti Yahova nthawe zentse ambakonza bzinthu mwalufoyi na pa nthawe yace. Bzinthu bzizinji bzomwe tidapfunza pakutumikira Yahova bzidatithandiza kupirira ku Eslovénia ndipo tidapfunzambo bzinthu bzipsa.

Tsono bzinthu bzidapitiriza kucinja pa moyo wathu. Mu 2000 tidauzidwa kuti tikatumikire ku Costa do Marfim komwe ni ku África Ocidental. Patsogolo pace, mu Novembro 2002, tidathawira ku Serra Leoa thangwe ra nkhondo. Bzinthu kumweko bzikhali bwino thangwe nkhondo yomwe idacitika kwa magole 11 ikhadamala. Bzidakhala bzakunesa kwene-kwene kucoka ku Costa do Marfim mwakamfulumize. Tsono bzomwe tidapfunza kumweko bzidatithandiza kupitiriza kukhala wakukondwa.

Wanthu azinji ku Serra Leoa akhafunisisa kupfunza cadidi. Abale wa kumweko akhali wa lufoyi ndipo akhadapirira kwa magole mazinji. Ndipopa tikhambakumbukira kwene-kwene bzinthu bzabwinobzi. Napo kuti abale akhali wakusauka, iwo akhafunambo kupasa winango bzomwe akhanabzo. Mpfumakazi inango idapasa Debbie bzakubvala. Pakuyamba Debbie akhafuna kulamba, tsono mpfumakaziyo idangingimira mwa kumuuza kuti: “Pa nthawe ya nkhondo abale wa m’madziko manango adatithandiza. Tsapano ni nthawe yangu ya kucitambo bzibodzi-bodzibzi.” Inepano na Debbie tidawona kuti bzikhali bwino kutewezerambo ciratizo cawo.

Na kupita kwa nthawe, tidadzakwanisa kubwerera pomwe ku Costa do Marfim, tsono kumweko bzinthu bzidadzafika pomwe pakuipa. Na tenepo, mu Novembro 2004, ifepano tidafunikira kuthawa pomwe. Tidanyamulidwa na elikopitero ndipo tikhana pasta yathu ibodzi. Tidagona pantsi ku mbuto komwe kukhakhala acikunda wa França ndipo kumacibese kwace tidapakira ndeke ticiyenda ku Suíça. Ifepano tidafika usiku ku Beteli. Tsono tidatambiridwa bwino na abale wa m’Komiti ya Mthambi pabodzi na apfunzisi wa Xikola Yakupfunzisa Utumiki pabodzi na azikazawo. Iwo adatikumbatira, adatipasa cakudya na xokolati. Bzimwebzi bzidacitisa kuti tibzibve kuti ndife wakufunika.

Ifepano tidatumikira ku Gana kwa kanthawe kakucepa ndipo patsogolo pace tidadzakwanisa kubwerera pomwe ku Costa do Marfim pomwe bzinthu bzikhali bwino pang’ono. Kudeka mtima kwa abale kudatithandiza kupirira pa nthawe yakunesayi na kucinja-cinja kwa utumiki bwathu. Inepano na mkazangu Debbie tidakwanisa kuwona kuti lufoyi limweri limbalatizidwa kwene-kwene mu gulu la Yahova. Tsono bzimwebzi bzin’ticitisa lini kuleka kutenda bzomwe abale ambacita. Na kupita kwa nthawe, tidadzazindikira kuti bzinthu bzimwebzi bzidacita mbali ya mapfunziro yathu.

KU MÉDIO ORIENTE

Mu 2006 tidatambira karta yakucokera ku likulu lathu yakulewa kuti tikhafunika kuyenda kukatumikira ku Médio Oriente. Kumweko tingadakapfunza bzinthu bzipsa, kugumana na mabvuto, kupfunza cirewedwe na cikhalidwe cipsa. Ifepano tikhadziwa kuti tikhafunikira kupfunza bzinthu bzizinji ku mbuto imweyi komwe kukhana mabvuto mazinji thangwe ra nkhani za ndale na za magereja. Bzikhali bzakudekeza kwene-kwene kuwona kusiyana kwa bzirewedwe m’magwere. Napo kuti abale wa kumweko akhali wa bzikhalidwe bzakusiyana-siyana iwo akhali wakuphatana kwene-kwene thangwe rakuti akhateweza malango yomwe akhatambira kucokera m’gulu la Yahova. Ifepano tikhadabwa kwene-kwene na abale wa kumweko thangwe akhali wakukhwimika ndipo akhakwanisa kulimbana na adzinza wawo, avizinyu na anzawo wakubasa akakhala akuwatsutsa.

Mu 2012, ifepano tidayenda ku mtsonkhano wa cigawo wakupambulika ku Tel Aviv, ku Israel. Umweyu udakhala mtsonkhano wakuyamba ukulu wa wanthu wa Yahova wa ku mbuto imweyire kucokera pa Pentekosite 33 pomwe Kristu akhadabwera kale. Udakhala mtsonkhano wakusaya kuyebweka!

M’magole yamweyale tidatumizidwa kuti tikazungire dziko linango komwe basa lathu likhadaletsedwa. Ifepano tidanyamula mabukhu manango, tidapalizira na kucitambo mitsonkhano ming’ono ming’ono ya dera. Ifepano tikhambakwanisa kuwona acikunda omwe akhana nfuti ndipo tikhambapitambo na m’mbuto zomwe akhaimisa wanthu kuti akwanise kuwona bzomwe wanthuwo anyamula. Tsono pakuti tikhambacita bzinthu mwakusamala ndipo tikhambafamba pabodzi na abale wakumweko tikhambabzibva kukhala wakukhotcerereka.

KUBWERERA POMWE KU ÁFRICA

Mu 2013 tidatambira utumiki bunango bwakusiyana. Tidauzidwa kuti tikatumikire ku Kinshasa, ku Congo, dziko lakudeka tsono lomwe limbadziwikambo ninga dziko lakusauka na la nkhondo. Pakuyamba tidalewa kuti: “Ku África timbakudziwa kale ndipopa bzin’katinesa lini kwene-kwene.” Kulewa cadidi tidapfunza bzizinji kumweko maka-maka pomwe tikhacita ulendo, thangwe m’dziko limwelire mukhalibe miseu yakukonzedwa bwino na maponti. Ndipo tidawona bzinthu bzizinji bzabwino kumweko. Napo kuti abale akhagumana na bvuto lakusaya kobiri iwo akhapirira mwakukondwa, akhafuna basa lakupalizira ndipo akhacita nyongo yakugumanika pa mitsonkhano ya gwere na ya dera. Tidakwanisa kuwona na maso yathu kuti wanthu azinji akhabvuma kupfunza cadidi thangwe ra thandizo na bzisimbo bzakucokera kwa Yahova. Tidapfunza bzinthu bzizinji ku Congo ndipo tidakhalambo na axamwali omwe ali ninga abale wathu caiwo.

Mu 2017, tidatambira utumiki bupsa bwa kuyenda kukatumikira ku África do Sul komwe kuna mthambi ikulu yakusiyana na mthambi zinango zomwe tikhadatumikira kale. Kumweko tidatambira basa lomwe tikhanati kulicita kale pa moyo wathu. Na tenepo tidafunikira pomwe kupfunza bzinthu bzizinji. Tsono bzinthu bzomwe tidapfunza m’mbuyo bzidatithandiza kwene-kwene. Kucokera pomwe tidafika kuno, tidakomedwa kwene-kwene kudziwana na abale omwe ana magole mazinji akupirira pakutumikira Yahova. Mpsakudekeza kwene-kwene kuwona abale wa m’banja la Beteli akuphata basa mwakuphatana napo kuti ambakhala ku mbuto na m’bzikhalidwe bzakusiyana. Atumiki wa Yahova ambacita nyongo yakukhala na unthu bupsa na kuphatisa basa mitemo ya m’Bibliya ndipo bzimwebzi bzimbacitisa kuti Yahova awasimbe mwa kuwapasa mtendere.

Kwa magole mazinji, inepano na Debbie tidatambira mautumiki yakusiyana-siyana, tidafunika kuzolowerana na bzikhalidwe bzakusiyana-siyana na kupfunzambo bzirewedwe bzipsa. Kucita bzimwebzi kukhali lini kwakupusa tsono tikhakwanisa kuwona Yahova akuphatisa basa gulu lace pabodzi na abale kuti atilatize lufoyi lace lacadidi. (Salimo 144:2) Pana bzinthu bzizinji bzomwe tidapfunza thangwe ra kucita utumiki bwa nthawe zentse.

Nimbatenda kwene-kwene bzentse bzomwe abereki wangu adandipfunzisa, thandizo lomwe mkazangu Debbie ambandipasa na ciratizo cabwino comwe ndidatambira kwa abale wa pa dziko lentse. Tikakumbukira bzakutsogolo, ndife wakutsimikiza kupitiriza kupfunzisidwa na Mpfunzisi Wathu Mkulu.