Thandizani Nyakupfunza Wanu wa Bibliya Kusankhula Kutumikira Yahova

1-2. (a) Thangwe ranyi anyakupfunza winango wa Bibliya ambazeza kutumikira Yahova? (b) Kodi n’ciyani comwe tin’cezerana mu nkhani ino?

KODI pakhana bzinthu bzomwe bzikhakucitisani thupo ayai kuzeza kukhala Mboni ya Yahova? Pinango mukhacita mantha kuti mungadakalipisa anzanu wakubasa, axamwali wanu ayai adzinza wanu bzingadakhala kuti mwasankhula kukhala Mboni ya Yahova. Ayai pinango mukhakumbuka kuti bzingadakhala bzakunesa kubvera malamulo ya Mulungu. Penu bzimwebzi bzidakucitikirani, imwepo mukukwanisa kudziwa momwe anyakupfunza winango wa Bibliya ambabvera na thangwe lomwe limbawacitisa kuwona kuti mpsakunesa kwa iwo kusankhula kukhala Mboni ya Yahova.

² Jezu adazindikira kuti mantha yangadacitisa kuti bzikhale bzakunesa kukula mwauzimu. (Mateu 13:20-22) Tsono iye alibe kusiya kuthandiza wale omwe bzikhawanesa kusankhula kukhala ateweri wace. Ndipopa mu nkhani ino tin’cezerana momwe Jezu adathandizira wanthu amwewa (1) kuzindikira bzomwe bzikhawatazisa kusankhula kutumikira Yahova, (2) kukulisa lufoyi lawo kwa Yahova, (3) kucinja bzinthu pa moyo wawo na (4) momwe angadakundira mabvuto. Kodi tingatewezere tani bzomwe Jezu adacitabzi pomwe tikuphatisa basa bukhu lakuti Khalani na Moyo Wakukondwa Mpaka Kale-Kale! lomwe lidakonzedwa kuti lithandize nyakupfunza wa Bibliya kukhotcerera cadidi?

THANDIZANI NYAKUPFUNZA WANU KUZINDIKIRA BZOMWE BZIKUMUTAZISA KUTUMIKIRA YAHOVA

3. Kodi n’ciyani comwe pinango cidatazisa Nikodemo kukhala nyakupfunza wa Jezu?

³ Nikodemo, omwe akhali mtongi wakubvekera wa Adjuda adagumana na mabvuto kuti asankhule kukhala nyakupfunza wa Jezu. Pomwe padapita minyezi 6 pambuyo pa Jezu kuyamba utumiki bwace, Nikodemo adazindikira kuti Jezu akhali muimikiri wa Mulungu. (Juwau 3:1, 2) Ndipopa Nikodemo adasankhula kugumana na Jezu mwakabise-bise thangwe ra “kugopa Adjuda.” (Juwau 7:13; 12:42) Pinango iye akhakumbuka kuti angadaluza bzinthu bzizinji thangwe ra kukhala nyakupfunza wa Jezu.a

4. Kodi Jezu adathandiza tani Nikodemo kubvesesa bzomwe Mulungu akhafuna kuti iye acite?

⁴ Nikodemo akhadziwa bzomwe Malamulo yakhalewa, tsono iye akhafunikira thandizo kuti abvesese bzomwe Yahova akhafuna kuti iye acite. Kodi Jezu adamuthandiza tani? Jezu mwakudeka mtima adapambula nthawe kuti agumane na Nikodemo usiku. Ndipo Iye adafotokozera Nikodemoyo bzomwe akhafunikira kucita kuti akhale nyakupfunza wace. Iye adamuuza kuti akhafunika kukungula pikado zace, kubatizidwa na madzi na kukhulupira Mwana wa Mulungu. — Juwau 3:5, 14-21.

5. Kodi tingathandize tani nyakupfunza wa Bibliya kuzindikira bzomwe bzikumutazisa kutumikira Yahova?

⁵ Napo kuti nyakupfunza wa Bibliya angabvesese bwino Bzinembo, tsono pinango iye angafunikire thandizo kuti azindikire bzomwe bzikumutazisa kutumikira Yahova. Bzinthu ninga basa la ntsiku na ntsiku na kutsutsidwa na adzinza bzingamutazise kukwanirisa bzakulinga bzauzimu. Ndipopa mbakhalani na nthawe yakuceza na nyakupfunza wanu. Imwepo mungamucemere kuti mukadye naye pabodzi ayai kuzunga naye. Pa nthawe zimwezi, pinango iye angakuuzeni bzomwe bzikumucitikira pa moyo wace ndipo imwepo mungadzakwanise kudziwa mabvuto yomwe iye akugumana nayo. Patsogolo pace, muthandizeni kuwona momwe angacinjire bzinthu bzinango. Ndipo mukumbuseni kuti bzomwe bzikumucitisa kucita bzimwebzi ni thangwe rakuti akufuna kukondwesa Yahova sikuti imwepo.

6. Kodi imwepo mungathandize tani nyakupfunza wanu wa Bibliya kuti ambaphatise basa bzomwe akupfunza? (1 Akolinto 16:13)

⁶ Nyakupfunza wa Bibliya akakhulupira kuti Yahova an’dzamuthandiza kuphatisa basa mitemo ya m’Bibliya, iye an’dzakhala wakukhwimika kuphatisa basa bzomwe akupfunza. (Werengani 1 Akolinto 16:13.) Imwepo mungabvesese momwe mungathandizire nyakupfunza wanu kucita bzimwebzi mukakumbukira bzomwe mpfunzisi wa ku xikola ambacita. Mukakumbukira nthawe yomwe mukhapfunza ku xikola, kodi ni mpfunzisi uponi omwe mukhakomedwa naye kwene-kwene? Kulewa cadidi ni mpfunzisi omwe mwakupirira adakuthandizani kuzindikira kuti imwepo muna luso lakucita bzinthu. Mwa njira ibodzi-bodziyi, mpfunzisi wabwino wa Bibliya ambandopfunzisa lini bzomwe Mulungu an’funa kuti ticite basi, koma iye ambatsimikizira nyakupfunza wace kuti na thandizo la Yahova iye an’dzakwanisa kucinja bzinthu bzomwe akufunikira kucinja pa moyo wace. Kodi mungacite tani bzimwebzi?

THANDIZANI NYAKUPFUNZA WANU KUKULISA LUFOYI LACE KWA YAHOVA

7. Kodi Jezu adathandiza tani wale omwe akhamutetekera kukulisa lufoyi lawo kwa Yahova?

⁷ Jezu akhadziwa kuti kufuna Mulungu kungadacitisa kuti anyakupfunza wace aphatise basa bzomwe akhapfunza. Kazinji-kazinji, iye akhapfunzisa bzinthu bzomwe bzikhathandiza anyakupfunza wace kuthumizira lufoyi lawo kwa Baba wawo wa kudzulu. Iye adandendemezera Yahova na pai omwe ambapasa bzinthu bzabwino wana wace. (Mateu 7:9-11) Winango mwa atetekeri wa Jezu pinango alibe kukhala na pai walufoyi. Ndokumbukirani momwe iwo adabvera pomwe Jezu adaphatisa basa ciratizo ca pai walufoyi omwe adatambira mwana wace omwe akhadacita bzinthu bzizinji bzakuipa. Jezu adathandiza wanthu kuwona kuti Yahova ambawafuna kwene-kwene ndipo akufuna kuwathandiza. — Luka 15:20-24.

8. Kodi imwepo mungathandize tani nyakupfunza wanu wa Bibliya kukulisa lufoyi lace kwa Yahova?

⁸ Imwepo mungathandize nyakupfunza wanu kukulisa lufoyi lace kwa Yahova mwa kumbaceza naye kawiri-kawiri bza makhalidwe ya Mulungu. Pomwe mukucita pfunziro na nyakupfunza wanu, muthandizeni kuwona kubverana komwe kulipo pakati pa bzomwe akupfunza na lufoyi la Yahova. Pomwe mukucezerana bza cakulombolera, thandizani nyakupfunza wanu kubvesesa kuti Yahova alibe kundocita bzimwebzi thangwe rakuti ambafuna wanthu wentse basi koma adacita bzimwebzi thangwe rakuti ambafunambo nyakupfunza wanuyo. (Aroma 5:8; 1 Juwau 4:10) Ndipopa mpsakupusa kwa nyakupfunza wanu kuyamba kufuna Yahova akambakumbukira bza lufoyi lomwe Yahovayo analo kwa iye. — Agalatiya 2:20.

9. Kodi n’ciyani comwe cidathandiza Michael kucinja bzinthu pa moyo wace?

⁹ Onani bzomwe bzidacitikira Michael, omwe ambakhala ku Indonésia. Iye adakulira m’banja la Mboni za Yahova tsono alibe kufika pakubatizidwa. Pomwe akhana magole 18, iye adayenda kukaphata basa la kufambisa kamiyau ku dziko linango. Patsogolo pace, iye adabwerera ku Indonésia kuti akalowole. Tsono adapitiriza basi kuphata basa ku dziko linangolo bzomwe bzikhacitisa kuti akhale kutali na mkazace na mwana wace. Ndipo mkazace na mwana waceyo adayamba kupfunza Bibliya aciyamba kuphatisa basa bzomwe akhapfunza. Pomwe mai wa Michael adasaika, iye adabwerera ku mui kuti akasamalire pai wace ndipo adayamba kupfunza Bibliya. Pomwe akhacezerana mbali yakuti “Fufudzani Bzinango” pa pfunziro 27 la bukhu lakuti Khalani na Moyo Wakukondwa Mpaka Kale-Kale! Michael adasunama kwene-kwene. Pomwe akhakumbukira momwe Yahova adabvera pomwe akhawona Mwana wace akubonera, Michael adalira. Iye adatenda kwene-kwene Yahova na Jezu thangwe ra cakulombolera ndipo adacinja bzinthu pa moyo wace acifika pakubatizidwa.

THANDIZANI NYAKUPFUNZA WANU KUCINJA BZINTHU PA MOYO WACE

10. Kodi Jezu adathandiza tani anyakupfunza wace wakuyambirira kucinja bzinthu pa moyo wawo kuti atumikire Yahova? (Luka 5:5-11) (Onanimbo cithunzi-thunzi.)

¹⁰ Anyakupfunza wakuyambirira adakwanisa kuzindikira kuti Jezu akhali Mesiya, tsono iwo akhafunikira thandizo kuti abvesese kuti atumikire Yahova akhafunika kupalizira mafala yabwino na nyongo. Pomwe Jezu adauza Pedru na Andereya kuti amutewere, iwo akhali kale anyakupfunza. (Mateu 4:18, 19) Iwo akhacita basa la kumedza ntsomba pabodzi na Tiyago na Juwau ndipo bzinthu bzikhawafambira bwino. (Marko 1:16-20) Tsono Pedru na Andereya ‘adasiya basa lawo,’ lakupha ntsomba kuti atewere Jezu. Pomwe adacita bzimwebzo bzikuwonekeratu kuti angadapitiriza kusamalira mabanja yawo napo kuti akhatewera Jezuyo. Kodi n’ciyani comwe cidawathandiza kuti acinje bzinthu pa moyo wawo? Cinembo ca Luka cimbafotokoza kuti Jezu adacita bzakudabwisa bzomwe bzidathandiza anyakupfunza wace kukhulupira kuti Yahova angadawapasa bzomwe akhafunikira. — Werengani Luka 5:5-11.

11. Kodi tingaphatise tani basa bzomwe bzidaticitikira kuti tilimbise cikhulupiro ca nyakupfunza wathu?

¹¹ Ifepano tingakwanise lini kucita bzakudabwisa ninga momwe Jezu akhacitira koma tingafotokoze nkhani za momwe Yahova ambathandizira wale omwe ambasankhula kumuikha pa mbuto yakuyamba. Kodi imwepo mukukumbukira momwe Yahova adakuthandizirani pomwe mudayamba kugumanika pa mitsonkhano? Pinango mudafunikira kukalewalewa na patrau wanu mucimufotokozera kuti thangwe ranyi mungadaphata lini pomwe basa na nthawe yakuthumizirika bzingadakhala kuti bzimwebzo bzikukutazisani kufika pa mitsonkhano. Fotokozerani nyakupfunza wanu momwe bzimwebzi bzidakuthandizirani kulimbisa cikhulupiro canu pomwe mudawona momwe Yahova adakuthandizirani pa moyo wanu pomwe mudasankhula kumuikha pa mbuto yakuyamba.

12. (a) Thangwe ranyi tin’funika kuyenda na abale wakusiyana-siyana kuti tikacitise pfunziro la Bibliya? (b) Kodi mungaphatise tani basa mavidiyo kuti mupfunzise nyakupfunza wanu mu njira yakubveseseka? Fotokozani.

¹² Nyakupfunza wanu angagumanembo phindu akambabva momwe Akristau winango adacinjira bzinthu pa moyo wawo. Ndipopa mbayendani na abale wakusiyana-siyana pomwe mukuyenda kukacitisa pfunziro la Bibliya. Akumbireni kuti afotokoze momwe adadziwira cadidi na bzomwe adacita kuti aikhe Yahova pa mbuto yakuyamba. Kuthumizira bzimwebzi, mbapambulani nthawe pabodzi na nyakupfunza wanu kuti mumbawone vidiyo zomwe zimbagumanika pa mbali yakuti “Fufudzani Bzinango” ayai “Onani Pomwe Ibzi” mu bukhu lakuti Khalani na Moyo Wakukondwa Mpaka Kale-Kale! Pomwe mukucezerana pfunziro 37 m’bukhuli na kuwona vidiyo yakuti Yahova An’dzatipasa Bzomwe Tikufunikira, cezeranani bza vidiyoyo ndipo thandizani nyakupfunza wanu kuwona kuti Yahova an’dzamuthandiza akasankhula kumuikha pa mbuto yakuyamba.

THANDIZANI NYAKUPFUNZA WANU KUKUNDA MABVUTO

13. Kodi Jezu adakonzekeresa tani anyakupfunza wace pa nkhani yakutsutsidwa?

¹³ Jezu adauza anyakupfunza wace mwakubwereza-bwereza kuti iwo angadadzatsutsidwa na wanthu winango napo na adzinza wawo caiwo. (Mateu 5:11; 10:22, 36) Pomwe zikhadasala ntsiku zing’ono-ng’ono kuti Jezu aphedwe, iye adauza anyakupfunza wace kuti iwo angadadzafika pakuphedwa thangwe ra kutumikira Yahova. (Mateu 24:9; Juwau 15:20; 16:2) Iye adawacenjeza kuti akhafunika kukhala tceru pomwe akhacita basa lakupalizira. Iye adawauza kuti akhafunika lini kunesana na munthu omwe angadatsutsa bzomwe iwo akhakhulupira na kucitambo mphole na bzomwe wanthuwo angadalewa na kucita.

14. Kodi tingathandize tani nyakupfunza wathu kukhala wakukonzeka akadzatsutsidwa? (2 Timotio 3:12)

¹⁴ Ninga Jezu, ifepano tingafotokozere nyakupfunza wathu bzomwe anzace wakubasa, axamwali wace ayai adzinza wace angalewe na kucita thangwe rakuti iye akupfunza Bibliya. (Werengani 2 Timotio 3:12.) Anzace winango wakubasa angayambe kumuseka thangwe ra kuphatisa basa bzomwe iye akupfunza. Napo adzinza wace winango angayambembo kutsutsa bzomwe iye akupfunza m’Bibliya. Ndipopa, mpsabwino kucezerana mwakamfulumize na nyakupfunza wathu bza nkhani yakulewa bza kutsutsidwa. Mwa njira imweyi, iye an’dzadabwa lini bzimwebzi bzikadzamucitikira ndipo an’dzadziwa bzomwe angadzalewe na kucita winango akadzamutsutsa.

15. Kodi mungathandize tani nyakupfunza wa Bibliya kukhala wakukhwimika akatsutsidwa na wanthu wa m’banja mwace?

¹⁵ Pakulewa bza nkhani yakutsutsidwa na adzinza, limbikisani nyakupfunza wanu kuti akumbukire bzomwe bzacitisa kuti adzinza wace akalipe. Pinango Iwo angakumbuke kuti bzomwe Mboni za Yahova zimbapfunzisa mpsakunama nakuti ni wanthu wakuipa. Napo adzinza winango wa Jezu akhakomedwa lini na bzomwe iye akhacita. (Marko 3:21; Juwau 7:5) Na tenepo, thandizani nyakupfunza wanu kupitiriza kukhala wakupirira na kumbalewalewa mwakudeka mtima na wanthu winango kuphatanidzambo adzinza wace.

16. Kodi tingathandize tani nyakupfunza wa Bibliya kufotokoza bzomwe ambakhulupira mu njira yabwino?

¹⁶ Napo kuti adzinza wa nyakupfunza wanu angalatize kuti akufuna kudziwa bzizinji, mpsanzeru lini kwa nyakupfunzayo kufotokoza bzentse kabodzi na kabodzi. Thangwe iye akacita bzimwebzi, bzingawawandire adzinza wacewo ndipo iwo angafune lini kupitiriza na macezayo. Ndipopa thandizani nyakupfunza wanuyo kuti ambafotokoze bzomwe ambakhulupira mu njira yomwe ingacitise wadzinzawo kudzafuna kupitiriza na macezayo pa nthawe inango. (Akolose 4:6) Pinango iye angakumbire adzinza wace kuti apite mu saite ya jw.org. Mwa njira imweyi, iwo angapfunze bzizinji pakulewa bza Mboni za Yahova pa nthawe yomwe akufuna na bzinthu bzomwe angafune kupfunza ayai kuwerenga.

17. Kodi imwepo mungakonzekerese tani nyakupfunza wanu wa Bibliya kuti akwanise kumbatawira mibvunzo yakulewa bza Mboni za Yahova? (Onanimbo cithunzi-thunzi.)

¹⁷ Imwepo mungaphatise basa mbali yakuti “Mibvunzo Yakubvunzidwa Kawiri-kawiri” yomwe iri mu jw.org kuti muthandize nyakupfunza wanu kukonzekera mitawiro yakusaya kunesa pa mibvunzo yomwe angacitidwe na adzinza wace ayai anzace wakubasa. (2 Timotio 2:24, 25) Kuphampha kwa pfunziro liri-lentse mbawonani mbali yakuti “Wanthu Winango Ambalewa Kuti” mu bukhu lakuti Khalani na Moyo Wakukondwa Mpaka Kale-Kale! Thandizani nyakupfunza wanu kumbakonzekera mitawiro na mafala yace-yace. Lekani kuzeza kumuuza bzomwe angacite kuti mitawiro yaceyo ikhale yabwino. Mukacita bzimwebzi, mun’dzamuthandiza kuti ambafotokoze bzomwe ambakhulupira mwakukhwimika.

18. Kodi imwepo mungathandize tani nyakupfunza wanu kuti ambafotokoze bzomwe ambakhulupira mu utumiki? (Mateu 10:27)

¹⁸ Jezu adauza anyakupfunza wace kuti ambapalizire mafala yabwino. (Werengani Mateu 10:27.) Nyakupfunza wathu akayamba kumbapalizira pabodzi na gwere, iye an’dzakwanisa kuwona Yahova akumuthandiza ndipo bzimwebzi bzin’dzacitisa kuti athembe kwene-kwene Yahovayo. Kodi mungathandize tani nyakupfunza wanu kuti cimweci cikhale cakulinga cace? Bzikakhala kuti m’gwere mwaperekedwa cidziwiso ca kampanya ya upalizi, limbikisani nyakupfunza wanu kukumbukira bzomwe angacite kuti athemere kukhala mpalizi. Mufotokozereni momwe bzidakhalira bzakupusa kwa wanthu winango kuyamba kupalizira pa nthawe ya kampanya. Cakulinga cinango comwe angakhale naco ndico kubzinembesa kuti ambacitembo mbali pa mtsonkhano omwe umbacitika pakati pa sumana. Akacita bzimwebzi, iye an’dzapfunza kufotokoza mwakutsimikiza bzomwe ambakhulupira.

LATIZANI NYAKUPFUNZA WANU KUTI MUMBAMUKHULUPIRA

19. Kodi Jezu adalatiza tani kuti akhakhulupira anyakupfunza wace, ndipo tingamutewezerembo tani?

¹⁹ Pomwe Jezu akhanati kuyenda kudzulu, iye adauza anyakupfunza wace kuti angadadzakhala nawo pomwe pabodzi. Iwo alibe kubvesesa kuti Jezu akhalewa bza nkhani yakuti iwo adzayende kudzulu. Napo bziri tenepo, Jezu adawona kukhulupirika kwawo sikuti bzomwe iwo akhapenukira. (Juwau 14:1-5, 8) Iye akhadziwa kuti anyakupfunzawo akhafunikira nthawe kuti abvesese bzinthu bzinango ninga cidikhiro cawo cakudzayenda kudzulu. (Juwau 16:12) Ifepanombo tin’funika kulatiza kuti timbakhulupira kuti nyakupfunza wathu ambafuna kukondwesa Yahova.

20. Kodi mpfumakazi inango ya ku Malawi idalatiza tani kuti ikhakhulupira nyakupfunza wace?

²⁰ Timbapitiriza kukhulupira kuti nyakupfunza wathu akufuna kucita bzinthu bzabwino. Mbatiwoneni bzomwe bzidacitikira mpfumakazi inango ya ku Malawi yakucemeredwa, Chifundo. Iyo idayamba kupfunza Bibliya na tswaka linango lacikatolika lakucemeredwa Alinafe mwakuphatisa basa bukhu lakuti Khalani na Moyo Wakukondwa Mpaka Kale-kale! Pomwe mpfumakazi Chifundo idamala kucezerana pfunziro 14 na nyakupfunza wace, iyo idabvunza nyakupfunza waceyo bza momwe akhawonera nkhani ya kuphatisa basa bzifanikiso pakunamata. Alinafe adakalipa kwene-kwene ndipo adatawira kuti: “Ine ningaphatise basa bzifanikiso ndikafuna!” Mpfumakazi Chifundo idakumbuka kuti pinango pfunziro lawo lingadaimira pamwepo. Tsono iyo idapitiriza kupfunza na Alinafe na cikhulupiro cakuti na kupita kwa nthawe iye angadadzabvesesa nkhaniyo. Pomwe padandopita minyezi pang’ono, mpfumakazi Chifundo idabvunza nyakupfunza wace mbvunzo omwe uli pa pfunziro 34 wakuti: “Kodi bzinthu bzomwe mwapfunza m’Bibliya pakulewa bza Yahova bzakuthandizani tani?” Pakulewa bza momwe Alinafe adatawirira mpfumakazi Chifundo, idalewa kuti: “Iye adafotokoza nfundo zabwino kwene-kwene, ibodzi mwa nfundozo njakuti Mboni za Yahova zimbacita lini bzinthu bzomwe Bibliya limbabverana lini nabzo.” Na kupita kwa nthawe, Alinafe adadzasiya kuphatisa basa bzifanikiso ndipo adadzathemera kubatizidwa.

21. Kodi tingalimbikise tani nyakupfunza wathu kuti asankhule kutumikira Yahova?

²¹ Napo kuti Yahova ndiye omwe “ambakulisa,” ifepano tingathandize nyakupfunza wathu kuti apitirize kukula mwauzimu. (1 Akolinto 3:7) Timbacita bzizinji sikuti kundomupfunzisa bzomwe Mulungu an’funa kuti iye acite. Timbamuthandiza kukulisa lufoyi lace kwa Yahova. Timbamulimbikisambo kuti akulise lufoyiro mwakucinja bzinthu pa moyo wace kuti aikhe Yahova pa mbuto yakuyamba. Ndipo timbamupfunzisambo kuthemba Yahova napo kuti angagumane na mabvuto. Tikambalatiza nyakupfunza wathu kuti timbakhulupira kuti iye akufuna kukondwesa Yahova timbamuthandiza kukhala wakukhwimika acisankhula kutumikira Yahovayo.