NKHANI YAKUPFUNZA 26
NYIMBO 123 Kubvera Mwakukhulupirika Mitemo ya Gulu la Mulungu
Khalani Wakubzicepesa Pakakhala na Bzinthu Bzomwe Mukubvesesa Lini
“Tingakwanise lini kumubvesesa wamphanvu-zentse.” — DJOBI 37:23.
CAKULINGA CA NKHANIYI
Mu nkhani ino, tin’pfunza momwe tingalimbanire na mabvuto na kuikha makumbukidwe yathu pa bzinthu bzomwe timbadziwa na kuthemba Yahova napo kuti tingadziwe lini bzentse bzomwe bzingacitike.
1. Kodi Yahova adatilenga na luso liponi, ndipo thangwe ranyi?
YAHOVA adatilenga na luso lakukumbuka, kupfunza bzinthu bzipsa na kumbaphatisa basa bzinthu bzomwe timbapfunzabzo. Thangwe ranyi iye adatilenga tenepa? Kuti “timudziwe Mulungu” ticikhala na cidziwiso caico. — Mimwani 2:1-5; Aroma 12:1.
2. (a) Kodi n’ciyani comwe ifepano tin’funika kuzindikira? (Djobi 37:23, 24) (Onanimbo cithunzi-thunzi.) (b) Thangwe ranyi bzimwebzi mpsabwino kwa ifepano?
2 N’cadidi kuti Yahova adatilenga na luso lakupfunza, tsono kulewa cadidi ifepano tin’funika kuzindikira kuti pana bzinthu bzizinji bzomwe timbabzidziwa lini. (Werengani Djobi 37:23, 24.) Kumbukirani bzomwe bzidacitikira Djobi. Yahova adamucita mibvunzo mizinji Djobi yomwe idamuthandiza kubvesesa kuti pakhana bzinthu bzizinji bzomwe iye akhabzidziwa lini. Maceza yamweya yadathandiza Djobi kukhala wakubzicepesa na kucinja momwe akhakumbukirira. (Djobi 42:3-6) Mu njira ibodzi-bodziyi, mpsabwino kuti ifepano tikhale wakubzicepesa na kubvuma kuti timbadziwa lini bzinthu bzentse. Na tenepo, tingakhale na citsimikizo cakuti Yahova nthawe zentse an’dzatiuza bzomwe tin’funikira kudziwa kuti ticite bzakusankhula bzabwino. — Mimwani 2:6.
Kubvuma kuti timbadziwa lini bzinthu bzentse n’kwabwino kwa ifepano ninga momwe bzidakhalira na Djobi (Onani ndime 2)
3. Kodi n’ciyani comwe tiniwona mu nkhani ino?
3 Mu nkhani ino, tiniwona bzinthu bzinango bzomwe timbabzidziwa lini na mabvuto yomwe pinango tingagumane nayo thangwe ra kusaya kudziwa bzinthu bzimwebzi. Tiniwonambo kuti thangwe ranyi mpsabwino kusaya kudziwa bzinthu bzinango. Kupfunza nkhani imweyi kunilimbisa cikhulupiro cathu cakuti Yahova, “omwe ambadziwa cinthu ciri-centse,” ambatiuza bzinthu bzomwe tin’funikira kudziwa. — Djobi 37:16.
TIMBADZIWA LINI POMWE CIMALIZIRO CIN’DZAFIKA
4. Mwakubverana na Mateu 24:36, kodi ni cinthu cibodzi ciponi comwe ifepano timbacidziwa lini?
4 Werengani Mateu 24:36. Ifepano timbadziwa lini kuti ni lini pomwe dzikoli lin’fika kuphampha. Napo pomwe Jezu akhali pa dziko la pantsi, iye akhadziwa lini bza “ntsikuyo na nthawe yace.”a Na kupita kwa nthawe, iye adafotokozera apostolo wace kuti Yahova omwe ni “mwenekaciro wa nthawe,” adakhazikisa nthawe yomwe bzinthu bzinango bzingadadzacitika. (Mabasa 1:6, 7) Yahova adakhazikisa nthawe yomwe dzikoli lin’dzafika kuphampha tsono ifepano tingakwanise lini kudziwa kuti ni lini pomwe bzimwebzi bzin’dzacitika.
5. Pakuti timbadziwa lini ntsiku yomwe cimaliziro cin’dzafika, kodi bzimwebzi bzingaticitise kuti tibzibve tani?
5 Mwakubverana na bzomwe Jezu adalewa, ifepano timbadziwa lini kuti tin’funika kudikhirira kwa nthawe ikulu tani cimaliziro cikanati kufika. Na thangwe limweri, ifepano pinango tingasiye kupirira ayai tingasuname maka-maka tikakhala kuti tikudikhirira ntsiku ya Yahova kwa nthawe itali. Ndipo bzingakhalembo bzakunesa bzikakhala kuti adzinza wathu ayai wanthu winango akutiseka thangwe rakuti cimaliziro cikanati kufika. (2 Pedru 3:3, 4) Pinango tingakumbuke kuti bzingadakhala bzakupusa kupirira bzomwe wanthu winango ambatilewa bzingadakhala kuti timbadziwa bza ntsiku caiyo yomwe cimaliziro cin’dzafika.
6. Thangwe ranyi mpsabwino kusaya kudziwa kuti ni lini pomwe cimaliziro cin’dzafika?
6 Kulewa cadidi, thangwe ra Yahova kusaya kutiuza bza ntsiku ya cimaliziro kumbatipasa mpata wakulatiza kuti timbamutumikira thangwe rakuti timbamufuna na kumukhulupira. Ifepano timbafuna kutumikira Yahova mpaka kale-kale sikuti mpaka cimaliziro basi. M’mbuto mwa kumbakumbukira kwene-kwene kuti ni lini pomwe “ntsiku ya Yahova” in’dzafika, bzomwe tingacite ni kumbakumbukira bzinthu bzabwino bzomwe bzin’dzacitika ntsikuyi ikadzafika. Kucita bzimwebzi kun’dzatithandiza kufendererana na Yahova, kuthumizira cikhulupiro cathu na kucita bzentse bzomwe tingakwanise kuti timukondwese. — 2 Pedru 3:11, 12.
7. Kodi ni bzinthu bziponi bzomwe timbadziwa?
7 Mpsabwino kukumbukira bzomwe timbadziwa bzakuti ntsiku zakumalizira zidayamba mu 1914. Yahova adatipasa maprofesiya ya m’Bibliya yomwe yambandolatiza lini basi bza gole limweri koma yambafotokozambo bzomwe bzingadadzacitika kuyambira mu gole la 1914. Na tenepo, ifepano tina citsimikizo cakuti “ntsiku ikulu ya Yahova iri pafupi.” (Zefaniya 1:14) Ndipo timbadziwambo basa lomwe Yahova akufuna kuti ticite lomwe ni kupalizira “mafala yabwino ya Umambo” kwa wanthu azinji. (Mateu 24:14) Mafala yamweya yakupaliziridwa m’bzigawo na madziko pafupi-fupi 240 m’bzirewedwe bzakupitirira 1000. Kuti ticite basali na nyongo bzimbathemba lini kudziwa “ntsiku na nthawe” yomwe cimaliziro cin’dzafika.
TIMBADZIWA LINI MOMWE YAHOVA ANGACITIRE BZINTHU
8. Kodi mafala yakuti “basa la Mulungu wacadidi” yambathandauza ciyani? (Mpalizi 11:5)
8 Ni nthawe lini zentse zomwe timbadziwa “basa la Mulungu wacadidi.” (Werengani Mpalizi 11:5.) Mafala yamweya yakuthandauza bzomwe Yahova ambacita na bzomwe ambalekerera kuti bzicitike kuti akwanirise cakulinga cace. Ifepano timbadziwa lini mathangwe yentse yomwe yambacitisa Yahova kulekerera kuti cinthu cinango cicitike ayai momwe iye an’dzacitira bzinthu kuti atithandize. (Salimo 37:5) Bibliya limbandendemezera kusaya kudziwa kwathu “basa la Mulungu wacadidi” na kusaya kubvesesa momwe mwana ambakulira akakhala kuti ali m’mimba. Napo masiyentista yambabvesesambo lini momwe bzimwebzi bzimbacitikira. Mwa njira ibodzi-bodziyi, ifepano timbakwanisa lini kubvesesa bwino-bwino momwe Yahova ambacitira bzinthu.
9. Pakuti timbadziwa lini momwe Yahova an’dzacitira bzinthu, n’ciyani comwe cingacitike?
9 Thangwe ra kusaya kudziwa momwe Yahova angadzacitire bzinthu kuti atithandize, pinango tingayambe kuzeza kucita bzakusankhula bzinango. Pinango tingacite mantha kubvuma kuluza bzinthu bzinango kuti ticite bzizinji pakutumikira Yahova ninga kukhala na moyo wakusaya kufuna bzizinji ayai kuyenda ku mbuto komwe kukufunikira apalizi azinji. Ifepano tingayambe kukumbuka kuti Yahova akutisimba lini tikatazira kukwanirisa bzakulinga bzathu, tikasaya kugumana munthu kuti tipfunze naye Bibliya ayai tikagumana na mabvuto pa basa linango lomwe tikucita mu gulu lace.
10. Kodi ni makhalidwe yaponi yomwe tingayakulise thangwe ra kusaya kudziwa momwe Yahova an’dzacitira bzinthu?
10 Kusaya kudziwa momwe Yahova angacitire bzinthu, kumbatithandiza kukulisa makhalidwe ninga kubzicepesa na kuzindikira malire yathu. Timbakwanisa kuwona kuti Yahova ambadziwa bzomwe mpsabwino. (Zaiya 55:8, 9) Kuthumizira bzimwebzi, timbalimbisa cikhulupiro cathu kwa Yahova ndipo timbapfunza kumuthemba kuti bzinthu bzitifambire bwino pa moyo wathu. Tikagumana phindu mu upalizi ayai pa basa lomwe tikucita m’gulu lace, ifepano timbapereka ulemerero bwentse kwa Yahova. (Salimo 127:1; 1 Akolinto 3:7) Ndipo bzinthu bzikasaya kucitika ninga momwe tikhadikhirira tin’funika kukumbukira kuti Yahova ambawona bzinthu bzentse. (Zaiya 26:12) Ifepano timbacita mbali yathu ndipo timbakhulupirambo kuti Yahova an’dzacitambo mbali yace. Tina citsimikizo centse cakuti iye an’dzatitsogolera napo acisaya kucita bzimwebzo mu njira yakudabwisa ninga momwe akhacitira kale-kale. — Mabasa 16:6-10.
11. Kodi ni bzinthu bziponi bzakufunika bzomwe timbadziwa pakulewa bza Yahova?
11 Ifepano timbadziwa kuti Yahova nthawe zentse ngwalufoyi, ngwakulungama na wanzeru. Ndipo cinthu cibodzi comwe tin’funika kukumbukira n’cakuti Yahova ambawona bzomwe timbamucitira na bzomwe timbacitirambo abale na mpfumakazi zathu. Ndipo tikupenukira lini kuti Yahova nthawe zentse ambasimba wale omwe mbakukhulupirika kwa iye. — Ahebereu 11:6.
TIMBADZIWA LINI BZOMWE BZIN’DZACITIKA MANGWANA
12. Mwakubverana na Tiyago 4:13, 14, kodi n’ciyani comwe tentsenefe timbadziwa lini?
12 Werengani Tiyago 4:13, 14. Kulewa cadidi, tentsenefe timbadziwa lini momwe moyo wathu un’dzakhalira mangwana. Mu dziko lomwe tikukhala lino “bzinthu bzakusaya kudikhiririka” bzingaticitikire. (Mpalizi 9:11) Thangwe ra bzimwebzi, ifepano timbadziwa lini penu tin’dzakwanisa kucita bzinthu bzomwe tikufuna kudzabzicita ayai penu tin’dzapitiriza kukhala na moyo kuti tidzabzikwanirise.
13. Kodi tingabzibve tani thangwe ra kusaya kudziwa bzinthu bzentse bzomwe bzin’dzacitika kutsogolo?
13 Kusaya kudziwa momwe bzinthu bzin’dzakhalira pa moyo wathu kungacitise kuti bzikhale bzakunesa kupirira. Mwa njira iponi? Kucita thupo na bzomwe bzin’dzaticitikira mangwana kungaticitise kuti tileke kukhala wakukondwa. Mwadzidzidzi bzinthu bzingacinje pa moyo wathu ndipo bzimwebzi bzingatisunamise. Ndipo bzinthu bzikasaya kucitika ninga momwe tikhadikhirira, ifepano tingasuname. — Mimwani 13:12.
14. Kuti tikhale wakukondwa bzimbathemba ciyani? (Onanimbo bzithunzi-thunzi.)
14 Tikakhala tikugumana na mabvuto, ifepano timbakhala na mwayi wakulatiza kuti bziribe basa bzomwe bzingacitikebzo, ifepano timbatumikira Yahova thangwe ra lufoyi sikuti thangwe ra dyera. Bibliya limbalatiza kuti ifepano tin’funika lini kudikhirira kuti Yahova atikhotcerere ku mabvuto yentse. Ndipo iye alibe kunemberatu bzomwe bzin’dzaticitikira pa moyo wathu. Yahova akudziwa kuti ifepano tikhale wakukondwa bzimbathemba lini kudziwa bzentse bzomwe bzin’dzacitika kutsogolo. Koma cadidi n’cakuti kuti tikhale wakukondwa tin’funika kutsogoleredwa na Yahova na kubvera malamulo yace. (Jeremiya 10:23) Tikabvuma thandizo la Yahova pomwe tikusankhula bzakucita, ifepano tin’dzacita lini thupo na bzomwe bzin’dzacitika mangwana. Bzin’dzakhala ninga tikulewa kuti: “Yahova akafuna, tin’dzakhala na moyo ndipo tin’dzacita ibzi na bzire.” — Tiyago 4:15.
Tikabvuma kutsogoleredwa na Yahova na kumubvera timbakhala wakukhotcerereka (Onani ndime 14-15)b
15. Kodi n’ciyani comwe timbadziwa pakulewa bzakutsogolo?
15 N’cadidi kuti tikudziwa lini bzomwe bzin’dzacitika kutsogolo koma tikudziwa kuti Yahova adatipicira moyo wakusaya kumala. Winango an’dzatambira moyo umweyu kudzulu ndipo winango an’dzautambira pa dziko la pantsi. Timbadziwambo kuti Yahova anganame lini ndipo palibe comwe cingamutazise kukwanirisa bzomwe adapicira. (Tito 1:2) Iye ndiye yekha ‘omwe ambalewa bza cimaliziro kuyambira pa ciyambi. Kuyambira kale-kale ambalewa bzinthu bzomwe bzikanati kucitika.’ Bzinthu bzomwe Yahova adalewa kuti bzingadacitika m’mbuyomu bzidacitikadi ndipo bzentse bzomwe iye adalewa kuti bzin’dzacitika kutsogolo bzin’dzacitikadi. (Zaiya 46:10) Ndipo tina citsimikizo cakuti palibe cinthu comwe cingatazise Yahova kutifuna. (Aroma 8:35-39) Bziribe basa bzomwe bzingaticitikire pa moyo wathu, Yahova an’dzatipasa nzeru, mtsangalazo na mphanvu zomwe tikufunikira kuti tipirire. Timbapenukira lini kuti Yahova an’dzatithandiza na kutisimba. — Jeremiya 17:7, 8.
TIMBAKWANISA LINI KUBVESESA MOMWE YAHOVA AMBATIDZIWIRA
16. Kodi n’ciyani comwe Yahova ambadziwa pakulewa bza ifepano comwe tingakwanise lini kucibvesesa bwino-bwino? (Salimo 139:1-6)
16 Werengani Salimo 139:1-6. Mulengi wathu ambadziwa bzentse pakulewa bza ifepano. Iye ambadziwa bzomwe timbakumbuka na momwe timbabvera. Iye ambadziwa bzomwe timbalewa na bzomwe bziri mu mtima mwathu. Iye ambadziwambo bzomwe timbacita na thangwe lomwe limbaticitisa kucita bzimwebzo. Napo Mambo Davide adalatiza kuti Yahova ali tceru kuti atithandize pa cinthu ciri-centse. Kodi mumbabzibva tani thangwe ra kudziwa kuti Yahova omwe ni Mulengi wa cirengedwe centse ambacita thupo tenepa na m’bodzi na m’bodzi wa ifepano? Kodi mpsakulimbikisa lini? Davide adalewa kuti: “Kwa inepano mpsakunesa kwene-kwene kubvesesa bzinthu bzimwebzi. Mpsapadzulu kwene-kwene mwakuti ningabzifikire lini.” — Salimo 139:6.
17. Thangwe ranyi bzingakhale bzakunesa kwa ifepano kubvuma kuti Yahova ambatidziwa bwino-bwino?
17 Thangwe ra momwe tidaleredwera, cirewedwe cathu ayai thangwe ra bzomwe tikhakhulupira pomwe tikhanati kupfunza cadidi, bzingakhale bzakunesa kuwona Yahova ninga Pai omwe ana lufoyi kwene-kwene ndipo ambacita nafe thupo. Ayai pinango tingakumbuke kuti pikado zomwe tidacita m’mbuyo n’zakuipa kwene-kwene mwakuti Yahova angafune lini kukhala xamwali wathu ndipo iye ali kutali na ifepano. Ndipo napo Davide akhabzibvambo tenepo. (Salimo 38:18, 21) Napo munthu omwe akucita nyongo yakukondwesa Yahova angabzibvunze kuti: ‘Penu Mulungu ambandidziwa thangwe ranyi iye akufuna kuti ndisiye bzinthu bzomwe bzimbawoneka kuti mpsabwino kwa inepano?’
18. Thangwe ranyi mpsabwino kubvuma kuti Yahova ambatidziwa kuposa momwe ifepano timbabzidziwira tekha? (Onanimbo bzithunzi-thunzi.)
18 Mpsakufunika kudziwa kuti Yahova ambatidziwa bwino kuposa momwe ifepano timbabzidziwira. Iye ambawona bzinthu bzabwino kwa ifepano bzomwe tingakwanise lini kubziwona. Napo kuti Yahova ambawona bzakuphonya bzathu, iye ambadziwa nyongo yomwe tikucita kuti tikhale wanthu wabwino ndipo ambatifuna kwene-kwene. (Aroma 7:15) Tikazindikira kuti Yahova nthawe zentse angawone mtundu wa munthu omwe tingakhale bzimwebzi bzin’dzatipasa mphanvu zomwe tikufunikira kuti timutumikire mwakukhulupirika na mwakukondwa.
Tikakhala tikugumana na mabvuto yakusaya kudikhiririka Yahova ambatithandiza kulimbisa cikhulupiro cathu pa mapiciro yace yakulewa bzakutsogolo (Onani ndime 18-19)c
19. Kodi n’ciyani comwe timbadziwa pakulewa bza Yahova?
19 Ifepano timbadziwa kuti Yahova ni lufoyi. Ndipo timbapenukira lini bzimwebzi. (1 Juwau 4:8) Timbadziwa kuti bzentse bzomwe ambatikumbira kuti ticite thangwe ra kuti ambatifuna ndipo ambafuna kuti bzinthu bzitifambire bwino. Ndipo timbadziwambo kuti Yahova akufuna kuti tidzatambire moyo wakusaya kumala. Kuti bzimwebzi bzikwanisike, iye adatipasa cakulombolera. Mphaso imweyi imbatilimbikisa kuti napo kuti ndife wanthu wakuperewera, ifepano tingakwanise kukondwesa Yahova. (Aroma 7:24, 25) Timbadziwa kuti “Mulungu ni mkulu kuposa mitima [yathu] ndipo iye ambadziwa bzinthu bzentse.” (1 Juwau 3:19, 20) Yahova ambadziwa bzinthu bzentse pakulewa bza ifepano ndipo iye ana citsimikizo cakuti ifepano tin’dzakwanisa kucita bzentse bzomwe ambatikumbira.
20. Thangwe ranyi tin’funika lini kucita thupo kwene-kwene na bzomwe timbadziwa lini?
20 Yahova ambatiuza bzentse bzomwe ifepano timbafunikira kudziwa. Tikazindikira malire yathu na kubvuma bzimwebzo tin’dzacita lini thupo kwene-kwene na bzomwe timbabzidziwa lini. M’mbuto mwace timbaikha makumbukidwe yathu pa bzinthu bzomwe mpsakufunika. Tikacita tenepo tin’dzalatiza kuti ndife wakubzicepesa ndipo timbathemba Yahova, “ule omwe ambadziwa bzinthu bzentse.” (Djobi 36:4) N’cadidi kuti pana bzinthu bzinango bzomwe tingakwanise lini kubzibvesesa tsapano, tsono timbadziwa kuti Yahova an’dzapitiriza kutipfunzisa mpaka kale-kale. Ndipo bzimwebzi mpsabwino kwene-kwene thangwe cipo ticidzasiya kupfunza bza Mulungu wathu wabwino Yahova. — Mpalizi 3:11.
NYIMBO 104 Mzimu Wakucena ni Mphaso ya Mulungu
a Jezu ndiye omwe an’dzatsogolera nkhondo ya Armagedo pa kudzapfudza dziko lakuipa la Sathaniri. Na tenepo, tsapano tingatsimikizire kuti Jezu ambadziwa ntsiku yomwe Armagedo in’dzacitika na pomwe “an’dzakunda nkhondoyo.” — Apokalipse 6:2; 19:11-16.
b BZOMWE BZIKUCITIKA PA CITHUNZI-THUNZI: Pai na mwana akuikha bzinthu m’pasta bzomwe bzingadzawathandize pakadzacitika bzinthu bzakusaya kudikhiririka.
c BZOMWE BZIKUCITIKA PA CITHUNZI-THUNZI: M’bale omwe akugumana na mabvuto akukumbukira momwe an’dzakhalira wakukondwa mu dziko lipsa.