Mubaghile Ukuya Nulutengano Pakabalilo ka Ndamyo

1. Ngimba “ulutengano lwa Kyala” findu fiki kangi tukusayiwa bulebule panongwa yakuya nalo? (Bafilipi 4:6, 7)

LULIPO ulutengano lumo ulu abandu ba nkisu iki bakalumanya. Ulu lo “lutengano lwa Kyala,” ulu tukuya nalo panongwa yakuya pabumanyani ubununu na Tata witu wakumwanya. Linga tuli nulutengano lwa Kyala, tukuya bakufighililiwa. (Belenga Bafilipi 4:6, 7.) Tukuhoboka ukuya pabumanyani na bandu aba banganile Kyala. Kangi tukuhoboka ukuya pabumanyani ubwamaka na “Kyala walutengano.” (1 Tes. 5:23) Linga tummenye kanunu, tukunsubila nukumpilikila Tata witu, ulutengano lwa Kyala lubaghile ukututula ukuti tungatamiwagha naminong’ono linga tukwaghana ni ndamyo.

2. Nongwa yafiki tuli nulusubilo ukuti tubaghile ukuya nulutengano lwa Kyala?

² Ngimba sibaghile ukubombiwa ukulwagha ulutengano lwa Kyala linga tukwaghana ni ndamyo bo ukupalamasiwa nimbungo syakwambukila, ingozi sya kipeliwa, ifyamiywegho pamo ukufwimiwa? Ifyakubombiwa bo ifi fibaghile ukutupangisya ukuya nubogha. Loli Yesu abapele ubulongosi abafundiwa bake ubwakuti: “Mungalalamukagha indumbula syinu kangi munganyololokagha.” (Yoh. 14:27) Mwalusekelo, abakamu na balumbu bikukonga ubulongosi bwa Yesu ubu. Nubutuli bwa Yehova, abene bikufwanisya ukulwagha ulutengano nukwifimbilisya ku ndamyo isyakukindanakindana.

MUNO TUBAGHILE UKUYILA NULUTENGANO LINGA TUPALAMASIWE NIMBUNGO SYAKWAMBUKILA

3. Ngimba imbungo yakwambukila yibaghile ukutupangisya bulebule ukuti tungayagha nulutengano?

³ Imbungo yakwambukila yibaghile ukuchenja ifindu pa bumi bwitu. Inong’onela muno imbungo ya COVID-19 yabapalamasyile abandu bingi. Abakufufuza bamo batile abandu bingi bayobile ukuti bikutamiwa ukughona utulo pakabalilo ka mbungo iyi. Pakabalilo ka mbungo iyi, abandu bingi bikutamiwa naming’ono, bikunwa fiyo ubwalwa, imikota iyakusyutisya ubongo, bikwaghana nifyankhaza kangi bikwighogha. Linga kuno mukwikala kuli imbungo yakwambukila, ngimba findu fiki fibaghile ukubatula ukuti mungatamiwagha naminong’ono nukuhoboka nulutengano lwa Kyala?

4. Nongwa yafiki ukumanya ubusololi bwa Yesu ubwa mmasiku ghakubumalikisyo bukutupa ulutengano?

⁴ Yesu ayobile ngani ukuti mmasiku ghakubumalikisyo, kwisakuyangako imbungo imbela filalilali, “mbuyo bu bwingi.” (Luka 21:11) Ngimba ukumanya isi kukututula bulebule ukuya nulutengano? Tutikuswigha ni mbungo syakwambukila. Tukumanya ukuti ifindu ifi fikubombiwa ukufwana namuno Yesu ayobile. Yonongwa yake tukukonga ubulongosi bwa Yesu ubu ababulile abandu aba bikwikala mmasiku ghakubumalikisyo ukuti: “Mungisakunyomokagha.”​—Mat. 24:6.

5. (a) Ukufwana na Bafilipi 4:8, 9, ngimba tukulondiwa ukusuma isyafiki ndwiputo linga twaghene ni ndamyo iya mbungo yakwambukila? (b) Ngimba ukupilikisya inkhani sya mu Baibolo isyakujambula kukubakasya bulebule?

⁵ Imbungo yakwambukila yibaghile ukutupangisya ukuti tupasyeghe kangi tuye nubogha. Isi syo syabombiwe ku mulumbu Desi.b Bo jomba wake, untani na dokotala bafwile panongwa ya COVID-19, umwene atilagha ukuti ikuya pakwambula imbungo iyi nukumwambukisya mama wake uyu ali nkangale. Panongwa ya mbungo iyi, apasyagha ukuti imbombo yikuya pakumalika kangi akamenye muno ayagha pakusyaghila indalama isyakuti uleghe ifyakulya nukulipila inyumba. Umwene apasyagha fiyo na isi kangi atoliwagha nukughona utulo. Loli Desi alwaghile kangi ulutengano. Bulebule? Iputagha kwa Yehova ukuti antule ukuya mololo nukuya naminong’ono amanunu. (Belenga Bafilipi 4:8, 9.) Apilikisyagha isi Yehova “ambulagha” ukwendela mu nkhani sya mu Baibolo isyakujambula. Umwene atile, “Ifundo sya nkamu uyu ayobagha inkhani, syalindulile ukuti ningatamiwagha naminong’ono kangi syangumbusyagha ukuti Yehova ikumbasikisya.”​—Sal. 94:19.

6. Ngimba ukumanyila Ibaibolo kwa pamwibene ningomano fikubatula bulebule?

⁶ Pakabalilo ka mbungo yakwambukila, utubalilo twingi tutikufwanisya ukubomba ifindu fyosa ifi twabombagha kunyuma. Loli mutikulondiwa ukwitikisya ukuti fibatolesye ukumanyila Ibaibolo kwa pamwibene nukubungana. Isi bamo balyaghene nasyo pa bumi bwabo, isi sikwaghiwa mu mabuku ghitu na mmavidiyo, sibaghile ukubakumbusya ukuti abakamu na balumbu bikukindilila ukunangisya ubusubiliwa nalinga ukuti bikwaghana ni ndamyo isyakufwana itolo na isi mukwaghana nasyo. (1 Pet. 5:9) Ingomano sya kipanga sikuya pakubatula ukuti mwinong’oneleghe ifundo isyakukasya isi sikwaghiwa mu Baibolo. Sikuya pakubapa kangi ulusako ulwakuti mubakasye abangi kangi nanumwe mukuya pakukasiwa. (Rom. 1:11, 12) Bo mukwinong’onela isya muno Yehova ikubatulila ababombi bake linga babinile, bali nubogha pamo bali bene, ulwitiko lwinu lukuya pakukasiwa fiyo nukuya nulusubilo ukuti nanumwe ikuya pakubatula.

7. Ngimba mukumanyilako isyafiki ku ntumiwa Yohani?

⁷ Mwiyipeghe ukuti muyobesanieghe na bakamu na balumbu binu. Pakabalilo ka mbungo yakwambukila tukulondiwa ukukindilila ukwikala pabutali na bangi nalinga tuli na Bakristu abinitu. Pakabalilo bo aka, tubaghile ukwipilika bo muno alipilikile untumiwa Yohani. Umwene alondagha ukwakwaghana nummanyani wake Gayi maso na maso. (3 Yoh. 13, 14) Loli Yohani asimenye ukuti kwa kabalilo atikuya pakwaghana nawe. Yonongwa yake abombile isi abaghile ukufwanisya; umwene alindembile kalata Gayi. Linga mutikufwanisya ukubendela abakamu na balumbu maso na maso, mughelegheleghe ukubimbila ifoni pamo ukubatumila imeseji. Linga mukuyobesania na Bakristu abininu, mukuya pakuya bakufighililiwa kangi balutengano. Mubimbileghe abakulumba bakipanga linga mukutamiwa naminong’ono kangi mukongeghe ubulongosi ubu bikubapa mwalughano.​—Yes. 32:1, 2.

MUNO TUBAGHILE UKUYILA NULUTENGANO LINGA TWAGHENE NINGOZI SYAKIPELIWA

8. Ngimba ingozi syakipeliwa sibaghile ukusofania bulebule ulutengano lwinu?

⁸ Linga mwaghenepo ni ndamyo iyakuteka kwa misi, mubaghile ukutamiwa naminong’ono kwa kabalilo akatali. Linga unkamu winu afwile pamo inyumba nakatundu winu fyalyonangike, mubaghile ukuya nikitima pamo ukukalala. Isi sitikusanusya ukuti mufighanile ifindu fya kumbili pamo mukaya nulwitiko. Pakabalilo aka mukuya mu ndamyo kangi bamo babaghile ukuketa ukuti mutikubomba kanunu ifindu. (Jobu 1:11) Loli nalinga sili bo ulu, mubaghile ukukindilila ukuya nulusekelo. Bulebule?

9. Ngimba Yesu ayobile isyafiki ukuti twitendekesye ku ngozi syakipeliwa?

⁹ Tukumbukeghe isi Yesu ayobile ngani ukuti sisakubombiwa. Abandu bamo bikwinong’ona ukuti batikuya pakwaghana ningozi syakipeliwa. Loli tusimenye ukuti ingozi syakipeliwa sikuya pakukindilila ukubombiwa nkabalilo aka. Yesu ababulile abafundiwa bake ukuti “utusenyenda utukulumba” ningozi isingi isyakipeliwa fikuya pakukindilila pakubombiwa bo ubumalikisyo bukali ukufika. (Luka 21:11) Kangi ayobile ngani ukuti ifindu ifibibi ‘fisakongelelagha’ ukubombiwa amasiku agha. Mwakifwanikisyo, tukuketa ifindu ifibibi nifyankhaza fikubombiwa. (Mat. 24:12) Yesu akayobile ukuti ifindu ifi fisakubapalamasya abandu bene aba bandekile Yehova. Kangi ababombi ba Yehova bingi bikwaghana ningozi syakipeliwa. (Yes. 57:1; 2 Kor. 11:25) Yehova akabaghila ukutufighilila mwakuswighisya ku ngozi syakipeliwa loli umwene ikuya pakutupa kilikyosa iki tukulondiwa ukuti tukindilile ukuya bololo kangi balusekelo.

10. Nongwa yafiki ukwitendekesya lino ku ngozi syakipeliwa kukunangisya ukuti tuli nulusubilo? (Isya Mbupingamu 22:3)

¹⁰ Kubaghile ukuya kupepe ukukindilila ukuya bololo linga twitendekisye ingozi syakipeliwa isi tukaghulilagha ukuti sikuya pakubombiwa. Loli ngimba ukwitendekesya kukunangisya ukuti tukaya nulwitiko kwa Yehova? Hayi. Ukwitendekesya kukunangisya ukuti tuli nulwitiko myake ukuti ikuya pakutufighilila. Bulebule? Amasyu gha Kyala ghikutukasya ukuti twitendekesyeghe ku ngozi syakipeliwa. (Belenga Isya Mbupingamu 22:3.) Kangi ukwendela mu nkhani sya mmagazini, ingomano sya kipanga na bakalata, igulu lya Yehova likutukumbusya mwakwandisania ukuti twitendekesyeghe ku ngozi syakipeliwa.c Ngimba tukunsubila Yehova? Linga tukunsubila, tukuya pakukonga ubulongosi ubu lino—bo ingozi syakipeliwa sikali ukubombiwa.

11. Ngimba tukumanyilako isyafiki kwa Margaret?

¹¹ Inong’onela isi alyaghene nasyo umulumbu Margaret. Umwene abuliwe ukuti asame kuno ikalagha panongwa yakuti kwalyakile umoto ku kighaba iki ikalagha. Panongwa yakuti abandu bingi balyandile ukubopa pakabalilo kamokene, amagalimoto ghali mingi mu nsebo kangi akalipo uyu afwanisyagha ukukinda nukubuka nkyeni. Ilyosi lyali lingi fiyo kangi Margaret akalondagha ukuyileka igalimoto yake. Loli aponile panongwa yakuti alitendekisye. Umwene asungile amapu nkakwama kake akanandi agha ghalintulile ukuyagha injila iyakuti asokeko ku kighaba kila. Amenye kuno alondiwagha ukubuka linga kubombiwe ingozi isi akaghulilagha ukuti sikuya pakubombiwa. Panongwa yakuti alitendekisye, Margaret aponile pa ngozi iyi.

12. Nongwa yafiki tukukonga ubulongosi pa ngozi syakipeliwa?

¹² Ukuti tufighililiwe ku ngozi syakipeliwa abakulumba ba boma babaghile ukutubula ukuti tukonge ubulongosi ubu bubaghile ukututula. Abandu bamo batikupilikila ubulongosi ubu panongwa yakuti batikulonda ukufileka ifindu fyabo. Ngimba Abakristu bikubomba bulebule? Ibaibolo likutubula ukuti: “Panongwa ya Yehova amulambeghe kubalaghili bosa nalinga yo Kaisari papo yo wapamwanya nalinga ko ku balindililakisu papo bo aba abatumile.” (1 Pet. 2:13, 14) Igulu lya Kyala lyope likutupa ubulongosi ukuti bututule. Utubalilo tosa tukukumbusiwa ukubapa inambala abakulumba bakipanga iyi babaghile ukutwimbila linga twaghene ni ngozi syakipeliwa. Ngimba mubapele abakulumba inambala yinu? Tubaghile kangi ukwambilila ubulongosi ubwakuno tubaghile ukubuka, pamo ukusoka, ukwambilila ifindu ifyakulondiwa pa bumi bwitu pamo muno tubaghile ukubatulila abangi. Linga tutoliwe ukupilikila, tubaghile ukubika ubumi bwitu nubwa bakulumba pa ngozi. Tukumbukeghe ukuti abanyambala abasubiliwa aba bikuyilindilila imyoyo yinu. (Hib. 13:17) Margaret atile, “Ngusubila ukuti ukukonga ubulongosi bwa bakulumba nu bwa gulu bundulile fiyo pa bumi bwangu.”

13. Ngimba findu fiki fyabatulile Abakristu bingi aba basamile ku malo aghangi ukuti baye balusekelo kangi balutengano?

¹³ Abakamu na balumbu bingi aba batulekile utwaya twabo panongwa ya ngozi syakipeliwa, ubwite pamo ifyamiywegho bikughelaghela ukwisibila amalo aghakihesya nukwiyipa pakumbombela Yehova. Mwakufwana itolo na Bakristu bakunyuma aba babopile ku malo aghangi panongwa yakufwimiwa, bakindililagha “ukufumusya amasyu amanunu.” (Imbo. 8:4) Ukufumusya kwabatulagha ukuti binong’oneleghe fiyo isya Bunyafyale mmalo mwa ndamyo isi baghanagha nasyo. Ifyakukongapo fyake, abene bakindilile ukuya balusekelo kangi bali nulutengano.

MUNO TUBAGHILE UKUYILA NULUTENGANO LINGA TUKUFWIMIWA

14. Ngimba ukufwimiwa kubaghile ukusofania bulebule ulutengano lwitu?

¹⁴ Linga tukufwimiwa, tubaghile ukonanga ifindu fingi ifi fikututula ukuti tuye bololo. Tukuhoboka fiyo linga twaghene pampene, tukufumusya nukubomba ifindu kisita kutila ukupinyiwa. Linga tutikufwanisya ukubomba ifindu ifi, tubaghile ukutamiwa aminong’ono nukutila ifindu ifi fikuya pakubombiwa nkyeni. Kukaya kubibi ukwipilika bo ulu. Loli tukulondiwa ukuya maso. Yesu ayobile ukuti ukufwimiwa kukubapangisya abafundiwa bake ukuti batamiweghe. (Yoh. 16:1, 2) Ngimba tubaghile ukukindilila bulebule ukuya nulutengano linga tukufwimiwa?

15. Nongwa yafiki tutikulondiwa ukutila ukufwimiwa? (Yohani 15:20; 16:33)

¹⁵ Amasyu gha Kyala ghikuti: “Bosa aba bikulonda ukuya nu bumi bwa kuntila Kyala mwa Kristu Yesu, bo bisakufwimiwagha.” (2 Tim. 3:12) Unkamu Andrei atamiwagha fiyo ukwitikisya ukuti ababombi ba Yehova bikuya pakufwimiwa linga imbombo iyakufumusya yikanisiwe nkisu kyabo. Umwene inong’onagha ukuti: ‘Abaketi ba Yehova baliko bingi fiyo nkisu kyabo. Ngimba abakulumba ba boma babaghile ukutupinya bulebule twesa?’ Loli mmalo mwakuti Andrei aye nulutengano, ukwinong’ona bo ulu kwalimpangisye ukuti atamiweghe fiyo naminong’ono. Abakamu abangi bansubilagha fiyo Yehova kangi bakalinong’winepo ukuti bakabaghila ukupinyiwa. Abene basimenye ukuti babaghile ukupinyiwa loli bakatamiwagha fiyo aminong’ono bo Andrei. Yonongwa yake achenjile akayilo kake nukwanda ukunsubila fiyo Yehova. Bo akabalilo kakindilepo, Andrei alyandile ukuya walusekelo nalinga ukuti aghanagha ni ndamyo nyingi. Isi sibaghile ukubombiwa na kumyitu. Bo Yesu ikuyoba ukuti twitendekesyeghe ukufwimiwa, atusimikisyile kangi ukuti tubaghile ukukindilila ukuya basubiliwa.​—Belenga Yohani 15:20; 16:33.

16. Ngimba bulongosi buliku ubu tukulondiwa ukupilikila linga tukufwimiwa?

¹⁶ Linga imbombo yitu iyakufumusya yikanisiwe, tubaghile ukwambilila ubulongosi ukufuma ku ofesi na ku bakulumba bakipanga. Isi sikututula ukuti tuye bakufighililiwa, twambilileghe ifyakulya fyamwambepo kangi tukindilileghe ukufumusya muno tubaghile ukufwanisyila. Mughelegheleghe ukupilikila ubulongosi ubu mukwambilila nalinga ukuti mutikubupilikisya kanunu. (Yak. 3:17) Kangi mungayobagha inkhani syakisisi isyakufwana na bakamu na balumbu bitu bamo isi tukubomba kungomano ku bandu aba batikulondiwa ukumanya.​—Ndumbi. 3:7.

17. Mwakufwana itolo na batumiwa, ngimba tukukasiwa ukubomba isyafiki?

¹⁷ Ikifukwa kimo ikinywamu iki Setano ikulimbana na babombi ba Kyala kyo kyakuti abene “bikusikonga ingomelesyo sya Kyala nukunsisimikisya Yesu.” (Ubuset. 12:17) Mungitikisyagha ukuti Setano ni kisu kyake fibatetemesyeghe. Linga tukufumusya nukumanyisya nalinga ukuti tukususiwa sikututula ukuya balusekelo kangi balutengano. Nkabalilo kakunyuma Abayuda aba bali nubudindo babakanisyagha abatumiwa ukuti baleke ukufumusya loli abanyambala abasubiliwa aba basalile ukumpilikila Kyala. Abene bakindililagha ukufumusya kangi imbombo iyi yabahobosyagha fiyo. (Imbo. 5:27-29, 41, 42) Bwanaloli ukuti linga imbombo yitu iyakufumusya yikanisiwe, tukulondiwa ukuya maso linga tukufumusya. (Mat. 10:16) Linga tukubomba syosa isi tubaghile ukufwanisya, tukuya pakuya nulutengano ulu lukwisa panongwa yakunhobosya Yehova nukubabula abangi amasyu aghakupoka ubumi.

“KYALA UMWENELUTENGANO ISAKUYAGHA NANUMWE”

18. Ngimba tukulondiwa ukukumbuka isyafiki isyakufwana namuno tubaghile ukulwaghila ulutengano?

¹⁸ Tuyeghe nulusubilo ukuti nalinga po pakabalilo ka ndamyo, tubaghile ukuya nulutengano. Pakabalilo bo aka, tukulondiwa ukukumbuka ukuti ulutengano ulu tukulondiwa lo lutengano lwa Kyala ulu Yehova mwene yo abaghile ukutupa. Munsubileghe umwene linga mupalamasiwe nimbungo syakwambukila, ingozi syakipeliwa pamo ukufwimiwa. Mukolelaneghe fiyo ni gulu lyake. Mughulileghe ifindu ifinunu ifi fikuya pakubombiwa nkyeni. Linga mukubomba isi, “Kyala umwenelutengano isakuyagha nanumwe.” (Filip. 4:9) Mu nkhani iyakukongapo, twisakuyobesania muno tubaghile ukubatulila Abakristu abinitu aba bikutamiwa ukuya nulutengano lwa Kyala.