Mubatuleghe Abangi Ukwifimbilisya Pakabalilo ka Ndamyo

1. Ngimba utubalilo twingi Yehova ikwamula bulebule inyiputo sya babombi bake?

NGIMBA musimenye ukuti Yehova abaghile ukubabombesyela ukwamula ulwiputo ulwakufuma pasi pandumbula ulwa mundu yumo? Isi sibaghile ukubombiwa kali muli nkulumba wakipanga, ntuli, mpayiniya pamo mfumusi. Mubaghile ukutula kangi kali muli wakilumyana, nkangale muli nkamu pamo mulumbu. Linga umundu yumo uyu anganile Yehova ikusuma ubutuli kumyake, utubalilo twingi Kyala ikubombela abakulumba bakipanga na babombi abangi abasubiliwa ukuti baye “lusubisyo” ku mundu uyu. (Kolos. 4:11) Tuli nulusako ulunywamu fiyo ulwakumbombela Yehova nukubatula abakamu na balumbu bitu. Tubaghile ukufwanisya ukubatula linga bapalamasiwe nimbungo syakwambukila, ingozi syakipeliwa pamo bikufwimiwa.

MUBATULEGHE ABANGI PAKABALILO KA MBUNGO SYAKWAMBUKILA

2. Nongwa yafiki kubaghile ukuya kukafu ukuti tubatule abangi pakabalilo ka mbungo syakwambukila?

² Pakabalilo ka mbungo syakwambukila kubaghile ukuya kukafu ukutulana. Mwakifwanikisyo, tubaghile ukulonda ukuti tubendele abamanyani bitu loli kubaghile ukuya kukafu. Tubaghile ukulonda ukubakolela aba bikwaghana ni ndamyo ya ndalama ukuti bise kukaya kitu ukuti tusalye nabo ifyakulya loli kubaghile ukuya kukafu. Tubaghile ukulonda ukuti tubatule abangi loli kubaghile ukuya kukafu linga aba mumbumba yitu bikutamiwa. Loli tukulonda ukubatula abakamu na balumbu bitu kangi Yehova ikuhoboka fiyo linga tukubomba isi tubaghile ukufwanisya ukuti tubatule. (Mbu. 3:27; 19:17) Ngimba tukulondiwa ukubomba isyafiki?

3. Ngimba tukumanyilako isyafiki ku bakulumba ba kukipanga kya Desi? (Yeremiya 23:4)

³ Isi abakulumba bikulondiwa ukubomba. Linga muli nkulumba wakipanga, musimanyeghe kanunu ing’osi. (Belenga Yeremiya 23:4.) Umulumbu Desi uyu tunjobile pakwanda mu nkhani iyi yakindagha, atile, “Abakulumba ba kukagulu kangu, utubalilo tosa tukufumusya nabo pampene kangi bikuya nakabalilo akakwangala na bangi.”b Panongwa yakubomba isi kwali kupepe kumyabo ukuti bantule Desi pakabalilo ka mbungo ya COVID-19 kangi aba mumbumba yake bamo bafwile panongwa ya mbungo iyi.

4. Nongwa yafiki abakulumba bafwanisyagha ukuntula Desi, ngimba tukumanyilako isyafiki?

⁴ Desi atile, “Panongwa yakuti namenye ukuti abakulumba bali babumanyani, kwali kupepe kumyangu ukubabula muno nipilikilagha.” Ngimba abakulumba bikumanyilapo isyafiki? Muyeghe nubulendo bwa butimi ku bandu aba mukubapasikisya bo indamyo sikali ukubagha. Muyeghe nabo pabumanyani. Linga kubombiwe imbungo syakwambukila kangi mukabaghile ukufwanisya ukubendela abakamu na balumbu, mughelegheleghe ukusyagha injila isingi. Desi atile, “Utubalilo twingi abakamu abakukindanakindana banyimbilagha pamo ukundumila amameseji pisiku ilyakufwana itolo. “Amalemba agha balimbelengile ghalingasisye fiyo, nalinga ukuti naghamenye kanunu.”

5. Ngimba abakulumba babaghile ukumanya bulebule isi abakamu na balumbu bikulonda, kangi babaghile ukubatula bulebule?

⁵ Injila yimo iyi mubaghile ukumanya isi abakamu na balumbu bikulonda ko kubalalusya amalalusyo agha ghakabaghila ukubakosya isoni. (Mbu. 20:5) Ngimba bali nifyakulya ifyakufwana, unkota ni findu ifingi ifi bikulondiwa? Ngimba imbombo yabo yibaghile ukumalika pamo ukusoba indalama iyakuti balipile inyumba? Ngimba bikulondiwa ubutuli ubwakufuma ku boma? Desi alyambilile ifindu ukufuma ku Bakristu abinake. Loli ulughano ulu abakulumba balinnangisye nukunkasya nifundo sya mu Baibolo fyo fyalintulile fiyo. Umwene atile: “Abakulumba biputagha nanine. Nalinga ukuti ngabaghila ukukumbukila isi bayobile loli ngukumbukila muno nalipilikile. Syafwanagha itolo Yehova ikuyoba ukuti, ‘Ukaya wimwene.’”​—Yes. 41:10, 13.

6. Ngimba abakamu na balumbu nkipanga babaghile ukubomba isyafiki ukuti babatule abangi? (Keta ikithuzi.)

⁶ Isi abangi babaghile ukubomba. Tusimenye ukuti abakulumba bo bikulongosya nkipanga. Loli Yehova ikulonda ukuti twesa tubakasyeghe nukubatula abangi. (Gal. 6:10) Nalinga tubaghile ukubomba nandi ukuti tuntule umundu yumo uyu abinile, sibaghile ukunkasya fiyo. Umwana abaghile ukumpa ikyabupe unkamu ukuti ankasye. Uwakilumyana abaghile ukubuka ukwakumulila ifindu umulumbu. Abangi nkipanga babaghile ukumpiyila ifyakulya umundu yumo uyu abinile nukuntwalila kukaya kake. Bwanaloli ukuti pakabalilo ka mbungo syakwambukila, aliwesa nkipanga ikulondiwa ukukasiwa. Lumo tubaghile ukusyalikila panandi linga ingomano simalike ukuti twangale na bakamu na balumbu maso na maso pamo ukwendela pa vidiyokofelensi. Kangi abakulumba bakipanga bope bikulondiwa ukukasiwa. Abaketi bamo bikubandaghisya abakulumba aba utubalilo twingi bikwikolania fiyo pakabalilo ka mbungo syakwambukila. Sikuya syakukasya fiyo linga tukubomba isi tubaghile ukufwanisya ukuti “tusubisanieghe kangi tuyenganeghe twe babo batupu bo mumo tukubombela.”​—1 Tes. 5:11.

MUBATULEGHE ABANGI PAKABALILO KA NGOZI SYAKIPELIWA

7. Ngimba ndamyo siliku isi tubaghile ukwaghana nasyo linga kubombiwe ingozi syakipeliwa?

⁷ Ingozi syakipeliwa sibaghile ukubombiwa mwakunyomosya pa bumi bwa mundu. Abandu bamo katundu wabo ikonangika, utwaya kangi abakamu babo bikufwa. Ifyakubombiwa bo ifi fikubombiwa na ku bakamu na balumbu. Ngimba tubaghile ukubomba isyafiki ukuti tubatule?

8. Ngimba abakulumba ni mitu ya mbumba bikulondiwa ukubomba isyafiki bo ingozi syakipeliwa sikali ukubombiwa?

⁸ Isi abakulumba bikulondiwa ukubomba. Mwe bakulumba, mubatuleghe abakamu na balumbu ukwitendekesya bo ingozi syakipeliwa sikali ukubombiwa. Muketesyeghe ukuti bosa nkipanga bamenye isi bikulondiwa ukubomba ukuti bafighililiwe nukuya ninambala sya bakulumba. Margaret, uyu tunjobile mu nkhani iyi yakindagha, atile: “Abakulumba batubulile ifi fikulondiwa nkighaba kitu, ukuti batusoke isya kwaka kwa moto ughu wabombiwe nkighaba kitu. Abene batile linga aba boma batubulile ukuti tusame mu nyumba syitu pamo linga ifindu fikaya kanunu, tukulondiwa ukusokamo mwanakalinga.” Abakamu batubulile isi pakabalilo kake panongwa yakuti umoto wamaka walyandile bo abasabata 5 bakindilepo. Pakabalilo kakumanyila kwa pambumba, umutu wambumba walondiwagha ukumbula aliwesa mumbumba yake isi abaghile ukubomba. Linga umwe na baninu mwitendekisye, mukuya pakukindilila ukuya bololo pakabalilo ka ngozi syakipeliwa.

9. Ngimba abakulumba babaghile ukubomba bulebule ukuti biyipe bo ingozi syakipeliwa sikali ukubombiwa pamo sibombiwe?

⁹ Linga muli wakuketesya akagulu kabufumusi, muketesyeghe ukuti muli ninambala na maadilesi gha naloli agha bandu ba kukagulu kinu. Mungaghulilagha ukuti ingozi syakipeliwa sibombiwe tasi. Kangi akabalilo kosa muketesyeghe ukuti inambala syabo sikukola. Ukufuma apo linga ingozi syakipeliwa sibombiwe, mukuya pakufwanisya ukumwimbila umfumusi aliwesa uyu ikulondiwa ubutuli. Mumbuleghe mwanakalinga uyu ikuketesya imbombo sya bakulumba ukuti ambule uwakwendela idela. Linga abakulumba aba bikubombela pampene, babaghile ukutula munjila inunu. Bo umoto ghubombiwe, uwakwendela idela wa kukipanga kya Margaret akaghonile utulo kwa maawala 36. Umwene alikolenie fiyo nukuketesya imbombo sya bakulumba bo bikughelaghela ukuti babimbile abakamu na balumbu 450 aba balondiwagha ukusokako ku twaya twabo. (2 Kor. 11:27) Yonongwa yake bosa aba balondiwagha amalo aghakwikala baghaghile.

10. Nongwa yafiki abakulumba bikuketa ukuti ukubakasya abakamu na balumbu kwakulondiwa fiyo? (Yohani 21:15)

¹⁰ Abakulumba bali nubudindo ubwakubakasya abakamu na balumbu ni fundo sya mu Baibolo nukubatula aba bikutamiwa aminong’ono. (1 Pet. 5:2) Pakabalilo ka ngozi syakipeliwa, abakulumba bikulondiwa ukuketesya ukuti unkamu pamo umulumbu aliwesa afighililiwe, ali nifyakulya namalo aghakwikala. Loli linga imyesi mingi yikindilepo, abakamu na balumbu bikulondiwa ukukasiwa ni fundo sya mu Baibolo nukubatula mwakumbili. (Belenga Yohani 21:15.) Harold uyu ikubomba mu Komiti ya pa Ofesi kangi alyaghenepo na bakamu na balumbu bingi aba bapalamasiwe ningozi syakipeliwa, atile “Pikwegha akabalilo ukuti bande ukwipilika kanunu.” Abene babaghile ukwanda ukwibwa ifindu fyabo ifi fyalyonangike loli ukukumbukila inifwa ya nkamu wabo kyo kindu kyakubaba fiyo iki bakabaghila ukwibwa. Isi sibaghile ukubapangisya ukuti bayeghe nikitima utubalilo twingi. Ukubomba isi sitikusanusya ukuti bakaya nulwitiko loli mo muno umundu aliwesa ikwipilikila.”

11. Ngimba imbumba sikuya pakukindilila ukuya ni findu fiki?

¹¹ Abakulumba bikulondiwa ukukonga ubulongosi ubwakuti “amulileghe nabo aba bikulila.” (Rom. 12:15) Abene bikulondiwa ukubasimikisyila aba bapalamasiwe ningozi syakipeliwa ukuti Yehova kangi abakamu na balumbu babaghanile fiyo. Abakulumba bikulondiwa ukusitula imbumba ukuti sikindilileghe ukwiputa, ukumanyila amasyu gha Kyala, ukubungana nukufumusya. Abene bikulondiwa kangi ukubakasya abapapi ukuti babatuleghe abanabo ukuti binong’oneleghe fiyo ifindu ifi fikabaghila ukonangika panongwa ya ngozi syakipeliwa. Mwe bapapi, mubakumbusyeghe abaninu ukuti Yehova ikuya pakukindilila ukuya mmanyani wabo kangi ukuti akabalilo kosa ikuya pakubatula. Kangi mubabuleghe ukuti akabalilo kosa abakamu na balumbu pa kisu kyosa bitendekisye ukuti babatule.​—1 Pet. 2:17.

12. Ngimba bamo babaghile ukubomba isyafiki ukuti batulepo linga kubombiwe ingozi syakipeliwa?

¹² Isi abangi babaghile ukubomba. Linga ingozi syakipeliwa sibombiwe kubupipi nakuno mukwikala, mubalalusyeghe abakulumba muno mubaghile ukutulila. Lumo mubaghile ukubakolela ku nyumba yinu aba batulekile utwaya twabo pamo aba bikutula linga kubombiwe ingozi syakipeliwa ukuti basikale kwa kabalilo akanandi. Mubaghile ukubapa abafumusi ifyakulya ni findu ifingi ifi bikulondiwa. Linga ingozi syakipeliwa sibombiwe kubutali na kuno mukwikala, mubaghile kangi ukutulapo. Bulebule? Mwakubiputila aba bapalamasiwe. (2 Kor. 1:8-11) Mubaghile ukutulapo kangi mwakubika ifyabupe ifi fikutula pambombo iya pa kisu kyosa. (2 Kor. 8:2-5) Linga mubaghile ukufwanisya ukubuka ku malo agha ghapalamasiwe ningozi syakipeliwa, mubalalusye abakulumba isi mubaghile ukubomba ukuti mutulepo. Linga babakolile ukuti mukatulepo, mukuya pakumanyila ifimanyilo fimo ukuti mufwanisyeghe ukubomba kanunu imbombo iyi.

MUBATULEGHE ABAKAMU NA BALUMBU LINGA BIKUFWIMIWA

13. Ngimba ndamyo siliku isi abakamu na balumbu bikwaghana nasyo mfisu ifi imbombo yitu yikanisiwe?

¹³ Mfisu ifi imbombo yitu iyakufumusya yikanisiwe, kukuya twakutamya ukwikalako. Abakamu na balumbu mfisu ifi bikukindilila ukwaghana ni ndamyo sya ndalama, bikubina kangi abakamu babo bikufwa. Panongwa yakuti imbombo yitu yikanisiwe, kukuya kukafu ku bakulumba ukubendela pamo ukubimbila aba bikulondiwa ubutuli. Isi syo syabombiwe kwa Andrei, uyu tunjobile mu nkhani iyi yakindagha. Umulumbu yumo wa ku kagulu kabo ka bufumusi atamiwagha ukuti asyaghe indalama. Ukufuma apo, apangile ingozi. Umwene alondiwagha ukuti bakampange opaleshoni kangi akafwanisyagha ukubomba imbombo. Panongwa yakukanisiwa kwa mbombo yitu nimbungo isyakwambukila, abakamu na balumbu babombagha syosa isi ababaghile ukufwanisya ukuti bantule kangi Yehova amenye syosa isi syabombiwagha.

14. Ngimba abakulumba babaghile ukunangisya bulebule ukuti bikunsubila Yehova?

¹⁴ Isi abakulumba bikulondiwa ukubomba. Andrei aliputile kangi abombile isi abaghile ukufwanisya. Ngimba Yehova abombile isyafiki? Abakasisye abakamu na balumbu nkipanga ukuti bantule. Bamo babukagha numulumbu uyu kukipatala ukuti akaghane na dokotala. Bamo bampagha indalama ukuti sintule. Yehova abakasisye ukuti bantule. Kangi aketesyagha ukuti abakamu na balumbu nkipanga biyipeghe ukuti bampe kilikyosa iki umulumbu uyu alondiwagha. (Hib. 13:16) Mwe bakulumba, linga imbombo yitu iyakufumusya yikanisiwe, mubasumeghe abangi ukuti batulepo. (Yere. 36:5, 6) Ukukinda fyosa, munsubileghe fiyo Yehova. Umwene ikuya pakubatula ukuti mubape abakamu na balumbu ifi bikulondiwa.

15. Ngimba tubaghile ukukindilila bulebule ukukolelana na bakamu na balumbu linga tukufwimiwa?

¹⁵ Isi abangi babaghile ukubomba. Linga imbombo yitu iyakufumusya yikanisiwe, tubaghile ukwaghana na bakamu na balumbu mu magulu. Yonongwa yake kwakulondiwa fiyo ukuti tukindilileghe ukuya palutengano. Mulimbaneghe na Setano komma na bakamu pamo abalumbu. Munginong’onelagha fiyo isi abakamu na balumbu bitu bikusoba kangi mungakabilagha ukumasya indamyo linga mukindene aminong’ono. (Mbu. 19:11; Ef. 4:26) Mughelegheleghe ukubatula abangi. (Titi 3:14) Ubutuli ubu abangi balimpele umulumbu uyu bwalinkasisye fiyo pampene na bandu ba kagulu kake ka bufumusi. Abene bakindilile ukukolelana bo mbumba.​—Sal. 133:1.

16. Ukufwana na Bakolosi 4:3, 18, ngimba tubaghile ukubatula bulebule abakamu na balumbu aba bikufwimiwa?

¹⁶ Abakamu na balumbu bingi bikumbombela Yehova nalinga ukuti aba boma bikukanisya imbombo yitu iyakufumusya. Bamo bikupinyiwa mu jele panongwa ya lwitiko lwabo. Tukulondiwa ukubiputila abene, imbumba syabo na aba bikubika ubumi bwabo pangozi ukuti babatule abakamu na balumbu mwambepo na kumbili.c (Belenga Bakolosi 4:3, 18.) Mungibwagha ukuti inyiputo syinu sibaghile ukubatula abakamu na balumbu aba.​—2 Tes. 3:1, 2; 1 Tim. 2:1, 2.

17. Ngimba lino mubaghile ukwitendekesya bulebule ukufwimiwa?

¹⁷ Umwe na ba mumbumba yinu mubaghile ukwitendekesya lino ukufwimiwa. (Imbo. 14:22) Munginong’onelagha fiyo ifindu ifibibi ifi fibaghile ukubombiwa. Mmalo mwake, mukasyeghe ubumanyani bwinu na Yehova nukubatula abaninu ukuti bope syo babombeghe. Linga utubalilo tumo mukutamiwa naminong’ono, mumbuleghe Kyala syosa isi sili mundumbula yinu. (Sal. 62:7, 8) Pakuya mbumba, muyobesanieghe ififukwa fyosa ifi fikubapangisya ukuti munsubileghe umwene.d Pakabalilo ka ngozi syakipeliwa, ukwitendekesya kwinu nukunsubila Yehova kukuya pakubatula fiyo abaninu ukuya bakifu kangi balutengano.

18. Ngimba tukughulila isyafiki nkyeni?

¹⁸ Ulutengano lwa Kyala lukututula ukuya bakufighililiwa. (Filip. 4:6, 7) Ukwendela ndutengano ulu, Yehova ikututula ukuya bololo nalinga ukuti tukupalamasiwa nimbungo syakwambukila, ingozi syakipeliwa nukufwimiwa ifi fikutupalamasya fiyo amasiku agha. Umwene ikubombesyela abakulumba bakwiyipa ukuti batukasyeghe mwambepo. Kangi ikutupa ulusako ulwakuti tutulaneghe. Ulutengano ulu tukuhoboka nalo lino, lukututula ukwitendekesya indamyo inywamu isi tukuya pakwaghana nasyo nkyeni kangi na “pabutolwe ubukulumba.” (Mat. 24:21) Pakabalilo ako, tukulondiwa ukwisakukindilila ukukasya ulutengano lwitu nukubatula abangi ukubomba mwakufwana itolo. Linga ifyakubombiwa ifi fimalike, tutisakwaghanagha kangi ni ndamyo yiliyosa iyi yisakutupangisyagha ukuti tutamiweghe naminong’ono. Pabumalilo twisakuhobokagha fiyo nulutengano lwanaloli ulu lwisakuyako kwa bwila na bwila bo muno Yehova alondelagha.​—Yes. 26:3, 4.