Jesu o Ghini Hwu Fọkiẹ Omẹmẹ?

BAIBOL na ọ vuọnren rhẹ ẹmro rẹ ehworhare ri “vwo iroro ri họhọ erẹ ọwan” i ta nẹ ẹhẹn rhe. (Jas. 5:17) Jerẹ udje, ọwan ina sabu vwẹruọ oborẹ i Paul o mevirhọ ọke rọ tẹmro rọ ha uvuẹn Romans 7:21-24: “Ọke mia guọlọ ruẹ oborẹ orhomurun, oborẹ obiomurun nọ yọ homaphia mẹ. . . . Orharhere ọhworhare mi havwọ!” Aruẹ iroro ọrana ọ yẹ ọwan urhebro ọke re lele ijẹgba ọwan wọnrọn.

Paul ọ ji ta kpahen iroro erọrọ. Uvuẹn Galatians 2:20, nọ ta oborẹ o vwo imwẹro kpahen, taghene Jesu o “vwo ẹguọlọ [kpahiẹn] jeghwai ha omayen kpahontọre fọkiẹ [ọye]!” Wu vwo aruẹ iroro ọrana? Ọkezẹko, rhẹ ọke ephia-an.

Arha lẹrhẹ ọdandan re ru vrẹn ne kpe ẹhẹn ọwan riotọre, a sabu vwo imwẹro taghene Jehova o vwo ẹguọlọ kpahen ọwan jeghwai harhomu ọwan ne-e, ọnọ ji lẹrhiẹ bẹn na mẹrẹn izobo otan i Jesu jerẹ ẹghẹlẹ re ru harẹn ọwan owuowu. Jesu ọ ghini guọlọ na ha aruẹ ukẹro ọrana ni izobo otan na? Orho rhiẹ omaran, me yọ nọ sabu ha userhumu rẹn ọwan? Jenẹ a ta kpahen enọ eva erana?

UKẸRO I JESU Ọ HA NI IZOBO ỌNẸYEN

Jesu ọ guọlọre nẹ ọwan owuowu i ha ukẹro ọghoghanren ni izobo yi. Mesoriẹ a ta omaran? Ha ẹhẹn roro kpahen iyẹnrẹn rọ ha uvuẹn Luke 23:39-43. A kanren ọhworhare owu mwu orhan oja kẹri Jesu. Ọye o ji kwe taghene ọye oruọdandan. Ọdandan yen ọnọ gbanhon omamọ, fọkime aruẹ ojẹriọ ọnana ya ha riẹ ihworho ri ruẹ ọdandan rọ gbanhonron omamọ. Ọhworhare ọnana no brudu, omarana nọ rẹ i Jesu: “Karorhọ mẹ uvuẹn Uvie ọnọ.”

Marhẹ i Jesu ọ kpahenrhọ riẹn lele? Roro kpahen omiamiamo i Jesu o rhiẹromẹrẹn ọke rọ ghwẹriẹ urhomie nọ sabu mẹrẹn ọhworhare na. Dedevwo ọ ha omiamiamo nọ ji chẹẹ riẹn, ji yẹ ye imwẹro ọnana: “Urhomẹmro mia ta wẹn inyenana, wu ne leli mẹ rhirhiẹ ye uvuẹn i Paradais.” Jesu ọnọ sabu ghwai karorhọ ọhworhare na taghene “Ọmọ onyakpọ ọ rhere . . . jeghwai ha arhọ ye ru otan harẹn ihworho buebun.” (Matt. 20:28) Izede bọrọbọrọ, Jesu nọ lẹrhẹ ọhworhare na rhe oborẹ izobo otan ọnẹyen ọ ghanren te riẹn. O dje uruemru bọrọbọrọ na phia ọke rọ ha ẹmro na ‘wẹwẹ’ ọrhẹ ‘mẹmẹ,’ ruiruo. Jesu ọ ta rẹn ọhworhare na taghene ono rhirhiẹ ye uvuẹn paradais.

Itiọrurhomẹmro, Jesu ọ guọlọre nẹ ọhworhare na o rhe taghene izobo otan na ọnọ ji rhua erere vwe yi. Jesu orho roro omaran kpahen ohi ro vwo vwo uphẹn rọ nọ ga Osolobrugwẹ, ono ji roro omaran kpahen Olele Kristi ro bromarhame ne rọ ga Osolobrugwẹ. Me yọ nọ ha userhumu rẹn ọwan sabu vwo imwẹro taghene izobo otan i Jesu, ọnọ rhua erere vwe ọwan udabọ edandan re ru vrẹn ne?

OBORẸ Ọ HA USERHUMU RẸN PAUL

Owian aghwoghwo i Paul o dje aruẹ ukẹro i Paul ọ ha ni izobo otan i Jesu phia. Izede ọgo? Nọ tare: “Mie dje ọdaremẹro phia harẹn Kristi Ọrovwori ọwan, ohworho ro yẹre mẹ omẹgbanhon, fọkime o nirin mẹ rhiẹ ohworho rọ fuevwan nyoma ọ yẹ mẹ iruo uvie na, dedevwo mẹmẹ ohworho rọ rhaphiẹ ihworho, ọrọ kparehaso ihworho, rọ jeghwai kparoma vẹrhẹ bi.” (1 Tim. 1:12-14) Owian ọnana ri Jesu ọ yẹ i Paul nọ lẹrheriẹ vwo imwẹro taghene Jesu o ghini vwo arodọmẹ, ẹguọlọ ọrhẹ ẹruẹhaso kpahiẹn. Jesu ọ ji yẹ ọwan owian aghwoghwo na. (Matt. 28:19, 20) Owian aghwoghwo na ọnọ ji sabu lẹrhuọ vwo aruẹ imwẹro ọnana?

Albert re le nẹ ukoko omẹ ẹgbukpe 34 ne, rọ rharhumu bru i Jehova rhe nọ tare: “Edandan mẹ i ha obaro mẹ ọke ephian. Ọrẹn, mi rhe riẹ aghwoghwo ni mie vwo aruẹ ẹhẹn i Paul o vwori, taghene Jesu ọ yẹre mẹ owian aghwoghwo na. Ọ lẹrhẹ oma merhen mẹ jeghwai lẹrhe mẹ ha ukẹro ro serhọ ni oma mẹ, akpenyerẹn mẹ ọrhẹ obaro akpọ mẹ.”—Ps. 51:3.

Allan ro rhiẹ ologbozighi bi ro ji gburhi ghwẹ bọmọke o ki yono urhomẹmro na, nọ tare: “Mie ji roro kpahen ọsoso ẹkuọn mi ha vwe ihworho ne. Ọkezẹko, ọ lẹrhẹ ẹhẹn mẹ seriotọre. Ọrẹn, mia kpẹmẹ i Jehova taghene ọ lẹrhere mẹ ro rhiẹ oruọdandan sabu ghwoghwo iyẹnrẹn esiri na rẹn awọrọ. Ọke mia mẹrẹn oborẹ ihworho a kpahanrhọ iyẹnrẹn esiri na, nọ karorhọ mẹ oborẹ i Jehova orhomu te ji vwo ẹguọlọ kpahen ọwan. Mie roro taghene ọ ha mẹ ha userhumu rẹn ihworho ri ji ruẹ ekwakwa ibiobiomu vrẹn ne.”

Ọke ra ha aghwoghwo, na tẹnrovi emamọ ekwakwa ọrhẹ iroro ri serhọ. Nọ yẹ ọwan imwẹro kpahen arodọmẹ, ẹguọlọ ọrhẹ ẹruẹhaso i Jesu o vwo kpahen ọwan.

JEHOVA Ọ DO GHWẸ ỌMUDU ỌWAN

Bọmọke ana ghwọghọ akpọ Echu, ene ji rhe mwuomarhọ fọkiẹ edandan re ru vrẹn ne. Me yọ nọ ha userhumu rẹn ọwan wọnrọn haso iroro enana?

Jean ro mwuomarhọ fọkiẹ aruẹ enyerakpọ eva ro nyerẹn vrẹn ne nọ tare, “Ọ merhenren mẹ oma taghene ‘Osolobrugwẹ ọ do ghwẹ ọmudu ọwan.’” (1 John 3:19, 20) Jerẹ Jean, ẹhẹn ọwan ọnọ sabu totọre fọkime e rheri taghene Jehova ọrhẹ Jesu i rheri taghene ọwan iruedandan. Karorhọ taghene ẹguọlọ yo mwurun aye yẹ ọwan izobo otan na, fọkime ọwan ihworho ri vwa gba.—1 Tim. 1:15.

Arha nẹrhomo, fiomarhọ owian aghwoghwo na vuọnvuọn, jeghwai roro kodo kpahen oborẹ i Jesu o lele awọrọ ri vwa gba nyerẹnkugbe, no no mwu ọwan ẹro taghene fọkiẹ ọwan yi Jesu o hwu. Wu rhe ru ọnana, jerẹ i Paul wu na sabu ta: Jesu o “vwo ẹguọlọ kpahen mẹ jeghwai ha omayen kpahontọre fọkiẹ omẹmẹ.”