UYONO 02

Baibol na o Vive Kpahen Obọdẹn Akpenyerẹn Obaro na

Ọre Fomẹ Phia

Ihworho buebun uvuẹn ọsoso akpọ na a dẹrughwaroghwẹ ebẹnbẹn ra lẹrhẹ aye mwuomarhọ, vwo ọfiamu, jeghwai rioja omiamiamo. Wu dẹrughwaroghwu erhirhiẹ rọ lẹrheruọ roro kpahen ekwakwa enana dẹ ne? Ọkezẹko wa rioja emiamo, yanghene ohworho wu vwo ẹguọlọ kpahen, o hwu va obọ. Ọkezẹko nu we roro, ‘Ekwakwa ina sabu rhomurhọ?’ Baibol na o vwo obọdẹn ẹkpahenrhọ rẹn onọ ọrana.

1. Ifiẹrorhọ ọgo yi Baibol na ọ yẹrẹ ọwan?

Baibol na o dje kpahen oborẹ ọsoriẹ ebẹnbẹn a vuọn otọrakpọ na, ọ ji ta rẹn ọwan kpahen iyẹnrẹn esiri na taghene phẹrẹkpẹ, Osolobrugwẹ ono tiẹ ebẹnbẹn enana nie. Ive ri ha uvuẹn i Baibol na, ina sabu yẹ ọwan “omamọ obaro akpọ kugbe ifiẹrorhọ.” (Se Jeremiah 29:11, 12.) Ive enana ina ha userhumu rẹn ọwan din ebẹnbẹn vwana, jeghwai vwo omamerhomẹ, habaye, aye a ji yẹ ọwan imwẹro na taghene ene vwo omamerhomẹ bẹmẹdẹ.

2. Aruẹ obaro akpọ ọgo yi Baibol na o ve rẹn ọwan?

Baibol na ọ ta rẹn ọwan taghene uvuẹn obaro na, “uhwu orho rhirhiẹ ye-e, orho vwo omemwurhọ-ọ, yanghene unuebo oviẹ-ẹ, yanghene omiamiamo orho rhirhiẹ ye ghwomara-an.” (Se Revelation 21:4.) Ebẹnbẹn ra lẹrhẹ ihworho rioja inyenana jerẹ, erhirhiẹ ogbere, osehiẹn, emiamo ọrhẹ uhwu, ine nie phẹlẹphẹlẹ. Baibol na o ve rẹn ọwan taghene ọke ọrana, ituakpọ ina sabu riamerhen akpọ bẹmẹdẹ uvuẹn i Paradais ro no rhirhiẹ otọrakpọ na.

3. Marhẹ ono ru sabu mwuẹro taghene ive i Baibol na ine rugba dẹn?

Ihworho buebun e fiẹrorhọ ekwakwa irhorhomu rẹ aye ine rhiẹromẹrẹn, ọrẹn, o vwo mwu aye ẹro taghene oborẹ aye i guọlọre ono vi te aye obọ-ọ. Ọrẹn, orhiomaran yẹ ive i Baibol na ọ havwọ-ọ. Ana sabu hẹroso oborẹ i Baibol na ọ tare, nyoma ra “dabu ni Eyaya Ọfuanfon na sua.” (Acts 17:11) Ru we yono i Baibol na, ne wu na sabu brorhiẹn harẹn omobọ ọnọ, sẹ wu na sabu vwo imwẹro kpahen oborẹ ọ tare kpahen obaro na.

YONO KODO RHỌ

Yono kpahen ekwakwa ezẹko ri Baibol na o veri kpahen obaro na. Roro kpahen oborẹ ifiẹrorhọ ri Baibol na ọ yẹrẹ ọwan, o ru ha userhumu rẹn ihworho inyenana.

Collage: Mẹrẹn ovẹnẹ rọ ha uvwre erhirhiẹ ihworho e rhiẹromẹrẹn uvuẹn akpọ na inyenana ọrhẹ ive kpahen oborẹ akpọ na ono rhirhiẹ obaro na. E dje kpahen erhirhiẹ enana obotọre.

4. Baibol na o ve rẹn ọwan taghene ana sabu nyerẹn bẹmẹdẹ vabọ ebẹnbẹn

Ni ive sansan uvuẹn i Baibol na ra na hunute. Ọgo usuẹn ive na yọ mai jo? Mesoriẹ?

Se ekete i Baibol ri ta kpahen ive enana, nẹ are i kpahenrhọ enọ enana:

Wu na sabu mẹrẹn erere nẹ ekete i Baibol enana? Ive enana ina sabu yẹ ekron ọrhẹ igbehian ifiẹrorhọ?

Roro kpahen ọke wu ne nyerakpọ

RẸ OHWORHO OWUOROWU . . .	IHWORHO EPHIAN . . .
ọnọ jọ rioja omiamiamo, ọho yanghene tobọ hwu dede.—Isaiah 25:8.	ina mẹrẹn erẹ aye i vwo ẹguọlọ kpahen ra na rhọmọ nuhwu rhiẹ akpọ.—John 5:28, 29.
ono jo kpomu yanghene rioja ebẹnbẹn ọgbogbanhon.—Isaiah 33:24; 35:5, 6.	ine vwo omọkpokpọ jeghwai sasa jerẹ uphuphẹn.—Job 33:25.
ọnọ jọ rioja osehiẹn.—Isaiah 32:16, 17.	ine vwo emaren buebun, obọdẹn oghwa ọrhẹ omamọ iruo.—Psalm 72:16; Isaiah 65:21, 22.
ọnọ jọ rioja fọkiẹ uvweri.—Psalm 46:9.	ina riamerhen obọdẹn ufuoma.—Psalm 37:11.
ọnọ jọ rioja fọkiẹ ẹhẹn ro seriotọre, yanghene iroro oborẹ ọ phia vrẹn ne.—Isaiah 65:17.	ine nyerẹn bẹmẹdẹ uvuẹn erhirhiẹ ro fuoma.—Psalm 37:29.

Ọmọ ọhworhare ro kpomẹ bi, rẹ omayen ọ gbanhon ne rọ gbalọ izie.

Ọhworhare rọ ho ne bi, ọrẹn nẹ idama vwana, ro ghorien iwilbaro rọ vuọnren rhẹ ewawọ.

5. Ifiẹrorhọ ri Baibol na o tiobọnu ọnọ sabu ha userhumu rẹn ọwan

Ẹhẹn ihworho buebun o seriotọre yanghene aye a tuekwẹre fọkiẹ ebẹnbẹn rẹ aye e rhiẹromẹrẹn. Ezẹko a damoma neneyo aye i sabu ruẹ ekwakwa rhomurhọ. Ni oborẹ ive i Baibol na taghene ekwakwa ine rhomurhọ, o ru ha userhumu rẹn ihworho vwana. Kporo IVIDIO na, orho ru, are i gba kpahenrhọ enọ enana.

IVIDIO: Mi Guọlọ Wọnrọn Hasuẹ Osehiẹn (4:07)

Collage: Ekete ezẹko uvuẹn ividio na, ‘Mi Guọlọ Wọnrọn Hasuẹ Osehiẹn.’ 1. Rafika rọ kọrọ i cotton uvuẹn ikebi rhẹ ihworho amwa yen ọke rọ ha ọgbọtọ. 2. Oma ọ merhen i Rafika ọke rọ mẹrẹn aruẹ ihworho sansan re ruẹ ekwakwa kugbe, ọke ra ha use riẹn riẹ omẹvwa Iseri Jehova ọke ọrukaro.

Uvuẹn ividio na, osehiẹn ọgo yi Rafika ọ dẹrughwaroghwu?
Dedevwo osehiẹn rọ dẹrughwaroghwu na o notọre-e, marhẹ i Baibol na o ru ha userhumu riẹn?

Arha hẹroso ive i Baibol na kpahen obaro na, ẹhẹn ọwan orho seriotọre-e, habaye, oma ọnọ ji merhen ọwan udabọ ebẹnbẹn. Se Proverbs 17:22 ọrhẹ Romans 12:12, orho ru, are i gba kpahenrhọ enọ enana:

Oborẹ i Baibol na ọ tare kpahen obaro na, ọnọ sabu lẹrhẹ akpenyerẹn ọnọ rhomurhọ vwana? Mesoriẹ we rorie omaran?

OBORẸ IHWORHO EZẸKO A TA: “Ive i Baibol na kpahen obaro na, ghwai ikuegbe kpekpa.”

Mesoriẹ we roro taghene o fori ne wu guọlọ otọriẹ fiotọre?

ME WU YONORIN?

Baibol na ọ yẹ ọwan ifiẹrorhọ, ọ jeghwai ha userhumu rẹn ọwan diẹn ebẹnbẹn, nyoma ro ve kpahen obaro akpọ re ne vwo omamerhomẹ.

Ẹzẹkoko

Mesoriẹ o fo nẹ ihworho i rhe kpahen ive Osolobrugwẹ?
Me yi Baibol na ọ tare kpahen obaro na?
Marhẹ ifiẹrorhọ kpahen obaro na, ono ru ha userhumu wẹn vwana?

Ẹdẹ we yono uyono ọnana hin:

Oborẹ Wu Guọlọ Ru

Dabu riẹnrioma rhẹ ive i Baibol na, nyoma wu ne se eghwẹmro ra hunute uvuẹn uyono ọnana.

Ọrọrọ:

Your other goal

GUỌLỌ IYẸNRẸN ERỌRỌ

Yono kpahen oborẹ ifiẹrorhọ ono ru ha userhumu wẹn, wu rha dẹrughwaroghwu ebẹnbẹn.

“Bọgo ya na Sabu Mẹrẹn Obọdẹn Ifiẹrorhọ?” (Awake!, April 22, 2004)

Yono oborẹ ifiẹrorhọ kpahen obaro na, ono ru ha userhumu rẹn ihworho ra rioja emiamo ọgbogbanhon.

“Baibol na Ọnọ Sabu ha Userhumu Wẹn Nyerẹn Ghele Emiamo Ọgbogbanhon?” (Urhomu-ẹmro rọ ha uvuẹn itanẹti)

We rhe ni ikpekporo ividio na, rhe roro kpahen ọke wẹwẹ rhẹ ekrun ọnọ ina riamerhen akpọ uvuẹn i Paradais ri Baibol na o ve kpahen obaro na.

Roro Kpahen Ọke Na (3:37)

Se kpahen oborẹ ọhworhare owu rọ guọlọ ruẹ ekwakwa rhomurhọ, o ru wene akpenyerẹn ọnẹyen fọkiẹ oborẹ o yonorin uvuẹn i Baibol na kpahen obaro na.

“Mie Rhe Vwo Ẹhẹn mi ne Wene Akpọ na Ghwomara-an” (The Watchtower, July 1, 2013)