Enọ Rẹ Otu Re Se Ẹbe Ọwan I Nọren
Ọnyikọ Paul ọ yare taghene i Jehova ‘ọ vwọ samọ lẹrhẹ ọwan dẹrughwaroghwu ọdamuni ra na ja sabu di-in.’ (1 Cor. 10:13) Ọnana no mevirhọ taghene i Jehova o rhe ọdamuni rẹ ọwan ina sabu vwo edirien, nọ jeghwai djẹ ọdamuni rẹ ọwan ina dẹrughwaroghwu harẹn ọwan?
Roro kpahen oborẹ o nẹ erhumu aruo iroro ọrana rhe. Omizu ọhworhare owu rẹ ọmọyen ọhworhare o kpe omayen, nọ nọren: ‘Jehova o rheri sẹ mẹmẹ ọrhẹ ane mẹ ina sabu vwo edirin oborẹ ọmọ ame o ruru na? Osolobrugwẹ o rheri taghene ame ina sabu vwo edirin oborẹ ọ phiare na, ọyẹ ọsoriẹ ọ lẹrhiẹ phia rẹn ame?’ O vwo iroro rọ nọ lẹrhẹ ame kwerhọ ye taghene i Jehova yo ru ekwakwa ni rhirhiẹ omaran uvuẹn akpenyerẹn ame?
Arha dabu roro kpahen ẹmro i Paul ọ ya rhẹ 1 Corinthians 10:13, ọnọ lẹrhẹ ọwan kwerhọ iroro ọnana: O vwo ekete i Baibol rọ tariẹ taghene i Jehova o rhe edamuni rẹ ọwan ina sabu vwo edirie-en, Baibol na ọ jeghwai ta taghene i Jehova ọ djẹ edamuni rẹ ọwan ina dẹrughwaroghwu harẹn ọwa-an. Jene roro kpahen iroro ẹne rọ nọ lẹrhẹ ọwan kwerhọ iroro ọrana.
Ọrukaro, Jehova ọ yẹrẹ ọwan ẹghẹlẹ ugbomọphẹ. Jehova ọ guọlọre nẹ ọwan i djẹ oborẹ ọwan ine nyerẹn akpọ ọwan lele. (Deut. 30:19, 20; Josh. 24:15) Ọwan i rha djẹ akpenyerẹn ro serhọ, ọwan na hẹroso i Jehova nọ kpọ idjaghwẹ ọwan vi. (Prov. 16:9) Ọrẹn ọwan i rha djẹ akpenyerẹn rọ sọre, ọwan ni na rioja omiamiamo ro no nẹ erhumie rhe. (Gal. 6:7) Orhianẹ, Jehova yọ djẹ edamuni rẹ ọwan ina dẹrughwaroghwu, nọyẹ o tiobọnu ẹghẹlẹ ugbomọphẹ na rẹn ọwan nẹ ẹhẹn rhe-e.
Ọreva, Jehova ọ vwọ sẹrorẹ ọwan nẹ ukpokpogho kpregede-e. (Eccl. 9:11) Ukpokpogho kpregede ọnọ sabu phia rẹn ọwan nime ọwan i ha uvuẹn ekete ọrhẹ ọke ro vwo serhọ. Jesu ọ hunute ukpokpogho rọ phia rẹn ihworho awan 18, rẹ oghwa o se bru, Jesu nọ jeghwai ta taghene orhiẹ Osolobrugwẹ yọ so ukpokpogho kpregede ọrana-a. (Luke 13:1-5) Orhiẹ oborẹ ọsọre re ne roro taghene Osolobrugwẹ yọ djẹ ihworho ri ne nyerẹn yanghene eri ne hwuo, ukpokpogho ọrhọ homaphia?
Ọresa, oborẹ Echu ọ ta kpahen emevigbanhon ọwan o sekpahen ọwan ephian. Karorhọ taghene Echu ọ yenyan kpahen emevigbanhon idibo i Jehova, ọke rọ ta taghene o vwo ohworho rọ nọ sẹrorẹ atamwu ọnẹyen kpahen i Jehova udabọ edamuni-i. (Job 1:9-11; 2:4; Rev. 12:10) Orhianẹ i Jehova ọ sẹrorẹ ọwan nẹ ikpokpogho ezẹko nime o rheri taghene ọwan i sabu vwo edirie-en, ọrana ọrhọ lẹrhẹ Echu ta taghene ọwan a ga Osolobrugwẹ fọkiẹ oborẹ ọwan ina mẹrẹn?
Ọrẹne, orhiẹ kemru kemru ra phia rẹn ọwan yi Jehova ọ mẹrẹn rhotọre-e. Ọwan i rha ta taghene Osolobrugwẹ yọ djẹ ọdamuni rẹn ọwan, nọyẹ ọwan a haye ta taghene Osolobrugwẹ o rhe i kemru kemru rọ nọ phia uvuẹn akpenyerẹn ọwan rhotọre. Ọrẹn, Baibol na ọ ta omara-an. Osolobrugwẹ o vwo omẹgbanhon ro no rhe oborẹ ọnọ phia obaro na. (Isa. 46:10) Ọrẹn, Baibol na o djerie phia taghene Osolobrugwẹ ọ djẹ oborẹ ọye ọ guọlọ rhe kpahen obaro na. (Gen. 18:20, 21; 22:12) Omarana, Jehova ọ ha omẹgbanhon rọ nọ mẹrẹn obaro na ruiruo izede ro serhọ sekpahen ugbomọphẹ rẹ ọye ọ yẹrẹ ọwan na. Ọrana orhiẹ oborẹ ọwan ine fiẹrorhọ mie Osolobrugwẹ rọ yẹrẹ ọwan ugbomọphẹ, rọ ji ha omẹgbanhon ọnẹyen ruiruo izede ro serhọ?—Deut. 32:4; 2 Cor. 3:17.
“Osolobrugwẹ ọ vwọ samọ lẹrhẹ are dẹrughwaroghwu ọdamuni are ina ja sabu di-in,” nẹ marhẹ ọwan ine ru vwẹruọ ẹmro ọrana ri Paul ọ tare na? Paul nọ ha ọnana dje kpahen oborẹ i Jehova o ruẹ uvwre ọke ọwan i rha dẹrughwaroghwu ọdamuni. Paul ọ vwọ ta kpahen edamuni ri na phia rẹn ọwan obaro na-a, ukpomaran ọ ta kpahen oborẹ i Jehova o ruẹ uvwre ọke rẹ ọwan a dẹrughwaroghwu edamuni.a Ẹmro enana ri Paul ọ tare na, a yẹ ọwan imwẹro taghene Jehova ọnọ ha userhumu rẹn ọwan fi ebẹnbẹn rẹ ọwan i rhiẹromẹrẹn ephian kparobọ. (Ps. 55:22) Paul ọ bọn ẹmro urhebro enẹyen kpahen urhomẹmro eva.
Ọrukaro, ‘awọrọ a ji dẹrughwaroghwu edamuni rẹ ọwan a dẹrughwaroghwẹ na’. Omarana, ebẹnbẹn rẹ ọwan e rhiẹromẹrẹn, a je phia rẹn awọrọ. Ọwan i rha hẹroso Osolobrugwẹ, ana sabu vwo edirin edamuni erana. (1 Pet. 5:8, 9) Ẹmro ri Paul ọ ya rhẹ 1 Corinthians 10:13, ọ rionbọrhọ edamuni rẹ emọ Israel i dẹrughwaroghwu uvuẹn ato na. (1 Cor. 10:6-11) Emọ Israel a dẹrughwaroghwu ebẹnbẹn rẹ aye ina ja sabu vwo edirie-en. Paul ọ tare ọgbọ ẹne taghene ezẹko usuẹn emọ Israel na, i ten uvwele Osolobrugwẹ. Ọrẹ omemwurhọ, emọ Israel na ezẹko ne ru ọdandan nime aye a hẹroso Osolobrugwẹ-ẹ.
Ọreva, ‘Osolobrugwẹ ohworho ra sabu hẹrosua.’ Iyẹnrẹn ra nẹ kpahen oborẹ Osolobrugwẹ o lele emọ Israel nyerẹn lele, o djephia taghene Osolobrugwẹ o vwo ẹguọlọ atamwu kpahen ihworho ri vwo ẹguọlọ kpahiẹn, ra jeghwai nyalele ekama enẹyen. (Deut. 7:9) Iyẹnrẹn ọrana, o ji djephia taghene Osolobrugwẹ o ruẹ oborẹ o veri ọke ephian. (Josh. 23:14) Iyẹnrẹn kpahen oborẹ i Jehova ọ ha Ẹmro ọnẹyen te orugba lele, ọ lẹrhẹ ihworho ri vwo ẹguọlọ kpahiẹn, ra jeghwai huvwele yi vwo imwẹro kpahen ive enana, aye i rha dẹrughwaroghwu ebẹnbẹn: (1) Jehova ọ vwọ samọ lẹrhẹ ọdamuni owuorowu phia rẹn aye te erhirhiẹ rẹ aye ina ja sabu vwo edirie-en, habaye (2) “ọnọ ji gbẹn izede firhọ” nẹ aye i sabu din ebẹnbẹn na.
Jehova ọ “ha urhebro rẹn ọwan uvuẹn edamuni ọwan ephian”
Marhẹ i Jehova o ru gbẹn izede firhọ harẹn ihworho ri hẹrosuiẹ, aye i rha dẹrughwaroghwu ebẹnbẹn? Itiọrurhomẹmro, orho rhiẹ ọhọre ọnẹyen, ono ti ọdamuni na nie. Ọrẹn, jenẹ ọwan i karorhọ ẹmro i Paul, ọke rọ ta: Jehova “ọnọ ji gbẹn izede firhọ” nẹ ọwan i sabu vwo edirin edamuni na. Omarana, uvuẹn erhirhiẹ buebun, Jehova ọ “gbẹn izede firhọ” neneyo ọwan i sabu vwo edirin edamuni. Roro kpahen izede ezẹko ri Jehova o ru gbẹn izede firhọ rẹn ọwan:
Jehova ọ “ha urhebro rẹn ọwan ọke edamuni.” (2 Cor. 1:3, 4) Jehova o ru ọwan gbanhan nyoma i Baibol na, ẹhẹn ọfuanfon ọnẹyen, ẹbe ọrhẹ ekwakwa erọrọ rẹ ọvrẹn ra hẹrosua ro ji vwo ẹghwanren na ọ yẹ ọwan.—Matt. 24:45; John 14:16, Rom. 15:4.
Jehova ọ ha ẹhẹn ọfuanfon ọnẹyen kpọ ọwan viẹ. (John 14:26) Ọwan i rha dẹrughwaroghwu ebẹnbẹn, ẹhẹn ọfuanfon na ọnọ ha userhumu rẹn ọwan karorhọ uruemru-urhi Baibol ri na sa ọwan erhumu kpare idjaghwẹ rọ gbare.
Jehova ọ ha emakashe simi ọwan.—Heb. 1:14.
Jehova ọ nyoma imizu ri ha uvuẹn ukoko na bọn ọwan gbanhan.—Col. 4:11.
Me yẹ ẹmro i Paul ọ ya rhẹ 1 Corinthians 10:13 na, o mevirhọ? Jehova ọ vwọ djẹ edamuni rẹ ọwan ina dẹrughwaroghwu harẹn ọwa-an. Ọrẹn ọwan i rha dẹrughwaroghwu ebẹnbẹn, ọwan ina sabu vwo imwẹro ọnana taghene: Ọwan i rha hẹroso i Jehova, ọ vwọ samọ ha uphẹn rẹn ebẹnbẹn rẹ ọwan ina ja sabu vwo edirien, no bru ọwan rhe-e; ọnọ gbẹn izede firhọ nẹ ọwan i sabu vwo edirin edamuni na ọke ephian. Ọnana obọdẹn urhebro.
a Ẹmro na “ọdamuni,” uvuẹn i Greek, ọnọ sabu mevirhọ “ebẹnbẹn yanghene ukpokpogho.”