Omizu Ọrọrọ Ra Haba Ugboma Usuon Na

UVUẸN urhiọke i Wednesday January 24, 2018, Oghọn Ukoko i United States ọrhẹ ọrẹ i Canada ni rhon aghwoghwo oghẹnrensan owu: E ghwoghwori taghene a ha Omizu Kenneth Cook, Jr., ba Ugboma Usuon ọrẹ Iseri Jehova ne.

E vwiẹ Omizu Cook obẹ i Pennsylvania, U.S.A avwaye yọ ji ghwanren. Ọ ki ruotọre nẹ isukuru, no yono urhomẹmro na mie ohworho iklasiẹ, nọ jeghwai bromarhame uvuẹn June 7, 1980. Nọ tuẹn owian ọkobaro rhọ uvuẹn September 1, 1982. Ọke rọ wian owian ọkobaro te ẹgbukpe eva ne, ne serie riẹ Oghọn Ukoko, nọ tuẹn owian rhọ obẹ Wallkill, New York, uvuẹn October 12, 1984.

Omizu Cook nọ gare avwaye te ẹgbukpe 25, ọ gare uvuẹn Ekete Re Fomu Ẹbe ọrhẹ Bethel Office. Omizu Cook ọ rọnmọ aniẹ re se Jamie uvuẹn ẹgbukpe 1996, aye awanva ni gare uvuẹn Wallkill. Uvuẹn December 2009, ne dje Omizu Cook ọrhẹ aniẹ riẹ Ekete ra ha Isukuru Uvie na sansan phia obẹ Patterson, New York, avwaye yẹ Omizu Cook ọ wian uvuẹn Awuiruo Ra Kpahanrhọ Enọ. Uvuẹn April 2016, ọke Omizu Cook ọrhẹ aniẹ a ghwẹrioma riẹ i Wallkill ibiesuọn, ne djerẹ aye riẹ Brooklyn, New York. Ibiamo isionrin a vrẹn, Omizu Cook ọrhẹ aniẹ ni kwa riẹ Warwick, New York ro rhiẹ esiri ukoko. Uvuẹn January 2017, na ha Omizu Cook mwu no rhiẹ ọrọ ha userhumu rẹn Umẹ Eyaya ọrẹ Ugboma Usuon na.