Ha Ividio Yono Emọ Uyono i Baibol Enọ

Ekwakwa re rhiẹromẹrẹn, a ha userhumu rẹn ihworho vwẹruọ emru jeghwai karorhọ oborẹ aye i yonorin. Oyono ọwan Rode ro rhiẹ i Jehova, ọ ha ekwakwa re rhiẹromẹrẹn e yono iyono eghoghanren. (Ge 15:5; Jer 18:1-6) Jesu ro ji rhiẹ Oyono ọduado ọ ji ha ekwakwa re rhiẹromẹrẹn yono ihworho. (Mt 18:2-6; 22:19-21) Aruẹ ekwakwa re rhiẹromẹrẹn rọ wian omamọ ikpe ezẹko rhe na yẹ ividio. Wa dabu ha ividio ruiruo ọke we yono emọ uyono i Baibol enọ?

E mwuegbe ividio ikpe rẹn ọwan ri na ha userhumu rẹn ọwan ha Iyẹnrẹn Esiri ro nẹ Obẹ Osolobrugwẹ Rhe! yono ihworho. E rurie neneyo urhomu-ẹmro ividio na o serhọ rhẹ enọ re ru kpoto uvuẹn ibroshọ na. Ibroshọ ọnana rọ ha uvuẹn i jw.org o vwo ekete ra na sabu hiẹn rọ karorhọ ọwan ọke ra na ha ividio na ruiruo. Habaye, ana ji sabu ha ividio erọrọ ruiruo sekpahen ẹbe ri ha usuẹn Ekwakwa ra ha Yono Ihworho na.

We yono ọmọ Uyono i Baibol ọnọ urhomu-ẹmro rọ vwọ sabu vwẹruọ ye? Gbinẹ ọ dẹrughwaroghwu ebẹnbẹn? Gba guọlọ ividio uvuẹn i jw.org® ọrhẹ JW Broadcasting® neneyo wu sabu mẹrẹn ọrẹ ọnọ sabu sa ye erhumu. Ọkezẹko wẹwẹ ọrhẹ ọmọ Uyono i Baibol na, ina sabu ni ividio na kugbe nẹ are i ta kpahiẹn.

Kibiamo kibiamo, e tiobọnu ividio ekpokpọ. We rhe ni ividio na, roro kpahen oborẹ wu ne ru sabu ha aye yono awọrọ.