Userhumu re Tiobọnu Rẹn Erẹ Oghwọghọ Kpregede ọ Phia Riẹn Uvuẹn 2022—Ẹguọlọ Imizu re Djephia

Baibol na ọ mẹraro taghene uvuẹn ọke ọwan na, ivweri, otọre ekpogho, emiamo, ọrhẹ “ekwakwa re mwuofẹn” ine buon omamọ. (Luke 21:10, 11) Ẹmro aruẹmẹrẹn enana i rugba rhọ uvwre ẹgbukpe ẹga ọrẹ 2022.a Jerẹ udje, uvweri re fiẹ obẹ Ukraine ọ hobọte iduduru ihworho ne. Ihworho buebun a ji rioja fọkiẹ emiamo i COVID-19. Habaye, oghwọghọ kpregede ra homaphia ọ hobọte ihworho buebun, jerẹ etọre ekpogho ri phiare obẹ Haiti, ọrhẹ igiribo egbogbanhon ri ghwọghọ ekwakwa obẹ Central America, Philippines, ọrhẹ ekete ezẹko uvuẹn Africa. Marhẹ Iseri Jehova i ru ha userhumu rẹn ihworho rẹ ekwakwa enana i phia riẹn?

Uvwre ẹgbukpe ẹga ọrẹ 2022, ukoko ame i ha userhumu rẹn ihworho ri rhiẹromẹrẹn oghwọghọ kpregede uvuẹn ekete ri te 200! Igho rọ joma bun te dollars oduduru 12, yẹ ame i ghwọghọ ne fọkiẹ userhumu re tiobọnẹ.b Djokarhọ oborẹ e ru ha igho re torori ha userhumu rẹn ihworho ri rhiẹromẹrẹn oghwọghọ kpregede uvuẹn ẹkwotọre eva.

Otọre ro Kpoghori Uvuẹn Haiti

Uvuẹn August 14, 2021, otọre ekpogho rọ gbanhonron omamọ nọ homaphia uvuẹn obọrẹ o riotọre uvuẹn Haiti. Ọrẹ omemwurhọ, Iseri Jehova awansa yi hwuru—imizu emẹse awanva ọrhẹ omizu ọhworhare owu. Enyerẹn oghwa imizu buebun i ghwọghọre, habaye aye a ji dẹrughwaroghwẹ omiamiamo ugboma ọrhẹ ọrẹ iroro. Omizu ọhworhare owu re se Stephane nọ tare: “Ihworho buebun i hwuru uvuẹn amwa ame, te erhirhiẹ taghene uvwre ibiamo eva, nẹ kọkprughwre kọkprughwre ye ruẹ irueruo orinmi esion.” Omizu ọhworhare ọrọrọ re se Éliézer nọ tare: “Iseri Jehova buebun e vwo oghwa-a, omaran ji te ewun, isabatu, ọrhẹ ekwakwa erọrọ aye i guọlọre. Uvwre ibiamo buebun, ofẹn no mwu ihworho fọkiẹ otọre ekpogho rọ phia vrẹn ne na.”

Ukoko ame ọ kiki ha userhumu phia. Oghọn Ukoko ọrẹ Haiti ni fa emaren buebun rhe, omaran ji te ibọkpọ, itapulini, ukpe, ọrhẹ charger ifonu ra ha ọrẹn ruiruo. Habaye, uvwre ẹgbukpe ẹga ọrẹ 2022, eghwa ri vrẹn 100 ya rharhumu bọn yanghene kwaphiẹ. Igho rọ vrẹn dollar oduduru ya ghwọghọ rhẹ owian ọnana.

Imizu ọwan i vwo ọdaremẹro kpahen ọnana omamọ. Lorette nọ tare: “Otọre ekpogho na ọ ghwọghọ oghwa ọrhẹ eyẹsuọ ame phẹlẹphẹlẹ. Ame erhe vwo oborẹ ame ina riọ-ọ. Ọrẹn, ukoko i Jehova o mevi kẹrẹ ame, ji yẹ ame i kemru kemru rẹ ame i guọlọre.” Micheline nọ tare: “Otọre ekpogho na ọ ghwọghọ oghwa rẹ omẹmẹ ọrhẹ emọ mẹ awanva e rhirhiẹ. Ẹrhomo ọvo yi mi sabu nẹ uvuẹn erhirhiẹ na, Jehova nọ ha userhumu rẹn ame nyoma ukoko yi. Vwana, ame i vwo omamọ oghwa rẹ ame e rhirhiẹ ne. Mi vwo omwemẹ rhọ ne, mi ne dje ọdaremẹro phia rẹn i Jehova ne.”

Ere suẹn dede i tobọ djokarhọ userhumu rẹ ame i tiobọnu na. Ọrọ hẹrote aghwẹlẹ ọduado rọ ha uvuẹn amwa re se L’Asile nọ tare: “Mi kpẹmerẹ are omamọ fọkiẹ izede ọphophẹrẹ rẹ are e tiobọnẹ userhumu. Mi ji kpẹmẹ are fọkime are a họghọ rẹn ere suẹn. Ọ merhoma ra mẹriẹn taghene are e vwo ufiuvwele igho-o. Ukpomaran, are i guọlọ ha userhumu phia. Ẹguọlọ yo mwu are kpare idjaghwẹ.”

Ogiribo Ọgbogbanhon re se Ana ro Zuru Uvuẹn Ẹkwotọre i Malawi Ọrhẹ Mozambique

Uvuẹn January 24, 2022, Ogiribo Ọgbogbanhon re se Ana no zuru uvuẹn Mozambique ọke oru, nọ rhọ dẹrughwaroghwẹ obọrẹ ọren o se gbe uvuẹn Malawi. Ogiribo ọnana nọ lẹrhẹ oso ọgbogbanhon rhọ, rọ gbanhonron omamọ. O vwerẹ ifi ra kpare ukpẹ, ghwọghọ ibriji buebun, ji lẹrhẹ ukude ọgbogbanhon phia.

Ogiribo na ọ hobọte Iseri Jehova ri vrẹn 30,000 uvuẹn Malawi ọrhẹ Mozambique. Charles ro rhiẹ omizu ọhworhare rọ ha userhumu phia, nọ tare: “Ọke mia mẹrẹn ojẹriọ imizu na ọrhẹ ekwakwa ri varẹ aye obọ ne, ẹhẹn mẹ no seriotọre omamọ.” Ọrọ mai biomu, ibiẹ emaren aye i vwori, ọrhẹ ewawọ aye ọ ghwọghọ hin. Eghwa aye buebun ọ ji ghwọghọ. Ọrẹ omemwurhọ, ane omizu ọhworhare owu ọrhẹ emọyen egbọtọ awanva i hwuru, ọke owọ aye o rhue.

Ogiribo na o mwuofẹn omamọ. Emrẹ ughwọdjọ owu urhiọke uvuẹn amwa i Nchalo, uvuẹn Malawi, ekrun i Sengeredo ni rhon edon ame rọ zẹ phẹphẹrẹ. Ukude o kwuẹ irhie eva ne! Omizu Sengeredo no brorhiẹn taghene aye i brokpakpa zẹ nẹ oghwa na. Ọnana orhienbro ẹghwanren, nime o jiri-i, ukude na nọ ghwọghọ oghwa aye. Nọ ghwọghọ enyerẹn oghwa aye ezẹko, ji kpare eri hẹrhẹre nyarhẹn. Ekrun na ni zẹ riẹ Aghwẹlẹ Uvie aye, rọ ha emrẹ iminiti 30 seri nẹ oghwa aye. Ọrẹn uvuẹn erhirhiẹ ọnana, inọke eva yẹ aye a sabu nya te yi. Ọke aye e te Aghwẹlẹ Uvie na, oma aye ọ kpọtọ ne, oma ọ ji ghwọghọ aye ne, ọrẹn aye i vwo omefuon.

Oghọn Ukoko ọrẹ Malawi ọrhẹ Mozambique ni ruẹ ẹkwaphiẹrhotọre ra na ha userhumu phia ogege. Aye ni tiobọnẹ ọkpọvi rẹn iniruo okinhariẹ ọrhẹ ekpako ukoko nẹ aye ni erhirhiẹ imizu na so, ji ha urhebro ọrhẹ obẹhatua rẹn imizu na. Na ha Umẹ rọ ha Userhumu Phia Ọke Oghwọghọ Kpregede (DRC) mwu, nẹ aye i ni owian na so, ji ha userhumu rẹn imizu ukoko na vwo emaren ọrhẹ ekwakwa erọrọ rẹ aye i guọlọre. Igho rọ vrẹn dollars 33,000 ya ha dẹ ekwakwa rẹn aye, na rha ghwọghọ igho rọ vrẹn dollars 300,000, bọn yanghene kwaphiẹ eghwa ri ghwọghọre.

Umẹ rọ ha Userhumu Phia Ọke Oghwọghọ Kpregede i ha igho na ruiruo izede ẹghwanren, maido ra mẹriẹn taghene ekwakwa ni ghanranren omamọ. Jerẹ udje, uvwre ibiamo irhiruẹ erukaro, flour ra ha ọka ru—ro rhiẹ emaren ra mai ria uvuẹn Malawi—nọ mọ ghanren omamọ. Pẹtrol nọ ji ghanren. Omarana, imizu na ni dẹ emaren buebun ọrhẹ ekwakwa erọrọ ra ha bọn oghwa rhotọre. Fọkiẹ ọnana, na rhẹriẹ rẹn aye kweku, habaye igho rẹ aye i ha kpare ehwan na orho bu-un.

Userhumu ọnana re tiobọnu na, ọ hobọte ihworho i Jehova omamọ. Felisberto ro rhiẹ omizu ọhworhare ro nẹ Mozambique rhe, nọ tare: “Mia ji mẹrẹn ukoko ọrọrọ ro ghwọghọ igho omana-a: tẹ ekwakwa ra ha bọn oghwa, igho ra ha kpare ihworho, era homakpahontọre wian owian ebanbọn, emaren, ọrhẹ urhebro ẹguọlọ. Owian ọnana ghwai udje ẹguọlọ imizu, ri Jesu ọ ta kpahen uvuẹn John 13:34, 35.” Ester ro rhiẹ ọmase uku obẹ i Malawi, rẹ oghwa ye ọ ghwọghọre nọ tare: “Ẹhẹn mẹ ọ taghare, nime mie vwo igho ro no te bọn oghwa ọrọrọ-ọ. Omarana, ọke imizu na a bọn oghwa ọrọrọ mẹ, nọ họhọre taghene mi ruẹ Paradais ne.”

Rẹ akpọ ọkpokpọ na o tiẹkẹrẹ ne na, ọwan e fiẹrorhọ taghene oghwọghọ kpregede ono bunrhọ bunrhọ. (Matthew 24:7, 8) Ọrẹn, ame i kpẹmirẹ are fọkiẹ itetoro are ro nẹ ẹhẹn rhe, o mwurun ame ero taghene ihworho i Jehova ina mẹrẹn userhumu rẹ aye i guọlọre. Oborẹ ene toro itetoro lele ọ ha uvuẹn donate.jw.org. Are nobiruo fọkiẹ uruemru ghwologhwolo are.