Oborẹ Ene ru ha Userhumu Phia Oghwọghọ Kpregede Ọrhọ Homaphia

Oghwọghọ kpregede ne buẹnrhọ buẹnrhọ inyenana. Oghwọghọ kpregede ọrhọ homaphia, o fori na dabu nyalele ẹkwaphiẹrhotọre ọke ra ha userhumu phia. Fọkiẹ ọnana, Ugboma Usuon na nọ ha awuiruo re se Disaster Relief Department mwu rhẹ oghọn ukoko ephian.

Imizu ri ha awuiruo ọrana i rhe rhon kpahen oghwọghọ kpregede, ogege aye ne se ekpako ri ha okogho ọrana nẹ aye i rhe oborẹ o rhiẹ ọdamẹ rẹn imizu na. Orhianẹ oghwọghọ na ọ vrẹn oborẹ imizu na ọvo ina sabu hẹrote, oghọn ukoko na no dje imizu ri mwuovwan nẹ aye i kobaro uvuẹn owian ra ha userhumu phia. Imizu erana ina sabu sa aye erhumu wian yanghene ta rẹn imizu nẹ aye i toro itetoro ekwakwa ra guọlọre, yanghene aye ina sabu dẹ ekwakwa ji ghaliẹ rẹn imizu na.

Erere buebun i havwiẹ aye i rha nyalele ẹkwaphiẹrhotọre ọnana. Ọ lẹrhẹ imizu na ja wian fughwẹ, suẹ ọyanghan yanghene ghwọghọ igho ọrhẹ ekwakwa re torori, ọrẹn imizu na arha nyalele ẹkwaphiẹrhotọre-e, ekwakwa ne biomẹ.

Imizu rẹ oghọn ukoko na ọ ha mwu ina sabu brorhiẹn uchunu igho rẹ aye ina ha ruiruo yanghene uchunu imizu ri na ha userhumu rẹn aye wian owian na. Aye ina sabu lele era wian owian igọmẹti uvuẹn okogho na tẹmro kugbe, fọkime ọnana ọnọ lẹrhẹ owian na phẹrẹ. Omarana, o fo nẹ ohworho ọvo o koko igho, kpare ekwakwa vwe imizu yanghene riẹ ekete oghwọghọ na ọ phia-a, jokpanẹ a ta rẹn ọravwọ no ru omaran.

Ọrẹn, oghwọghọ kpregede ọrhọ phia, ana ji sabu ha userhumu phia. (Heb 13:16) E vwo ẹguọlọ kpahen imizu ọwan! Me ya na sabu ru? Ọrọ mai ghanren, ana sabu nẹrhomo kpahen imizu rẹ oghwọghọ kpregede ọ phia riẹn na ọrhẹ era sa aye erhumu. Ana ji sabu toro itetoro fọkiẹ owian akpọ ephian. Ugboma Usuon na ọ ha omẹgbanhon na rẹn eghọn ukoko nẹ aye ọvo i brorhiẹn kpahen imizu ri mai guọlọ igho na. Orhianẹ owuowọnwan ọ ji guọlọ ha userhumu phia, ọnọ sabu fiobọrhọ ifọmu na Local Design/​Construction Volunteer Application (DC-50).

NI IVIDIO NA UKUDE RỌ SUẸ OGHWỌGHỌ OBẸ BRAZIL, ORHO RU GBA KPAHENRHỌ ONỌ ỌNANA:

Me yọ mai jo kpahen userhumu rẹ Iseri Jehova i tiobọnu ọke ukude o ku obẹ Brazil uvuẹn ẹgbukpe 2020?