Userhumu Ọgo Yẹ Ame A Harẹn Imizu Ukoko Ame Ọke Ebẹnbẹn?

Ọke oghwọghọ kpregede ọrhọ homaphia, ogege Iseri Jehova na ha userhumu harẹn imizu ukoko aye rẹ oghwọghọ na ọ hobọte. Oghẹnren omẹdamo enana, o dje oborẹ ẹguọlọ ame i vwori kpahen owuowọnwan okodo te. (John 13:34, 35; 1 John 3:17, 18) Izede ego yẹ ame e tiobọ nẹ userhumu?

Ame e toro igho. Ọke rẹ orhọmo ọgbogbanhon ọ homaphia uvuẹn Judea, Ilelikristi ukukaro re ha uvuẹn Antioch ni toro igho vwe imizu Ilelikristi erẹ aye. (Acts 11:27-30) Omaran ọ je havwọ, ọke rẹ ame e rhon taghene imizu ame ekete ezẹko uvuẹn akpọ na e dẹrughwaro ghwu erhirhiẹ ọgbogbanhon, ame ne ji toro igho nyoma ukoko ame na yẹ aye userhumu.—2 Corinthians 8:13-15.

Ame e tiobọ nẹ userhumu ọrẹ ugboma. Ekete oghwọghọ na ọ homaphia, ekpako na a damoma guọlọ imizu ukoko na owuowu nẹ aye mẹrẹn aye ephian, nọ jeghwai mwu aye ẹro taghene oma aye oserhọ. Umẹ rẹ a ha userhumu phia, a hẹrote emaren ẹghalẹ, ame rọ foron rẹ ana da, iwun rẹ ene kurhọ, ekete ene rhirhiẹ rhẹ imwu re simi oma. Iseri Jehova buebun ri vwo ona sansan a homakpanhotọre ha igho omobọ aye fa oma ya ha userhumu phia, jeghwai vwobọ rhẹ ẹkwaphiẹ eghwa rhẹ Kingdom Hall ri ghwọghọre. Omamọ onyerẹnkugbe rẹ ame ariẹ omamerhomẹ yen jerẹ ukoko, ọrhẹ irherhe rẹ ame i vwo nẹ ọke rẹ ame a wian kugbe, nọ lẹrhiẹ phẹrẹ ana mẹrẹn ekwakwa a guọlọre ọrhẹ ihworho re na wian owian uvuẹn ọke ukpokpogho. Dedevwo ame a ha userhumu phia harẹn erẹ ‘ọwan rhẹ aye i gbe fi uvuẹn esegburhomẹmro na,’ ame a je yẹ awọrọ userhumu, otoro ẹga aye a nya-a.—Galatians 6:10.

Ame a ha urhebro ro nẹ i Baibol phia jeghwai ru ẹhẹn ihworho te otọre. Erẹ oghwọghọ kpregede ọ phia riẹn e guọlọ omamọ urhebro. Uvwre ọke ọrana ame a mẹrẹn omẹgbanhon mie i Jehova, ‘Osolobrugwẹ urhebro ephian.’ (2 Corinthians 1:3, 4) Rhẹ aghọghọ, ame a ghalẹ iverhọ i Baibol rhẹ ihworho ẹhẹn aye ọ ghwọghọre, a yẹ aye imwuẹro taghene phẹrẹkpẹ Uvie Osolobrugwẹ ọnọ ha ukpokpogho ephian rẹ a so omiamiamo rhẹ oja-ẹriọ e toba.—Revelation 21:4.

• Mesoriẹ Iseri Jehova a sabu ha userhumu ogege ha phia ọke rẹ oghwọghọ kpregede ọrhọ phia?

• Urhebro i Baibol ego yẹ ame ena sabu harẹn eri vabọ oghwọghọ?