Kwaphiẹ Onyerẹnkugbe Ọnọ Rhẹ Jehova Rhọ

KẸGBUKPE KẸGBUKPE, idibo i Jehova a ghwẹrioma rhiẹ ukoko Ilele Kristi. Gbe roro kpahen “aghọghọ rode ono rhirhiẹ ye obẹ odjuwu,” ọke odibo owu ọrhọ ghwẹrioma rhe! (Luke 15:7, 10) Orhianẹ wu rharhumu rhiẹ ukoko na, vwo imwẹro taghene oma ọ merhen i Jesu, emakashe na, ọrhẹ Jehova ọke aye a mẹruọn taghene wu rharhumu rhiẹ ukoko na. Ọrẹn, ọke wa rharhumu bọn onyerẹnkugbe ọnọ rhẹ Jehova, wu na sabu vwo ebẹnbẹn. Me yẹ ebẹnbẹn na ezẹko, me yọ nọ sabu ha userhumu wẹn?

ME YẸ EBẸNBẸN NA?

Imizu buebun a wọnọn hasuẹ iroro esọsọ, ọke aye i rha ghwẹrioma rhiẹ ukoko na ne. Ọkezẹko wu vwẹruọ iroro Orodje David. Dedevwo a harhomu edandan ye ne, nọ tare: “Edandan mẹ i rhurhuru mẹ ba otọre.” (Ps. 40:12; 65:3) Ọke imizu ezẹko i rha ghwẹrioma bru i Jehova, ẹhẹn iborhin ọnọ sabu kpokpo aye yanghene ofa ọnọ sabu ro aye uvwre ẹgbukpe buebun. Isabelle,a re le nẹ ukoko ẹgbukpe rọ vrẹn 20, ọrhọ ta, “Ọ bẹn mẹ mi ne vwo imwẹro taghene Jehova ọnọ sabu harhomu mẹ.” Orhianẹ ẹhọn o seriotọre, onyerẹnkugbe ọnọ rhẹ Jehova ọnọ sabu dogho. (Prov. 24:10) Wu vwe jẹ ọrana phia wẹ-ẹn.

Owian aye ina rharhumu bọn onyerẹnkugbe aye rhẹ Jehova ọ lẹrhẹ ẹhẹn imizu ezẹko seriotọre. Ọke Antoine ọ rharhumu rhiẹ ukoko na, nọ tare: “Ni mie roro taghene ekwakwa mi yonorin jeghwai ru ọke mie rhie Olele Kristi, e sẹre mẹ ẹro ne.” Fọkiẹ aruẹ iroro erana, imizu ezẹko ina sabu ru sikẹnsikẹn aye ina kwaphiẹ onyerẹnkugbe aye rhẹ Jehova rhọ.

Jerẹ udje, ohworho rẹ ogiribo ọgbogbanhon ọ ghwọghọ oghwa ye ro vwo ẹguọlọ kpahen, ọnọ sabu vwo ọfiamu ọke ro roro kpahen ọke ọrhẹ omẹdamu ra guọlọre nọ rharhumu bọn yen. Omaran ọ ji havwọ, orhianẹ onyerẹnkugbe ọnọ rhẹ Jehova ọ ghwọghọre fọkiẹ ọdandan wu ruru, wu na sabu roro taghene ọnọ guọlọ omẹdamu ọgbogbanhon ne wu ki kwaphiẹrhọ. Ọrẹn, userhumu ọ havwiẹ.

Jehova ọ ha use rẹn ọwan: “Are i mọ, jenẹ ọwan kwaphiẹ ekwakwa serhọ uvwre ọwan.” (Isa. 1:18) Wu wian gbanhon ne, ne wu sabu “kwaphiẹ ekwakwa serhọ.” Jehova o vwo ẹguọlọ kpahuọn fọkiẹ omẹdamu ọrana. Gbe rorie: Wu yi Jehova oborẹ ọnọ ha djephia taghene Echu ọ mọrenfian!—Prov. 27:11.

Fọkime wu ghwẹrioma bru i Jehova, wu tikẹrẹ i Jehova rhọ ne, ọye o ji ve taghene ono tikẹruọ. (Jas. 4:8) Ọrẹn, o ji vwo ekwakwa erọrọ wu ne ruo vrẹn ọrẹ imizu na ina mẹrẹnvwrurhe taghene wu rharhumu rhiẹ ukoko na ne. O fori wu rhe ruẹ ẹguọlọ wu vwo kpahen Jehova ro rhiẹ Ọsẹ ọrhẹ Ugbehian ọnọ gbanhonrhọ. Marhẹ wu ne ruie lele?

BRU ẸKẸ WU NA SABU NYAMWU

Damoma bru ẹkẹ wu na sabu nyamwu. Ọnọ sabu rhirhiẹ taghene wu ji karorhọ irherhe wu vwo kpahen Jehova ọrhẹ ive yi kpahen obaro na. Ọrẹn, o fori ne wu vwo obọdẹn ẹkwaphiẹrhotọre, ro surhobọmwu aghwoghwo iyẹnrẹn esiri na ọrhẹ ọrẹ wu ne kwomakugbe imizu ukoko ọke ephian. Roro kpahen ẹkẹ enana.

Nẹrhomo vwe i Jehova ọke ephian. Jehova o vwẹruọ ọke ẹhọn orho kpokpuo fọkiẹ ọdandan wu ruru, rọ nọ sabu lẹrhiẹ bẹn wu na nẹrhomo vwe yi. (Rom. 8:26) Ọrẹn, “gbromarhọ ẹrhomo ẹnẹ,” ji ta rẹn Jehova oborẹ wu guọlọ rharhumu rhiẹ ugbehian yen te. (Rom. 12:12) Andrej ọrhọ ta: “Ẹhẹn mẹ okpokpiri mẹ omamọ, ofa ọ ji ro mẹ. Ọrẹn, mi rha nẹrhomo hin, iroro erana ne zien. Ni mie vwo omefuon rhọ.” Orhianẹ we rhe oborẹ wu na nẹrhomo kpahe-en, wu na sabu roro kpahen ẹrhomo ẹghwẹriẹ ọrẹ Orodje David rọ ha Psalms 51 ọrhẹ 65.

Yono i Baibol na ọke ephian. Ọnana ọnọ ha userhumu wẹn vwo esegburhomẹmro ọgbogbanhon, ji lẹrhẹ ẹguọlọ ọnọ kpahen Jehova kodorhọ. (Ps. 19:7-11) Felipe ọrhọ ta, “Fọkime mie vwo ẹkwaphiẹrhotọre mie ruẹ isese i Baibol ọrhẹ uyono omobọ-ọ, ni mi ruẹ oborẹ o biomu i Jehova evwan. Mia guọlọ vwanriẹn orusọ ọrana-a, omarana ni mi brorhiẹn mi ne ruẹ uyono omobọ ọke ephian.” Wu na ji sabu ruẹ omaran. Wu rha guọlọ userhumu ne wu sabu djẹ irhomu-ẹmro wu na ha ruẹ uyono omobọ, wu na sabu nekpẹn userhumu mie ugbehian ro te edje.

Rharhumu bọn obọdẹn onyerẹnkugbe rhẹ imizu ukoko na. Ihworho ezẹko ri ghwẹrioma rhiẹ ukoko na, e brudu taghene awọrọ ina ha ukẹro sakamu ni aye. Larissa ọrhọ ta: “O fa ọ roro mẹ omamọ. Ni mie roro taghene mi ruẹ oborẹ ọnọ jọ lẹrhẹ oma merhen imizu ukoko na. Mi lele iroro erana wọnrọn uvwre ọke jijiri.” Vwo imwẹro taghene ekpako na ọrhẹ imizu erọrọ ri te edje i vwo omwemẹ aye ina ha userhumu wẹn rharhumu rhiẹ ugbehian i Jehova. (Se ekpeti na “Me yẹ Ekpako Ina Sabu ru?”) Oma ọ merhen aye taghene wu ghwẹrioma rhe, aye i ji guọlọ nẹ oma ọ merhuọn!—Prov. 17:17.

Me yọ nọ sabu ha userhumu wẹn tikẹrẹ ukoko na rhọ? Fiomarhọ oborẹ imizu ukoko na e ruẹ, nọyẹ uyono ukoko ẹnya ọrhẹ re vwobọrhọ owian aghwoghwo na ọke ephian. Marhẹ enana ine ru ha userhumu wẹn? Felix ọrhọ ta: “Imizu ukoko na i fiẹrorhọ ọke mi na ghwẹrioma rhe. Oma ọ merheren mẹ. Aye ephian i ha userhumu mẹ rharhumu rhiẹ usuẹn ukoko na, rhe taghene a harhomi mẹ ne, ji lẹrhe mẹ rha ga i Jehova rhọ.”—Se ekpeti na “Me wu na Sabu ru?”

WU VWE FIOBỌRHOTỌRE-E!

Echu ọnọ rhọ ha “ebẹnbẹn” vwe ọwan, nẹ aye i lẹrhẹ onyerẹnkugbe ọwan rhẹ Jehova seriotọre. (Luke 4:13) Mwuegbe wu na bọn onyerẹnkugbe ọnọ rhẹ Jehova gbanhon vwana.

Sekpahen idibo yi, Jehova orho ve: “Mi na guọlọ ọro vruru, mi na rharhumu ha ọro begheri na rhe, mi na hẹrote ọrọ konron, mi ne ji ruẹ ọrọ vwiẹlẹre nọ gbanhon.” (Ezek. 34:16) Jehova ọ ha userhumu rẹn ihworho buebun kwaphiẹ onyerẹnkugbe aye rhẹ ọye rhọ ne. Vwo imwẹro taghene ọ guọlọ ha userhumu wẹn rhe vwo onyerẹnkugbe ọgbogbanhon rhẹ ọye.

Me yẹ Ekpako Ina Sabu ru?

Ekpako na i vwo owian ọghoghanren aye ina ha userhumu rẹn imizu ri ghwẹrioma rhiẹ ukoko na, nẹ aye i kwaphiẹ onyerẹnkugbe aye rhẹ Jehova rhọ. Djokarhọ oborẹ aye ina sabu ru rẹn imizu na.

Yẹ aye imwẹro. Ọnyikọ Paul o rheri taghene oruọdandan rọ ghwẹriẹre ọnọ sabu “mwuomarhọ phan.” (2 Cor. 2:7) Ọnọ sabu rhe vwo ẹhẹn iborhin ọrhẹ ofa. Paul nọ ha urhebro rẹn ukoko na: “Are i harhomie ji yẹ ye urhebro.” O fori na yẹ imizu ri ghwẹrioma rhiẹ ukoko na imwẹro taghene Jehova ọrhẹ imizu ukoko na i vwo ẹguọlọ kpahen aye. Erhe jiri aye, ji yẹ aye userhumu re rhiẹromẹrẹn, ọnọ sabu lẹrhẹ ẹhẹn aye je seriotọre.

Lele aye nẹrhomo kugbe. “Ẹrhomo ọvwata o vwo omẹgbanhon omamọ.” (Jas. 5:16) Larissa, ra hunute vrẹn ne, ọrhọ ta: “Ni mi ta rẹn ekpako na kpahen ẹhẹn eveva ọrhẹ ofẹn mi vwori. Aye ni leliri mẹ nẹrhomo kugbe. Ọke ọrana ni mi mẹrẹnvwrurhe taghene ekpako na i vwa tuekwẹre kpahen mẹ-ẹ. Aye i guọlọ ha userhumu mẹ kwaphiẹ onyerẹnkugbe mẹ rhẹ Jehova rhọ.” Theo ọrhọ ta: “Ẹrhomo ekpako na ọ yẹre mẹ imwẹro taghene Jehova o ghini vwo ẹguọlọ kpahen mẹ, ọ ji mẹrẹn iruemru irhorhomu mi vwori, orhiẹ obiobiomu ọvo-o.”

Ha aye mwu igbehian. Imizu ri rharhumu bru i Jehova i guọlọ igbehian uvuẹn ukoko na. Ọkpako owu re se Justin ọrhọ ta, “Guọlọ uphẹn ephian wu ne lele aye wian uvuẹn aghwoghwo na, ọrọ mai ghanren kọn bru aye uvuẹn oghwa aye. Ọghanranren ne rhiẹ ugbehian aye!” Ọkpako ọrọrọ re se Henry ọrhọ ta, “Awọrọ uvuẹn ukoko na i rha mẹrẹn ekpako na, ra ha imizu ri ghwẹrioma rhiẹ ukoko na mwu ugbehian, aye na ji ha aye mwu ugbehian.”

Ha userhumu rẹn aye yono. Ugbehian ro te edje ọnọ sabu ha userhumu rẹn omizu rọ ghwẹrioma bru i Jehova, no vwo ẹkwaphiẹrhotọre uyono omobọ. Ọkpako owu re se Darko, ọrhọ ta: “Oma ọ merhen mẹ mi na ta rẹn awọrọ kpahen oborẹ mi yono nẹ uyono omobọ mẹ, ji dje rẹn aye oborẹ mia riamerhen uyono i Baibol te. Mie ji vwo ẹkwaphiẹrhotọre mi ne lele aye yono irhomu-ẹmro ezẹko kugbe.” Ọkpako ọrọrọ re se Clayton, ọrhọ ta: “Mie jirie rẹn aye nẹ aye i guọlọ iyẹnrẹn i Baibol rọ họhọ oborẹ aye rhiẹromẹrẹn ne, ọrhẹ oborẹ aye ina sabu yono nie rhe.”

Kọn bru aye. Eri ghwẹrioma rhiẹ ukoko na, i mẹrẹn ẹrhẹ oguẹnzọn rẹ ekpako i havwọ ne. Vwana, vrẹn ọke bi, o fori nẹ ekpako i rhiẹ era hẹrote aye. (Jer. 23:4) Rha kiki kerhọ, ji mwuegbe wu na ha ekpẹmẹ phia. Rhe lele aye tẹmro ọke ephian. Djokarhọ oborẹ ọkpako owu re se Marcus, o ruẹ ọrhọ kọn bru imizu na: “Ame e se ekete nẹ i Baibol na, jiri aye, ji yẹ aye imwẹro taghene oma ọ merhen ame ọrhẹ Jehova taghene aye a wian gbanhan nẹ aye i sabu bru i Jehova. Uvuẹn ehion ẹkwaphiẹrhotọre ọrana, ame ne bru ẹdẹ ame ina ghwẹrioma rhe.”

a E wene edẹ ihworho uvuẹn urhomu-ẹmro ọnana.