Wu Vwe Jenẹ Emru Owuorowu Lẹrhuọ Sẹrerhumuji Jehova-a

1. Marhẹ e ru rhe taghene Jehova ọ guọlọre ne tikẹriẹ?

JEHOVA ọ ha use rẹn ọwan ne tikẹriẹ. (Jas. 4:8) Ọ guọlọ rhiẹ Osolobrugwẹ, Ọsẹ ọrhẹ Ugbehian ọwan. Ọ kpahenrhọ ẹrhomo ọwan, ji ha userhumu phia uvwre ọke ebẹnbẹn. Habaye, ọ ha ukoko yi yono, ji sẹrorẹ ọwan. Me ye ne vi ru na sabu tikẹrẹ i Jehova rhọ?

2. Marhẹ ene ru tikẹrẹ i Jehova rhọ?

² Ana sabu tikẹrẹ i Jehova nyoma ra na nẹrhomo vwe yi, rhe se i Baibol na, ji roro kodo kpahiẹn ọke ephian. Erhe ruẹ omaran, ẹguọlọ ọrhẹ ọdaremẹro re vwo kpahiẹn no no kodorhọ. Ọrana no mwu ọwan huvwele yi, ji ha ujiri rọ dabu mwuovwan yen riẹn. (Rev. 4:11) Ọke erhe yono kpahen Jehova rhọ, na hẹrosuiẹ ọrhẹ ukoko yi rhọ, ro tiobọnu nọ ha userhumu rẹn ọwan.

3. Marhẹ i Dẹbolo o ru damoma rọ nọ hẹriẹ ọwan nẹ obọrẹ i Jehova, ọrẹn me yọ nọ ha userhumu rẹn ọwan ja sẹrerhumuji Jehova ọrhẹ ukoko yi? (Psalm 31:13, 14)

³ Ọrẹn, Dẹbolo ọ damoma rọ nọ hẹriẹ ọwan nẹ obọrẹ i Jehova, maido ọke arha dẹrughwaroghwu ebẹnbẹn. Marhẹ o ruie lele? Nyoma ro ruie bibiesuọn bibiesuọn na ja hẹroso i Jehova ọrhẹ ukoko yi. Ọrẹn, ana sabu tiẹn ena yen. Ọke erhe vwo esegburhomẹmro ọrhẹ ẹruẹhaso ọgbogbanhon kpahen Jehova, ọwan i sẹrerhumuji Jehova ọrhẹ ukoko yi-i.​—Se Psalm 31:13, 14.

4. Me ye ne yono kpahen uvuẹn urhomu-ẹmro ọnana?

⁴ Uvuẹn urhomu-ẹmro ọnana, ene yono kpahen ebẹnbẹn esa ri na sabu nẹ abọ ihworho ri vwa ha urhomẹmro na rhe; owuowu ọnọ sabu lẹrhẹ ọwan ja hẹroso i Jehova ọrhẹ ukoko yi. Marhẹ ebẹnbẹn enana ine ru lẹrhẹ ọwan sẹrerhumuji Jehova? Me ye ne ruo na sabu fiẹ omẹdamu Echu kparobọ?

ARHA DẸRUGHWAROGHWU AKPENYERẸN ỌGBOGBANHON

5. Marhẹ ebẹnbẹn ine ru lẹrhẹ ọwan ja hẹroso i Jehova ọrhẹ ukoko yi?

⁵ Ọkezẹko, ọwan e rhiẹromẹrẹn akpenyerẹn ọgbogbanhon​—jerẹ udje, ekrun ra kparahaso ọwan, yanghene iruo rọ vare ọwan obọ. Marhẹ aruẹ ebẹnbẹn erana ine ru lẹrhẹ ọwan ja hẹroso ukoko i Jehova, ji lẹrhẹ ọwan sẹrerhumuji Jehova? Erhe diẹn ebẹnbẹn uvwre ọke jijiri ne, ẹhẹn ọwan ọnọ sabu seriotọre ji roro taghene erhe vwo ifiẹrorhọ-ọ. Echu ọ ha aruẹ uphẹn erana ruiruo, ji damoma lẹrhẹ ọwan vwo ẹhẹn eveva kpahen ẹguọlọ i Jehova. Dẹbolo ọ guọlọre ne roro sẹ Jehova yanghene ukoko yi, yọ suẹ ojẹriọ ọwan. Aruẹ emru omaran ọ ji phia rẹn emọ Israel ezẹko uvuẹn Egypt. Ọke ukaro, aye i kweri taghene Jehova ọ ha i Moses ọrhẹ Aaron mwu, nẹ aye i simi aye nẹ erhirhiẹ evrẹn. (Ex. 4:29-31) Ọrẹn, ọke i Pharaoh o ruẹ akpọ bẹn rẹn aye, aye ne kperi Moses ọrhẹ Aaron fọkiẹ ebẹnbẹn aye, nyoma aye a ta: “Are i lẹrhẹ i Pharaoh ọrhẹ idibo yi vwo utuoma kpahen ame ne, are i ji yẹ aye odan ọlọkọ aye ina ha kpe ame hwu ne.” (Ex. 5:19-21) Aye ne kperi idibo i Jehova. Ọrana ọ miamo oma! Orhianẹ we diẹn ebẹnbẹn uvwre ọke jijiri ne, marhẹ wu ne ru rha hẹroso i Jehova ọrhẹ ukoko yi rhọ?

6. Me ye yono mie ọmẹraro Habakkuk kpahen ọrẹ ene diẹn ebẹnbẹn? (Habakkuk 3:17-19)

⁶ Ta ọsoso ẹhọn rẹn Jehova uvuẹn ẹrhomo, ne wu ji guọlọ userhumu ọnẹyen. Ọmẹraro Habakkuk ọ dẹrughwaroghwu ebẹnbẹn buebun. Uvwre ọke owu, nọ họhọre taghene o vwo ẹhẹn eveva sẹ Jehova o ghini vwo ọdamẹ kpahiẹn. Omarana, nọ ta iroro yi rẹn Jehova uvuẹn ẹrhomo. Nọ tare: “Marhẹ ono jiri te, O Jehova mi ne kperi se owẹwẹ ne wu ha userhumu mẹ, ọrẹn wu vwe rhon mẹ-ẹ? . . . Mesoriẹ wa nyajẹ osehiẹn vwo no rhirhiẹ ye?” (Hab. 1:2, 3) Jehova ọ kpahenrhọ ẹrhomo ọrana ro nẹ ẹhẹn rhe rẹ Habakkuk ọ nẹren na. (Hab. 2:2, 3) Ọke ro roro kodo kpahen irueruo usimi Jehova hin, Habakkuk nọ rharhumu vwo aghọghọ. No vwo imwẹro rhọ taghene Jehova ọ hẹrote yi, habaye ọnọ ha userhumu riẹn diẹn ebẹnbẹn ephian. (Se Habakkuk 3:17-19.) Me ye yonorin? Arha dẹrughwaroghwu ebẹnbẹn, ofori na nẹrhomo vwe i Jehova ji ta riẹn oborẹ ọ ha ẹhẹn ọwan. Orho ru, gba guọlọ obẹhatua ọnẹyen. Erhe ruẹ omaran, ana sabu vwo imwẹro taghene Jehova ọnọ yẹ ọwan omẹgbanhon ra guọlọre na sabu vwo edirin. Arha mẹrẹn oborẹ ọ ha userhumu rẹn ọwan lele, esegburhomẹmro ọwan nọ gbanhanrhọ.

7. Me yẹ ohworho ekrun i Shirley owu ọ tare, me yọ ha userhumu rẹn Shirley ja lẹrhẹ esegburhomẹmriẹn kpahen Jehova seriotọre?

⁷ Rhe ruẹ ekwakwa ra lẹrhuọ tikẹrẹ i Jehova. Ọrana yẹ oborẹ ọ ha userhumu rẹn Shirley, omizu ọmase ro rhirhiẹ Papua New Guinea, ọke rọ dẹrughwaroghwu akpenyerẹn ọgbogbanhon.b Ekrun Shirley ivwiegbere, ọkezẹko ọ bẹn aye ina mẹrẹn emaren ro te rẹn aye. Ohworho ekrun aye owu nọ damoma rọ nọ lẹrhiẹ ja hẹroso i Jehova. Nọ tare: “Wa ta taghene ẹhẹn ọfuanfon Osolobrugwẹ ọ ha userhumu wẹn, nẹ userhumu na ne? Ekruon ọ ji ha erhirhiẹ ogbere. We kpọke fughwẹ riẹ aghwoghwo.” Shirley nọ tare: “Ni mi nọ oma mẹ: ‘Jehova o vwo ọdamẹ kpahen ame gbinẹ o vwo ọdamẹ ame-e?’ Omarana, ni mi nẹrhomo vwe i Jehova ogege, ji ta riẹn kemru kemru rọ ha ẹhẹn mẹ. Ni mie se i Baibol na ọrhẹ ẹbe ukoko na sansan, ni mie ghwoghwo, ji riẹ uyono ukoko.” O jiri-i, Shirley nọ mẹrẹnvwrurhe taghene Jehova ọ hẹrote ekruien bi. Orhọmo o kpe ekruie-en, oma ọ ji merhen aye. Shirley nọ tare: “Ni mi mẹrẹnvwrurhe taghene Jehova ọ kpahanrhọ ẹrhomo mẹ.” (1 Tim. 6:6-8) We rhe vwobọrhọ ekwakwa re ruẹ esegburhomẹmrọ gbanhan, wu ha uphẹn rẹn ebẹnbẹn yanghene ẹhẹn eveva nọ lẹrhuọ sẹrerhumuji Jehova-a.

ERHE SEHIẸN IMIZU RA KOBARO UVUẸN UKOKO NA

8. Me yọ nọ sabu phia rẹn imizu ra kobaro uvuẹn ukoko i Jehova?

⁸ Nyoma oghwa iyẹnrẹn ọrhẹ itanẹti, evwreghrẹn ọwan ne kerabọ efian evwiavwia kpahen imizu ra kobaro uvuẹn ukoko i Jehova. (Ps. 31:13) E mwu imizu ukoko na ezẹko rhẹ ekanron, ji mọrenfian baren aye taghene aye i haso urhi. Ilele Kristi erukaro na, i ji rhiẹromẹrẹn aruẹ erhirhiẹ ọrana, ọke ra mọrenfian baren ọnyikọ Paul, ji mwuien riẹ ekanron. Marhẹ aye i kpahenrhọ ye lele?

9. Marhẹ Ilele Kristi ezẹko i ru lele ọke re mwu ọnyikọ Paul rhẹ ekanron?

⁹ Ilele Kristi erukaro na ezẹko, i vwa rha ha userhumu rẹn ọnyikọ Paul ọke re mwuien rhẹ ekanron obẹ Rome-e. (2 Tim. 1:8, 15) Mesoriẹ? Ofa ọ ruo aye kpahen Paul fọkime ihworho a ta taghene ọ haso urhi? (2 Tim. 2:8, 9) Gbinẹ ofẹn o mwu aye taghene ana ji kparehaso aye? Oborẹ iroro na ọ havwọ ephian, o mwẹro taghene oma ọ merhen i Pau-ul. Ọye o diẹn ebẹnbẹn buebun ne, ji tobọ fiẹ arhọ ye rhẹ erhirhiẹ imwofẹn fọkiẹ aye. (Acts 20:18-21; 2 Cor. 1:8) E vwe ru jerẹ Ilele Kristi erana ri sẹrerhumuji Paul uvwre ọke ebẹnbẹn ye-en! Me yo fori ne vwo rhẹ ẹhẹn ọke arha kparehaso imizu ra kobaro uvuẹn ukoko na?

10. Me yo fori na karorhọ ọke arha kparehaso imizu ra kobaro uvuẹn ukoko na, mesoriẹ?

¹⁰ Karorhọ oborẹ ọsoriẹ a kparahaso ọwan ọrhẹ ohworho rọ soriẹ. 2 Timothy 3:12 ọrhọ ta: “Ana kparehaso ọsoso ihworho ri guọlọ hẹrokele i Kristi Jesu nyerẹn akpọ ọ ga Osolobrugwẹ.” Omarana, o vwo gbe ọwan unu ọke Echu ọrhọ vi kparehaso imizu ra kobaro-o. Ọ guọlọre nẹ imizu enana i dobọ ogame i Jehova ji, nẹ ofẹn o ji mwu ọwan.​—1 Pet. 5:8.

11. Me ye yono nẹ udje Onesiphorus? (2 Timothy 1:16-18)

¹¹ Rha hobọtua imizu ukoko na, ji vwo atamwu kpahen aye. (Se 2 Timothy 1:16-18.) Owuọwan usuẹn Ilele Kristi erukaro na re se Onesiphorus o vwo ọdamẹ kpahen Paul ọke re mwuien rhẹ ekanron. “Ofa ọ ruiẹ fọkiẹ ejọrọ ri ha obọ [i Pau-ul].” Ukpomaran, Onesiphorus nọ guọlọ i Paul, ọke rọ mẹriẹn, nọ damoma ha userhumu riẹn rhẹ oborẹ ọ guọlọre. Nyoma ọnana, Onesiphorus no fiẹ arhọ ye rhẹ erhirhiẹ imwofẹn. Me ye yonorin? O fo na lẹrhẹ ofẹn onyakpọ nọ lẹrhẹ ọwan ghweghwe-e, yanghene lẹrhẹ ọwan ja ha userhumu rẹn imizu ukoko na ra kparahasua-a. Ukpomaran, je na chochọn aye, ji ha userhumu rẹn aye. (Prov. 17:17) Aye i guọlọ obẹhatua ọrhẹ ẹguọlọ ọwan.

12. Me ye yono mie imizu ukoko na ri ha Russia?

¹² Roro kpahen oborẹ imizu ukoko na obẹ i Russia, i ru ha userhumu rẹn imizu re firhọ ekanron ne. Ọke re guẹnzọn imizu na ezẹko, imizu ukoko na buebun ne riẹ oghwa ẹghware na ya hobọtua aye. Me ye yonorin? Ọke arha mọrenfian banren imizu ra kobaro, mwu aye rhẹ ekanron yanghene kparehaso aye, wu vwa zofẹ-ẹn. Nẹrhomo rẹn aye, hẹrote ihworho ekrun aye, ji guọlọ izede wu ne ru hobọtua aye.​—Acts 12:5; 2 Cor. 1:10, 11.

IHWORHO ARHA HA ỌWAN DJECHẸẸ

13. Marhẹ echẹdjẹ ono ru lẹrhẹ ọwan ja hẹroso i Jehova ọrhẹ ukoko yi?

¹³ Ihworho ekrun ri vwe rhiẹ Iseri Jehova, ere lele wian, yanghene emọ re lele riẹ isukuru, ina sabu ha ọwan djechẹẹ fọkiẹ owian aghwoghwo na, yanghene fọkime ọwan e nyerẹn lele irhi egbagba i Jehova. (1 Pet. 4:4) Aye ina sabu ta: “Aruẹ ohworho wu havwọ o jeri mẹ, ọrẹn urhi ogame ọnọ ọ gbanhon phan, yanghene orhiẹ ahwanren ne.” Ezẹko ina sabu ha ọwan guẹnzọn fọkiẹ oborẹ e nyerẹn lele rhẹ ihworho re le nẹ ukoko, rẹ aye ina ta: “Ọrana o dje ẹguọlọ phia-a.” Aruẹ ẹmro erana ina sabu lẹrhẹ ọwan vwo ẹhẹn eveva. Ana sabu rhe roro: ‘Jehova ọ guọlọre ne mi ru vrẹn oborẹ mi na sabu ru? Urhi ukoko yi ọ ghini gbanhon phan?’ Wa rha dẹrughwaroghwu aruẹ erhirhiẹ ọrana, marhẹ wu ne ru daji kẹrẹ i Jehova ọrhẹ ukoko yi?

14. Marhẹ ana kpahenrhọ ye lele ọke ihworho arha ha ọwan djechẹẹ fọkime a nyalele irhi Jehova? (Psalm 119:50-52)

¹⁴ Brorhiẹn wu na nyalele irhi Jehova. Job ohworho rọ nyalele irhi egbagba i Jehova udabọ echẹdjẹ. Owuọwan ro ruẹ kamẹriẹn ọye ugbehian i Job, ọ damoma rọ nọ lẹrhiẹ vwo imwẹro taghene Jehova o vwo ọdamẹ kpahiẹ-ẹn, sẹ o ruẹ oborẹ ọgbare yanghene oborẹ obiomurun. (Job 4:17, 18; 22:3) Ọrẹn, Job o kwerhọ efian erana-a. O rheri taghene irhi Jehova kpahen oborẹ orhomurun ọrhẹ oborẹ ọsọre, i gbare, no ji brorhiẹn rọ nọ nyalele aye. Ọ ha uphẹn rẹn awọrọ nẹ aye lẹrhiẹ ja sẹrorẹ emevigbanhon ọnẹye-en. (Job 27:5, 6) Me ye yonorin? Wu vwa ha uphẹn rẹn echẹdjẹ nọ lẹrhuọ vwo ẹhẹn eveva kpahen irhi Jehova-a. Roro kpahen oborẹ wu rhiẹromẹrẹn ne. Ọgbọ buebun, wu mẹrẹnvwrurhe ne taghene irhi Jehova i gbare, aye a ji yẹ ọwan erere. Omarana, brorhiẹn wu na hobọtua ukoko rọ nyalele irhi erana. Ọke ọrana, o vwo echẹdjẹ ro nẹ ekete owuorowu rhe, rọ nọ lẹrhuọ dobọ ogame i Jehova ji-i.​—Se Psalm 119:50-52.

15. Mesoriẹ a ha i Brizit djechẹẹ?

¹⁵ Roro kpahen oborẹ ọ phia rẹn Brizit, omizu ọmase ro rhirhiẹ India. Ihworho ekruien i hariẹ djechẹẹ fọkiẹ esegburhomẹmriẹn. Ọke rọ ghwai bromarhame hin uvuẹn ẹgbukpe 1997, iruo esa ye ro vwo rhiẹ Oseri Jehova nọ variẹ abọ. Omarana, esa ye no brorhiẹn taghene ọye, Brizit ọrhẹ emọyen egbọtọ ine ye lele eri vwiẹriẹ ri ha amwa ọrọrọ rhirhiẹ. Ọrẹn, Brizit nọ dẹrughwaroghwu ebẹnbẹn egbogbanhon erọrọ. Fọkime esa ye o vwo iruo-o, ọye nọ yọ wian hẹrote ekrun na. Habaye, ekete ukoko ọ havwọ o seri te 350 kilometers (iroko 220). Ọrẹ omemwurhọ, ekrun esa ye ni kparehaso esegburhomẹmro ọnẹyen. Erhirhiẹ na nọ gbanhonron omamọ te erhirhiẹ ekrun Brizit a rharhumu kwa. Ọke oru, esa ye no hwuru kpregede. Ọrana o nie, owu usuẹn emọyen egbọtọ no hwuru fọkiẹ emiamo ikansa ọke rọ ha ẹgbukpe 12. Haba erhirhiẹ erana, ekrun Brizit na ta taghene ọye yọ suẹ ekwakwa erana. Aye na ta taghene orhianẹ o kwomakugbe Iseri Jehova-a, manẹ ekwakwa ibiobiomu erana i vwa phia-a. Ọrẹn, Brizit ọ hẹroso i Jehova, ji daji kẹrẹ ukoko yi.

16. Marhẹ i Brizit o ru mẹrẹn ebrurhọ fọkime ọ daji kẹrẹ i Jehova ọrhẹ ukoko yi?

¹⁶ Ra mẹriẹn taghene ekete i Brizit o rhirhiẹ, o seri nẹ ekete ukoko na ọ havwọ, oniruo okinhariẹ owu no jiririe riẹn no ghwoghwo rẹn ihworho ri ha ekete ro rhirhiẹ, no ruẹ uyono ukoko uvuẹn oghwa ye. Ọke ukaro, no roro taghene ọnọ bẹn. Ọrẹn, nọ nyalele ọkpọvi na. No ghwoghwo rẹn ihworho, ruẹ uyono ukoko uvuẹn oghwa ye, ji fi ọke rhotọre ruẹ ogame ekrun rhẹ emọyen egbọtọ. Me yo nerhumie rhe? Brizit ọ sabu tuẹn uyono i Baibol rhọ, buebun aye ni ji bromarhame. Uvuẹn ẹgbukpe 2005, nọ ga ẹrhẹ ọkobaro. Fọkime ọ hẹroso i Jehova ji vwo atamwu kpahen ukoko yi, nọ mẹrẹn ebrurhọ. Emọyen egbọtọ a fuevwan ga i Jehova, vwana ukoko eva yi ha uvuẹn okogho ọrana! Brizit o vwo imwẹro taghene Jehova yọ yẹriẹ omẹgbanhon rọ sabu nyerẹn ghele ebẹnbẹn erana, ji diẹn echẹdjẹ ekruien.

SẸRORẸ ATAMWU KPAHEN JEHOVA ỌRHẸ UKOKO YI

17. Me yo fori ne brorhiẹn re ne ruo?

¹⁷ Echu ọ guọlọre ne vwo imwẹro taghene Jehova ọ sẹrerhumuji ọwan vwo uvuẹn ọke ebẹnbẹn, habaye arha hobọtua ukoko i Jehova, ọnọ lẹrhẹ akpọ bẹn harẹn ọwan. Echu ọ guọlọre nẹ ofẹn o mwu ọwan ọke arha mọrenfian banren era kobaro uvuẹn ukoko na, kparehaso yanghene fiẹ aye rhẹ ekanron. Nyoma echẹdjẹ, ọ guọlọre ne vwo ẹhẹn eveva kpahen irhi Jehova ọrhẹ ukoko yi. Ọrẹn, ọwan i dabu rhe kpahen ena ọkon enẹyen, aye i vwa rha phiẹ ọwan rhọ-ọ. (2 Cor. 2:11) Brorhiẹn wu na tiẹn efian Echu, ji sẹrorẹ atamwu ọnọ kpahen Jehova ọrhẹ ukoko yi. Karorhọ, Jehova ọ sẹrerhumuji owẹwẹ vwo-o. (Ps. 28:7) Omarana, wu vwe je emru owuorowu lẹrhuọ dobọ ogame i Jehova ji-i!​—Rom. 8:35-39.

18. Me ye ne yono kpahen uvuẹn urhomu-ẹmro rọ ha kpahen ọnana?

¹⁸ Uvuẹn urhomu-ẹmro ọnana, e yono kpahen ebẹnbẹn ri na sabu nẹ abọ ihworho ri vwa ha ukoko na rhe. Ọrẹn, imizu ukoko na ina ji sabu damu ẹruẹhaso re vwori kpahen Jehova ọrhẹ ukoko yi ni. Marhẹ ene ru fie aruẹ ebẹnbẹn erana kparobọ? Ene yono kpahiẹn uvuẹn urhomu-ẹmro rọ ha kpahen ọnana.