Wu Mwuegbe ne wu na “ha Otọrakpọ na Riuku”?
ỌWAN hẹrhẹ ọke ive i Jesu ọnana ono rugba: “Omamerhomẹ ọ havwiẹ harẹn ihworho dẹndẹn, fọkime aye ina ha otọrakpọ na riuku.” (Matt. 5:5) Era djẹha na ina ha otọrakpọ na riuku nyoma aye ine sun ẹrhẹ irodje obẹ odjuwu rhẹ i Jesu. (Rev. 5:10; 20:6) Ilele Kristi buebun inyenana a tẹnrovi ọke aye ina ha otọrakpọ na riuku, nẹ aye i nyerẹn bẹmẹdẹ uvuẹn erhirhiẹ ọgbagba, ọrẹ ufuoma ọrhẹ omamerhomẹ. Nẹ ọrana ọ sabu phia, aye i vwo ewian eghoghanren aye ina wian. Jena ta kpahen esa vwọye: aye ine ruẹ otọrakpọ na rhiẹ Paradais, hẹrote era rhọmọnuhwu, ji yono aye. Ji roro kpahen oborẹ wu ne ru djephia vwana taghene wu guọlọ ruẹ ekwakwa erana.
MWUEGBE WU NE RUẸ OTỌRAKPỌ NA RHIẸ PARADAIS
Ọke i Jehova o jurhi rẹn ituakpọ taghene aye “i vuọn akpọ na jeghwai hẹrote yi,” no djephia taghene ọsoso otọrakpọ na ono rhiẹ i paradais. (Gen. 1:28) Ihworho ri na ha otọrakpọ na riuku ina huvwele urhi ọrana. Otọrakpọ na o rhiẹ i paradais ọke ọtonrhọ-ọ, fọkime ogba Eden ọrhọ havwiẹ-ẹ. Ewian buebun i havwiẹ ra na wian Armageddon ọrhọ vrẹn hin, re ne ruẹ ekete ri ghwọghọre vwana fon. Ọrana ọ ghini guọlọ owian ọgbogbanhon!
Ọnana nọ karorhọ ọwan kpahen owian emọ Israel i wianren ọke aye e nẹ Babylon rhe. O vwo ọro rhirhiẹ otọre na emrẹ ẹgbukpe 70 ne-e. Ọrẹn, ọmẹraro Isaiah nọ tare taghene nyoma ebrurhọ i Jehova, aye ina sabu kwaphiẹ ye rhọ. Aruẹmẹrẹn ọrana ọrhọ ta: “Ono ruẹ ato ọnẹyen jerẹ Eden, ọrhẹ ekete enẹyen ri kare jerẹ ogba i Jehova.” (Isa. 51:3) Emọ Israel ni ghini fikparobọ. Omaran ọ ji havwọ, nyoma ebrurhọ i Jehova, eri na ha otọrakpọ na riuku ine fikparobọ ruie rhiẹ paradais. Vwana, wu na sabu djephia taghene wu guọlọ vwobọrhọ owian ọrana.
Izede owu wu ne ruie, ọrẹ wu na dabu ruẹ oghwa ọnọ ọrhẹ ekete we rhirhiẹ fon. Wu na sabu ruẹ ọnana o toro oborẹ ihworho re rhirhiẹ kẹruọ e ruẹ-ẹ. Wu na ji sabu ha userhumu phia ruẹ Aghwẹlẹ Uvie na ọrhẹ Aghwẹlẹ Omẹvwa fon, ji hẹrote aye. Orhianẹ erhirhiẹ ọnọ oserhọ, wu na ji sabu fiobọrhọ ọbe wu na homakpahontọre ha userhumu phia, ọke oghwọghọ ọrhọ homaphia. Omarana, nu we djephia taghene wu mwuegbe wu na ha userhumu phia arha guọliẹ. Nọ oma, ‘Mi na sabu yono ena ezẹko mi na ha ruiruo ọke i Jehova ọrhọ ha uphẹn mẹ ne mi rhirhiẹ paradais bẹmẹdẹ?’
MWUEGBE WU NA HẸROTE ERA RHỌMỌNUHWU
Ogege ra rhọmọ ọmọ ọgbọtọ i Jairus hin, Jesu nọ tare taghene a yẹ ọmọ na emaren nọ re. (Mark 5:42, 43) Orhiẹ oborẹ ọ bẹnren ra na hẹrote ọmọ ọrana rọ ha ẹgbukpe 12 na-a. Ọrẹn, roro kpahen owian rọ havwiẹ ra na wian, na sabu ru ive i Jesu te orugba taghene “ọsoso ihworho ri ha uvuẹn usin okarorhọ ine rhon uvwele yi, aye ni ne vẹnrẹn rhe.” (John 5:28, 29) Dedevwo i Baibol na ọ ghwai ta kpahiẹ-ẹn, ọrẹn ana sabu ha ẹhẹn roro taghene ihworho ra rhọmọnuhwu ina guọlọ emaren, ewun ọrhẹ ekete aye ine rhirhiẹ. Wu na sabu djephia vwana taghene wu mwuegbe wu na ha userhumu phia? Wu na sabu nọ oma enọ enana.
Me wu na sabu ru vwana ro no djephia taghene wu guọlọ ha otọrakpọ na riuku?
Erhe ghwoghwo taghene oniruo okinhariẹ ọnọ kọn bru ukoko wu havwọ, wu mwuegbe wu na ha use riẹn nọ mọ riẹ emaren uvuẹn oghwa ọnọ? Ọke erhe wene owian imizu ri ha Oghọn Ukoko rhiẹ ukoko wu havwọ, yanghene ekete we rhirhiẹ, yanghene erhe wene owian oniruo okinhariẹ, wu na sabu ha userhumu riẹn guọlọ oghwa? Orhianẹ ene ruẹ emẹvwa ẹkwotọre yanghene emẹvwa oghẹnrensan uvuẹn ekete we rhirhiẹ, wu na sabu homakpahontọre wian bọmọke ana ki tuiẹn rhọ yanghene erhe ruie hin, yanghene wu na sabu dede imizu ri na rhiẹ omẹvwa na?
MWUEGBE WU NE YONO ERA RHỌMỌNUHWU
Lele oborẹ ọ ha Acts 24:15, ọwan e fiẹrorhọ taghene ana rhọmọ iduduru ihworho buebun. Ihworho buebun usuẹn era na rhọmọnuhwu na e vwo uphẹn aye ine yono kpahen Jehova bi-i. Omarana, uphẹn na ono rhie firhọ rẹn aye ọke ra rhọmeren aye nuhwu ne.a Idibo ri fuevwan, ri ji tẹn ona ne, ine vwobọrhọ owian re ne yono ihworho enana. (Isa. 11:9) Omizu ọmase owu re se Charlotte, ro ghwoghwori uvuẹn Europe, South America, ọrhẹ Africa, ọ tẹnrovi ọke ọrana. Nọ tare rhẹ omamerhomẹ: “Mia tẹnrovi ọke mi ne yono ihworho uvwre ọke ẹrhọmọnuhwu na. Ọke mi rhe se kpahen ohworho ro nyerẹnren ọke ahwanren, ni mie roro: ‘Orhianẹ ohworho ọnana o rhe i Jehova bi, manẹ akpenyerẹn yen o wene.’ Mia hẹrhẹ ọke mi na ta rẹn era rhọmọnuhwu kpahen ekwakwa irhorhomu aye i vwa ji mẹrẹn.”
Idibo i Jehova ri fuevwan ga ye bọmọke i Jesu ọ ki rhiẹ otọrakpọ na, i ji vwo ekwakwa buebun aye ine yono kpahen. Roro kpahen oborẹ ọnọ merhoma te ọke re ne dje rẹn Daniel kpahen oborẹ aruẹmẹrẹn rọ yare ro vwo vwẹruọ ye, i ru te orugba. (Dan. 12:8) Yanghene roro kpahen ọke re ne yono i Ruth ọrhẹ Naomi kpahen oborẹ aye i ru rhiẹ ekrun ri Messiah na o nurhe. Ono ghini rhiẹ emru aghọghọ re ne vwobọrhọ owian uyono akpọ ephian ọrana, rọ vabọ ọhiẹn ọrhẹ ọyanghan rọ ha akpọ ọkon ọnana!
Wu na sabu djephia vwana taghene wu guọlọ vwobọrhọ ẹkwaphiẹrhotọre ọrana? Izede owu yẹ ọrẹ wu ne ruẹ ona uyono ọnọ rhomurhọ, ne wu ji rhe vwobọrhọ owian aghwoghwo na. (Matt. 24:14) Orhianẹ ọho yanghene erhirhiẹ erọrọ i vwa sabu lẹrhuọ wian buẹ-ẹn, omẹdamu ọnọ o djephia taghene wu vwo omwemẹ wu ne yono era rhọmọnuhwu na.
Omarana, onọ ọghoghanren owu yẹ, Wa ghini tẹnrovi ọke wu na ha otọrakpọ na riuku? Oma ọ merhuọn kpahen ọke re ne ruẹ akpọ na rhiẹ paradais, hẹrote era rhọmọnuhwu, jeghwai yono aye? Wu na sabu djeyi phia vwana nyoma wu ne vwobọrhọ aruẹ ewian ra wian ọke ọnana, ri họhọ era na wian uvuẹn otọrakpọ na ọke rọ sa, ọke ra na ha otọrakpọ na riuku!
a Se urhomu-ẹmro na “Era Lẹrhẹ Ihworho Buebun Rhiẹ Evwata” rọ ha Oghwa Odẹrẹ ọrẹ September 2022.