Faarfannaa
Geggeessaa muuziqaatiif. Faarfannaa Daawit.
64 Yaa Waaqayyo, yommuun kadhannaa dhiheessu sagalee koo dhagaʼi.+
Lubbuu koos haleellaa diinaa isa sodaachisaa taʼe irraa eegi.
2 Mala haxxummaa namoonni hamoon dhoksaatti qopheessan jalaa,+
Namoota hedduu balleessaa raawwatan jalaas na golgi.
3 Isaan akkuma goraadeetti arraba isaanii qaratu;
Dubbii isaanii isa hamaas akka xiyyaatti akeekkatu,
4 Kanas kan godhan, iddoo dhokatan irraa nama balleessaa hin qabnetti futtaasuufi;
Isaan sodaa tokko malee akkuma tasaa isatti futtaasu.
5 Yaada isaanii isa hamaatti cichu;*
Kiyyoowwan isaanii akkamitti dhoksanii akka kaaʼan mariʼatu.
“Eenyutu isaan arga?” jedhu.+
6 Malawwan haaraa balleessaa itti raawwatan barbaaddatu;
Tooftaa haxxummaa isaaniis dhoksaatti qopheessu;+
Yaanni garaa tokkoon tokkoon isaanii keessa jirus gad fagoo dha.
7 Waaqayyo garuu isaanitti futtaasa;+
Xiyyis akkuma tasaa isaan madeessa.
8 Arrabumti isaanii akka kufan isaan godha;+
Warri kana argan hundis mataa isaanii raasu.
9 Sana booda namoonni hundi ni sodaatu,
Wanta waaqayyo godhe ni labsu,
Gochawwan isaa irrattis hubannaa ni qabaatu.+