Murteessuu kan Dandeessu Akkamitti?
“Hawaan wanta hin jirre irraa of uumuu ni dandaʼa.”—Isteefan Haawukiingii fi Liyoonardi Maloodinaaw, hayyoota fiiziksii.
“Waaqayyo samii fi lafa uume.”—Kitaaba Qulqulluu, Uumama 1:1.
Hawaa fi jireenya isa keessa jiru Waaqayyotu uume moo akkuma carraa kan argamani dha? Yaanni hayyoonni fiiziksii lamaan dubbatanii fi yaanni Kitaaba Qulqulluu olitti ibsame, gaaffii kanaaf deebii guutummaatti garaa gara taʼe kennu. Namoonni yaadawwan lamaanuu cimsanii deggaran jiru. Taʼus, namoonni hedduun waaʼee kanaa mirkanaaʼoo miti. Namoonni kitaabota beekamoo taʼanitti fayyadamanii, akkasumas sagantaawwan televizyinii irratti dhihaatanii dhimma kana irratti wal falmu.
Barsiisonni kee hawaanii fi jireenyi isa keessa jiru kan argame akkuma tasaa akka taʼee fi Uumaan akka hin jirre shakkii tokko malee dubbatu taʼa. Garuu barsiisonni kee ragaa Uumaan akka hin jirre argisiisu siif dhiheessaniiruu? Karaa kan biraatiin immoo, geggeessitoonni amantaa Uumaan akka jiru yeroo lallaban dhageesseetta taʼa; garuu isaan hoo ragaa amansiisaa siif dhiheessaniiruu? Moo akkasumatti akka amantu sitti himan?
Tarii atis waaʼee kanaa yaaddee Uumaan jiraachuuf dhiisuu isaa eenyu illee mirkanaaʼaa taʼuu akka hin dandeenye sitti dhagaʼamee taʼuu dandaʼa. Tarii immoo, ‘Deebii kanaa beekuun barbaachisaa dhaa?’ jettee yaadda taʼa.
Barruun Dammaqaa! kun jalqaba irratti, ragaawwan namoonni baayʼeen Uumaan jiraachuu isaa akka amanan isaan taasisan tokko tokko dhiheessa. Itti aansuudhaan immoo, jireenyi lafa irratti argamu akkamitti akka jalqabe beekuun barbaachisaa kan taʼe maaliif akka taʼe ibsa.