Georgette Douwma/Stone via Getty Images
LAFTI BADIISARRAA NI OOLTII?
GARBA
GARBI wantoota nyaataaf taʼan qofa utuu hin taʼin wantoota qoricha hojjechuuf oolan hedduus qaba. Garbi oksijiinii lafarra jiru walakkaadhaa ol taʼu maddisiisa, kaarboonii miidhaa geessisummoo ofitti fudhata. Haala qilleensaa lafaas ni toʼata.
Garbi Balaadhaaf Saaxilameera
Jijjiiramni qilleensaa cirracha galaanaas taʼe uumamawwan garba keessa jiran balaadhaaf saaxiluu dandaʼa. Saayintistoonni cirrachi uumama galaana keessa jiru hunda keessaa yoo xinnaate kurmaana tokko jiraachisu waggaa 30 keessatti baduu akka dandaʼu tilmaamaniiru.
Hayyoonni simbirroota galaana keessaa sooratan keessaa dhibbeentaa 90 kan taʼan pilaastikii nyaatanii taʼuu akka dandaʼu tilmaamaniiru; pilaastikiin garba keessatti argamu waggaa waggaadhaan bineeldota miliyoonaan lakkaaʼaman akka galaafatu yaadama.
Barreessaa Olaanaa Dhaabbata Mootummoota Gamtoomanii kan taʼan Antooniyoo Guuterez bara 2022tti akkana jedhaniiru: “Garbaaf kunuunsa barbaachisu gochaa hin jirru; kanaan kan kaʼes yeroo ammaatti balaadhaaf saaxilamee jira.”
Lafti Rakkina Dandamachuu Akka Dandeessu Godhamtee Uumamte
Garbii fi lubbu qabeeyyiin garba keessa jiran faalamni namoonni geessisan hamma baayʼee hin hammaannetti of qulqulleessuu akka dandaʼan godhamanii uumaman. Kitaabni Regeneration: Ending the Climate Crisis in One Generation jedhamu akka ibsetti namoonni faaluu yoo dhiisan “garbi of qulqulleessuusaa itti fufuu ni dandaʼa.” Fakkeenyota muraasa ilaali:
Orgaanizimoonni xixinnoon faayitoopilaankitan jedhaman kaarboon daayoksaayidii isa hoʼi addunyaa akka dabalu godhu ni sooratu, akkasumas ni kuufatu. Orgaanizimoonni kun qofti kaarboon daayoksaayidii mukkeen, margii fi biqiltoonni lafarratti biqilan kaan hundi walitti idaʼamanii kuufatan wajjin wal qixa taʼu kuufachuu dandaʼu.
Maayikiroobonni gogaa fi lafee qurxummiilee duʼanii sooratu; wantoonni kun garba faaluu dandaʼu. Achiis maayikiroobonni kun uumamawwan galaanaa kan birootiif nyaata taʼu. Weebsaayitiin Smithsonian Institution Ocean Portal jedhamu akka jedhetti qindoominni kun “garbi qulqulluu taʼee akka itti fufu godha.”
Uumamawwan garba keessa jiran hedduun sirna bullaaʼinsa nyaataa isaaniitti fayyadamanii asiidiin bishaan keessa jiruu fi uumamawwan elellaa qabanii fi uumamawwan kan biroo miidhu akka hirʼatu godhu.
Namoonni Rakkoo Kana Furuuf Maal Gochaa Jiru?
Miʼoota irra deddeebiʼanii faayidaarra ooluu dandaʼanitti yoo fayyadamne baayʼina pilaastikii garba keessatti gatamuu hirʼisuu dandeenya
Balfi gara garbaatti hin seenu taanaan qulqulleeffamuun isa hin barbaachisu. Hayyoonni miʼoota pilaastikii yeruma sana gatamanitti fayyadamuu mannaa, wantoota irra deddeebiʼanii faayidaarra ooluu dandaʼanitti akka fayyadamnu kan jajjabeessan kanaafi.
Kun qofti garuu gaʼaa miti. Dhiheenya kana dhaabbanni eegumsa naannoo tokko waggaa tokko keessatti balfa biyyoota 112 keessatti qarqara galaanaatti gatame toonii 9,200 ol walitti qabeera. Taʼus kun balfa waggaa waggaadhaan garbatti gatamu keessaa gara tokko kuma tokkoffaa qofadha.
National Geographic akka gabaasetti “asiidiin hanga ammaatti [garba keessatti] kuufamaa ture qulqulleeffamuu kan hin dandeenye taʼuu dandaʼa.” Aarri maddeen anniisaa keessaa baʼu uumamawwan galaana keessaa garba qulqulleessuu akka hin dandeenye gufuu isaanitti taʼeera.
Kitaabni Qulqulluun Abdii Akkamii Kenna?
“Lafti wanta ati tolchiteen guutamteetti. Galaannis guddaa fi balʼaa dha, uumamawwan guguddaa fi xixinnaan lakkaaʼamuu hin dandeenyes isa keessa guutaniiru.”—Faarfannaa 104:24, 25.
Uumaan keenya garba yeroo uumetti dandeettii of qulqulleessuu akka qabaatu godhee uume. Galaanas taʼe uumamawwan galaanaa hunda kan uume isa waan taʼeef, miidhaa garbarra gaʼe hunda sirreessuu ni dandaʼa jedhanii amanuun sirriidha. Mata duree “Waaqayyo Lafti Badiisarraa Akka Ooltu Waadaa Galeera” jedhuu fi fuula 15rra jiru ilaali.