Xalayaa Qaama Olaanaarraa Ergame

Yihowaa Kan Jaallattuufi Kitaaba Kana Kan Dubbistu:

Yesus, “Dhugicha in hubattu; dhugichis birmaduu isin in baasa” jedheera. (Yohannis 8:32) Jechoota baay’ee nama jajjabeessan mitii? ‘Guyyoota gara dhumaafi’ yeroo sodaachisaa sobni itti babal’ate keessa jiraannus, dhugaa beekuun ni danda’ama. (2 Ximotewos 3:1) Guyyaa jalqabaa dhugaa Dubbii Waaqayyoo keessa jiru itti dhageesse ni yaadattaa? Yeroo baay’ee itti gammadde akka ta’e homaa hin shakkisiisu!

Ta’us, akkuma beekumsa dhugaa argachuufi dhugaa kana warra kaaniif hiruun barbaachisaa ta’e, amalli keenyas dhugaa kanaa wajjin kan walsimu ta’uunsaa barbaachisaadha. Akkas gochuuf jaalala Waaqayyoo keessatti of eeguu qabna. Kun maalfaa dabalata? Jechoonni Yesus galgala du’asaa dura dubbate, gaaffii kanaaf deebii kennu. Ergamootasaa amanamoodhaan, “Akkuma ani abboommii abbaa kootii hundumaa eegee, jaalala isaattis qabamee jiraadhu, isinis abboommii koo hundumaa yoo eegdan jaalala kootti qabamtanii in jiraattu” jedheera.—Yohannis 15:10.

Yesus jaalala Waaqayyootti qabamee kan jiraate, abboommii Abbaasaa eeguudhaan ta’uusaa qalbeeffadhu. Nutis akkasuma gochuu qabna. Jaalala Waaqayyo keessatti of eeguuf, guyyaa guyyaan dhugaa barannee wajjin haala walsimuun jiraachuu qabna. Yesus galgaluma sana, “Kana erga beektanii, akkuma kanaatti yoo hojjettan kan ayyaanomtanii dha” jedheera.—Yohannis 13:17.

Kitaabni kun dhugaa baratte kana hojiirra oolchuukee itti fufuudhaan ‘jaalala Waaqayyoo isa jireenya barabaraatti si geessu keessatti of eeguuf’ akka si gargaaru hawwii keenyadha!—Yihudaa 21.