DEEBII GAAGGII MACAAFA QULQULLUU
Kaayyoon Kiristos itti deebiʼu maalidha?
Yesus Kiristos Dh.K.B. bara 33tti gara samiitti ol baʼuusaa dura akka deebiʼu waadaa galee ture. Abbaa qoroo mootii taʼee bulchuuf aangoo qabatee deebiʼuuf yeroo dheeraadhaaf iddoo kan biraa deemetti of fakkeessee ture. Kanaaf, Yesus kan deebiʼu ilmaan namootaa bulchiinsa gaarii taʼe akka argatan gochuufidha.—Luqaas 19:11, 12 dubbisi.
Yesus ilmaan namootaatiif bulchiinsa gaarii taʼe ni fida
Kiristos qaama akkamiitiin deebiʼa? Duʼaa kan kaʼe, qaama hafuuraa ijaan hin mulʼanne taʼeeti. (1 Phexros 3:18) Achiis gara samii deemee mirga Waaqayyoo taaʼe. (Faarfannaa 110:1) Waggoota hedduu booda, Yesus, Yihowaa, “isa bara baayʼee dheeraa jiraate” duratti kan dhiheeffame siʼa taʼu, ilmaan namootaa akka bulchuufis aangoon isaaf kenname. Kanaaf, Yesus kan deebiʼu Mootii ijaan hin mulʼanne taʼeeti.—Daani’el 7:13, 14 dubbisi.
Yesus yommuu deebiʼee dhufu maal godha?
Yesus ergamoota Waaqayyoo wajjin qaama hafuuraatiin ennaa deebiʼee dhufu ilmaan namootaatiif firdii kenna. Hamoota kan balleessu siʼa taʼu, namoota Mootii taʼuusaa amananii fudhataniifimmoo jireenya barabaraa kenna.—Maatewos 25:31-33, 46 dubbisi.
Yesus Mootii taʼuudhaan yommuu bulchu lafti gara jannataatti deebiti. Namoota duʼanis duʼaa kaasuudhaan lafa Jannata taatu sanarra akka jiraatan godha.—Luqaas 23:42, 43 dubbisi.