Kitaabni Qulqulluun Badiisa Irraa kan Oole Maaliifi?

Kitaabni Qulqulluun badiisa irraa ooleera. Kanaan kaʼes yeroo harʼaatti kitaaba kana qabaachuu fi dubbisuu ni dandeessa. Hiikkaa Kitaaba Qulqulluu gaarii yoo filatte, kitaaba barreeffama isa jalqabaa irraa of eggannoodhaan garagalchame dubbisaa akka jirtu mirkanaaʼaa taʼuu dandeessa.a Haa taʼu malee Kitaabni Qulqulluun tortoruu irraa, mormii cimaa irraa, akkasumas yaalii taʼe jedhamee ergaa isaa geddaruuf godhame irraa haala nama dinqisiisuun kan oole maaliifi? Kitaaba kana baayʼee adda kan taasisu maali dha?

Barattoonni Kitaaba Qulqulluu hedduun akkuma Phaawulos ergamaa xumura, “Kitaabni Qulqulluun hundi geggeessaa hafuura Waaqayyootiin . . . barreeffame” jedhu irra gaʼaniiru. (2 Ximotewos 3:16) Kitaabni Qulqulluun badiisa irraa kan oole Dubbii Waaqayyoo adda taʼe waan taʼee fi Waaqayyo hanga harʼaatti akka turu waan godheef akka taʼe ni amanu. Faayizal inni mata duree isa jalqabaa irratti caqasame, yeroo booda wantoota dhagaʼe mirkaneeffachuuf ofii isaatii Kitaaba Qulqulluu qoʼachuuf murteesse. Wanti inni hubate isa dinqisiiseera. Utuu baayʼee hin turin barumsi Saba Kiristiyaanaa hedduun Kitaaba Qulqulluu keessa akka hin jirre hubate. Kana malees, kaayyoo Waaqayyo lafaaf qabu ilaalchisee wanti Kitaaba Qulqulluu keessatti ibsame isa tuqeera.

Akkana jedheera: “Amma Kitaabni Qulqulluun ani qabu kennaa Waaqayyo biraa dhufe taʼuu isaa mirkanaaʼaa taʼeera. Waaqayyo inni uumama cufa uume, kitaaba nuu kennuu fi eegee nuu tursuuf humna hin qabuu? Akkas gochuu hin dandaʼu jedhanii yaaduun humna Waaqayyoo tuffachuu dha. Humna Isa Waan Hundumaa Dandaʼuu kanan tuffadhu ani eenyu?”—Isaayaas 40:8.