Qoʼannaa Kitaaba Qulqulluu Kee Caalaatti Buʼa Qabeessaa fi Gammachiisaa Gochuu kan Dandeessu Akkamitti?

Iyaasuun Seericha yommuu dubbisaa jira; dallaawwan Yerikoo yommuu jijjigan manni Rahaab garuu akkuma dhaabatetti jira; Iyaasuun harka isaa gara samiitti ol kaasee yommuu kadhatu

IYAASUUN haala rakkisaa tokko moʼuun isa barbaachisa. Rakkoowwan guguddaa moʼuudhaan saba Israaʼel Biyyattii Abdachiifamtetti geessuu qaba. Yihowaan milkaaʼina akka argatu isaaf mirkaneessuudhaan akkana jedhee isa jajjabeesse: ‘Cimi, ija jabaadhus! Seera koo eegi! Macaafni seerichaa kun afaan kee keessaa hin dhabamin! Halkanii fi guyyaas waaʼee isaa yaadi! Karaan kee akka siif qajeelutti, wanti ati gootus akka wal siif qixxaatutti, wanta isa keessatti caafame hundumaa gaarii godhii eegi!’—Iya. 1:7, 8.

Nuunis ‘guyyoota dhumaa yeroo addaa baayʼee rakkisaa taʼe’ kana keessatti rakkoowwan guguddaan nu mudatu. (2 Xim. 3:1) Akkuma Iyaasuu milkaaʼina argachuu yoo barbaanne, gorsa Yihowaan Iyaasuudhaaf kenne hordofuu qabna. Yeroo hunda Kitaaba Qulqulluu dubbisuu fi yeroo qorumsi nu mudatutti qajeelfama achi keessa jiru of eeggannoodhaan hojii irra oolchuu dandeenya.

Haa taʼu malee, dhugaa isaa dubbachuuf baayʼeen keenya barattoota gaarii akka hin taanee fi qoʼannaa gochuun salphaa akka nuuf hin taane nutti dhagaʼama taʼa. Taʼus, Kitaaba Qulqulluu qoʼachuun baayʼee barbaachisaa dha; qoʼannaa keenya caalaatti buʼa qabeessaa fi gammachiisaa gochuuf, yaadawwan gaggaarii tokko tokko saanduqa, “Yaadawwan Armaan Gadii Hojii Irra Oolchuuf Yaali” jedhu irraa dubbisuu dandeenya.

Faarfatichi, “Daandii ati abboomte irra akkan adeemu godhi, innoo anatti in tola” jechuudhaan faarfateera. (Far. 119:35) Atis Dubbii Waaqayyoo qoʼachuudhaan gammachuu guddaa argachuu dandeessa. Kitaaba Qulqulluu qoʼachuu kee yommuu itti fuftu yaadawwan baayʼee gaggaarii taʼan hedduu argachuu dandeessa.

Akka Iyaasuu saba geggeessitu tokko qabaachuu baattus, qorumsawwan mataa keetii qabda. Kanaaf, akkuma Iyaasuu wanta faayidaa keetiif barreeffame dubbisi, akkasumas hojii irra oolchi. Akkas kan gootu yoo taʼe, karaan kee siif qajeela, wanti ati gootus wal siif qixxaata.

YAADAWWAN ARMAAN GADII HOJII IRRA OOLCHUUF YAALI

Qoʼannaa jalqabuu kee dura kadhadhu. Kitaabni Qulqulluun yaada Waaqni inni hundumaa dandaʼuu faayidaa keetiif akka barreeffamu godhe kan qabate dha. Kanaaf, Kitaaba Qulqulluu yommuu dubbistu, hubachuuf, yaadachuu fi jireenya kee keessatti hojii irra oolchuuf akka si gargaaru isa gaafachuuf carraaqqii godhi.—Iz. 7:10.
Kitaaba Qulqulluu ykn barreeffama Kitaaba Qulqulluu irratti hundaaʼe yommuu dubbistu gaaffiiwwan armaan gadii of gaafadhu: ‘Kutaan kun waaʼee Yihowaa maal na barsiisa? Ergaa Kitaaba Qulqulluu wajjin kan wal qabatu akkamitti? Warra kaan gargaaruuf itti fayyadamuu kanan dandaʼu akkamitti?’
Wanta qoʼatte irratti xiinxali. Takka dhaabadhuutii wanta dubbiste irratti yaadi: ‘Wantin dubbise kun maaltu akka natti dhagaʼamu godha? Akkas akka natti dhagaʼamu kan godhe maaliifi? Kun wanta kanan dura na mudate, amma na mudachaa jiruu fi gara fuulduraatti na mudatuu wajjin kan walqabatu akkamitti? Qajeelfamawwan Kitaaba Qulqulluu kanaa fi gorsa kana jireenya koo keessatti hojii irra oolchuu kanan dandaʼu akkamitti?’ (Iyo. 23:5; Far. 49:3) Yommuu xiinxaltu, ‘Yihowaan sabni isaa gochawwan tokko tokko irraa akka fagaatan kan isaanitti himu maaliif akka taʼe ibsuu nan dandaʼaa?’ jedhii of gaafadhu. Yookiin immoo namni ati seenaa isaa dubbiste sun wanta faallaa taʼe utuu godheera taʼee wanta isa irra gaʼuu dandaʼu yaadi.—Kes. 32:28, 29.
Seenaawwan tokko tokko yommuu dubbistu dandeettii yaadaan ilaaluu keetti fayyadami. Fakkeenyaaf, obbolaan Yoseef warra Ishmaaʼelitti yommuu isa gurguran sitti mulʼataa? (Uma. 37:18-28) Wanti argitu, dhageessuu fi fuunfattu maali dha? Bakka namoota sanaa of kaaʼi. Wanti isaan yaadanii fi wanti isaanitti dhagaʼamu maali dha? Yaadawwan akkasii irratti xiinxaluun kee, qoʼannaan kee caalaatti ifaa fi buʼa qabeessa akka taʼu godhu.
Barreeffamoota qoʼannaa, qorannaa kee gabbisuuf qophaaʼanitti fayyadami. Barreeffamoota qooqa keetiin intarneetii irra jiranis taʼe maxxanfamanii jiranii wajjin akka gaariitti wal bari. Karaa buʼa qabeessa taʼeen akkamitti itti fayyadamuu akka dandeessu barachuuf gargaarsa warra kaanii gaafachuu irraa duubatti hin jedhin. Fakkeenyaaf, Indeeksiin Barreeffamoota Waldaa Masaraa Eegumsaa (Ingiliffa) ykn Kitaabni Barreeffama Qorannaa Dhugaa Baatota Yihowaa Gargaaruuf Qophaaʼe, mata duree adda addaa fi ibsa caqasawwan Kitaaba Qulqulluu irratti kennaman hedduu beekuuf si gargaaru. Teessuma lafaa, duraa duuba yeroo, safartuuwwanii fi kkf ilaalchisee odeeffannoo barbaachisaa argachuuf, buukleetii Barreeffama Dubbii Waaqayyoo Qayyabachuuf Gargaaru jedhamutti fayyadami.
Wanta qoʼatte yaadachuuf akka si gargaaruuf yaadawwan ijoo taʼan gabaabsii ibsi. Wanta argatte sana warra kaanitti himuunis wanta dubbiste yaadachuuf si gargaara. Wanta tajaajila kee irratti itti fayyadamtu hoo argatteettaa? Wantoota armaan olitti caqasaman gochuun kee, qabxiiwwan ijoo taʼan yaadachuuf qofa utuu hin taʼin, wanta qoʼatte warra kaan ittiin gargaaruufis akka itti fayyadamtu si gargaara.