Kitaaba Yihowaatti Dhihaadhaa Jedhamu Qayyabachuudhaan Faayidaa Argadhaa
1 Walga’ii Konyaa “Labsitoota Dubbii Mootummichaa Hinaaffaadhaan Labsan” jedhamurratti, kitaaba Yihowaatti Dhihaadhaa jedhamu argachuu keenyaan baay’ee gammadnee turre. Namoonni hedduun kitaaba kana akkuma ba’een dubbisaniiru. Kaanimmoo, caqasa waggaa 2003: “Waaqayyotti dhi’aadhaa, innis isinitti in dhi’aata” jedhuun kakaafamanii dubbisuunsaanii beekamaadha.—Yaq. 4:8.
2 Ji’a Hagayyaatii kaasee kitaaba Yihowaatti Dhihaadhaa jedhamu kana Qayyabannaa Kitaabaarratti fudhachuu jalqabna. Qayyabannaa kanarraa caalaatti faayidaa argachuu kan dandeenyu akkamitti? Qophii gochuun baay’ee barbaachisaadha. Boqonnaan tokko torban lama keessatti waan qayyabatamuuf, torban torbanitti kan qayyabataman keeyyatawwan muraasadha. Kunimmoo, qayyabannaarratti yaada garaadhaa madde kennuuf akkasumas barumsicharratti xiinxaluuf yeroo ga’aan akka argamu godha. Kana malees, kutaa kitaabichaa keessaa bifa adda ta’erratti mari’achuuf yeroo ga’aan akka argamuuf kutaan boqonnichaa inni dhumaa keeyyatawwan xiqqoo qofaa kan qabu ta’a.
3 Boqonnaa 2 kaasee, saanduqa mata duree “Gaaffiiwwan Xiinxaluuf Gargaaran” jedhu gara dhuma boqonnaa hundaarratti argama. Keeyyata isa dhumaarratti erga mari’attanii booda, ilaaltuun olaanaa qayyabannaa kitaabaa saanduqicharatti tuuta sanaa wajjin mari’ata. Miseensoonni hundumtuu maree kanarratti akka hirmaataniif isaan jajjabeessa; Caqasawwanirratti xiinxaluusaaniitiin qabxiiwwan gaarii argatan akka dubbatan gaafata. (Fak. 20:5) Gaaffiiwwan saanduqicha keessatti dhihaatan malees, gaaffiiwwan kanaa gadii gaafachuu danda’a ta’a: “Odeeffannoon kun waa’ee Yihowaa maal isinitti himaa? Jireenya keessanirratti dhibbaa maalii geessisa? Warra kaan gargaaruuf akkamitti isin fayyada?” Kaayyoonsaa yaadawwan garaadhaa maddan akka kennaniif malee, wantoota xixiqqoo gaafachuudhaan tuuticha qoruu barbaadee miti.
4 Kitaabni Yihowaatti Dhihaadhaa jedhamu barreeffamoota kaanirraa adda kan ta’edha. Barreeffamoonni ‘hojjetaa amanamaafi ogeessaan’ qophaa’an hundinuu Yihowaadhaaf ulfina kan fidan yoo ta’aniyyuu, kitaabni kun garuu guutummaatti waa’ee amalawwan Yihowaa kan qoratudha. (Mat. 24:45-47) Fuldura keenyatti carraa gammachiisaa akkamiitu nu eegaa! Waa’ee amalawwan Yihowaa gadi fageenyaan qayyabachuudhaan bu’aa arganna. Qayyabannaan kun, Abbaa keenya isa samiitti kan nu dhiheessu haa ta’u; warri kaanis akkuma kana akka godhan gargaaruudhaan bu’a qabeeyyii haa taanu.